2010–2019
Lub Hwj Chim ntawm lub Pov Thawj Hwj
October 2013

Lub Hwj Chim ntawm lub Pov Thawj Hwj

Los ntawm Txwj Laug Neil L. Andersen

Ntawm Pawg Kaum Ob tug Thwj Tim

Daim Duab

Ib tug txiv neej txawj qhib ntaub npog qhov rais cia duab tshav ntuj los rau hauv ib chav, tiam sis lub hnub los yog qhov kaj tsis yog tus txiv neej li.

Txhua tus Txais Tau cov Koob Hmoov Pov Thawj Hwj

Thaum cov me nyuam hauv kev sib ntsib txais lub cim nco txog zoo siab hu nkauj lub Koom Haum Me Nyuam Yaus ib zaj nkauj hu ua “Muaj Kev Hlub Nyob No,” txhua leej txhua tus luag nyav. Ib tug niam tsev uas muaj tsib tug me nyuam tau mloog zoo rau nqe ob: “Txhua lub sij hawm kuv lub tsev txais koob hmoov los ntawm lub hwj chim pov thawj hwj.”1 Nws tu siab xav tias, “Kuv cov me nyuam tsis tau muaj ib lub tsev zoo li ntawd.”2

Kuv xav hais rau tus poj niam rau siab ntseeg no thiab rau txhua leej txhua tus hais tias peb muaj peev xwm ua neej nyob txhua lub sij hawm “nrog cov koob hmoov ntawm lub hwj chim pov thawj hwj,”

Tej lub sij hawm peb xav tias tsuas yog cov txiv neej ntawm lub Koom Txoos uas txais tau lub hwj chim ntawm lub pov thawj hwj xwb. Lub pov thawj hwj yog lub hwj chim thiab txoj cai ntawm Vajtswv uas Nws muab kom cawm thiab foom koob hmoov rau txhua tus---txiv neej, poj niam, thiab me nyuam.

Ib tug txiv neej txawj qhib ntaub npog qhov rais cia duab tshav ntuj los rau hauv ib chav, tiam sis lub hnub los yog qhov kaj tsis yog tus txiv neej li. Cov koob hmoov ntawm lub pov thawj hwj yeej tseem ceeb tshaj tus uas Vajtswv hais kom muab lub txiaj ntsim ntawd.

Qhov uas peb txais tau cov koob hmoov, lub hwj chim, thiab kev cog lus ntawm lub pov thawj hwj nyob hauv lub neej no thiab lub neej tom ntej yog ib lub cib fim thiab kev lav ris tseem ceeb heev. Thaum peb tsim nyog, cov kab ke ntawm lub pov thawj hwj txhawb nqa peb lub neej hauv lub ntiaj teb thiab npaj peb txais tau Vajtswv tej kev cog lus hauv lub neej tom ntej. Tus Tswv hais tias, “Nyob hauv cov kab ke ... thiaj pom tau Vajtswv lub hwj chim.”3

Txhua tus neeg tsim nyog uas ua kev cai raus dej, txais tus Vaj Ntsuj Plig Dawb Huv, thiab txais lub cim nco txog, lawv txais tau Vajtswv cov koob hmoov tshwj xeeb. Lub tuam tsev ua rau peb txais qhov kaj ntxiv, thiab tau kev cog lus tias yuav txais txoj sia nyob mus ib txhis.4

Tag nrho cov kab ke pab peb ntseeg Yexus Khetos zuj zus tuaj thiab ua raws li peb tej kev khi lus rau Vajtswv. Thaum peb ua raws li tej kev khi lus dawb ceev, peb txais tau lub hwj chim thiab koob hmoov ntawm lub pov thawj hwj.

Peb pom tau lub hwj chim ntawm lub pov thawj hwj hauv peb lub neej thiab ntawm lub Koom Txoos cov mej zeej uas ua raws li lawv tej kev khi lus los? Peb pom lub hwj chim no nyob hauv cov neeg hloov siab los ntseeg tom qab lawv ua kev cai raus dej thiab lawv txais kev zam txim lawm. Peb pom peb cov me nyuam thiab cov tub hluas ntxhais hluas txawj hnov tau tus Vaj Ntsuj Plig Dawb Huv tej kev tshoov siab thiab tej kev coj. Peb pom cov kab ke ntawm lub tuam tsev yog ib lub teeb uas ci ntsa iab rau cov txiv neej thiab cov poj niam ncaj ncees nyob thoob plaws lub ntiaj teb no.

