1 Manje, kwenteka kutsi emvakwekutsi Abinadi sekakhulume lamavi welula sandla sakhe watsi: Sikhatsi siyeta lapho bonkhe bayawuyibona insindziso yeNkhosi; lapho tonkhe tive, tihlobo, tilimi, kanye nebantfu bayawubona ngewabo emehlo futsi bayawuvuma phambi kwaNkulunkulu kutsi tehlulelo takhe tilungile.

2 Futsi ngaleso sikhatsi lababi bayawucoshwa, bayawuba nesizatfu sekuhhewula, nesekukhala, nesekulila, kanye nesekugedletela kwematinyo abo; futsi loku kuyawuba ngenca yekutsi abalilalelanga livi leNkhosi; ngako-ke iNkhosi ayibahlengi.

3 Ngoba banaka kwenyama futsi banebudeveli, nadeveli unemandla ngetulu kwabo; yebo, leyo nyoka lendzala leyakhohlisa batali betfu bekucala, leyaba sizatfu sekuwa kwabo; lokwaba sizatfu seluntfu lonkhe kutsi lunake kwenyama, kwemvelo, lube nebudeveli, lwati lokubi kulokuhle, lwatibeka ngaphansi kwekulawulwa ngudeveli.

4 Ngaleyo ndlela lonkhe luntfu lwalahleka; buka, lwaluyawulahleka ngalokungapheli kube bekungasiko kutsi Nkulunkulu wabahlenga bantfu bakhe ekulahlekeni kwabo kanye nasesimeni sabo sekuwa.

5 Kodvwa khumbulani kutsi loyo lophikelelako esimeni sakhe senyama, achubeke etindleleni tesono futsi ahlubuke kuNkulunkulu, uhlala asesimeni sakhe sekuwa futsi develi uba nemandla onkhe ngetulu kwakhe. Ngako-ke kuye kuba shangatsi akutange kube khona kuhlengwa lokwentiwa, asitsa saNkulunkulu; futsi ngalokunjalo nadeveli usitsa saNkulunkulu.

6 Futsi kube Khristu akatange ete emhlabeni, ngikhuluma ngetintfo letisatokwenteka shangatsi setentekile, bekungeke kube khona kuhlengwa.

7 Futsi kube Khristu akatange avuke kulabafile, noma adzabule tibopho tekufa kute lithuna lingabi nekuncoba, nekutsi kufa kungabi neludvonsi, bekungeke kube khona kuvuka.

8 Kodvwa kukhona kuvuka, ngako-ke lithuna lite kuncoba, futsi ludvonsi lwekufa lugwinywe kuKhristu.

9 Ukukhanya nekuphila kwemhlaba; yebo, ukukhanya lokungapheli, lokungeke kufiphaliswe nanini; yebo, futsi ngalokunjalo nemphilo lengapheli, kute kungabe kusaba khona kufa nanini.

10 Naloko lokubhubhako kuyawembatsa kungabhubhi; naloko lokubolako kuyawembatsa kungaboli, futsi kuyawuletfwa kutsi kume phambi kwesihlalo saNkulunkulu, kute kwehlulelwe nguye njengekwemisebenti yabo noma ngabe mihle noma ngabe mibi—

11 Uma imihle, ekuvukeni kwekuphila lokungapheli kanye nenjabulo; futsi uma imibi, ekuvukeni kwekulahlwa lokungapheli, baniketwe develi, lobabeke ngaphansi kwakhe, lokukulahlwa—

12 Bahambe ngekwentsandvo yenyama kanye netifiso tabo; bangatange bayibite nanini iNkhosi ngesikhatsi imikhono yemusa yelulelwe kubo, ngoba imikhono yemusa beyelulelwe kubo, futsi abatange bawemukele umusa; bayaliwe ngebubi babo kodvwa bangasuki kubo, futsi bayaletwa kutsi baphendvuke kodvwa abatange baphendvuke.

13 Manje, ngabe akukameli yini nitfutfumale futsi niphendvuke etonweni tenu, nikhumbule kutsi kuphela kuKhristu futsi ngaye ningasindziswa na?

14 Ngako-ke, uma nifundzisa umtsetfo waMosi, ngetulu kwaloko fundzisani kutsi kukufana kwaleto tintfo letitako—

15 Bafundziseni kutsi kuhlengwa kuta ngaKhristu iNkhosi, longuBabe waPhakadze lucobo. Amen.