1 Manje Alma, asacwayiswe yiNkhosi kutsi emabutfo enkhosi Nowa abeyawutseleka etikwabo, futsi asabatisile bantfu bakhe, ngako-ke bagcogcela ndzawonye imihlambi yabo, batsatsa lokuyinhlavu kwabo, besuka baya ehlane phambi kwemabutfo enkhosi Nowa.

2 INkhosi yabacinisa, kute bantfu benkhosi Nowa bangakhoni kubakhandza kute bababulale.

3 Babaleka batsatsa luhambo lwemalanga lasiphohlongo basehlane.

4 Befika eveni, yebo, live lelihle kakhulu futsi lelenelisako kakhulu, live lemanti lahlantekile.

5 Bamisa emathende abo, bacala kulima umhlabatsi, bacala kwakha takhiwo; yebo, bebakhutsele, futsi basebenta kakhulu.

6 Futsi labantfu bebanesifiso sekutsi Alma abe yinkhosi yabo, ngoba bekatsandvwa bantfu bakhe.

7 Kodvwa watsi kubo: Bukani, akukafaneli kutsi sibe nenkhosi; ngoba naku lokushiwo yiNkhosi: Anituphakamisa lomunye umuntfu ngetulu kwalomunye, noma indvodza lenye ayinakuticabanga ingetulu kwalenye; ngako-ke ngitsi kini akukafaneli kutsi nibe nenkhosi.

8 Noko, kube bekungenteka kutsi nikwati kuba nemadvodza lalungile njalo kutsi abe ngemakhosi enu bekuyawuba kuhle kini kutsi nibe nenkhosi.

9 Kodvwa khumbulani bubi benkhosi Nowa kanye nebaphristi bayo; futsi nami lucobo ngangena elugibeni, ngenta tintfo letinyenti letatinengekile emehlweni eNkhosi, letangibangela kuphendvuka lokubuhlungu kakhulu;

10 Noko, emvakwekuhlupheka kakhulu, iNkhosi yakuva kukhala kwami, yayiphendvula imithandazo yami, futsi seyingente sikhali etandleni tayo ekuletseni labanyenti benu ekwatini liciniso layo.

11 Noko, kuloku angitichayisi, ngoba angikafaneli kutichayisa.

12 Manje ngitsi kini, benicindzetelwe yinkhosi Nowa, benisebugcilini bakhe kanye nebaphristi bakhe, futsi nangena ebubini ngenca yabo; ngako-ke naniboshwe ngetibopho tebubi.

13 Manje njengobe senikhululiwe ngemandla aNkulunkulu naphuma kuleti tibopho; yebo, nasetandleni tenkhosi Nowa kanye nebantfu bayo, kanjalo nakuto tinketane tebubi, ngifisa kutsi nime nicine kulenkhululelo lenikhululwe ngayo, futsi nekutsi ningatsembi muntfu kutsi abe yinkhosi ngetulu kwenu.

14 Ngetulu kwaloko ningetsembi namunye kutsi abe ngumfundzisi noma sikhonti senu, ngaphandle kwekutsi abe ngumuntfu waNkulunkulu, ahambe etindleleni takhe futsi ayigcine imiyaleto yakhe.

15 Alma wabafundzisa ngalendlela bantfu bakhe, kutsi wonkhe muntfu kufanele atsandze makhelwane wakhe njengobe atitsandza yena, kute kungabi khona incabano emkhatsini wabo.

16 Manje Alma bekangumphristi wabo lomkhulu, ngoba yena angumsunguli welibandla labo.

17 Futsi kwenteka kutsi kute namunye lowaniketwa ligunya lekushumayela noma kufundzisa ngaphandle kwekutsi alitfole ngaye livela kuNkulunkulu. Ngako-ke wabeka bonkhe baphristi kanye nabo bonkhe bafundzisi babo; futsi kute lababekwa ngaphandle kwekutsi babe bantfu labalungile.

18 Ngako-ke babagadza bantfu babo, futsi babondla ngetintfo letiphatselene nekulunga.

19 Futsi kwenteka kutsi bacala kuphumelela kakhulu eveni; balibita lelive ngekutsi yiHelamu.

20 Futsi kwenteka kutsi bandza baphindze baphumelela kakhulu eveni laseHelamu; bakha lidolobha, lebalibita ngekutsi lidolobha laseHelamu.

