1 Futsi kwenteka kutsi Limhi kanye nebantfu bakhe babuyela edolobheni laNefi, bacala kuhlala kulelive ngekuthula futsi.

2 Futsi kwenteka kutsi emvakwemalanga lamanyenti emaLamani acala futsi kutsi aphehlelwe entfukutselweni ngekumelana nemaNefi, acala kuta eminceleni yelive lelibatungeletile.

3 Manje bekangeke alokotse ababulale, ngenca yesifungo inkhosi yawo leyayisentile kuLimhi; kodvwa bekabashaya etihlatsini tabo, asebentise ligunya ngetulu kwabo; futsi acala kubatfwalisa imitfwalo lesindzako emihlane yabo, babachuba njengembongolo lengakhulumi—

4 Yebo, konkhe loku kwentiwa kute livi leNkhosi ligcwaliseke.

5 Manje tinhlupheko temaNefi betitinkhulu, futsi bekute indlela yekutsi batikhulule etandleni tawo, ngoba emaLamani abebatungelete ndzawo tonkhe.

6 Futsi kwenteka kutsi bantfu bacala kuvungama enkhosini ngenca yetinhlupheko tabo; bacala baba nesifiso sekutsi bahambe bayawukulwa nawo. Bayihlupha kakhulu inkhosi ngetikhalo tabo; ngako-ke yabavumela kutsi bente njengekwetifiso tabo.

7 Baphindze babutsana ndzawonye, bahloma tikhali tabo, bahamba bayawukulwa nemaLamani kute bawakhiphele ngephandle kwelive labo.

8 Futsi kwenteka kutsi emaLamani abashaya, ababuyisela emuva, abulala labanyenti babo.

9 Manje kwaba khona kukhala lokukhulu kanye nesililo emkhatsini webantfu baLimhi, umfelokati akhalela indvodza yakhe, indvodzana nendvodzakati bakhalela uyise, bomnakabo bakhalela banakabo.

10 Manje besekukhona bafelokati labanyenti kakhulu eveni, bakhala kakhulu lilanga nelilanga, ngoba kwesaba lokukhulu emaLamani kwakusetikwabo.

11 Futsi kwenteka kutsi kukhala kwabo lokungapheli kwabaphehla labebasele bebantfu baLimhi kutsi batfukutselele emaLamani; bahamba futsi bayawukulwa, kodvwa babajikisa bababuyisela emuva futsi, balahlekelwe kakhulu.

12 Yebo, babuyela futsi kwesitsatfu, baphindze balahlekelwa njengasekucaleni; labo labebangakabulawa baphindze babuyela edolobheni laNefi.

13 Batitfoba naselutfulini, batiletsa kulo lijoko lebugcili, batinikela kutsi bashaywe, nekutsi babalekiswe behliswe benyuswa, bahlushwe, njengekutsandza kwetitsa tabo.

14 Batehlisa nasekujuleni kwekutfobeka; bakhala kakhulu kuNkulunkulu; yebo, nangabo bonkhe budze belilanga bakhala kuNkulunkulu wabo kutsi abakhulule baphume etinhluphekweni tabo.

15 Manje iNkhosi yephuta kuva kukhala kwabo ngenca yebubi babo; noko iNkhosi yakuva kukhala kwabo, yacala kutsambisa tinhlitiyo temaLamani kangangekutsi acala kuyenta yaba melula imitfwalo yabo; noko iNkhosi ayibonanga kufanele kutsi ibakhulule ebugcilini.

16 Futsi kwenteka kutsi bacala kuphumelela kancane kancane eveni, bacala kukhulisa lokuyinhlavu ngebunyenti, kanye nemihlambi yetimvu, kanye nemihlambi yetinkhomo, kangangekutsi abahlushwanga yindlala.

17 Manje bekukhona sibalo lesinyenti sebafati, lesasingetulu kwaleso semadvodza; ngako-ke iNkhosi Limhi yayaleta kutsi nguleyo ndvodza ayinikele kute kondliwe bafelokati kanye nebantfwana babo, kute nabo bangabhujiswa yindlala; futsi loku akwenta ngenca yesibalo lesikhulu sabo lesasibulewe.

18 Manje bantfu baLimhi batigcina ndzawonye bayimbumba kangangoba kwakungahle kwenteke, futsi bavikela lokuyinhlavu kwabo kanye nemihlambi yabo;

19 Nenkhosi lucobo lwayo yayingatetsembi uma ingephandle kwetindvonga telidolobha, ngaphandle kwekutsi itsatse bogadzi bayo nayo, ngekwesaba kutsi ngandlela tsite ingawela etandleni temaLamani.

20 Futsi yenta kutsi bantfu bayo bagadze live ndzawo tonkhe, kute ngandlela tsite babambe labo baphristi labebabalekele ehlane, labebantjontje emadvodzakati emaLamani, futsi labebente kutsi kube khona imbubhiso lenkhulu kangaka etikwabo.

