1 Mine, Zenifi, ekubeni ngifundzisiwe ngalo lonkhe lulwimi lwemaNefi, nginelwati ngelive laNefi, noma live lelilifa lekucala labokhokho betfu, futsi ekubeni ngitfunywe njengenhloli emkhatsini wemaLamani kute ngihlole emabutfo awo, kute libutfo letfu litseleke etikwawo liphindze liwabhubhise—kodvwa ngesikhatsi ngibona loko lokwakukuhle emkhatsini wabo ngaba nesifiso sekutsi angabhujiswa.

2 Ngako-ke ngaphikisana nabomnaketfu ehlane, ngoba ngangifuna kutsi umbusi wetfu ente sivumelwano nawo; kodvwa ngenca yekutsi bekanelulaka futsi angumuntfu lowomela ingati wayaleta kutsi ngibulawe; kodvwa ngasindziswa kucitseka kwengati lenyenti; ngoba babe walwa nababe, umnakabo nemnakabo, kwate kwatsi sibalo lesikhulu selibutfo letfu labhujiswa ehlane; futsi sabuyela, tsine lebesisindzile, eveni laseZarahemla, kutsi siyolandzisa leyo ndzaba kubafati babo kanye nakubantfwana babo.

3 Futsi noko, mine nginenshisekelo lenkhulu yekutfola njengelifa live labokhokho betfu, ngagcogca labanyenti labebafisa kukhuphuka kuyawutsatsa lelo live, saphindze sacala luhambo lwetfu ehlane kukhuphukela eveni, kodvwa sabulawa yindlala kanye netinhlupheko letibuhlungu; ngoba sasephuta kukhumbula iNkhosi Nkulunkulu wetfu.

4 Noko, emvakwemalanga lamanyenti sizulazula ehlane samisa emathende etfu endzaweni lapho bomnaketfu bebabulawelwe khona leyayisedvute nelive labokhokho betfu.

5 Futsi kwenteka kutsi ngaphindze ngahamba nalamane emadvodza ami kuya edolobheni, saya enkhosini, kute ngati simo senkhosi, nekutsi ngati kutsi ngangingangena yini nebantfu bami futsi ngilitsatse live ngekuthula.

6 Ngangena ngaya enkhosini, yenta sivumelwano nami kutsi ngingalitsatsa live lemaLehi-Nefi, kanye nelive laseShilomu.

7 Ngetulu kwaloko yayaleta kutsi bantfu bayo besuke kulelo live, kwatsi mine nebantfu bami sahamba saya kulelive kute silitsatse.

8 Sacala kwakha takhiwo, kanye nekulungisa tindvonga telidolobha, yebo, tindvonga telidolobha lemaLehi-Nefi, kanye nelidolobha laseShilomu.

9 Sacala kulima umhlabatsi, yebo, nangato tonkhe tinhlobo tetinhlanyelo, ngetinhlanyelo temmbila, netemabele, netebhali, netinesi, neteshemu, kanye netinhlanyelo tayo yonkhe inhlobo yetitselo; futsi sacala kwandza saphindze saphumelela eveni.

10 Manje kwakungemacebo kanye nebucili benkhosi Lamani, kutsi iletse bantfu bami ebugcilini, kutsi iyekele lelive kute silitsatse.

11 Ngako-ke kwenteka, kutsi emvakwekutsi sesihleti kulelive sikhatsi lesiyiminyaka lelishumi nakubili inkhosi Lamani yacala kukhatsateka, funa bantfu bami bakhule bacine kulelive, nekutsi bebangeke basakhona kubancoba baphindze babaletse ebugcilini.

12 Manje emaLamani bekabantfu labebangemavila futsi bakhonta tithico; ngako-ke bebanesifiso sekutsi basiletse ebugcilini, kute batitike ngemisebenti yetandla tetfu; yebo, kute batondle emihlanjini yemasimi etfu.

13 Ngako-ke kwenteka kutsi inkhosi Lamani yacala kuphehla bantfu bayo kutsi balwe nebantfu bami; ngako-ke kwacala kwaba khona timphi kanye netincabano kulelo live.

14 Ngoba, ngemnyaka welishumi nakutsatfu wekubusa kwami eveni laNefi, khashane eningizimu yelive laseShilomu, ngesikhatsi bantfu bami banatsisa baphindze badlisa imihlambi yabo, balima imihlaba yabo, libutfo lelikhulu lemaLamani latseleka etikwabo lacala kubabulala, nekubatsatsela imihlambi yabo, kanye nemmbila wemasimi abo.

15 Yebo, futsi kwenteka kutsi babaleka, bonkhe labo labangazange batfolwe, babalekela edolobheni laNefi, bangicela kutsi ngitawubavikela.

16 Futsi kwenteka kutsi ngabahlomisa ngebutjoki, nangemicibisholo, nangetinkemba, nangabocelemba, nangetagila, nangetilingi, kanye nangato tonkhe tinhlobo tetikhali lesasingatakha, futsi mine nebantfu bami sahamba sayawukulwa nemaLamani.

17 Yebo, ngemandla eNkhosi sahamba sayawukulwa nemaLamani; ngoba mine nebantfu bami sakhala kakhulu eNkhosini kutsi isikhulule etandleni tetitsa tetfu, ngoba sabese sivuselwa kukhumbula ngekukhululwa kwabokhokho betfu.

18 Nkulunkulu wakuva kukhala kwetfu futsi wayiphendvula imithandazo yetfu; sahamba ngemandla akhe, yebo, sahamba sayawukulwa nemaLamani, futsi ngelilanga linye kanye nebusuku sabulala tinkhulungwane letintsatfu nemashumi lamane nakutsatfu; sawabulala sate sawacosha sawakhiphela ngephandle kwelive letfu.

19 Futsi mine, lucobo lwami, ngetami tandla, ngasita kungcwaba labafile bawo. Buka, ngekudzabuka lokukhulu kanye nekulila, emakhulu lamabili nemashumi lasikhombisa nemfica abomnaketfu babulawa.