2010–2019
Tej Kev Txiav Txim uas Nyob Mus Ib Txhis
October 2013

Tej Kev Txiav Txim uas Nyob Mus Ib Txhis

Los ntawm Txwj Laug Russell M. Nelson

Ntawm Pawg Kaum Ob tug Thwj Tim

Daim Duab

Qhov uas nej siv nej txoj kev ywj siab xaiv kom txiav txim siab yog ib qho tseem ceeb rau nej txoj kev loj hlob ntawm sab ntsuj plig, niaj hnub no thiab nyob mus ib txhis.

Kuv cov kwv tij thiab cov muam, txhua hnub yog ib hnub uas peb txiav txim siab. Thawj Tswj Hwm Thomas S. Monson tau qhia peb tias “tej yam uas peb xaiv yuav hloov peb lub neej tom ntej.”1 Qhov uas nej siv nej txoj kev ywj siab xaiv kom txiav txim siab yog ib qho tseem ceeb rau nej txoj kev loj hlob ntawm sab ntsuj plig, niaj hnub no thiab nyob mus ib txhis. Nej yeej tsis hluas heev kawm, thiab nej yeej tsis laus dhau hloov tau. Nej tej kev xav kawm thiab hloov twb los ntawm qhov uas Vajtswv ua rau nej xav vam meej nyob mus ib txhis. 2 Txhua hnub nej muaj cib fim txiav txim siab txog tej yam uas yuav hloov nej lub neej nyob mus ib txhis.

Peb yog neeg uas nyob mus ib txhis---cov me nyuam ntsuj plig ntawm leej niam thiab leej txiv nyob saum ntuj ceeb tsheej. Phau Vaj Lug Kub Npainpaum qhia tias “Vajtswv tsim neeg kom muaj yam txwv zoo li nws, ... nws tsim txiv neej thiab tsim poj niam.”3 Tsis ntev tas los kuv hnov ib cov me nyuam hu nkauj zaj nkauj uas sawv daws nyiam “Kuv Yog Vajtswv Me Nyuam.”4 Kuv xav hais tias, “Vim li cas kuv tsis tshua tau hnov cov niam tsev los sis cov txiv tsev hu nkauj zaj no?” Peb txhua tus tsis yog Vajtswv cov me nyuam los? Muaj tseeb tiag, peb txhua tus yeej yog Vajtswv cov me nyuam!

Vim peb yog Vajtswv cov me nyuam, peb yuav tsum hlub nws kawg siab kawg ntsws, hlub nws zoo tshaj peb hlub peb leej niam leej txiv nyob hauv lub ntiaj teb.5 Peb yuav tsum hlub peb cov neeg zej zog vim lawv yog peb cov kwv tij thiab cov muam. Tsis muaj tej lus txib uas tseem ceeb tshaj tej lus txib no.6 Thiab peb yuav tsum saib ib tug neeg txoj sia rau nqi, txawm nws loj hlob npaum li cas los.

Cov vaj lug kub qhia tias lub cev thiab tus ntsuj plig yog ob sab ntawm ib tug neeg.7 Vim peb muaj ob sab no, nej puav leej yuav tau ua Vajtswv tsaug rau Nws tej lub txiaj ntsim uas yog nej lub cev thiab tus ntsuj plig.

Tib Neeg lub Cev

Lub sij hawm thaum kuv yog ib tug kws kho mob ua rau kuv saib neeg lub cev rau nqi heev. Vajtswv tau tsim nej lub cev pub rau nej; nws yog ib qho zoo kawg nkaus! Cia li xav txog nej ob lub qhov muag uas txawj pom kev, pob ntseg uas txawj hnov, thiab ntiv tes uas txawj kov tau tag nrho tej yam zoo nyob ib puag ncig nej. Nej lub hlwb cia nej kawm, xav thiab tawm tswv yim. Nej lub plawv dhia txhua hnub txhua hmo tsis tu tsis tseg, es nej tsis tas xav txog hlo li.8

Nej lub cev pov hwm nws tus kheej. Nej muaj mob kom ceeb toom nej thaum muaj dab tsi tsis zoo thiab nej yuav tsum saib xyuas. Tej lub sij hawm nej raug tej kab mob, thiab thaum ntawd, lub cev pib ntaus kab mob kom tiv thaiv tsis muaj cov kab mob ntxiv.

