1 Manje kwenteka kutsi kuhlushwa lokwatfwaliswa libandla ngulabangakholwa kwaba kukhulu kakhulu kangangekutsi libandla lacala lavungama, lakhonona kubaholi balo mayelana naloludzaba; bakhonona naku-Alma. Futsi Alma walubeka ludzaba phambi kwenkhosi yabo, Mosiya. Mosiya wabonisana nebaphristi bakhe.

2 Futsi kwenteka kutsi inkhosi Mosiya yatfumela simemetelo kulo lonkhe live jikelele kutsi kube bete muntfu longakholwa lotawuhlupha noma ngubani walabo labebabelibandla laNkulunkulu.

3 Futsi kwaba khona umyalo locinile kuwo onkhe emabandla jikelele wekutsi kube bete kuhluphana emkhatsini wabo, nekutsi kufanele kube khona kulingana emkhatsini wabo bonkhe bantfu;

4 Nekutsi bangavumeli kutigcabha nekutikhukhumeta kuphatamise kuthula kwabo; nekutsi wonkhe umuntfu akamatise makhelwane wakhe njengobe atatisa yena, basebente ngetandla tabo lucobo kutondla bona.

5 Yebo, futsi bonkhe baphristi kanye nebafundzisi babo kufanele basebente ngetandla tabo lucobo kute batondle bona, ngaso sonkhe sikhatsi ngaphandle nangabe bagula, noma badzinge kakhulu; futsi ngekwenta leti tintfo, bagcwaliswa ngemusa waNkulunkulu.

6 Kwacala kwaba nekuthula lokukhulu futsi eveni; nebantfu bacala kuba banyenti kakhulu, bacala kuhlakateka ndzawo tonkhe emhlabeni wonkhe, yebo, enyakatfo kanye naseningizimu, emphumalanga kanye nasenshonalanga, bakha emadolobha lamakhulu kanye nemadolobhana kuwo onkhe emagumbi lamane elive.

7 Futsi iNkhosi yabavakashela yaphindze yabaphumelelisa, baba banyenti futsi baba bantfu labanotsile.

8 Manje emadvodzana aMosiya bekabalwa kanye nalabo labebangakholwa; futsi ngalokunjalo nayinye yemadvodzana a-Alma bekabalwa nabo, abitwa ngekutsi ngu-Alma, lekulibito leyise; noko waba yindvodza lekhohlakele kakhulu futsi akhonta tithico. Bekayindvodza leyayinebuciko, aphindze abayenga kakhulu bantfu; ngako-ke wahola labanyenti bantfu kutsi bente ngendlela yebubi bakhe.

9 Futsi waba ngulesikhulu sivimbelo ekutfutfukeni kwelibandla laNkulunkulu; antjontja tinhlitiyo tebantfu; abanga kuphikisana lokukhulu emkhatsini webantfu; aniketa litfuba sitsa saNkulunkulu kutsi sisebentise emandla aso ngetulu kwabo.

10 Manje kwenteka kutsi ngesikhatsi ahamba azulazula acitsa libandla laNkulunkulu, ngoba bekahamba ngasense azulazula kanye nemadvodzana aMosiya afuna kucitsa libandla, futsi afuna kudukisa bantfu beNkhosi, ngekuphikisana nemiyaleto yaNkulunkulu, noma nenkhosi—

11 Futsi njengobe ngitsite kini, njengobe bebahamba bazulazula bavukela Nkulunkulu, buka ingilosi yeNkhosi yavela kubo; yehla shangatsi yayisefini; yakhuluma shangatsi kwakulivi lekudvuma kwelitulu, lelenta kutsi umhlaba labebeme kuwo utamatame.

12 Kwaba kukhulu kwetfuka kwabo, kangangekutsi bawela phansi, futsi abatange bawacondze lawo mavi leyawakhuluma nabo.

13 Noko yaphindze yamemeta, yatsi: Alma, vuka ute ngaphambili, ngoba kungani uhlupha libandla laNkulunkulu na? Ngoba iNkhosi itsite: Leli libandla lami, ngitawulisungula; futsi kute intfo leyawulicitsa, ngaphandle kwekutsi kube tiphambeko tebantfu bami.