Lub hlis tas los kuv twb saib ib nkawm niam txiv hluas uas lawv txoj kev sib khi hauv lub tuam tsev tau txhawb lawv lub dag zog thaum lawv tus me nyuam tub tau yug los tiam sis ua neej nyob tau ib lub lim tiam xwb. Los ntawm cov kab ke ntawm lub pov thawj hwj, nkawm niam txiv hluas no thiab peb txhua tus txais kev nplij siab, lub dag zog, kev pov hwm, kev kaj siab lug thiab tej lus cog tseg uas nyob mus ib txhis.5

Peb Paub Dab tsi txog lub Pov Thawj Hwj

Tej tug yuav nug ncaj hais tias, “Yog txhua tus txais tau lub hwj chim thiab cov koob hmoov ntawm lub pov thawj hwj, vim li cas cov txiv neej yog tib co uas ua tau cov kab ke ntawm lub pov thawj hwj?”

Thaum ib tug tim tswv nug Nifais hais tias, “Koj puas paub hais tias Vajtswv twb yuav nqis los nrog neeg nyob?” Nifais ua siab ncaj hais tias, “Kuv paub tias nws yeej hlub nws cov me nyuam; txawm li ntawd los, kuv twb tsis paub tej ntsiab lus ntawm txhua yam.”6

Thaum peb hais txog lub pov thawj hwj, muaj ntau yam uas peb paub lawm.

Txhua tus Zoo Ib Yam

Peb paub tias Vajtswb hlub tag nrho Nws cov me nyuam thiab tsis xaiv leej twg ntsej muag hlo li. “Nws yeej tsis tau txwv ib tug twg uas los cuag nws, ... tsis hais poj niam los txiv neej; ... thiab txhua txhia tus zoo tib yam nkaus rau Vajtswv.”7

Ib yam li peb paub tias Vajtswv txoj kev hlub zoo “tib yam nkaus” rau Nws cov tub thiab Nws cov ntxhais, peb kuj paub hais tias Nws tsis tau tsim txiv neej thiab poj niam zoo tib yam nkaus. Peb paub tias qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab nyob hauv lub neej no thiab nyob mus ib txhis. Poj niam thiab txiv neej nyias muaj nyias tej kev lav ris uas dawb ceev.8

Chiv Keeb

Peb paub tias txij thaum chiv keeb los tus Tswv tau qhia tias yuav siv Nws lub pov thawj hwj li cas. “Tau muab lub Pov Thawj Hwj rau Adas ua ntej.”9 Nau-es, Anplaham, thiab Mauxes lawv puav leej tau ua cov kab ke pov thawj hwj. Yexus Khetos yog tus pov thawj siab tshaj plaws. Nws hu Nws cov Thwj Tim. Nws hais tias, “Tsis yog nej xaiv kuv, tiam sis yog kuv xaiv nej thiab tsa nej.”10 Nyob hauv peb lub caij nyoog Vajtswv txib cov tub xa xov los saum ntuj los. Yauhas tus Muab Neeg Ua Kev Cai Raus Dej, Petus, Yakaunpaus, thiab Yauhas muab lub pov thawj hwj txum tim rov qab los rau lub ntiaj teb dhau ntawm tus Yaj Saub Yauxej Xamiv.11 Nov yog txoj kev uas peb Leej Txiv Saum Ntuj Ceeb Tsheej tau muab Nws lub pov thawj hwj rau tib neeg.12

Ntau lub Txiaj Ntsim los ntawm Vajtswv

Peb paub tias yus siv tsis tau lub hwj chim ntawm lub pov thawj hwj dawb huv yog tsis muaj kev ntseeg, tus Vaj Ntsuj Plig Dawb Huv, thiab tej txiaj ntsim ntawm sab ntsuj plig. Cov vaj lug kub ceeb toom tias: “Tsis txhob [xyeej] Vajtswv tej txiaj ntsim, vim ... muaj ntau. ... Thiab muaj ntau txoj kev uas yuav muab tej txiaj ntsim no; tiam sis nws yog tib tug Vajtswv ua hauj lwm txhua yam rau sawv daws.”13

