INcwadzi yaMosiya

1 Manje besekute incabano eveni lonkhe laseZarahemla, emkhatsini wabo bonkhe bantfu labebabenkhosi Bhenjamini, kangangekutsi inkhosi Bhenjamini yaba nekuthula njalo onkhe emalanga ayo lebekasele.

2 Futsi kwenteka kutsi yayinemadvodzana lamatsatfu; yawetsa emabito abo kutsi nguMosiya, Helorumu, kanye naHelamani. Yenta kutsi afundziswe lonkhe lulwimi lwabokhokho bakhe, kute ngaloko abe ngemadvodzana lanekucondza; kute ati mayelana netiphrofetho letatikhulunywe ngemilomo yabokhokho babo, letatiletfwe kubo ngesandla seNkhosi.

3 Ngetulu kwaloko yawafundzisa mayelana nemibhalo leyayicoshwe kubongcwengcwe belitfusi, yatsi: Madvodzana ami, ngifuna kutsi nikhumbule kutsi kube bekungasiko ngenca yalaba bongcwengcwe, labacuketse lemibhalo kanye nemiyaleto, ngabe sahlala ekungatini, nangalesi sikhatsi samanje, singatati timfihlakalo taNkulunkulu.

4 Ngoba bekungeke kwenteke kutsi babe, Lehi, akwati kutikhumbula tonkhe leti tintfo, kutsi atifundzise bantfwana bakhe, ngaphandle kwekutsi asitwe ngulaba bongcwengcwe; ngoba yena afundziswe ngelulwimi lwemaGibhithe ngako-ke wakwati kuyifundza lemibhalo lecoshiwe, waphindze wayifundzisa nebantfwana bakhe, kute ngaloko bona bakwati kuyifundzisa bantfwana babo, kute kugcwaliseke imiyaleto yaNkulunkulu, kwehle kute kube ngulesi sikhatsi samanje.

5 Ngitsi kini, madvodzana ami, kube bekungasiko ngenca yaleti tintfo, letigciniwe talondvolotwa ngesandla saNkulunkulu, kute sitifundze siphindze sicondze ngetimfihlakalo takhe, siphindze sibe nemiyaleto yakhe njalonjalo phambi kwemehlo etfu, nabokhokho betfu bebayoncishelwa lukholo, besiyokuba njengabomnaketfu, emaLamani, wona langati lutfo mayelana naleti tintfo, futsi akatikholwa noma afundziswa ngato, ngenca yemasiko abokhokho, langakalungi.

6 O madvodzana ami, ngifuna kutsi nikhumbule kutsi leti tinkhulumo tiliciniso, nekutsi lemibhalo iliciniso. Bukani, nabongcwengcwe baNefi, labacuketse imibhalo kanye netinkhulumo tabokhokho betfu kusukela ngesikhatsi bashiya eJerusalema kute kube manje, baliciniso; futsi singati ngekuciniseka kwabo ngenca yekutsi sinabo phambi kwemehlo etfu.

7 Manje, madvodzana ami, ngifuna kutsi nikhumbule kutsi nibahlolisise ngekukhutsala, kute nizuze ngaloko; ngifuna kutsi niyigcine imiyaleto yaNkulunkulu, kute niphumelele eveni njengekwetetsembiso iNkhosi leyatenta kubokhokho betfu.

8 Tinyenti kakhulu tintfo inkhosi Bhenjamini leyatifundzisa emadvodzana ayo, letingakabhalwa kulencwadzi.

9 Futsi kwenteka kutsi ngesikhatsi inkhosi Bhenjamini seyicedzile kufundzisa emadvodzana ayo, yabese iba yindzala, yabese iyabona kutsi besekufanele kutsi masinyane nje ihambe ngendlela yawo wonkhe umhlaba; ngako-ke yakubona kufanele kutsi inikete umbuso kuyinye yemadvodzana ayo.

10 Ngako-ke yenta kutsi Mosiya aletfwe phambi kwayo; lawa ngemavi leyawakhuluma kuye, itsi: Ndvodzana yami, ngifuna kutsi wente simemetelo kulo lonkhe lelive emkhatsini wabo bonkhe laba bantfu, noma bantfu baZarahemla, kanye nakubantfu baMosiya labahlala kulelive, kute ngaloko bagcogcelwe ndzawonye; ngoba kusasa ngitomemetela kubo laba bantfu bami ngemlomo wami kutsi wena sewuyinkhosi kanye nembusi ngetulu kwabo laba bantfu, iNkhosi Nkulunkulu wetfu lesinike bona.

11 Ngetulu kwaloko, ngitonika laba bantfu libito, kute ngaloko behlukaniswe kubo bonkhe bantfu iNkhosi Nkulunkulu leyabakhipha eveni laseJerusalema; loku ngikwenta ngoba bebabantfu labakhutsele ekugcineni imiyaleto yeNkhosi.

12 Ngibaniketa libito lelingeke lesulwe nanini, ngaphandle kwekutsi kube ngenca yesiphambeko.

13 Yebo, ngetulu kwaloko ngitsi kuwe, uma kusho kutsi laba bantfu labatsandvwako kakhulu yiNkhosi bangawela esiphambekweni, futsi babe bantfu lababi kanye nalabaphingako, kute iNkhosi ibanikele etitseni tabo, kute ngaloko babe butsakatsaka njengabomnakabo, ayisenokubalondvolota ngemandla ayo langenakulinganiswa nalamangalisako, njengobe kute kube manje ibalondvolotile bokhokho betfu.

14 Ngoba ngitsi kuwe, kube ayiyelulanga ingalo yayo ekulondvoloteni bokhokho betfu bebayowela etandleni temaLamani, babe ngulabahlushwako kunzondo yawo.

15 Futsi kwenteka kutsi emvakwekutsi inkhosi Bhenjamini seyicedzile kukhuluma ngaleti tintfo kundvodzana yayo, yayiyaleta mayelana nato tonkhe tindzaba tembuso.

16 Ngetulu kwaloko, yaphindze yayiyaleta mayelana nemibhalo leyayicoshwe kubongcwengcwe belitfusi; kanjalo nangabongcwengcwe baNefi; kanjalo, nangenkemba yaLabani, kanye nebhola noma inkhombandlela, leyahola bokhokho betfu ekhatsi ehlane, leyayilungiswe ngesandla seNkhosi kute ngaloko ibahole, wonkhe muntfu ngekulalela kanye nekukhutsala lebebamniketa kona.

17 Ngako-ke, njengobe bebangaketsembeki abatange baphumelele noma bachubeke ngeluhambo lwabo, kodvwa babuyiselwa emuva, batehlisele kungajabuli kwaNkulunkulu etikwabo; ngaloko-ke bashaywa ngendlala kanye netinhlupheko letibuhlungu, kubaphehla kutsi bakhumbule umsebenti wabo.

18 Manje, kwenteka kutsi Mosiya wahamba wenta njengobe uyise abemyaletile, wamemetela kubo bonkhe bantfu labebaseveni laseZarahemla kute ngaloko bagcogcane ndzawonye, bahambe bakhuphukele ethempelini kuyokuva emavi uyise labekatawuwakhuluma kubo.