Nej lub cev kho nws tus kheej. Nej raug hlais los doog ntshav yuav zoo. Tej pob txha uas dam yuav rov qab muaj zog dua. Kuv twb hais txog ib feem xwb ntawm ntau yam uas nej lub cev uas Vajtswv tau pub ua tau.

Txawm li ntawd los, zoo nkaus li nyob hauv txhua tsev neeg, nyaj nyob hauv txhua tus neeg, muaj tej yam ntawm sab cev nqaij daim tawv uas yus yuav tsum ceev faj txog.9 Tus Tswv tau qhia ib tug txheej txheem uas pab tau thaum muaj tej teeb meem no. Nws hais tias, “Kuv muab txoj kev tsis muaj zog rau tib neeg kom lawv yuav txo hwj chim ... vim yog lawv txo lawv tej hwj chim rau kuv ... thiab muaj txoj kev ntseeg kuv, ces kuv yuav ua kom tej uas tsis muaj zog rais los mus muaj zog rau lawv.”10

Ntau zaus tej ntsuj plig uas muaj zog nyob hauv tej lub cev uas tsis zoo tag nrho.11 Lub txiaj ntsim kom muaj ib lub cev zoo li ntawd muaj peev xwm ua rau ib tsev neeg muaj zog thaum leej niam leej txiv thiab cov me nyuam txaus siab ua neej kom pab tus me nyuam uas muaj tej yam tshwj xeeb li no.

Qhov uas peb laus zuj zus tuaj kuj yog ib lub txiaj ntsim los ntawm Vajtswv, tsis hais kev tuag los yog. Qhov uas nej lub cev yuav tuag yog ib qhov tseem ceeb nyob hauv Vajtswv txoj kev zoo siab.12 Vim li cas? Vim kev tuag yuav cia nej tus ntsuj plig rov qab mus cuag Nws.13 Vim peb yuav nyob mus ib txhis, tib yam txoj kev tuag uas ntxov dhau yog txoj kev tuag ntawm cov uas tsis tau npaj mus cuag Vajtswv.

Vim nej lub cev yog ib qho tseem ceeb nyob hauv Vajtswv txoj hau kev nyob mus ib txhis, ces yeej tsis yog ib qho xav tsis thoob uas tus Thwj Tim Povlauj hais tias nej lub cev yog “Vajtswv lub tuam tsev.”14 Txhua zaus nej saib nej tus kheej hauv tsom iav, nej pom nej cev yog ib lub tuam tsev. Qhov tseeb ntawd---uas nej rov qab paub txog txhua hnub---yuav pab nej txiav txim zoo hais tias nej yuav tu nej lub cev zoo li cas thiab nej yuav siv nej lub cev ua dab tsi. Thiab tej yam uas peb xaiv ntawd yuav hloov peb lub neej tom ntej. Ua li cas ho muaj tau li no? Vim nej lub cev yog lub tuam tsev rau nej tus ntsuj plig. Thiab qhov uas nej siv nej lub cev ua li cas yuav hloov nej tus ntsuj plig. Tej kev txiav txim uas yuav hloov nej lub neej nyob mus ib txhis yog:

  • Nej yuav tu thiab siv nej lub cev ua dab tsi?

  • Nej yuav xaiv tej cwj pwm twg ntawm sab ntsuj plig kom loj hlob tuaj?

Tib Neeg tus Ntsuj Plig

Nej tus ntsuj plig nyob mus ib txhis. Tus Tswv hais rau Nws tus yaj saub Anplaham hais tias: “Kuv twb xaiv koj ua ntej koj yug los.”15 Tus Tswv hais ib yam zoo li ntawd txog Yelemis16 thiab ntau tus ntxiv.17 Nws twb hais li ntawd txog nej thiab.18

Nej Leej Txiv Saum Ntuj Ceeb Tsheej twb paub nej tau ntev lawm. Nws twb xaiv nej, uas yog Nws cov tub los sis cov ntxais, los rau hauv lub ntiaj teb thaum lub sij hawm no, ua Nws ib tug thawj coj ua Nws txoj hauj lwm tseem ceeb hauv lub ntiaj teb no.19 Nws tsis tau xaiv nej vim nej muaj ib lub cev tiam sis vim nej muaj tej cwj pwm ntawm sab ntsuj plig, xws li kev ua siab loj, lub siab ncaj, kev xav paub qhov tseeg, kev ntshaw tswv yim, kev xav pab lwm tus.