Kev Tsim Nyog

Peb paub tias yuav tsum tsim nyog kom ua tau thiab txais cov kab ke pov thawj hwj. Muam Linda K. Burton, tus tuam thawj tswj hwm ntawm lub Koom Haum Niam Tsev tau hais tias, “Kev ncaj ncees yog qhov uas ua rau peb thiaj muaj lub hwj chim pov thawj hwj hauv peb lub neej.”14

Piv txwv hais tias, cia li xav txog qhov uas tib neeg saib duab liab qab nyob thoob plaws lub ntiaj teb. Tus Tswv txoj kev cai tsis pub cov uas saib xyuas cov kab ke ntawm lub pov thawj hwj saib duab liab qab hlo li. Tus Cawm Seej hais tias:

“Hloov siab lees txim ntawm nej ... tej kev qias ntsiag to.”15

“Lub qhov muag yog lub teeb rau lub cev. ... Tiam sis yog nej ob lub qhov muag pom kev phem, tag nrho nej lub cev yuav tsaus ntuj nti.”16

“Leej twg saib ib tug poj niam thiab xav deev tus poj niam ntawd, qhov uas nws saib li ntawd kuj txhaum ib yam li nws twb tau deev tus poj niam ntawd lawm ntag.”17

Thaum peb tsis tsim nyog muab lub cim nco txog, foom koob hmoov rau cov neeg mob, los yog ua lwm yam kab ke ntawm lub pov thawj hwj, ces raws li Txwj Laug David A. Bednar hais tias, peb saib tsis taus Vajtswv lub npe.18 Yog ib tug neeg tsis tsim nyog, nws yuav tsum thim tsis txhob koom tes ua cov kab ke ntawm lub pov thawj hwj thiab txo hwj chim mus xyuas nws tus npisov kom pib hloov siab lees txim thiab rov qab ua raws li cov lus txib.

Kev Txo Hwj Chim

Ib qho ntxiv uas peb paub yog qhov uas muaj tej tsev neeg uas muaj ib leej niam thiab leej txiv ncaj ncees koom tes coj nkawd cov me nyuam ua zoo txais tau cov koob hmoov ntawm lub pov thawj hwj ntau nplua mias. Tiam sis peb kuj paub tias Vajtswv muab cov koob hmoov ntawd tib yam nkaus rau cov tsis zoo li ntawd thiab.19

Ib leej niam, uas yuav tsum khwv noj khwv haus rau nws tsev neeg thiab txawb nqa lawv sab ntsuj plig, nws piav hais tias nws yuav tsum txo hwj chim hu nws ob tug mus qhia tom tsev kom nkawd foom koob hmoov rau nws cov me nyuam. Tiam sis nws hais ntxiv hais tias nws tsis tas txo hwj chim ntau tshaj ob tug mus qhia tom tsev ntawd yuav tsum txo hwj chim thaum nkawd npaj siab foom koob hmoov rau nws cov me nyuam.20

Cov Yuam Sij Pov Thawj Hwj

Peb paub tias cov yuam sij ntawm lub pov thawj hwj, uas Thawj Pawg Thawj Tswj Hwm thiab Pawg Kaum Ob tug Thwj Tim tuav, coj tus Tswv txoj hauj lwm hauv lub ntiaj teb no. Lawv muab tej yuam sij pov thawj hwj tshwj xeeb rau ceg txheem ntseeg cov thawj tswj hwm thiab cov npisov nyob rau hauv tej qhov chaw uas lawv nyob. Thiab lawv hu cov txiv neej thiab cov poj niam los ntawm kev tshwm sim, txhawb nqa lawv thiab tsa lawv siv tej txoj cai uas tau pub rau lawv qhia thiab txhawb pab lwm tus.21

Txawm peb paub ntau yam txog lub pov thawj hwj, qhov uas peb nyob hauv lub ntiaj teb no ua rau peb tsis to taub tag nrho txog Vajtswv txoj hauj lwm.  Tiam sis nws muaj siab mos qhia peb tias, “Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua,”22 nws nplij peb lub siab tias thaum txog lub sij hawm thiab thaum peb ua neej nyob mus ib txhis peb yuav pom tej yam “raws li qhov yog”23 thiab to taub Nws txoj kev hlub zoo tag nrho.

