1 Manje, kwenteka kutsi Alma, loyo lobekabalekele tinceku tenkhosi Nowa, waphendvuka etonweni kanye nasebubini bakhe, wahamba ngasense emkhatsini webantfu, wacala kubafundzisa emavi a-Abinadi—

2 Yebo, mayelana naloko lokwakutawukwenteka, kanjalo mayelana nekuvuswa kwalabafile, nekuhlengwa kwebantfu, lokwakutawukwenteka ngemandla, netinhlupheko, nekufa kwaKhristu, nekuvuka kanye nekwenyukela kwakhe ezulwini.

3 Futsi bonkhe labo labebaliva livi lakhe wabafundzisa. Wabafundzisa ngasense, kute kungafiki ekwatiweni yinkhosi. Futsi labanyenti bawakholwa emavi akhe.

4 Futsi kwenteka kutsi bonkhe labo labakholwa bahamba baya endzaweni lebeyibitwa ngekutsi yiMormon, itfole libito layo enkhosini, iseminceleni yelive lelaligcwala tilwane tesiganga, ngaletinye tikhatsi noma ngetikhatsi temnyaka letitsite.

5 Manje eMormon bekukhona umtfombo wemanti lahlantekile, Alma waphumula lapho, edvute nemanti khona lapho bekukhona lihlatsi letihlahla letincane, lapho atifihla khona emini ekutfungatfweni yinkhosi.

6 Futsi kwenteka kutsi bonkhe labo labebamkholwa baya lapho kuyova emavi akhe.

7 Futsi kwenteka kutsi emvakwemalanga lamanyenti kwase kunesibalo lesikhulu lesasesibutsana ndzawonye endzaweni yaMormon, kutova emavi a-Alma. Yebo, bonkhe babutsana ndzawonye labebakholelwa emavini akhe, kute bamuve. Wabafundzisa, washumayela kubo kuphendvuka, nekuhlengwa, kanye nelukholo eNkhosini.

8 Futsi kwenteka kutsi watsi kubo: Bukani, nawa emanti aMormon (ngoba bekabitwa kanjalo) manje, njengobe nifisa kuta emhlambini waNkulunkulu, futsi nibitwe ngebantfu bakhe, futsi nifuna kutfwalisana imitfwalo yaloyo naloyo, kute ibe lula;

9 Yebo, futsi nifuna kukhala kanye nalabo labakhalako; yebo, nidvudvute labo labadzinga kudvudvutwa, niphindze nime njengabofakazi baNkulunkulu ngato tonkhe tikhatsi nakuto tonkhe tintfo, nakuto tonkhe tindzawo leningaba kuto, kute kube sekufeni, kute nihlengwe nguNkulunkulu, futsi nibalwe kanye nalabo bekuvuka kwekucala, kute nibe nekuphila, lokuphakadze—

10 Manje ngitsi kini, uma loku kusifiso setinhlitiyo tenu, yini pho leyenta kutsi ningabhajatiswa egameni leNkhosi, kube njengebufakazi phambi kwayo kutsi seningene esivumelwaneni nayo kutsi nitawuyisebentela futsi nigcine imiyaleto yayo, kute itfululele Moya wayo ube mnyenti kakhulu kini na?

11 Manje ngesikhatsi labantfu sebawevile lamavi, bashaya tandla tabo ngenca yenjabulo, bamemeta batsi: Loku kusifiso setinhlitiyo tetfu.

12 Manje kwenteka kutsi Alma watsatsa Helamu, lobekangulomunye webekucala, wahamba wema phambili ekhatsi emantini, wakhala, watsi: O Nkhosi, tfululela Moya wakho etikwenceku yakho, kute yente lomsebenti ngebungcwele benhlitiyo.

13 Futsi ngesikhatsi sekawashito lamavi, Moya weNkhosi waba setikwakhe, watsi: Helamu, ngiyakubhabhatisa, ngineligunya lelivela kuNkulunkulu Somandla, njengebufakazi bekutsi ungenile esivumelwaneni sekutsi umsebentele ute ubhubhe ngekwemtimba lobhubhako; shangatsi Moya weNkhosi ungatfululelwa etikwakho; futsi shangatsi angakunika kuphila lokuphakadze, ngekuhlengwa kwaKhristu, lamlungisa kusukela ekusekelweni kwemhlaba.

14 Emvakwekutsi Alma sekawashito lamavi, bobabili Alma naHelamu bacwila emantini; bavuka baphindze baphuma emantini batfokotile, bagcwaliswe ngaMoya.

15 Futsi, Alma watsatsa lomunye, waya phambili kwesibili ekhatsi emantini, wambhabhatisa njengalona wekucala, kuphela yena akacwilanga futsi emantini.

16 Ngalendlela wababhabhatisa bonkhe labo labaya endzaweni yaMormon; bebasibalo sebantfu labacishe babe ngemakhulu lamabili nakune; yebo, futsi babhajatiswa emantini aMormon, bagcwaliswa ngemusa waNkulunkulu.