Muaj tej cwj pwm uas nej muaj ua ntej nej yug los rau hauv lub ntiaj teb no. Muaj lwm yam cwj pwm uas nej ua tau kom loj hlob tuaj nyob hauv lub ntiaj teb no20 thaum nej sib zog nrhiav.21

Ib tug xwj pwm ntawm sab ntsuj plig tseem ceeb yog kev tswj hwm yus tus kheej---yog kev muaj zog kom kev txawj xav kov yeej kev ntshaw. Kev tswj hwm yus tus kheej ua rau yus paub qhov zoo thiab qhov phem. Thiab qhov uas nej paub qhov zoo thiab qhov phem txawv li cas pab nej coj ncaj ncees thaum nej raug kev nyuaj, raug ntxias thiab raug kev sim siab. Kev yoo mov pab nej tus ntsuj plig kov yeej tau nej lub cev tej kev ntshaw. Kev yoo mov kuj ua rau nej txais tau ntuj txoj kev pab, vim kev yoo mov ua rau nej tej kev thov Vajtswv muaj zog. Vim li cas yuav tsum tswj hwm yus tus kheej? Vajtswv twb tso tej kev ntshaw uas muaj zog nyob hauv peb lub cev kom peb xav noj qab nyob zoo thiab muaj kev hlub, ob qho uas yuav tsum muaj kom muaj tib neeg tsis tu ncua.22 Thaum peb tswj hwm peb tej kev ntshaw kom ua raws li Vajtswv tej kev cai, ces peb yuav ua neej nyob ntev dua, muaj kev hlub ntau dua thiab muaj kev xyiv fab kawg nkaus.23

Yog li ntawd tsis yog ib qho xav tsis thoob uas tej kev ntxias uas kom peb tsis ua raws li Vajtswv txoj kev zoo siab feem ntau yog los ntawm kev siv tej kev ntshaw tseem ceeb uas Vajtswv pub rau peb kom ua tsis yog. Kev tswj hwm peb tej kev ntshaw tsis yooj yim. Tsis muaj leej twg uas tswj hwm tej ntawd zoo tag nrho.24 Peb ua yuam kev. Peb ua tsis yog. Peb ua txhaum. Ces peb yuav ua dab tsi? Peb kawm tau los ntawm peb tej kev ua yuam kev ntawd. Ces peb muaj peev xwm hloov siab lees txim.25

Peb hloov tau peb tus yeeb yam. Peb tej kev xav hloov tau. Peb yuav ua li cas? Muaj tib txoj kev xwb. Kev hloov siab tiag tiag----kev hloov siab uas ruaj khov kho---yuav tsum los dhau ntawm Yexus Khetos txoj Kev Theej Txhoj lub hwj chim uas kho thiab ntxuav peb kom huv.26 Nws hlub nej----nej txhua tus!27 Nws muab Nws lub hwj chim rau nej thaum nej rau siab ua raws nraim li Nws tej lus txib. Yeej yog ib qho yooj yim thiab tseeb npaum li ntawd. $Yexus Khetos txoj moo zoo yog ib txoj moo zoo ntawm kev hloov siab!28

Ib tug ntsuj plig uas muaj zog uas tswj hwm nws sab cev nqaij daim tawv tej kev ntshaw yog tus uas tswj nws lub siab thiab tej kev xav thiab tsis cia tej ntawd yuam nws. Tus ntsuj plig yuav tsum ywj siab li ntawd ib yam li lub cev yuav tsum ua pa! Kev ywj siab kom tsis txhob ua qhev rau yus lub cev yog kev txhiv dim tiag tiag!29

