1 Futsi kwenteka kutsi saphindze sacala kusungula umbuso saphindze sahlala eveni ngekuthula. Ngenta kutsi kube khona tikhali temphi talo lonkhe luhlobo letentiwako, kute ngaloko ngibe netikhali tebantfu bami ngesikhatsi emaLamani aphindze eta kutawukulwa nebantfu bami.

2 Ngabeka bogadzi batungeleta live, kute emaLamani angaphindzi atselekele etikwetfu singakacapheli bese ayasibhubhisa; ngaleyo ndlela ngabavikela bantfu bami kanye nemihlambi yami, ngabagcina ekuweleni etandleni tetitsa tetfu.

3 Futsi kwenteka kutsi salitsatsa live labokhokho betfu iminyaka leminyenti, yebo, sikhatsi lesiyiminyaka lengemashumi lamabili nakubili.

4 Ngenta kutsi emadvodza alime umhlabatsi, aphindze akhulise tonkhe tinhlobo talokuyinhlavu kanye nato tonkhe titselo letitinhlobonhlobo.

5 Ngenta kutsi besifazane batfunge, futsi batikhandle, basebente, bente tonkhe tinhlobo telineni lecolisakele, yebo, kanye nendvwangu leyinhlobonhlobo, kute sembatsise bungcunu betfu; ngaleyo ndlela saphumelela kulelive—ngaleyo ndlela saba nekuthula njalo kulelive sikhatsi lesiyiminyaka lengemashumi lamabili nakubili.

6 Futsi kwenteka kutsi inkhosi Lamani yafa, kwatsi indvodzana yayo yacala kubusa esikhundleni sayo. Yacala kuphehla bantfu bayo kutsi bavukele bantfu bami; ngako-ke bacala kulungiselela imphi, nekutohlasela bantfu bami.

7 Kodvwa bese ngititfumele tinhloli tami tatungeleta live laseShemloni, kute ngitfole ngekutilungiselela kwabo, kute ngibacaphele, kute bangatseleki etikwebantfu bami bababhubhise.

8 Futsi kwenteka kutsi bakhuphukela enyakatfo yelive laseShilomu, kanye nemabutfo abo lamanyenti, emadvodza ahlome ngebutjoki, nangemicibisholo, nangetinkemba, nangabocelemba, nangematje, kanye nangetilingi; futsi bebahhulile etinhloko tabo tate tangabi nalutfo; babophe emabhande etikhumba atungelete tinkhalo tabo.

9 Futsi kwenteka kutsi ngenta kutsi besifazane kanye nebantfwana bebantfu bami babhaciswe ehlane; ngetulu kwaloko ngenta kutsi onkhe emadvodza lamadzala ami labekakwati kuphatsa tikhali, kanjalo nawo onkhe emajaha ami labekakwati kuphatsa tikhali, abutsane ndzawonye kute ahambe ayawukulwa nemaLamani; ngababeka ngekwetigaba tabo, wonkhe umuntfu ngekweminyaka yakhe.

10 Futsi kwenteka kutsi sahamba sakhuphuka kutsi siyawukulwa nemaLamani; ngisho nanami lucobo, eminyakeni yami yebudzala, ngahamba ngakhuphuka ngayawukulwa nemaLamani. Futsi kwenteka kutsi sahamba sakhuphuka ngemandla eNkhosi sayawukulwa.

11 Manje, emaLamani bekangati lutfo mayelana neNkhosi, noma ngemandla eNkhosi, ngako-ke bebancike emandleni abo nje kuphela. Noko bebabantfu labanemandla, ngekwemandla ebantfu.

12 Bekatidlova, anelunya, futsi abantfu labomele ingati, akholelwa emasikweni abokhokho bawo, labengukutsi—Akholelwa kutsi wona akhishwa eveni laseJerusalema ngenca yebubi babokhokho bawo, nekutsi wona aphatfwa kabi ehlane bomnakabo, ngetulu kwaloko aphatfwa kabi ngesikhatsi adzabula lwandle;

13 Ngetulu kwaloko, nekutsi wona aphatfwa kabi ngesikhatsi aseveni lekucala lebelilifa lawo, emvakwekutsi sekadzabule lwandle, futsi konkhe loku kungenca yekutsi Nefi bekatsembekile kakhulu ekugcineni imiyaleto yeNkhosi—ngako-ke bekatsandvwa yiNkhosi, ngoba iNkhosi yayiyiva imithandazo yakhe futsi iyiphendvula, waphindze wahamba embili kulo luhambo lwabo ehlane.

14 Bomnakabo bamtfukutselela ngenca yekutsi bebangacondzi ngetento teNkhosi; ngetulu kwaloko bamtfukutselela emantini ngenca yekutsi batenta lukhuni tinhlitiyo tabo ngekumelana neNkhosi.

15 Ngetulu kwaloko, bamtfukutselela ngesikhatsi sebafike eveni lesetsembiso, ngenca yekutsi batsi yena utsatse kuphatfwa kwebantfu etandleni tabo; futsi bebafuna kumbulala.

16 Ngetulu kwaloko, bamtfukutselela ngenca yekutsi wesuka waya ehlane njengobe iNkhosi beyimyaletile, futsi watsatsa imibhalo lebeyicoshwe kubongcwengcwe belitfusi, ngoba batsi wabaphanga.

17 Ngaloko afundzise bantfwana bawo kutsi babatondze, nekutsi bababulale, nekutsi babagebenge baphindze babaphange, futsi bente konkhe labebangakwenta kutsi bababhubhise; ngako-ke banenzondo yaphakadze kubantfwana baNefi.

18 Kungalesi sizatfu inkhosi Lamani, ngemacebo akhe, kanye nebucili bemanga akhe, kanye netetsembiso takhe letinhle, wangikhohlisa, kutsi ngiletse labantfu bami kulelive, kute bababhubhise; yebo, futsi sihluphekile leminyaka leminyenti sikulelive.

19 Manje mine, Zenifi, emvakwekutsi sengitishito tonkhe leti tintfo kubantfu bami mayelana nemaLamani, ngabavusetela kutsi bahambe bayokulwa ngemandla abo, babeke litsemba labo eNkhosini; ngako-ke, salwa nawo, buso nebuso.

20 Futsi kwenteka kutsi sawacosha aphuma eveni letfu; sawabulala ngekubulala lokukhulu, aba manyenti kangangekutsi asiwabalanga.

21 Futsi kwenteka kutsi saphindze sabuyela eveni letfu, nebantfu bami baphindze bacala kwelusa imihlambi yabo, kanye nekulima umhlabatsi wabo.

22 Manje mine, sengimdzala, ngawuniketa umbuso kumunye wemadvodzana ami; ngako-ke, angisasho lutfo. Futsi shangatsi iNkhosi ingababusisa bantfu bami. Amen.