Cia Li Hloov Siab Los Ntseeg
Los ntawm Bonnie L. Oscarson
Koom Haum Ntxhais Hluas Tuam Thawj Tswj Hwm
Muaj txoj kev hloov siab los ntseeg thaum yus rau siab ua raws li tej lus qhuab qhia uas yus paub tias muaj tseeb thiab khaws tej lus txib tseg, ib hnub dhau ib hnub, ib hlis dhau ib hlis.
Cov nus thiab cov viv ncaus, ua rau kuv siab mos siab muag thaum kuv sawv ntawm no uas yog tib qhov chaw uas cov neeg uas kuv saib rau nqi heev tau sawv lawm thiab. Kuv xav hais rau nej paub txog tej yam uas nyob rau hauv kuv lub siab thiab xav kom cov tub hluas ntxhais hluas mloog zoo zoo.
Ib tug phab ej uas nyob rau hauv Phau Qub yog tus yaj saub thiab tub rog Yausuas. Nws tau caw cov neeg Yixalayees, uas nws tau coj: “Hnub no nej cia li txiav txim siab saib nej yuav pe hawm tus twg; … tiam sis kuv thiab kuv tsev neeg, peb yuav pe hawm tus Tswv tib leeg xwb.”1 Yausuas cov lus no qhia tias nws tau hloov siab los ntseeg txoj moo zoo tiag tiag lawm. Rau Yausuas thiab peb sawv daws, txoj kev hloov siab los ntseeg tej ntsiab cai muaj thaum peb ua peb tej neej ncaj ncees raws li txoj moo zoo thiab ua raws li peb tej kev khi lus nrog tus Tswv.
Kuv xav piav ib zaj dab neeg txog ib tug neeg uas muaj nqi heev rau kuv, uas hais txog txoj kev hloov siab los ntseeg ntawm kuv tsev neeg zaj keeb kwm. Nws lub npe hu ua Agnes Hoggan, thiab nws thiab nws tus txiv los ua me zeej rau hauv lub Koom Txoos hauv teb chaws Scotland thaum xyoo 1861. Vim lawv raug kev tsim txom hauv lawv teb chaws, nkawd thiab nkawd cov me nyuam khiav tuaj rau teb chaws Amelikas. Ob peb xyoos tom qab ntawd, Agnes tau ua ib tug poj ntsuam uas muaj yim tus me nyuam thiab tau sib zog uua hauj lwm es lawv thiaj li yuav tau zaub mov noj thiab ris tsho hnav. Nws tus ntxhais, Isabelle, uas muaj 12 xyoos nrhiav tau ib txoj hauj lwm ua tub qhev rau ib tse neeg uas nplua nuj heev tiam sis tsis yog neeg ntseeg.
Isabelle nrog lawv nyob hauv lawv lub tsev uas loj heev thiab pab saib lawv cov me nyuam me. Lawv them ib qho nyiaj me me rau nws niam txhua lub lim piam rau nws txoj hauj lwm uas nws ua no. Tsis ntev ces lawv hlub Isabelle ib yam li nws yog lawv tsev neeg thiab lawv them rau nws mus kawm ua las voos, yuav ris tsho uas zoo nkauj, thiab kawm ua yeeb yam. Nws yeej ua txoj hauj lwm no tau plaub xyoos los txog rau thaum tsev neeg no khiav mus nyob lwm lub xeev. Lawv tau hlub Isabelle heev tsis heev, lawv tau thov niam, Agnes, seb puas kam lawv yuav nws ua lawv me nyuam thiab. Tsev neeg no, hais tias lawv mam li ntiav kev kawm ntawv rau Isabelle, saib kom nws yuav ib tug txiv uas muaj nyiaj, thiab faib lawv ntiag tug rau nws ib yam li lawv cov me nyuam thiab. Thiab lawv mam li rau siab them nyiaj rau Agnes tom ntej mus thiab.
Tus poj ntsuam uas txom nyem no yuav tau ua ib qho txiav txim uas nyuaj heev, tiam sis nws yeej tsis tas xav ntev. Mloog Agnes tus ntxhais xeeb ntxwv cov lus uas tau muaj sau tseg piav hais tias: “Nws hlub Isabelle dhau heev lawm nws cia tsis tau lawv coj Isabelle mus—tsis tas li ntawd xwb nws tsev neeg tuaj deb tuaj, puag tim teb chaws Scotland tuaj caum txoj moo zoo thiab tseem raug kev txom nyem thiab kev sim siab ces nws yeej yuav tsis cia nws ib tug me nyuam plam tau txoj moo zoo uas nws tau coj lawv tuaj deb deb tuaj raws kom thiaj tau.”2 Yim neeg uas nplua nuj no yeej tsis tseev li thiab Isabelle tau quaj thiab thov kom nws niam cia nws mus, tiam sis Agnes yeej tsis kam li. Tej zaum nej yeej paub tias Isabelle tus uas muaj 16 xyoo xav tias nws lub neej puas tsuaj tas lawm.