21 Noko iNkhosi ibona kufanele kutsi ibajezise bantfu bayo; yebo, iyakuvivinya kubeketela kwabo kanye nelukholo lwabo.

22 Noko—loyo lobeka litsemba lakhe kuyo nguye kanye loyo loyawuphakanyiswa ngelilanga lekugcina. Yebo, futsi kwaba njalo nakulaba bantfu.

23 Ngoba buka, ngitawunikhombisa kutsi bebaletfwe ebugcilini, futsi bekute namunye lobekangabakhulula ngaphandle kweNkhosi Nkulunkulu wabo, yebo, Nkulunkulu wa-Abrahama kanye na-Isaka kanye naJakobe.

24 Futsi kwenteka kutsi yabakhulula, yawakhombisa emandla ayo lamakhulu kubo, yaba yinkhulu injabulo yabo.

25 Ngoba buka, kwenteka kutsi ngesikhatsi baseveni laseHelamu, yebo, edolobheni laseHelamu, ngesikhatsi balima eveni lonkhe, buka imphi yemaLamani yayiseminceleni yalelive.

26 Futsi kwenteka kutsi bomnakabo Alma babaleka emasimini abo, babutsana ndzawonye edolobheni laseHelamu; bebanekwesaba lokukhulu ngenca yekuchamuka kwemaLamani.

27 Kodvwa Alma wahamba wema emkhatsini wabo, wabakhutsata kutsi bangesabi, kodvwa bakhumbule iNkhosi Nkulunkulu wabo futsi iyawubakhulula.

28 Ngako-ke bakwehlisa kwesaba kwabo, bacala kukhala eNkhosini kutsi itsambise tinhlitiyo temaLamani, kute angababulali nebafati babo, kanye nebantfwana babo.

29 Futsi kwenteka kutsi iNkhosi yatitsambisa tinhlitiyo temaLamani. Alma kanye nabomnakabo bahamba batinikela etandleni tawo; futsi emaLamani alitsatsa live laseHelamu.

30 Manje emabutfo emaLamani, lawo labekalandzele ngemuva bantfu benkhosi Limhi, abesalahlekile ehlane emalanga lamanyenti.

31 Futsi buka, abesatfole labo baphristi benkhosi Nowa, endzaweni lebebayibita ngekutsi yi-Amuloni; futsi besebacale kutsatsa live lase-Amuloni sebacale kulima umhlabatsi.

32 Manje libito lemholi walabo baphristi bekungu-Amuloni.

33 Futsi kwenteka kutsi Amuloni wawancenga emaLamani; ngetulu kwaloko watfumela bafati babo, labebangemadvodzakati emaLamani, kutsi ancenge bomnakabo, kutsi angawabulali emadvodza abo.

34 EmaLamani aba nebubele ku-Amuloni kanye nakubomnakabo, futsi akatange ababulale ngenca yebafati babo.

35 Amuloni kanye nabomnakabo bahlangana nemaLamani, futsi bebahamba ehlane bafuna live laNefi ngesikhatsi batfola live laseHelamu, lelalihlala Alma kanye nabomnakabo.

36 Futsi kwenteka kutsi emaLamani amtsembisa Alma kanye nabomnakabo, kutsi uma bangabakhombisa indlela lebeyitobaholela eveni laNefi bangabanika imphilo kanye nenkhululeko yabo.

37 Kodvwa emvakwekutsi Alma sekabakhombisile indlela lebeyiya eveni laNefi emaLamani akasigcinanga setsembiso sawo; kodvwa abeka bogadzi batungeleta live laseHelamu, ngetulu kwa-Alma kanye nabomnakabo.

38 Futsi insalela yabo yahamba yaya eveni laNefi; kwatsi incenye yabo yabuyela eveni laseHelamu, ngetulu kwaloko baletsa kanye nabo bafati kanye nebantfwana babogadzi labo labebashiywe eveni.

39 Futsi inkhosi yemaLamani yayinikete Amuloni kutsi abe yinkhosi kanye nembusi ngetulu kwebantfu bakhe, labebaseveni laseHelamu; noko abengetukuba nemandla ekwenta noma yini lebeyingahambisani nentsandvo yenkhosi yemaLamani.