14 Ngetulu kwaloko, ingilosi yatsi: Buka, iNkhosi iyivile imithandazo yebantfu bayo, kanjalo nemithandazo yenceku yayo, Alma, longuyihlo; ngoba uthandaze ngelukholo lolukhulu mayelana nawe kutsi uletfwe ekwatini liciniso; ngako-ke, ngalena nhloso ngite kutawukukholwisa ngemandla kanye neligunya laNkulunkulu, kute imithandazo yetinceku takhe iphendvuleke ngekwelukholo lwabo.

15 Manje buka, ungawangabata yini emandla aNkulunkulu na? Ngoba buka, ngabe livi lami alitamatamisi umhlaba yini? Futsi ngetulu kwaloko awungiboni yini phambi kwakho na? Futsi ngitfunyiwe ngivela kuNkulunkulu.

16 Manje ngitsi kuwe: Hamba, ukhumbule kutfunjwa kwabokhokho bakho eveni laseHelamu, kanye naseveni laNefi; futsi ukhumbule kutsi tinkhulu kanganani tintfo labentele tona; ngoba bebasebugcilini, futsi ubakhululile. Manje ngitsi kuwe, Alma, hamba ngendlela yakho, ungaphindzi ufune kubhubhisa libandla, kute imithandazo yabo iphendvulwe, noma ngabe wena lucobo lwakho utawufuna kulahlwa.

17 Manje kwenteka kutsi lawa bekungemavi ekugcina ingilosi leyawakhuluma ku-Alma, yase iyahamba.

18 Manje Alma kanye nalabo bekanabo baphindze bawela phansi, ngoba kwaba kukhulu kwetfuka kwabo, ngoba ngewabo emehlo bebabone ingilosi yeNkhosi; futsi livi layo lalinjengekudvuma kwelitulu, lelatamatamisa umhlaba, futsi bati kutsi bekute lutfo lolwalungatamatamisa umhlaba ngaphandle kwemandla aNkulunkulu futsi ente kutamatame shangatsi kwakutohlukana ekhatsi.

19 Manje kwetfuka kwa-Alma kwaba kukhulu kakhulu kangangekutsi waphendvuka simungulu, kangangekutsi akakhonanga kuvula umlomo wakhe; yebo, futsi waba butsakatsaka, ngendlela yekutsi akakhonanga ngisho nekunyakatisa tandla takhe; ngako-ke watsatfwa ngulabo labekanabo, wetfwalwa angakhoni ngisho kwentani, wate wayawubekwa phambi kweyise.

20 Futsi balandzisa kuyise konkhe lobekwentekile kubo; neyise watfokota, ngoba bekati kutsi bekungemandla aNkulunkulu.

21 Wenta kutsi sicuku sibutsane ndzawonye kute sibone kutsi iNkhosi iyenteleni indvodzana yakhe, kanjalo nalabo labebanayo.

22 Wenta kutsi baphristi babutsane ndzawonye; bacala kuzila, kanye nekuthandaza eNkhosini Nkulunkulu wabo kutsi ivule umlomo wa-Alma, kute akhulume, nekutsi emalunga akhe atfole emandla awo—kute emehlo ebantfu avuleke kutsi babone baphindze bati ngebuhle kanye nenkhatimulo yaNkulunkulu.

23 Futsi kwenteka kutsi emvakwekutsi sebazile kudla futsi bathandaza sikhatsi lesingemalanga lamabili kanye nebusuku lobubili, emalunga a-Alma atfola emandla awo, wasukuma wacala kukhuluma kubo, wabancenga kutsi badvudvuteke.

24 Ngoba, watsi, sengiphendvukile etonweni tami, futsi sengihlengwe yiNkhosi; bukani sengitelwe nguMoya.

25 Futsi iNkhosi itsite kimi: Ungamangali kutsi bonkhe bantfu, yebo, besilisa nebesifazane, tive tonkhe, tihlobo, tilimi kanye nebantfu, kufanele batalwe kabusha; yebo, batalwe nguNkulunkulu, bashintje esimeni sabo sekunaka kwenyama nesekuwa, babe sesimeni sekulunga, bahlengwe nguNkulunkulu, babe ngemadvodzana nemadvodzakati akhe.