Isabelle Hoggan yog kuv tus niam tais laus, thiab kuv zoo siab heev rau nws niam zaj lus tim khawv thiab txoj kev ntseeg uas muaj loj heev hauv nws siab es nws thiaj li tsis muaj Isabelle txoj kev ntseeg pauv tej nyiaj kub nyiaj txiag hauv ntiaj teb no. Niaj hnub nim no, ntau puas leej uas yog nws cov xeeb leej xeeb ntxwv uas yog mej zeej muaj kev ntseeg vim Agnes txoj kev hloov siab los ntseeg txoj moo zoo loj thiab tob heev.
Kuv cov phooj ywg uas tseem hluas, peb nyob rau hauv ib lub sij hawm uas muaj kev kub ntxhov heev, thiab tej kev xaiv uas nej yuav tsum txiav txim rau txhua hnub, los sis txhua xuab moos los kuj muaj, yeej muaj kev txhaum lav ris tas mus ib txhis. Nej tej kev txiav txim hauv nej lub neej txhua hnub yeej yuav pab txiav txim seb yuav muaj li cas yav tom ntej rau nej. Yog hais tias nej tsis tau muaj ib zaj lus tim khawv thiab kev ntseeg uas loj thiab tob hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub nceeg vaj uas nyob rau hauv lub ntiaj teb no, ces lub sij hawm no yog ib lub sij hawm zoo uas yuav tsum ua li nej ua tau kom thiaj li tau qhov kev ntseeg ntawd. Yog hais tias nej tsis maj siab kom tau txoj kev ntseeg ntawd ces yeej yuav muaj kev cov nyom rau nej sab ntsuj plig.
Txoj kev hloov siab los ntseeg tiag tiag tsis yog paub txog tej ntsiab lus ntawm txoj moo zoo xwb, yuav tsum muaj kev ntseeg tob tshaj zaj lus tim khawv txog tej ntsiab lus ntawd. Muaj puas tau zaj lus tim khawv txog txoj moo zoo yog tias yus tsis ua yus lub neej raws li ntawd. Txoj kev hloov siab los ntseeg tiag tiag txhais tau tias peb yeej ua raws li peb ntseeg thiab muaj “kev pauv ntawm peb tus kheej los sis hauv peb siab.”3 Hauv phau ntawv True to the Faith, peb kawm tau tias txoj kev hloov siab los ntseeg yog ib qho uas peb niaj hnub ua tsis yog lam ua ib qho xwb. Yus muaj txoj kev hloov siab los ntseeg tiag tiag thaum … yus rau siab ua ncaj ncees raws tus Cawm Seej.”4 Yeej yuav siv sij hawm, dag zog, thiab yuav tsum rau siab ntso. Kuv niam tais laus muaj kev ntseeg txoj moo zoo loj heev thiab pom tias txoj moo zoo tseem ceeb rau nws cov me nyuam tshaj tej kub tej nyiaj thiab txhua yam uas lub ntiaj teb pom tias zoo, vim nws twb nyiaj dhau, ua ntau txoj kev dawb ceev, thiab ua nws lub neej raws li txoj moo zoo lawm. Nws muaj txoj kev hloov siab los ntseeg vim nws ua nws lub neej raws li tej ntsiab cai ntawm txoj moo zoo thiab nws tau txi ntau yam rau lawv.
Peb yuav tsum ua ib yam li no yog tias peb xav kom peb txoj kev ntseeg nyob ruaj khov. Tus Cawm Seej qhia tias, “Yog leej twg txaus siab ua raws li Vajtswv lub siab nyiam, tus ntawd yuav paub hais tias tej lus uas kuv qhia no yog Vajtswv kom kuv hais los sis yog kuv hais kuv xwb.”5 Tej thaum peb sim ua tiam sis ua tau rov qab lawm. Piv xam hais tias: Kuv yeej zoo siab hlo them ib feem kaum, tiam sis kuv yuav tsum paub hais tias yeej muaj tseeb ua ntej tso. Tej zaum twb tau thov kom peb tau ib zaj lus tim khawv txog kev them ib feem kaum ua ntej pib them ib feem kaum kiag. Nws yeej tsis ua hauj lwm li ntawd hlo li. Tus Tswv cia siab tias peb yuav muaj kev ntseeg. Peb yuav tsum rau rau siab thiab ua siab ncaj ncees them ib feem kaum yog peb xav tau ib zaj lus tim khawv txog txoj kev them ib feem kaum. Yuav tsum ua ib yam nkaus li no rau tej ntsiab lus ntawm txoj moo zoo, txawm tias yog txoj kev cai coj dawb huv, txoj ntsiab cai hnav ris tsho npog lub cev nqaij daim tawv, Lo Lus Txawj Ntse, los sis txoj kev cai yoo mov.