Peb “muaj kev ywj siab xaiv txoj kev nyob ywj siab thiab txoj sia nyob mus ib txhis ... los sis xaiv txoj kev poob cev qhev thiab txoj kev ploj kev tuag.”30 Thaum peb xaiv taug ib txoj kev siab dua mus rau kev ywj siab thiab txoj sia nyob mus ib txhis, ces kev sib yuav nyob ntawm txoj kev no.31 Haiv Neeg Ntseeg qhia hais tias “txoj kev sib yuav ntawm ib tug txiv neej thiab ib tug poj niam yog raug tsa los ntawm Vajtswv thiab tias tsev neeg yog lub ntsiab ntawm tus Tsim lub tswv yim rau Nws cov me nyuam txoj hmoov nyob mus ib txhis li.” Peb kuj paub tias “qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab, txawm hais tias nyob lub qub neej los yog, lub neej no los yog, lub neej nyob mus ib txhis li log yog.”32

Kev sib yuav ntawm ib tug txiv neej thiab ib tug poj niam tseem ceeb heev rau tus Tswv cov lus qhuab qhia thiab Vajtswv lub tswv yim nyob mus ib txhis li. Kev sib yuav ntawm ib tug txiv neej thiab ib tug poj niam yog Vajtswv txoj hau kev kom muaj kev zoo siab nyob hauv lub ntiaj teb thiab nyob saum ntuj ceeb tsheej. Yeej yuav tsum tsis txhob ua txhaum, to taub tsis yog, los yog xav ua yuam kev txog Vajtswv txoj hau kev ntawm kev sib yuav.33 Yuav tsum tsis txhob ua li ntawd yog nej xav tau kev xyiv fab tiag tiag. Vajtswv txoj hau kev ntawm kev sib yuav pov hwm lub hwj chim tsim tau neeg uas dawb ceev thiab kev xyiv fab uas muaj thaum sib yuav.34 Peb paub tias Vajtswv muab Adas thiab Evas sib yuav ua ntej nkawd tau muaj kev xyiv fab ntawm kev ua ib nkawm niam txiv.35

Niaj hnub no, tej tseem fwv txhawj txog kev pov hwm kev sib yuav vim tej tsev neeg uas muaj zog yog txoj kev zoo tshaj kom pab tej tiam neeg uas tab tom loj hlob tuaj muaj kev noj qab nyob zoo, kev kawm ntawv, kev pab thiab kev vam meej.36 Tiam sis tej yam uas cov pej xeem nyiam thiab noob neej tej tswv yim muaj hwj huam kom tej tseem fwv sau, rov qab sau thiab ntswj txoj kev cai. Txawm yog tseem fwv yuav tsa kev cai dab tsi los, tus Tswv tej lus qhuab qhia txog kev sib yuav thiab kev coj ncaj ncees yeej yuav tsis hloov.37 Cia li nco ntsoov: kev txhaum, txawm tib neeg tso cai los, Vajtswv tseem suav tias yog kev txhaum!

Txawm peb yuav tsum coj raws li tus Cawm Seej tus yam ntxwv ua siab zoo thiab muaj kev hlub tshua, txawm peb yuav tsum saib tag nrho Vajtswv cov me nyuam txoj cai thiab tej kev xav rau nqi, peb hloov tsis tau Nws tej lus qhuab qhia. Nws tsis tau muab Nws txoj lus rau peb kom peb muab hloov. Nws muab rau peb kom peb kawm, to taub, thiab txhawb nqa.

Tus Cawm Seej txoj kev ua neej yeej zoo. Nws txoj kev yog kev coj dawb huv ua ntej sib yuav thiab coj ncaj ncees tom qab sib yuav.38 Tus Tswv txoj kev yog tib txoj kev rau peb muaj kev zoo siab uas nyob ruaj nrees. Nws txoj kev ua rau peb tus ntsuj plig muaj kev nplij siab thiab kev kaj siab lug nyob hauv peb tsev. Thiab qhov zoo tshaj, Nws txoj kev coj peb mus tsev rau Nws thiab peb Leej Txiv Saum Ntuj Ceeb Tsheej, rau txoj sia nyob mus ib txhis thiab kev tsa not.39 Nov yog lub ntsiab ntawm Vajtswv txoj hauj lwm thiab yeeb koob.40

Kuv cov kwv tij thiab cov muam, txhua hnub yog ib hnub rau peb txiav txim siab, thiab tej yam uas peb xaiv yuav hloov peb lub neej tom ntej. Yuav muaj ib hnub thaum peb yuav sawv ntawm tus Tswv es Nws yuav txiav txim rau peb.41 Peb txhua tus yuav xam phaj nrog Yexus Khetos.42 Peb yuav lav ris peb tej kev txiav txim txog peb lub cev, peb tej cwj pwm sab ntsuj plig, thiab peb puas tau ua raws li Vajtswv txoj kev cai txog kev sib yuav thiab tsev neeg. Kuv thov kom peb yuav muaj tswv yim xaiv tej yam zoo txhua hnub nyob mus ib txhis los ntawm Yexus Khetos lub npe dawb ceev, amees.

