1 Manje bekukhona indzawo eShemloni lapho emadvodzakati emaLamani bekahlanganela khona ndzawonye kutsi ahlabele, agidze, futsi atijabulise.

2 Futsi kwenteka kutsi ngalelinye lilanga bekasibalo lesincane nje ahlangene ndzawonye kutsi ahlabelele futsi agidze.

3 Manje baphristi benkhosi Nowa, bebanemahloni ekubuyela edolobheni laNefi, yebo, ngetulu kwaloko bebesaba kutsi bantfu bebayawubabulala, ngako-ke abatange balokotse babuyele ebafatini babo kanye nasebantfwaneni babo.

4 Futsi sebahleti ehlane, sebawatfolile emadvodzakati emaLamani babhaca bawabuka;

5 Ngesikhatsi sekusele labambalwa nje babo labebabutsene ndzawonye kutsi bagidze, baphuma etindzaweni tabo tekubhaca bawatsatsa bawatfwala baya nawo ehlane; yebo, emashumi lamabili nakune emadvodzakati emaLamani bawatfwala baya nawo ehlane.

6 Futsi kwenteka kutsi ngesikhatsi emaLamani sekatfolile kutsi emadvodzakati awo bekalahlekile, atfukutselela bantfu baLimhi, ngoba acabanga kutsi bekubantfu baLimhi.

7 Ngako-ke atfumela emabutfo awo phambili; yebo nenkhosi lucobo lwayo yahamba phambi kwebantfu bayo baya eveni laNefi kuyawubhubhisa bantfu baLimhi.

8 Manje Limhi wawabona asembhoshongweni, nawo onkhe emalungiselelo emphi wawabona; ngako-ke wagcogcela ndzawonye bantfu bakhe, bahlala bawalindza etinkhundleni kanye nasemahlatsini.

9 Futsi kwenteka kutsi ngesikhatsi emaLamani sekachamukile, bantfu baLimhi bacala bakhwela etikwawo bavela etindzaweni tabo tekulindza, futsi bacala kuwabulala.

10 Futsi kwenteka kutsi imphi yaba matima kakhulu, ngoba balwa njengemabhubesi alwela inyamatane yawo.

11 Futsi kwenteka kutsi bantfu baLimhi bacala kuwacosha emaLamani phambi kwabo; noma bona bebangasiyo nencenye lenyenti njengemaLamani. Kodvwa balwela timphilo tabo, netebafati babo, kanye netebantfwana babo; ngako-ke batikhandla futsi balwa njengabonyokangwenya.

12 Futsi kwenteka kutsi bayitfola inkhosi yemaLamani emkhatsini wesibalo salabafile bawo; noma yona beyingakafi, beyilimele yashiywa phansi, bekushesha kakhulu kubaleka kwebantfu bayo.

13 Futsi bayitsatsa bayibopha emanceba, bayiletsa phambi kwaLimhi, batsi: Buka, nayi inkhosi yemaLamani; ngoba itfole linceba ibese iyawa emkhatsini walabafile bayo, futsi bayishiyile; buka, siyiletse phambi kwakho; manje asiyibulale.

14 Kodvwa Limhi watsi kubo: Angeke ngiyibulale, kodvwa yiletseni lapha kute ngiyibone. Bayiletsa. Limhi watsi kuyo: Ngusiphi sizatfu lesente nine nite nitawukulwa nebantfu bami na? Buka, bantfu bami abatange basephule sifungo lengasenta kini; ngako-ke, kungani nine nisephule sifungo lenasenta ebanftwini bami na?

15 Manje inkhosi yatsi: Ngisephulile sifungo ngoba bantfu bakho batsatse emadvodzakati ebantfu bami; ngako-ke, ngentfukutselo yami ngente kutsi bantfu bami bete batawukulwa nebantfu bakho.

16 Manje Limhi bekangakeva lutfo mayelana naloludzaba; ngako-ke watsi: Ngitawuphenya emkhatsini webantfu futsi noma ngubani lowente lentfo lena utawubhujiswa. Ngako-ke wenta kutsi kwentiwe luphenyo emkhatsini webantfu bakhe.

17 Manje ngesikhatsi Gideyoni sekativile leti tintfo, yena ayindvuna yemasotja enkhosi, wahamba waya phambili watsi enkhosini: Ngiyakucela hocisa, ungabaphenyi laba bantfu, futsi ungalibeki licala kubo ngalentfo.

18 Ngoba awubakhumbuli yini baphristi beyihlo, laba bantfu labebafuna kubabhubhisa na? Abekho yini ehlane na? Ngabe akusibo yini labantjontje emadvodzakati emaLamani na?

19 Manje, buka, futsi utjele inkhosi ngaleti tintfo, kute yona itjele bantfu bayo kute batfotjiswe kitsi; ngoba buka vele sebalungiselela kutsi bete batawukulwa natsi; buka ngetulu kwaloko kukhona kuphela labambalwa betfu.

20 Futsi buka, beta nalamanyenti emabutfo abo; futsi ngaphandle kwekutsi inkhosi ibatfobise kitsi sitawubhubha.

21 Ngoba akagcwaliseki yini emavi a-Abinadi, lawaphrofetha macondzana natsi—futsi konkhe loku kungenca yekutsi asitange siwalalele emavi eNkhosi, futsi siphendvuke ebubini betfu na?

22 Manje asiyitfobise inkhosi, sigcwalise sifungo lesasenta kuyo; ngoba kuncono kutsi sibe sebugcilini kunekutsi silahlekelwe timphilo tetfu; ngako-ke, asiyekeleni kucitsa ingati lengaka.

23 Manje Limhi wayitjela inkhosi tonkhe tintfo mayelana neyise, kanye nebaphristi labebabalekele ehlane, watsi kutsatfwa kwemadvodzakati abo kwentiwe ngibo.

24 Futsi kwenteka kutsi inkhosi yatfotjiswa kubantfu bayo; yatsi kubo: asambeni siyohlangana nebantfu bami, ngaphandle kwetikhali; futsi ngiyafunga kini ngesifungo kutsi bantfu bami angeke bababulale bantfu bakho.

25 Futsi kwenteka kutsi bayilandzela inkhosi, bahamba ngaphandle kwetikhali kuyohlangana nemaLamani. Futsi kwenteka kutsi bahlangana nemaLamani; nenkhosi yemaLamani yakhotsama phambi kwawo, futsi yabancengela bantfu baLimhi.

26 Futsi ngesikhatsi emaLamani abona bantfu baLimhi, kutsi bebangenatikhali, aba nebubele kubo futsi atfotjiswa ngubo, futsi abuyela emuva nenkhosi yawo ngekuthula aya eveni lawo.