Kuv xav piav qhia txog ib qho tim khawv uas yog yus ua yus lub neej raws li tej ntsiab cai ces thiaj li yuav pab peb hloov siab los ntseeg txoj ntsiab cai ntawd. Kuv yog ib tug ntxhais hluas hauv xyoo 1960 tej thiab kuv yog tib tug ntxhais uas yog mej zeej hauv kuv lub tsev kawm ntawv high school. Nws yog ib lub sij hawm uas tsis tas coj kev cai zoo, siv txhua yam yeeb, thiab sawv daws xav hais tias “nyias ua nyias“ dab tsi los tau. Kuv cov phooj ywg yeej yog neeg zoo thiab tiam sis lawv yeej xav coj txoj kev cai tshiab uas tsis tas coj kev cai zoo, uas yog txoj kev cai qub uas tsis zoo xwb. Kuv niam kuv txiv thiab kuv cov nais khu tau qhia kuv kom kuv saib kuv lub cev kom rau nqi, qhib kuv lub siab, thiab qho tseem ceeb tshaj plaws yog kawm kom cia siab rau tus Tswv tej lus qhuab qhia. Kuv txiav txim tsis mus rau tej qhov chaw kuv paub tias muaj cawv, luam yeeb, thiab txhua yam yeeb. Qhov no ua rau kuv mus koom tsis tau tej kev ua si, thiab yeej tsis tham hluas nraug li thiab. Cov hluas pib siv yeeb ntau zuj zus thiab thaum ntawd tsis paub zoo tias cov yeeb ua rau yus lub cev zoo li cas. Kuv ntau tus phooj ywg pib quav yeeb, puas hlwb, los sis puas hauv nrog rau lawv cev uas kho tsis tau. Kuv zoo siab heev uas kuv paub tias yuav tsum ua raws li Lo Lus Txawj Ntse hauv kuv lub tsev, thiab to taub zaj lub tim khawv txog cov ntsiab lus ntawm txoj moo zoo vim kuv muaj kev ntseeg thiab ua kuv lub neej raws li txoj moo zoo. Kuv pib kaj siab vim hnov tus Vaj Ntsuj Plig Dawb Huv ua tim khawv rau kuv tias tej ntsiab lus ntawm txoj moo zoo yeej muaj tseeb tiag. Thaum ntawd yog thaum uas kuv muaj txoj kev hloov siab los ntseeg tiag tiag.
Tus yaj saub Maulaunais, hauv Phau Ntawv Maumoos, qhia hais tias “Kuv yuav ua rau ntiaj teb paub tias txoj kev ntseeg yog tej yam uas cia siab rau thiab tsis pom; yog li ntawd tsis txhob cam vim nej tsis pom, vim nej yuav tsis pom ib qho tim khawv mus txog thaum nej txoj kev ntseeg twb raug muab sim lawm tso.”6 Hauv peb lub ntiaj teb uas sawv daws xav tau kev zoo siab tas sim ntawd, peb ua txhaum me ntsis vim peb xav tau nqi zog txawm peb tsis ua hauj lwm dab tsi. Kuv ntseeg tias Maulaunais tab tom qhia peb tias peb yuav tsum xub ua hauj lwm thiab muaj kev ntseeg thaum peb ua neej raws li txoj moo zoo, ces peb mam li txais zaj lus tim khawv tias qhov ntawd muaj tseeb. Muaj txoj kev hloov siab los ntseeg thaum yus rau siab ua raws li tej lus qhuab qhia uas yus paub tias muaj tseeb thiab khaws tej lus txib tseg ib hnub dhau ib hnub, ib hlis dhau ib hlis.