21 Ngoba bebanesifiso sekutsi bababambe kute babajezise; ngoba bebete eveni laNefi ebusuku, futsi batsatsa lokuyinhlavu kwabo kanye nalokunyenti kwetintfo tabo letiligugu; ngako-ke bahlala babalindza.

22 Futsi kwenteka kutsi akutange kusaba khona kuphatamisana emkhatsini wemaLamani nebantfu baLimhi, kwaze kwaba sikhatsi lapho Amoni kanye nabomnakabo bafika eveni.

23 Futsi inkhosi ngesikhatsi ingephandle kwemasango elidolobha kanye nabogadzi bayo, yatfola Amoni kanye nabomnakabo; futsi icabanga kutsi bekubaphristi baNowa ngako-ke yenta kutsi babanjwe, baboshwe, baphonswe ejele. Futsi kube bekubaphristi baNowa yayitokwenta kutsi babulawe.

24 Kodvwa ngesikhatsi itfola kutsi bekungasibo, nekutsi kwakubomnakabo, futsi bebaphuma eveni laseZarahemla, yagcwala injabulo lenkhulu kakhulu.

25 Manje inkhosi Limhi yayitfumele, ngaphambi kwekufika kwa-Amoni, lidlanzana lemadvodza kuyofuna live laseZarahemla; kodvwa akakhonanga kulitfola, futsi lalahleka ehlane.

26 Noko, atfola live lebelinebantfu; yebo, live lebelimbonywe ngematsambo lomile; yebo, live lebelinebantfu futsi lelalibhujisiwe; futsi bona, bebacabanga kutsi bekungilo live laseZarahemla, babuyela eveni laNefi, bafike eminceleni yelive kungasiwo emalanga lamanyenti phambi kwekutsi kufike Amoni.

27 Futsi beta nembhalo, umbhalo walabo bantfu ematsambo abo labebawatfolile; futsi bewucoshwe kubongcwengcwe bensimbi.

28 Manje Limhi waphindze wagcwala injabulo nakatfola ngemlomo wa-Amoni kutsi inkhosi Mosiya beyinesiphiwo lesivela kuNkulunkulu, lebekangakhona kuhumusha ngaso imibhalo lecoshiwe lenjena; yebo, futsi Amoni ngalokunjalo naye watfokota.

29 Noko Amoni kanye nabomnakabo bagcwala kudzabuka ngenca yekutsi labanyenti kakhulu babomnakabo bebabulewe.

30 Kanjalo nekutsi inkhosi Nowa kanye nebaphristi bayo bebente bantfu kutsi bente tono kanye nebubi lobunyenti kangaka ngekumelana naNkulunkulu; futsi ngetulu kwaloko bakhala ngekufa kwa-Abinadi; ngalokunjalo nangekuhamba kwa-Alma kanye nalabo bantfu labahamba naye, labebasungule libandla laNkulunkulu ngemandla kanye neligunya laNkulunkulu, kanye nelukholo emavini labekakhulunywe ngu-Abinadi.

31 Yebo, bakhala ngekuhamba kwabo, ngoba bebangati kutsi bebabalekele kuphi. Manje ngabe bebayawuhlanganyela nabo ngekutfokota, ngoba nabo bese bangene esivumelwaneni naNkulunkulu kutsi bamsebentele futsi bagcine imiyaleto yakhe.

32 Manje kusukela ekufikeni kwa-Amoni, inkhosi Limhi nayo ngalokunjalo yangena esivumelwaneni naNkulunkulu, kanjalo nebantfu bayo labanyenti; kutsi bamsebentele futsi bagcine imiyaleto yakhe.

33 Futsi kwenteka kutsi inkhosi Limhi kanye nebantfu bayo labanyenti bebanesifiso sekubhajatiswa; kodvwa kwakute namunye kulelive lobekaneligunya lelivela kuNkulunkulu. Amoni wala kukwenta loku, ngoba bekatibona njengenceku lengakafaneli.

34 Ngako-ke abatange ngaleso sikhatsi batihlanganise babe libandla, balindze Moya weNkhosi. Manje bebanesifiso sekutsi babe njenga-Alma kanye nabomnakabo, labebabalekele ehlane.

35 Bebanesifiso sekutsi babhajatiswe njengesibonakaliso kanye nebufakazi bekutsi bebatimisele kusebentela Nkulunkulu ngato tonkhe tinhlitiyo tabo; noko baselula sikhatsi; futsi indzaba yembhabhatiso wabo itawuniketwa emvakwaloku.

36 Manje yonkhe imetamo ya-Amoni nebantfu bakhe, nenkhosi Limhi kanye nebantfu bayo, bekungukutsi batikhulule baphume etandleni temaLamani kanye nasebugcilini.