Lus Cim

  1. Thomas S. Monson, “Decisions Determine Destiny” (Church Educational System kev sib ntsib, Kaum Ib Hlis Ntuj  6, 2005), 3; speeches.byu.edu.

  2. W. W. Phelps hais txog lub ntsiab ntawm kev vam meej nyob mus ib txhis nyob hauv nws zaj nkauj qhuas Vajtswv “If You Could Hie to Kolob” (Hymns, naj npawb 284). Nqe 4 hais tias: “Kev tsim txiaj yeej tsis kawg; / Lub hwj chim yeej tsis kawg; / Lub tswv yim yeej tsis kawg; / Txoj kev kaj yeej tsis kawg. / Kev koom siab yeej tsis kawg; / Kev ua hluas yeej tsis kawg; / Pov thawj hwj yeej tsis kawg; / Txoj kev tseeb yeej tsis kawg.” Nqe 5 hais tias: “Kev yeeb koob yeej tsis kawg; / Txoj kev hlub yeej tsis kawg; Txoj kev yog yeej tsis kawg; Tsis muaj kev tuag saum ntuj.”

  3. Chiv Keeb 1:27; kuj saib Kaulauxais 3:10; Amas 18:34; Ethaws 3:15; Mauxes 6:9.

  4. “Kuv yog Vajtswv ib tug Me Nyuam,” Hymns, naj npawb 301.

  5. Saib Mathais 10:37.

  6. Saib Malakaus 12:30–31.

  7. Saib Lus Qhuab Qhia thiab Kev Khi Lus 88:15.

  8. Muaj lwm yam ntawm Vajtswv tej tswv yim uas ua hauj lwm nyob hauv nej lub cev. Yuav tsum muaj tej yam xws li sodium, potassium, thiab calcium, thiab tej yam xws li dej, glucose, thiab proteins kom muaj txoj sia. Nej lub cev txawj siv oxygen thiab carbon dioxide. Nej lub cev txawj tsim insulin, adrenalin, thiab thyroxin. Muaj tej yam uas tswj hwm tej yam no thiab lwm yam no nyob hauv lub cev kom txhob muaj ntau thiab tsis muaj tsawg. Muaj cov kua dej yug lub cev uas ib yam tswj hwm ib yam hauv lub cev. Piv xam hais tias, lub qog hlwb nyob rau saum thooj hlwb taub hau tso ib co keeb ua rau taug qog raum muaj zog tso cov keeb adrenal cortical. Ces cov keeb cortical uas loj tuaj zuj zus ua rau lub qog hlwb ntawd tsis tso cov keeb ntawd ntau. Koj lub cev tswj qhov kev kub kev txias kom nyob ntawm 98.6˚F los sis 37˚C, txawm nej nyob ntawm txoj kab nruab nrab ntawm lub ntiaj teb los yog puag saum sab qaum teb.

  9. Muaj tej yam uas yooj yim pom; lwm yam nyob tiam sis tsis pom. Muaj tej yam uas los ntawm ib tsev neeg; lwm yam tsis yog li ntawd. Muaj tej tug uas yooj yim rau lawv raug mob cancer, lwm tus muaj kev fab, thiab li ntawd. Peb txhua tus muaj peev xwm paub txog nws tej kev qaug zog thiab txo hwj chim kawm tej yam uas tus Tswv yuav qhia, ces qhov kev qaug zog ntawd yuav hloov los ua ib qho kev muaj zog.

  10. Ethaws 12:27.

  11. Muaj tej yam uas yuav tsis kho mus txog thaum lub caij Sawv Rov Los, thaum “tag nrho txhua yam yuav rov txum tim los rau lawv tej qub chaw thiab qub cev uas zoo kawg nkaus” (Amas 40:23).