Peb sawv daws muaj siab xav ua hauj lwm. Tej lub sij hawm peb tsis txaus siab ua peb tej hauj lwm hauv lub Koom Txoos thiab xav kom lawv hu peb ua lwm yam. Tej lub sij hawm peb zoo siab thaum txog lub sij hawm tso peb tawm. Tsis yog peb kom Vajtswv hu peb ua hauj lwm.24 Kuv tau kawm qhov no thaum ntxov tom qab kuv yuav poj niam. Thaum wb nyuam qhuav sib yuav, kuv tus poj niam, Kathy, wb nyob hauv Florida. Muaj ib hnub Sunday ib tug pab cuam ntawm ceg txheem ntseeg pawg thawj tswj hwm piav rau kuv tias lawv txais kev tshoov siab hu Kathy ua ib tug xib hwb qhia vaj lug kub thaum sawv ntxov.

“Wb yuav ua li cas?” Kuv hais tias: “Wb muaj cov me nyuam me me, kev kawm vaj lug kub pib thaum 5:00 sawv ntxov, thiab kuv yog pawg ntseeg Koom Haum Tub Hluas tus thawj tswj hwm.”

Tus pab cuam luag nyav thiab hais tias, “Tsis ua li cas, Tij Laug Andersen. Peb yuav hu nws ua hauj lwm, thiab peb yuav tso koj.”

Thiab lawv ua li ntawd xwb.

Tej Hauj Lwm ntawm Poj Niam

Peb yuav tsum nug txog thiab mloog cov poj niam tej kev xav thiab tej kev txhawj nyob hauv peb lub neej, kev sib yuav thiab thaum peb txhim tsa Vajtswv lub nceeg vaj.

Nees nkaum xyoo tas los nyob hauv lub tuam rooj sab laj, Txwj Laug M. Russell Ballard hais txog ib lub sij hawm thaum nws nrog tus thawj tswj hwm ntawm lub Koom Haum Niam Tsev tham. Twb muaj ib lo lus nug uas hais txog qhov uas yuav tsum txhawb cov tub hluas ntxhais hluas lub zog kom lawv tsim nyog ua tub txib. Muam Elain Jack luag nyav thiab hais tias, “Txwj Laug Ballard, koj paub tias cov [poj niam] ntawm lub Koom Txoos tej zaum yuav muaj tswv yim zoo ... yog tias nej nug lawv. Vim ... peb yog lawv niam os!”25

Tus Thawj Tswj Hwm Thomas S. Monson lub neej nws yeej nug txog thiab pab cov poj niam tej kev txhawj xeeb. Tus poj niam uas pab nws ntau tshaj plaws yog Muam Frances Monson. Peb nco nws heev. Thiab, thaum hnub Thursday tas los, Thawj Tswj Hwm Monson ua rau cov Tuam Thawj Coj nco qab tias nws tau kawm ntau npaum li cas los ntawm 84 tus poj ntsuam nyob hauv nws pawg ntseeg. Nws twb mloog lawv lus ntau thaum nws yog ib tug npisov thiab tas nws lub neej.

Yog li ntawd, ua ntej Thawj Tswj Hwm Monson tshaj tawm tias yuav hloov hnub nyoog rau cov tub txib mus ua hauj lwm, lawv twb sib tham ntau nrog lub Koom Haum Niam Tsev, Koom Haum Ntxhais Hluas, thiab lub Koom Haum Me Nyuam Yaus tej pawg thawj tswj hwm.

Cov npisov, thaum nej ua raws li Thawj Tswj Hwm Monson tus yam ntxwv, nej yuav pom tus Tswv txhais tes coj nej txoj hauj lwm dawb ceev ntau nplua mias.

Peb nyob hauv Brazil tau ntau xyoo. Tsis ntev tom qab kuv tuaj, kuv ntsib Adelson Parrella, uas yog ib tug Xya Caum, thiab nws tus kwv Adilson, uas ua hauj lwm hauv peb ceg txheem ntseeg pawg thawj tswj hwm. Ces tom qab ntawd kuv ntsib nkawd tus kwv Adalton, uas yog ceg txheem ntseeg tus thawj tswj hwm nyob hauv Florianopolis, thiab ib tug kwv ntxiv Adelmo, uas yog ib tug npisov. Cov kwv tij no txoj kev ntseeg tshoov kuv lub siab, thiab kuv nug txog lawv niam lawv txiv.

