1 Manje, inkhosi Bhenjamini yacabanga kutsi bekufanele, emvakwekutsi seyicedzile kukhuluma kubantfu, kutsi itsatse emabito abo bonkhe labo labebangene esivumelwaneni naNkulunkulu kutsi bagcine imiyaleto yakhe.

2 Futsi kwenteka kutsi kwakute namunye umuntfu, ngaphandle kwebantfwana labancane, longangenanga esivumelwaneni wemukela Khristu wabitwa ngelibito lakhe.

3 Ngetulu kwaloko, kwenteka kutsi ngesikhatsi inkhosi Bhenjamini seyisentile siphetfo sato tonkhe leti tintfo, seyiyibekile indvodzana yayo Mosiya kutsi ibe ngumbusi kanye nenkhosi ngetulu kwebantfu bayo, seyiyiniketile imiyaleto mayelana nembuso, ngetulu kwaloko seyibabekile baphristi kutsi bafundzise bantfu, kute ngaloko bayive baphindze bayati imiyaleto yaNkulunkulu, nekutsi babaphehlele ekukhumbuleni sifungo labasenta, yasikhulula sicuku, babuyela emuva, wonkhe umuntfu, njengekwemindeni yabo, etindlini tabo.

4 Mosiya wacala kubusa esikhundleni seyise. Wacala kubusa ngemnyaka wemashumi lamatsatfu eminyaka yakhe yebudzala, loku kwenta sekuhlangene, cishe iminyaka lengemakhulu lamane nemashumi lasikhombisa nesitfupha kusukela ngesikhatsi Lehi ashiya eJerusalema.

5 Inkhosi Bhenjamini yaphila iminyaka lemitsatfu yase iyafa.

6 Futsi kwenteka kutsi inkhosi Mosiya yahamba etindleleni teNkhosi, yatigcina tehlulelo tayo kanye nemitsetfo yayo, yayigcina imiyaleto yayo kuto tonkhe tintfo leyayimyalete ngato.

7 Inkhosi Mosiya yenta bantfu bayo kutsi balime umhlabatsi. Nayo ngalokunjalo, lucobo lwayo, yawulima umhlabatsi, kute ngaloko ingabi ngumtfwalo kubantfu bayo, kute yente njengobe uyise bekentile kuto tonkhe tintfo. Akutange kube khona incabano emkhatsini wabo bonkhe bantfu bayo sikhatsi lesingangeminyaka lemitsatfu.