1 Manje kwenteka kutsi Zenifi waniketa Nowa umbuso, lomunye wemadvodzana akhe; ngako-ke Nowa wacala kubusa esikhundleni sakhe; futsi akahambanga etindleleni teyise.

2 Ngoba buka, akatange ayigcine imiyaleto yaNkulunkulu, kodvwa wahamba ngetifiso tenhlitiyo yakhe. Bekanebafati labanyenti kanye netingani. Wenta kutsi bantfu bakhe bone, baphindze bente loko lokwakunengekile emehlweni eNkhosi. Yebo, futsi benta bugwadla kanye nalo lonkhe luhlobo lwebubi.

3 Wabeka umtselo wencenye yinye kulokusihlanu kuko konkhe labebanako, incenye yinye kulokusihlanu yeligolide labo kanye nesiliva yabo, nencenye yinye kulokusihlanu yensimbi yabo leligugu, neyekhopha yabo, neyelitfusi labo kanye neyensimbi yabo; nencenye yinye kulokusihlanu yalokukhuluphalisiwe kwabo; futsi ngalokunjalo nencenye yinye kulokusihlanu yako konkhe lokuyinhlavu kwabo.

4 Konkhe loku wakutsatsa kute atondle yena, nebafati bakhe kanye netingani takhe; kanjalo nebaphristi bakhe, kanye nebafati babo kanye netingani tabo; ngako-ke besekatishintjile tindzaba tembuso.

5 Ngoba wabehlisa bonkhe baphristi labebabekwe nguyise, wabeka labasha esikhundleni sabo, njengalabo labebaphakeme etinhlitiyweni tabo.

6 Yebo, futsi bondliwa ebuvileni babo, kanye nasekukhonteni kwabo tithico, kanye nasebugwadleni babo, ngemitselo inkhosi Nowa leyayiyibeke etikwebantfu bayo; ngaleyo ndlela bantfu basebenta kakhulu ekondleni bubi.

7 Yebo, futsi nabo baba ngulabakhonta tithico, ngenca yekutsi bebakhohliswe ngemavi lalite kanye nalayengako enkhosi kanye nebaphristi; ngoba bakhuluma tintfo letiyengako kubo.

8 Futsi kwenteka kutsi inkhosi Nowa yakha takhiwo letinyenti naletinhle kakhulu; yatihlobisa ngemsebenti lomuhle welugodvo, kanye nato tonkhe tintfo letiligugu, teligolide, netesiliva, netensimbi, netelitfusi, netensimbi leligugu, kanye netekhopha;

9 Ngetulu kwaloko watakhela sigodlo lesikhulu, kanye nesihlalo sebukhosi emkhatsini waso, konkhe lokwakukwesigodvo lesihle futsi kuhlotjiswe ngeligolide nangesiliva kanye nangetintfo letiligugu.

10 Ngetulu kwaloko wenta kutsi tisebenti takhe tente tonkhe tinhlobo temsebenti lomuhle ngekhatsi kwetindvonga telithempeli, ngesigodvo lesihle, nangekhopha, kanye nangelitfusi.

11 Tihlalo letatibekelwe baphristi labakhulu, letatingetulu kunato tonkhe letinye tihlalo, watihlobisa ngeligolide lelimsulwa, futsi wenta kutsi kwakhiwe ludvonga phambi kwato kuphakama kwalo kuma esifubeni kute baphumute imitimba yabo kanye nemikhono yabo kulo ngesikhatsi bakhuluma emanga kanye nemavi lalite kubantfu bakhe.

12 Futsi kwenteka kutsi wakha umbhoshongo dvute nelithempeli; yebo, umbhoshongo lomudze kakhulu, lomudze ngendlela yekutsi abengakhona kuma etulu kwesicongo sawo abuke live laseShilomu, kanjalo nelive laseShemloni, lokwakungelemaLamani; futsi bekangakhona kubuka live ndzawo tonkhe.

13 Futsi kwenteka kutsi wenta kutsi kwakhiwe takhiwo letinyenti eveni laseShilomu; wenta kutsi kwakhiwe umbhoshongo lomkhulu egcumeni lelalisenyakatfo yelive laseShilomu, lebekuyindzawo yekuphumula yebantfwana baNefi ngesikhatsi babaleka baphuma eveni; futsi loku wakwenta ngemcebo lawutfola ngemtselo webantfu bakhe.

14 Futsi kwenteka kutsi wabeka inhlitiyo yakhe emcebeni wakhe, wacitsa sikhatsi sakhe ngekuhlala ngesiphitsiphitsi nebafati bakhe kanye netingani takhe; kanjalo nebaphristi bakhe bacitsa sikhatsi sabo netingwadla.

15 Futsi kwenteka kutsi wahlanyela tivini tatungeleta live; wakha tikhamo teliwayini, wenta liwayini lelinyenti; ngako-ke waba ngumnatsi weliwayini, kanye nebantfu bakhe.

