1 Futsi kwenteka kutsi emvakwekutsi inkhosi Limhi seyicedzile kukhuluma kubantfu bayo, ngoba yakhuluma letinyenti tintfo kubo kodvwa timbalwa kuphela tato lengitibhalile kulencwadzi, yatjela bantfu bayo tonkhe tintfo mayelana nabomnakabo labebaseveni laseZarahemla.

2 Futsi yenta kutsi Amoni eme ngembili kwesicuku, asilandzise konkhe lobekwentekile kubomnakabo kusukela ngesikhatsi lapho Zenifi ahamba aphuma kulelo live kute kube sikhatsi lapho yena lucobo ahamba aphuma kulelo live.

3 Ngetulu kwaloko waphindze wabalandzisa emavi ekugcina inkhosi Bhenjamini leyayibafundzisa wona, wawachaza kubantfu benkhosi Limhi, kute bawacondze onkhe emavi leyawakhuluma.

4 Futsi kwenteka kutsi emvakwekutsi sekakwentile konkhe loku, inkhosi Limhi yasikhulula sicuku, yenta kutsi wonkhe umuntfu abuyele endlini yakhe.

5 Futsi kwenteka kutsi yenta kutsi bongcwengcwe labebacuketse umbhalo webantfu bayo kusukela ngesikhatsi besuka eveni laseZarahemla, baletfwe phambi kwa-Amoni, kute abafundze.

6 Manje, masinyane nje emvakwekutsi Amoni sekawufundzile lombhalo, inkhosi yafuna kwati kuye kutsi angakwati yini kuhumusha tilimi, Amoni wayitjela kutsi angeke akwati.

7 Inkhosi yatsi kuye: Ngekudzabuka ngenca yetinhlupheko tebantfu bami, ngenta kutsi labangemashumi lamane nakutsatfu bebantfu bami batsatse luhambo baye ehlane, kute ngaloko batfole live laseZarahemla, kute sicele kubomnaketfu kutsi basikhiphe ebugcilini.

8 Balahleka ehlane sikhatsi lesingemalanga lamanyenti, noko bebakhutsele, abalitfolanga live laseZarahemla kodvwa babuyela kulelive, sebahambe eveni lelisemkhatsini wemanti lamanyenti, sebatfole live lelaligcwele ematsambo ebantfu, kanye newetilwane, ngetulu kwaloko ligcwele takhiwo letatibhidlikile talo lonkhe luhlobo, sebatfole live lebeligcwaliswe bantfu labebabanyenti njengeticuku taka-Israyeli.

9 Futsi bufakazi kutsi tintfo lebebatishito tiliciniso babuya nabongcwengcwe labangemashumi lamabili nakune labagcwele imibhalo lecoshiwe, futsi bebabeligolide lelimsulwa.

10 Buka, ngetulu kwaloko, baletse tivikelo tesifuba, letinkhulu, telitfusi kanye nekhopha, futsi tinhle kakhulu.

11 Ngetulu kwaloko, baletse tinkemba, tibambo tato lesetibolile, kukhalipha kwato kwasekudliwe kutfomba; kute namunye kulelive lokwatiko kuhumusha lulwimi noma imibhalo lecoshiwe lekubongcwengcwe. Kungako-ke ngitsite kuwe: ungakwati yini kuhumusha na?

12 Ngiyaphindza ngitsi kuwe: Kukhona yini lomatiko lokwati kuhumusha na? Ngoba ngifisa kutsi lemibhalo ihunyushelwe elulwimini lwetfu; ngoba, mhlawumbe, itawusinika lwati ngensali yalaba bantfu lababhujiswa, lapho lemibhalo yavela khona; noma, mhlawumbe, itosinika lwati ngabo labantfu lababhujiswa; nginesifiso sekwati sizatfu sekubhujiswa kwabo.

13 Manje Amoni watsi kuyo: Ngingakutjela ngalokucinisekile, O nkhosi, ngemuntfu longakwati kuhumusha imibhalo; ngoba yena unaloko lakwati kubuka kuko, ahumushe yonkhe imibhalo yasendvulo; kusipho lesivela kuNkulunkulu. Letintfo tibitwa ngekutsi tihumushi, kute umuntfu lokwati kubuka kuto ngaphandle kwekutsi ayaletiwe, funa abuke loko lokungakafaneli bese uyabhubha. Loyo loyaletwa kutsi abuke kuto, loyo ubitwa ngemboniswa.

14 Buka, inkhosi yebantfu labaseveni laseZarahemla nguye umuntfu loyaletiwe kutsi ente leti tintfo, futsi lonalesi sipho lesikhulu lesivela kuNkulunkulu.

15 Inkhosi yatsi umboniswa mkhulu kunemphrofethi.

16 Futsi Amoni watsi umboniswa ungumembuli kanye nemphrofethi; leso sipho lesikhulu kute umuntfu longaba naso, ngaphandle kwekutsi abe nemandla aNkulunkulu, lokute muntfu longaba nawo; noko umuntfu angaba nemandla lamakhulu aniketwe wona avela kuNkulunkulu.

17 Kodvwa umboniswa angati ngetintfo letendlulile, kanjalo nangetintfo letisatawukwenteka, futsi ngato tonkhe tintfo tiyawukwembulwa, noma, lokungenani, tintfo letisitsekile tiyawukwentiwa tibonakale, netintfo letifihlakele tiyawukwembulwa, netintfo letingatiwa tiyawukwembulwa ngato, ngetulu kwaloko kuyawukwembulwa tintfo ngato lebetingeyawukwatiwa ngaphandle kwato.

18 Ngaleyo ndlela Nkulunkulu wente tindlela tekutsi umuntfu, ngelukholo, ente timangaliso letinkhulu; ngako-ke uba lusito lolukhulu kubantfu bakubo.

19 Manje, ngesikhatsi Amoni sekacedzile kukhuluma lamavi inkhosi yatfokota kakhulu, yabonga Nkulunkulu, yatsi: Ngalokungangabateki imfihlakalo lenkhulu icuketfwe ngekhatsi kwalaba bongcwengcwe, naleti tihumushi ngalokungangabateki tilungiswa ngenhloso yekusombulula tonkhe timfihlakalo letinje kubantfwana bebantfu.

20 O imangalisa kangakanani imisebenti yeNkhosi, kuyawute kube nini ibeketelela bantfu bayo; yebo, kungakanani kuphumphutseka nekuba matima kwekucondza kwebantfwana bebantfu; ngoba abakufuni kuhlakanipha, noma bafise kutsi kona kubabuse!

21 Yebo, banjengemhlambi wesiganga wona lobalekela umelusi, usakateke, ubalekiswe, futsi udliwe tilwane tasendle.