Tam sim no yog ib lub sij hawm zoo ua ib tug hluas hauv lub Koom Txoos. Nej yog cov xub thawj uas kawm cov txheej txheem qhia ntawv rau cov hluas Come, Follow Me, uas muaj ib lub hom phiaj kom pab nej hloov siab los ntseeg Yexus Khetos txoj moo zoo. Yog ib qho zoo heev uas nej nco ntsoov tias txawm tias nej niam thiab txiv, thiab cov thawj coj paub qhia npaum li cas los “txoj kev lav ris hloov nej siab los ntseeg yeej nyob ntawm nej tes. Yeej tsis muaj leej twg uas yuav hloov siab los ntseeg tau rau nej, thiab yeej tsis muaj leej twg uas yuav yuam taw nej los hloov siab los ntseeg tau.”7 Txoj kev hloov siab los ntseeg tsuas muaj thaum nej rau siab thov Vajtswv, kawm nej tej vaj lug kub, mus lub Koom Txoos, thiab ua neej kom tsim nyog mus ua tej hauj lwm hauv lub tuam tsev. Txoj kev hloov siab los ntseeg tsuas muaj thaum peb ua raws tej ntsiab cai uas ncaj ncees uas peb tau kawm hauv peb tsev thiab hoob kawm. Txoj kev hloov siab los ntseeg tsuas muaj thaum peb ua ib lub neej uas huv huv, ua lub siab ncaj ncees, thiab txaus siab cia tus Vaj Ntsuj Plig Dawb Huv nrog nraim peb. Txoj kev hloov siab los ntseeg tsuas muaj thaum peb to taub Yexus Khetos txoj Kev Theej Txhoj, paub tias Nws yog peb tus Cawm Seej thiab tus Cawm Dim, thiab cia txoj Kev Theej Txhoj pab peb hauv peb lub neej.
Nej txoj kev hloov siab los ntseeg yuav pab tau nej thaum nej npaj ua tej kev khi lus hauv lub tuam tsev, mus ua tub txib, thiab pib tsa nej tsev neeg. Yam li thaum nej hloov siab los ntseeg lawm nej yuav xav qhia lwm tus txog tej yam uas nej tau kawm, thiab nej txoj kev ntseeg thiab nej lub siab uas xav hais lus tim khawv rau lwm tus yuav muaj zog thiab hwj chim ntxiv. Txoj kev xav hais qhia txog txoj moo zoo rau lwm tus thiab ua siab loj hais lus tim khawv los rau peb thaum peb hloov siab los ntseeg tiag tiag. Tus Cawm Seej qhia Petus tias, “Thaum koj los cuag kuv, koj yuav tsum txhawb koj cov kwv tij zog.”8
Puas nco qab Yausuas, tus yaj saub uas yog tub rog? Nws tsis yog hloov siab los ntseeg nws ib leeg xwb, tiam sis hauv tag nrho nws lub neej nws rau siab ntso pab Haiv Neeg Yixalayees los cuag Vajtswv. Peb nyeem hauv Phau Qub tias, “Cov Yixalayees ua tus Tswv tes hauj lwm mus txog hnub uas tas Yausuas tiam neej.”9 Ib tug neeg uas hloov siab los ntseeg tiag tiag tau hwj chim los ntawm txoj Kev Theej Txhoj thiab txais kev cawm dim, ces nws mam li ncav tes mus pab txhua tus neeg uas nws paub.
Kev ua neej nyob raws li txoj moo zoo thiab sawv hauv tej qhov chaw dawb huv tsis yooj yim txhua lub sij hawm, tiam sis kuv hais lus tim khawv tias yeej tsim nyog ua li ntawd! Tus Tswv ntuas Emma Smith kom nws cia li tso tej yam ntawm lub ntiaj teb no tseg, thiab nrhiav tej yam hauv ib lub ntiaj teb zoo dua.10 Kuv xav tias peb tsis to taub tias “tej yam ntawm ib lub ntiaj teb zoo dua” yuav zoo npaum li cas tiag!
Kuv hais lus tim khawv tias peb muaj ib Leej Txiv Saum Ntuj Ceeb Tsheej uas xav pab peb thiab foom koob hmoov rau peb txoj kev sim ua neej nyob raws li txoj moo zoo thiab hloov siab los ntseeg. Nws twb piav meej meej tias nws lub hom phiaj thiab lub luag hauj lwm yog kom peb tau “txoj kev tsis txawj tuag thiab tau lub neej nyob mus ib txhis.”11 Nws xav coj peb rov qab los tsev nrog Nws nyob. Kuv hais lus tim khawv tias thaum peb ua raws li txoj moo zoo tej lus qhuab qhia thiab niaj hnub xyaum ua li ntawd, peb thiaj yuav hloov siab los ntseeg thiab yuav ua tau tej yam zoo rau peb tsev neeg thiab hauv ntiaj teb. Thov kom peb niaj hnub yuav tau koob hmoov kom peb thiaj ncav cuag lub hom phiaj ntawd es kuv thov kom muaj li no los ntawm Yexus Khetos lub npe, amees.