16 Futsi kwenteka kutsi emaLamani acala kuhlasela bantfu bakhe, afikela labalinani lelincane, ababulalela emasimini abo, nangesikhatsi beluse imihlambi yabo.

17 Inkhosi Nowa yatfumela bogadzi batungeleta live kute awagcine akhashane; kodvwa ayitfumelanga linani lelenele, emaLamani atseleka etikwabo ababulala, achuba imihlambi leminyenti yabo ayikhipha eveni; ngako-ke emaLamani acala kubabhubhisa, kanye nekusebentisa inzondo yawo kubo.

18 Futsi kwenteka kutsi inkhosi Nowa yatfumela emabutfo ayo kuyawukulwa nawo, bawabuyisela emuva, noma bawabuyisela emuva kwesikhashana; ngako-ke, babuyela emuva batfokotile emphangweni yabo.

19 Manje, ngenca yaloku kuncoba lokukhulu baphakama ngekutigcabha kwetinhlitiyo tabo, batigabatisa ngemandla abo, basho nekutsi labangemashumi lasihlanu babo bangamelana netinkhulungwane temaLamani; futsi batikhukhumeta ngalendlela, bajabula ngengati, kanye nangekucitseka kwengati yabomnakabo, loku bakwenta ngenca yebubi benkhosi yabo kanye nebaphristi.

20 Futsi kwenteka kutsi bekukhona indvodza emkhatsini wabo libito layo bekungu-Abinadi; wahamba emkhatsini wabo, wacala kuphrofetha, watsi: Bukani, naku lokushiwo yiNkhosi, ingiyalete ngalendlela, yatsi, Hamba, utsi kulabantfu, naku lokushiwo yiNkhosi—Maye kulaba bantfu, ngoba ngitibonile tinengiso tabo, nebubi babo, kanye nebugwadla babo; futsi ngaphandle kwekutsi baphendvuke ngitawubajezisa ngentfukutselo yami.

21 Futsi ngaphandle kwekutsi baphendvuke baphindze babuyele eNkhosini Nkulunkulu wabo, buka ngitawubanikela etandleni tetitsa tabo; yebo, bayawuletfwa ebugcilini; bayawuhlushwa ngesandla setitsa tabo.

22 Futsi kuyawukwenteka kutsi bayawukwati kutsi mine ngiyiNkhosi Nkulunkulu wabo, futsi nginguNkulunkulu lonesikhwele, ngiyabujezisa bubi bebantfu bami.

23 Futsi kuyawukwenteka kutsi ngaphandle kwekutsi labantfu baphendvuke babuyele eNkhosini Nkulunkulu wabo, bayawuletfwa ebugcilini; kute namunye loyawubakhulula, ngaphandle kwekutsi kube yiNkhosi Nkulunkulu Somandla.

24 Yebo, futsi kuyawukwenteka kutsi ngesikhatsi bakhala kimi ngitawuphuta kukuva kukhala kwabo; yebo, futsi ngitawuvumela kutsi bashaywe titsa tabo.

25 Ngaphandle kwekutsi baphendvuke ngesembatfo selisaka kanye nemlotsa, bakhale kakhulu eNkhosini Nkulunkulu wabo, angeke ngiyive imithandazo yabo, noma ngibakhulule etinhluphekweni tabo; naku lokushiwo yiNkhosi, futsi ingiyalete kanje.

26 Manje kwenteka kutsi ngesikhatsi Abinadi sekawakhulumile lamavi kubo bamtfukutselela, bafuna kutsatsa imphilo yakhe; kodvwa iNkhosi yamkhulula etandleni tabo.

27 Manje ngesikhatsi inkhosi Nowa seyivile ngalamavi labekakhulunywe ngu-Abinadi kubantfu, nayo ngalokunjalo yatfukutsela; yatsi: Ngubani Abinadi, kutsi mine nebantfu bami singahlulelwa nguye, noma ngubani iNkhosi, leyawuletsa etikwebantfu bami inhlupheko lenkhulu kangaka na?

28 Nginiyaleta kutsi niletse Abinadi lapha, kute ngimbulale, ngoba usho letintfo kute aphehle bantfu bami kutsi batfukutselelane bodvwa, noma avuse tincabano emkhatsini webantfu bami; ngako-ke ngitawumbulala.

29 Manje emehlo ebantfu bekaphumphutsekisiwe, ngako-ke batenta lukhuni tinhlitiyo tabo ngekumelana nemavi a-Abinadi, futsi kusukela ngaleso sikhatsi kuya phambili bafuna kumbamba. Inkhosi Nowa yayenta lukhuni inhlitiyo yayo ngekumelana nemavi eNkhosi, futsi ayiphendvukanga etentweni tayo tebubi.