Tsev neeg no tau ua kev cai raus dej nyob hauv Santos, Brazil, 42 xyoos tas los. Adilson Parrella hais tias, “Thaum xub thawj, peb leej txiv zoo siab koom lub Koom Txoos. Tiam sis, tsis ntev ces nws tsis tshua muaj siab ntseeg thiab hais kom peb niam tsis txhob mus koom lub koom txoos ntxiv.”

Adilson qhia kuv tias nws niam tau xaws khaub ncaws rau cov neeg zej zog kom them nqi rau nws cov me nyuam caij npav mus rau lub koom txoos. Plaub tug me nyuam tub tau taug kev ib mais tawm mus rau ib lub zos ntxiv, caij npav tau 45 feeb, ces taug kev mus li 20 feeb ntxiv mus rau lub koom txoos.

Txawm nws mus tsis tau nrog nws cov me nyuam, Muam Parrella nyeem cov vaj lug kub nrog nws cov tub thiab ntxhais, qhia txoj moo zoo rau lawv, thiab thov Vajtswv nrog lawv. Lawv lub tsev me me muaj cov koob hmoov ntawm lub hwj chim pov thawj hwj. Cov me nyuam tub twb loj hlob, mus ua tub txib, kawm ntawv thiab sib yuav hauv lub tuam tsev. Cov koob hmoov ntawm lub pov thawj hwj twb puv lawv lub tsev.

Ntau xyoos tom qab ntawd, thaum nws tsis muaj tus txiv lawm, Vany Parrella mus rau hauv lub tuam tsev kom txais tau nws lub vaj txiaj ntsim thiab tom qab ntawd tau ua ntxhais txib nyob rau hauv Brazil peb zaug. Tam sim no nws muaj 84 xyoos, thiab nws txoj kev ntseeg foom koob hmoov rau ntau tiam neeg.

Zaj Lus Tim Khawv thiab Kev Cog Lus

Muaj lub hwj chim ntawm Vajtswv lub pov thawj hwj dawb huv nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv ua tim khawv tias thaum nej tsim nyog ua cov kab ke ntawm lub pov thawj hwj, tus Tswv yuav muab dag zog, kev kaj siab lug, thiab lub zeem muag nyob mus ib txhis ntxiv rau nej. Txawm nej muaj xwm txheej dab tsi los yog, nej lub tsev yuav “txais koob hmoov ntawm lub hwj chim pov thawj hwj” thiab cov uas nyob ze nej yuav xav muaj cov koob hmoov no ib yam thiab.

Peb yog txiv neej thiab poj niam, cov muam thiab cov kwv tij, Vajtswv cov tub thiab cov ntxhais, peb sawv daws koom siab ua ke. Nov yog peb lub cib fim, peb txoj kev lav ris, thiab peb txoj koob hmoov. Nov yog peb txoj hmoov----kom npaj Vajtswv lub nceeg vaj rau tus Cawm Seej txoj kev rov qab los. Los ntawm Yexus Khetos lub npe, amees.

Lus Cim

  1. “Love Is Spoken Here,” Children’s Songbook, 190–91.

  2. Email, Yim Hli Ntuj 5, 2013

  3. Lus Qhuab Qhia thiab Kev Khi Lus 84:20.

  4. Saib Lus Qhuab Qhia thiab Kev Khi Lus 138:37, 51.

  5. Saib Lus Qhuab Qhia thiab Kev Khi Lus 84:35; 109:22.

  6. 1 Nifais 11:16–17.

  7. 2 Nifais 26:33.

  8. Saib “Tsev Neeg: Ib Zaj Lus Tshaj Tawm rau lub Ntiaj Teb,” Ensign los sis Liahona, Kaum Ib Hlis Ntuj 2010, 129.

  9. Teachings of Presidents of the Church: Joseph Smith (2007), 104; kuj saib Lus Qhuab Qhia thiab Kev Khi Lus 84:16; 107:40–53; 128:18, 21; Russell M. Nelson, “Lessons from Eve,” Ensign, Kaum Ib Hlis Ntuj 1987, 86–89.