  12. Saib Amas 42:8.

  13. Tus uas sau nkauj sau hais tias, “Tus Tswv tu siab thaum nws ib tsoom haiv neeg ntseeg ib tug neeg tuag” (Phau Ntawv Nkauj 116:15). Kev tuag muaj nqi vim tus Neeg Ntseeg yuav mus tsev nyob nrog tus Tswv.

  14. 1 Kauleethaus 3:16; kuj saib 6:19.

  15. Anplaham 3:23.

  16. Saib Yelemis 1:5.

  17. Saib Amas 13:2–3.

  18. Saib Lus Qhuab Qhia thiab Kev Khi Lus 138:55–56.

  19. Saib Amas 13:2–3; Lus Qhuab Qhia thiab Kev Khi Lus 138:38–57.

  20. Tej cwj pwm xws li kev ntseeg, kev tsim txiaj, txoj kev paub, kev coj tu tu, kev ua siab ntev, ua neeg zoo li vajtswv, qhov uas ib leeg hlub ib leeg, kev siab hlub, kev txo hwj chim, [thiab] kev rau siab (saib Lus Qhuab Qhia thiab Kev Khi Lus 4:6) yog tej txiaj ntsim ntawm sab ntsuj plig uas peb siv tau thiab Vajtswv yuav muab rau peb. Kev ris txiaj kuj yog ib tug cwj pwm ntawm sab ntsuj plig. Kev ris txiaj ua tej yam rau yus xav thiab txawj ua hauj lwm. Thaum thaum nej sab ntsuj plig tau “yug los ntawm Vajtswv,” ces nej yuav txais Nws tus meej yim rau hauv nej lub ntsej muag (saib Amas 5:14).

  21. Saib 1 Kauleethaus 12; 14:1–12; Maulaunais 10:8–19; Lus Qhuab Qhia thiab Kev Khi Lus 46:10–29.

  22. Tej tug neeg raug ntxias noj ntau dhau. “Kev rog heev twb yog ib qho kev mob nyob thoob plaws lub ntiaj teb, muaj yuav luag 2.8 plhom tus neeg txhua xyoo uas tuag vim lawv rog dhau” (World Health Organization, “10 Facts on Obesity,” Peb Hlis Ntuj 2013, www.who.int/features/factfiles/obesity/en). Tej tug neeg raug ntxias noj tsawg dhau. Anorexia thiab bulimia ua rau ntau tus neeg lub neej, kev sib yuav thiab tsev neeg raug puas tsuaj. Thiab tej tug raug ntxias kom sib deev li tus uas tau Tsim peb tau txwv. Muaj tej lus qhia nyob hauv phau Handbook 2: Administering the Church, uas qhia hais tias: “Tus Tswv txoj kev cai coj dawb huv yog kev tsis sib deev thaum tsis tau sib yuav raws li txoj kev cai thiab kev tsis pw nrog lwm tus thaum tau sib yuav lawm. ... Kev deev luag poj luag txiv, kev deev nkauj nraug, txiv neej pw nrog txiv neej los yog poj niam pw nrog poj niam, thiab lwm yam kev ua tsis dawb huv los yog kev ua tsis raws li ntuj tsim.” Phau ntawv ntawd qhia ntxiv hais tias: “Qhov uas poj niam pw nrog poj niam los yog txiv neej pw nrog txiv neej twb txhaum Vajtswv txoj kev cai, thiab yog qhov fab ntxeev rau lub hom phiaj ntawm kev sib deev, thiab ua rau tib neeg txais tsis tau cov koob hmoov uas los ntawm ib tsev neeg thiab cov kab ke cawm seej ntawm txoj moo zoo.  ...Txawm lub Koom Txoos tsis pom zoo rau poj niam pw nrog poj niam los yog txiv neej pw nrog txiv neej, lub Koom Txoos to taub thiab saib taus cov uas nyiam sib thooj” ([2010], 21.4.5, 6).

  23. Saib 1 Kauleethaus 6:9–20; Yakaunpaus 1:25–27; Lus Qhuab Qhia thiab Kev Khi Lus 130:20–21. Thiab peb yeej yuav tsum nco ntsoov tias “muaj tib neeg xwv kom lawv yuav muaj kev xyiv fab” (2 Nifais 2:25).

