1 Manje kwenteka kutsi emvakwekutsi emadvodzana aMosiya sekatentile tonkhe leti tintfo, atsatsa sibalo lesincane kanye nawo abuyela kuyise, inkhosi, anesifiso sekutsi iwavumele kutsi, wona kanye nalabo labebabakhetsile, bahambe bakhuphukele eveni laNefi kute bayawushumayela tintfo lebebativile, nekutsi bayokwabelana ngelivi laNkulunkulu nabomnakabo, emaLamani—

2 Kute mhlawumbe babaletse ekwatini iNkhosi Nkulunkulu wabo, futsi babakholwise ngebubi babokhokho babo; nekutsi mhlawumbe babelaphe ekutondzeni kwabo emaNefi, kute nabo bentiwe bajabule eNkhosini Nkulunkulu wabo, kute babe nebungani kuloyo naloyo, nekutsi kungabe kusaba khona tincabano nanini kulo lonkhe live iNkhosi Nkulunkulu wabo lebanike lona.

3 Manje bebanesifiso sekutsi insindziso imenyetelwe kuto tonkhe tidalwa, ngoba bebangakhoni kubeketela kutsi kulahleke umphefumulo wemuntfu; yebo, nemicabango nje yekutsi noma ngumuphi umphefumulo kufanele uve kuhlupheka lokungapheli kwabenta kutsi batfutfumele futsi bachachatele.

4 Futsi Moya weNkhosi wasebenta ngaleyo ndlela kubo, ngoba bebatoni letimbi kakhulu, futsi iNkhosi yabona kufanele ngebubele bayo lobungapheli kutsi ibasindzise; noko beva lobukhulu buhlungu emphefumulweni ngenca yebubi babo, bahluphekile kakhulu futsi besaba kutsi bebayawulahlwa ingunaphakadze.

5 Futsi kwenteka kutsi bamncenga uyise emalanga lamanyenti kutsi bahambe bakhuphukele eveni laNefi.

6 Inkhosi Mosiya yahamba futsi yayobuta eNkhosini kutsi iwavumele yini emadvodzana ayo ahambe akhuphukele emkhatsini wemaLamani kutsi ayoshumayela livi.

7 INkhosi yatsi kuMosiya: Bavumele bahambe bakhuphuke, ngoba banyenti labayawukholelwa emavini abo, futsi bayawuba nekuphila lokuphakadze; futsi ngitawukhulula emadvodzana akho aphume etandleni temaLamani.

8 Futsi kwenteka kutsi Mosiya wabavumela kutsi bahambe futsi bente njengekwesicelo sabo.

9 Batsatsa luhambo lwabo baya ehlane benyuka bayoshumayela livi emkhatsini wemaLamani; futsi ngiyawuniketa indzaba ngetento tabo emvakwaloku.

10 Manje inkhosi Mosiya beyingenamuntfu wekutsi imnike umbuso, ngoba bekute namunye wemadvodzana ayo labekayawuvuma kutsatsa umbuso.

11 Ngako-ke watsatsa imibhalo lebeyicoshwe kubongcwengcwe belitfutsi, kanjalo nakubongcwengcwe baNefi, kanye nato tonkhe tintfo lebekatigcinile futsi atilondvolotile njengekwemiyaleto yaNkulunkulu, emvakwekutsi sekayihumushile wenta kutsi imibhalo ibhalwe leyo lebeyikubongcwengcwe beligolide lebeyitfolwe bantfu baLimhi, lebeyiletfwe kuye ngesandla saLimhi;

12 Futsi loku wakwenta ngenca yenshisekelo lenkhulu yebantfu bakhe; ngoba bebafisa kakhulu kutsi bati mayelana nalabo bantfu labebabhujisiwe.

13 Manje watihumusha ngekusebentisa lawo matje lamabili labeboshelwe emngcengcemeni weluhlaka.

14 Manje leti tintfo betilungiswe kusukela ekucaleni, futsi betendlulisiwe tehla titukulwane ngetitukulwane, ngenhloso yekuhumusha tilimi;

15 Futsi betigciniwe taphindze talondvolotwa ngesandla seNkhosi, kute ivetele tonkhe tidalwa letiyotsatsa live bubi kanye netinengiso tebantfu bayo;

16 Futsi loyo lonaleti tintfo ubitwa ngekutsi ngumboniswa, ngendlela yesikhatsi sakadzeni.

17 Manje emvakwekutsi Mosiya sekacedzile kuhumusha lemibhalo, buka, yalandzisa ngebantfu labebabhujisiwe, kusukela ngesikhatsi lababhujiswa ngaso kuya emuva ekwakhiweni kwembhoshongo lomkhulu, ngesikhatsi iNkhosi iphambanisa lulwimi lwebantfu futsi bahlakatwa ndzawo tonkhe emhlabeni wonkhe, yebo, futsi kusukela ngaleso sikhatsi kuya emuva kute kube sekudalweni kwa-Adamu.

18 Manje lendzaba yenta bantfu baMosiya kutsi bakhale kakhulu, yebo, bebagcwele lusizi; noko wabanika lwati lolunyenti, lekwatsi ngalo bajabula.

19 Futsi lendzaba iyawubhalwa emvakwaloku; ngoba buka, kufanele kutsi bonkhe bantfu bati tintfo letibhalwe kulendzaba.

20 Manje, njengobe ngishito kini, kutsi emvakwekutsi inkhosi Mosiya seyitentile leti tintfo, yatsatsa bongcwengcwe belitfusi, kanye nato tonkhe tintfo lebeyitigcinile, yatinika Alma, lobekayindvodzana ya-Alma; yebo, yonkhe imibhalo, kanjalo netihumushi, futsi yatiniketa yena, yamyaleta kutsi atigcine futsi atilondvolote, ngetulu kwaloko agcine nembhalo webantfu, atindlulise tehle kusukela esitukulwaneni kuya kulesinye, nanjengobe tatendlulisiwe kwehla kusukela ngesikhatsi Lehi ashiya eJerusalema.