26 Ngalendlela baba tidalwa letinsha; futsi ngaphandle kwekutsi bente loku, kute ngisho nalencane indlela kutsi badle lifa lembuso waNkulunkulu.

27 Ngitsi kini, ngaphandle kwekutsi kube njalo, kufanele balahlwe; futsi loku ngiyakwati, ngenca yekutsi ngicishe ngalahlwa.

28 Noko, emvakwekwendlula ekuhluphekeni lokukhulu, ngiphendvuka ngisondzele ekufeni, iNkhosi lenebubele ibone kufanele kutsi ingihlwitse ngiphume ekusheni kwaphakadze, futsi sengitelwe nguNkulunkulu.

29 Umphefumulo wami uhlengiwe elusizini nasetibopheni tebubi. Bengisemhumeni lomnyama bhuce; kodvwa manje sengibona kukhanya lokumangalisako kwaNkulunkulu. Umphefumulo wami bewuhlushwe kuhlupheka kwaphakadze; kodvwa ngihlwitsiwe, futsi umphefumulo wami awusenabuhlungu.

30 Ngamlahla uMhlengi wami, futsi ngakuphika naloko lobekukhulunywe bokhokho betfu; kodvwa manje kute babone kutsi utawufika, nekutsi uyatikhumbula tonkhe tidalwa latibumbile, utawutibonakalisa kubo bonkhe.

31 Yebo, onkhe emadvolo ayawukhotsama, futsi tonkhe tilimi tiyawuvuma phambi kwakhe. Yebo, nangelilanga lekugcina, ngesikhatsi bonkhe bantfu bayawukuma kutsi behlulelwe nguye, ngaleso sikhatsi bayawuvuma kutsi yena unguNkulunkulu; ngaleso sikhatsi bayawuvuma, labo labangakholwa kuNkulunkulu emhlabeni, kutsi kwehlulela kwesijeziso saphakadze kulungile kubo; futsi bayawutfutfumela, bachachatele, futsi bashwaphane ngaphansi kwekubona kweliso lakhe lelibona konkhe.

32 Manje kwenteka kutsi Alma wacala kusukela ngalesi sikhatsi kuya phambili kutsi afundzise bantfu, kanye nalabo labebana-Alma ngesikhatsi ingilosi ichamuka kubo, bahamba batungeleta live, bamemetela kubo bonkhe bantfu tintfo labebativile nalebebatibonile, futsi bashumayela livi laNkulunkulu ekuhluphekeni lokukhulu, bahlushwa kakhulu ngulabo labebangakholwa, bashaywa ngulabanyenti babo

33 Kodvwa nanoma kungenca yako konkhe loku, banika indvudvuto lenkhulu ebandleni, bacinisekisa lukholo lwabo, futsi babakhutsata ngekumela bulukhuni kanye nangekuhlupheka lokukhulu kutsi bagcine imiyaleto yaNkulunkulu.

34 Labane babo bekungemadvodzana aMosiya; emabito abo bekungu-Amoni, na-Aroni, na-Omneri kanye naHimni; lawa bekungemabito emadvodzana aMosiya.

35 Futsi bahamba balicedza lonkhe live laseZarahemla, nasemkhatsini wabo bonkhe bantfu labebangaphansi kwekubuswa yinkhosi Mosiya, ngekutikhandla betama kulungisa konkhe konakala labebakwentile ebandleni, bavuma tonkhe tono tabo, futsi bamemetela tonkhe tintfo labebatibonile, bachaza tiphrofetho kanye nemibhalo lengcwele kubo bonkhe labebanesifiso sekukuva.

36 Futsi ngalendlela baba tikhali etandleni taNkulunkulu ekuletseni labanyenti ekwatini liciniso, yebo, ekwatini uMhlengi wabo.

37 Futsi babusiswe kangakanani! Ngoba bakumemetela kuthula; batimemetela tindzaba letimnandzi tebuhle; futsi bamemetela ebantfwini kutsi iNkhosi iyabusa.