  24. Peb lub neej hauv lub ntiaj teb yog ib lub caij sim siab, raws li tau piav nyob hauv vaj lug kub hais tias Vajtswv yuav sim lawv siab, seb lawv puas yuav ua txhua tsav txhua yam uas tus Tswv lawv tus Vajtswv yuav txib lawv (Anplaham 3:25).

  25. Saib Mauxiyas 4:10; Amas 39:9; Hilamas 15:7. Handbook 2 muaj zaj lus no hais tias: “Yog neeg hloov siab lees txim ces lawv txais tau kev zam txim thaum lawv yog poj niam uas pws nrog poj niam los yog txiv neej pw nrog txiv neej” (21.4.6).

  26. Dhau los ntawm Yexus Khetos txoj Kev Theej Txhoj thiab los ntawm kev ua raws li txoj moo zoo tej ntsiab cai, tag nrho noob neej yuav txais kev cawm seej (saib Lus Qhuab Qhia thiab Kev Khi Lus 138:4; Tej Nqe Kev Ntseeg 1:3).

  27. Saib Ethaws 12:33–34; Maulaunais 8:17.

  28. Saib Mauxiyas 5:2; Amas 5:12–14.

  29. Saib Loos 8:13–17; Kalatias 5:13–25; Lus Qhuab Qhia thiab Kev Khi Lus 88:86.

  30. 2 Nifais 2:27.

  31. Saib Lus Qhuab Qhia thiab Kev Khi Lus 131:1–4.

  32. “The Family: A Proclamation to the World,” Ensign los sis Liahona, Kaum Ib Hlis Ntuj 2010, 129.

  33. Saib Mathais 19:4–6; Mauxiyas 29:26–27; Hilamas 5:2.

  34. Thaum txhua leej txhua tus yug los lawv muaj keeb, cov chromosomes, thiab DNA (deoxyribonucleic acid) uas yog lawv tus kheej li. DNA yog ib qho molecule uas muaj tej lus qhia txog keeb kwm uas yus lub cev siv kom cov cell loj tuaj thiab ua hauj lwm. Txhua tus neeg cov DNA twb tsim los thaum ib leej txiv thiab ib leej niam cov DNA koom ua ke ua ib lub cev tshiab---yog ib qho kev sib koom ua ke ntawm leej txiv, leej niam, thiab me nyuam.

  35. Saib Chiv Keeb 2:24–25; 3:20–21; 4:1–2, 25.

  36. Dr. Patrick F. Fagan sau hais tias, “Lub hauv paus tseem ceeb ntawm kev nyiaj txiag kev lag luam yog tej tsev neeg uas muaj niam muaj txiv sib yuav---qhov tseem ceeb yog tsev neeg uas muaj me nyuam uas teev tiam Vajtswv txhua lub lim tiam. ... Txhua txoj kev sib yuav tsim ib tsev neeg tshiab, ib pawg uas siv nyiaj, khaws nyiaj thiab tso nyiaj rau kev ua lag luam” (“The Family GDP: How Marriage and Fertility Drive the Economy,” The Family in America, phau 24, naj npawb 2 [Lub Caij Nplooj Ntoo Hlav 2010], 136).

  37. Saib Khiav Dim 20:14; Levis Kev Cai 18:22; 20:13; 2 Kev Cai 5:18; Mathais 5:27–28; Malakaus 10:19; Lukas 18:20; Loos 1:26–27; 13:9; Mauxiyas 13:22; 3 Nifais 12:27–28; Lus Qhuab Qhia thiab Kev Khi Lus 42:24; 59:6.

  38. Saib Gordon B. Hinckley, “This Thing Was Not Done in a Corner,” Ensign, Kaum Ib Hlis Ntuj 1996, 49.

  39. Saib Lus Qhuab Qhia thiab Kev Khi Lus 14:7.

  40. Saib Mauxes 1:39.

  41. Saib 2 Nifais 9:41, 46; Mauxiyas 16:10.

  42. Nws yuav txiav txim peb raws li tej yam peb ua thiab tej yam peb xav tau hauv peb lub siab (saib Lus Qhuab Qhia thiab Kev Khi Lus 137:9; kuj saib Henplais 4:12; Amas 18:32; Doctrine and Covenants 6:16; 88:109).