17 Babitwa ngelibandla laNkulunkulu, noma libandla laKhristu, kusukela ngaleso sikhatsi kuya phambili. Futsi kwenteka kutsi loyo lobekabhajatiswa ngemandla nangeligunya laNkulunkulu wahlanganiswa nelibandla lakhe.

18 Futsi kwenteka kutsi Alma, aneligunya lelivela kuNkulunkulu, wabeka baphristi; umphristi munye kulabangemashumi lasihlanu esibalweni sabo wababeka kutsi babashumayele, baphindze babafundzise mayelana netintfo letiphatselene nembuso waNkulunkulu.

19 Wabayaleta kutsi bangafundzisi lutfo ngaphandle kwekutsi kube tintfo leto lebekatifundzisile, naletatikhulunywe ngemlomo webaphrofethi labangcwele.

20 Yebo, wabayaleta kutsi bangashumayeli lutfo ngaphandle kwekuphendvuka kanye nelukholo eNkhosini, leyayibahlengile bantfu bayo.

21 Wabayaleta kutsi kubebete incabano lomunye nalomunye, kodvwa kutsi babuke phambili bamunye, banelukholo lunye kanye nembhabhatiso munye, banetinhlitiyo tabo letihlanganiswe ndzawonye ebunyeni kanye naselutsandvweni kuloyo nakuloyo.

22 Wabayaleta kutsi bashumayele kanjalo. Futsi ngaleyo ndlela baba bantfwana baNkulunkulu.

23 Wabayaleta kutsi bagcine lilanga lelisabatha, baligcine lingcwele, futsi ngetulu kwaloko emalanga onkhe babonge eNkhosini Nkulunkulu wabo.

24 Futsi ngetulu kwaloko wabayaleta kutsi baphristi labekababekile basebente ngetandla tabo lucobo kute batondle bona.

25 Futsi kwakukhona lilanga linye evikini lelalibekwe eceleni kutsi bahlangane ndzawonye kute bafundzise bantfu, bakhonte iNkhosi Nkulunkulu wabo, ngetulu kwaloko, njalo nje ngalokwakusemandleni abo, bahlangane ndzawonye.

26 Futsi baphristi kwakungakafaneli batsembele kubantfu kutsi babondle; kodvwa ngekusebenta kwabo bebatotfola umusa waNkulunkulu, kute bakhule babe nemandla kuMoya, babe nekwati ngaNkulunkulu, kute bafundzise ngemandla kanye nangeligunya lelivela kuNkulunkulu.

27 Futsi ngetulu kwaloko Alma wabayaleta kutsi bantfu belibandla kufanele baphane ngalabanako, wonkhe umuntfu ngaloko lanako; uma ngabe anako kukunyenti kufanele aphe ngebunyenti; futsi loyo lonako kodvwa kukuncane, kuncane lokuyodzingeka kuye; futsi loyo longenako kufanele anikwe.

28 Futsi ngaleyo ndlela kufanele baphane ngetintfo labanato ngekutitsandzela kwabo kanye netifiso letinhle ngaNkulunkulu, futsi nakulabo baphristi labebadzinga, yebo, futsi nakubo bonkhe bantfu labadzingile nalabangenako kwekwembatsa lokwanele.

29 Futsi loku wakusho kubo, ayaletwe nguNkulunkulu; bahamba ngebucotfo phambi kwaNkulunkulu, baphana loyo naloyo ngekwenyama nekwakamoya njengekwetidzingo tabo kanye netifiso tabo.

30 Manje kwenteka kutsi konkhe loku kwentiwa eMormon, yebo, ngasemantini aMormon, ehlatsini lelalisedvute nemanti aMormon; yebo, indzawo yaMormon; emanti aMormon, lihlatsi laMormon, kwakukuhle kangakanani emehlweni alabo labeta ekwatini uMhlengi wabo; yebo, futsi babusiswe kangakanani, ngoba bayawuhlabelela ludvumo lwakhe kute kube phakadze.

31 Futsi leti tintfo tentiwa eminceleni yelive, kute tingafinyeleli ekwatiweni yinkhosi.

32 Kodvwa bukani, kwenteka kutsi inkhosi, seyitfolile ngemnyakato emkhatsini webantfu, yatfumela tinceku tayo kutsi tibabuke. Ngako-ke elangeni lelo bebahlangene ngalo ndzawonye kutowuva livi lenkhosi batfolwa yinkhosi.

33 Manje inkhosi yatsi Alma bekaphehla bantfu kutsi bayivukele; ngaloko-ke yatfumela emabutfo ayo kutsi ayobabhubhisa.

34 Futsi kwenteka kutsi Alma kanye nebantfu beNkhosi bavuswa kuta kwemphi yenkhosi; ngako-ke batsatsa emathende abo kanye nemindeni yabo besuka baya ehlane.

35 Futsi bebabalelwa cishe kubantfu labangemakhulu lamane nemashumi lasihlanu.