  10. Yauhas 15:16.

  11. Saib Joseph Smith—History 1:72; kuj saib Lus Qhuab Qhia thiab Kev Khi Lus 13; 27.

  12. Saib M. Russell Ballard, “Let Us Think Straight” (BYU Campus Education Week devotional, Yim Hli Ntuj 20, 2013); speeches.byu.edu. Txwj Laug Ballard hais tias: “Vim li cas peb tsa cov txiv neej rau tej hauj lwm pov thawj hwj thiab tsis tsa tej poj niam? Thawj Tswj Hwm Gordon B. Hinckley piav hais tias yog tus Tswv, tsis yog txiv neej ‘uas pom zoo kom txiv neej nyob hauv Nws lub Koom Txoos yuav tuav lub pov thawj hwj’ thiab yog tus Tswv uas muab tej txiaj ntsim rau cov poj niam kom ‘muaj txuj ci pab lub koom haum zoo kawg nkaus no, uas yog lub Koom Txoos thiab Vajtswv lub nceeg vaj’ (“Women of the Church,” Ensign, Kaum Ib Hlis Ntuj 1996, 70). Tiam sis, tus Tswv tsis tau tshwm sim yog vim li cas Nws txhim Nws lub Koom Txoos raws li tus txheej txheem no.”

  13. Maulaunais 10:8.

  14. Linda K. Burton, “Priesthood: ‘A Sacred Trust to Be Used for the Benefit of Men, Women, and Children’” (zaj lus hais nyob hauv Brigham Young University Women’s Conference, Tsib Hlis Ntuj 3, 2013); ce.byu.edu/cw/womensconference/pdf/archive/2013/lindaBurtonTalk.pdf.

  15. 3 Nifais 30:2.

  16. Mathais 6:22–23.

  17. Mathais 5:28; kuj saib Amas 39:9. Thawj Tswj Hwm Thomas S. Monson hais tias: “Kev saib duab liab qab muaj yees heev. Kev lam saib duab liab qab hloov tau ua ib qho uas yus tswj tsis tau, ua rau yus xav saib tej yam qias neeg dua thiab ua phem ua qias tshaj yav tas los. Tiv thaiv kom txhob saib duab liab qab hlo li” (“Preparation Brings Blessings,” Ensign los sis Liahona, Tsib Hlis Ntuj 2010, 65).“Qhov ntshai heev ... yog qhov uas muaj ntau tus neeg siv Internet ua phem thiab ua qias heev, feem ntau lawv saib duab liab qab.” Kuv cov kwv thiab cov muam, kev koom ua tej ntawd yuav ua rau nej sab ntsuj plig puas tsuaj tas. Cia li muaj zog Cia li ua neeg huv. Tsis txhob saib tej yam uas yuav ua rau nej puas tsuaj---tsis hais tej ntawd nyob qhov twg los yog! Kuv ceeb toom rau txhua leej txhua tus nyob qhov txhia chaw” (“Until We Meet Again,” Ensign or Liahona, Tsib Hlis Ntuj 2009, 113).“Tsis txhob saib duab liab qab tsis hais qhov me dua ntais huv tib si. Qhov no yuav ua rau nej sab ntsuj plig hnov tsis tau dab tsi thiab ua rau nej tsis paub qhov zoo thiab qhov phem. Nyob hauv phau Lus Qhuab Qhia thiab Kev Khi Lus, nws qhia peb tias, qhov uas tsis txhawb pab yus tsis yog Vajtswv li, thiab yog kev tsaus ntuj [saib phau Lus Qhuab Qhia thiab Kev Khi Lus 50:23]” (“True to the Faith,” Ensign los sis Liahona, Tsib Hlis Ntuj 2006, 18–19).

  18. Saib David A. Bednar, Act in Doctrine (2012), 53.

  19. Saib Dallin H. Oaks, “Priesthood Authority nyob hauv the Family and the Church,” Ensign los sis Liahona, Kaum Ib Hlis Ntuj 2005, 24–27.

  20. Email, Yim Hli Ntuj 5, 2013; saib Yakaunpaus 5:14.

  21. Saib Henplais 5:4.

  22. Yaxayas 55:8.

  23. Yakhauj 4:13.

  24. Saib Lus Qhuab Qhia thiab Kev Khi Lus 81:4–5. Thawj Tswj Hwm Gordon B. Hinckley hais tias: “Nej txoj kev lav ris yeej tseem ceeb ib yam li kuv txoj kev lav ris. Tsis muaj ib txoj hauj lwm ntawm lub koom txoos uas tsis tseem ceeb” (“This Is the Work of the Master,” Ensign, Tsib Hlis Ntuj 1995, 71).

  25. M. Russell Ballard, “Strength nyob hauv Counsel,” Ensign, Kaum Ib Hlis Ntuj 1993, 76.