1 Futsi kwenteka kutsi ngesikhatsi Abinadi asaticedzile leti tinkhulumo, inkhosi yayaleta kutsi baphristi bamtsatse futsi bente kutsi abulawe.

2 Kodvwa bekukhona munye emkhatsini wabo libito lakhe bekungu-Alma, naye futsi awesitukulwane saNefi. Bekalijaha, futsi wawakholwa emavi Abinadi labekawakhulumile, ngoba bekati mayelana nebubi Abinadi labekafakaze ngabo ngekumelana nabo; ngako-ke wacala kuncenga enkhosini kutsi ingamtfukutseleli Abinadi, kodvwa imvumele kutsi esuke ngekuthula.

3 Kodvwa inkhosi yatfukutsela kakhulu, futsi yenta kutsi Alma acoshwe emkhatsini wabo, yatfumela tinceku tayo emvakwakhe kute timbulale.

4 Kodvwa wabaleka phambi kwato wabhaca kangangoba atimtfolanga. Futsi ngesikhatsi abhacile emalanga lamanyenti wawabhala onkhe emavi Abinadi labekawakhulumile.

5 Futsi kwenteka kutsi inkhosi yenta kutsi bogadzi bayo bamtungelete Abinadi bambambe; bambopha baphindze bamphonse ejele.

6 Emvakwemalanga lamatsatfu, seyibonisene nebaphristi bayo, yenta kutsi aphindze aletfwe phambi kwayo.

7 Futsi yatsi kuye: Abinadi, sikutfole unelicala, futsi ufanelwe kufa.

8 Ngoba utsite Nkulunkulu lucobo lwakhe kufanele ehlele phansi emkhatsini webantfwana bebantfu; manje, ngenca yaloku utawubulawa ngaphandle kwekutsi uwahocise onkhe lamavi lowuwakhulumile lamabi mayelana nami kanye nebantfu bami.

9 Manje Abinadi watsi kuyo: Ngitsi kuwe, angeke ngiwahocise lamavi lengiwakhulumile kuwe mayelana nalabantfu, ngoba aliciniso; kute nati ngekuciniseka kwawo ngitivumele kutsi ngiwele etandleni tenu.

10 Yebo, futsi ngitawuhlupheka kute kube sekufeni, angeke ngiwahocise lamavi ami, ayawukuma njengebufakazi ngekumelana nani. Futsi uma ningibulala nitawube nicitsa ingati lemsulwa, futsi loku nako ngalokunjalo kuyawukuma njengebufakazi ngekumelana nani ngelilanga lekugcina.

11 Manje inkhosi Nowa beseyitawumkhulula, ngoba beyesaba livi lakhe; ngoba beyesaba kutsi tehlulelo taNkulunkulu tatitawukuta etikwayo.

12 Kodvwa baphristi baphakamisa emavi abo ngekumelana naye, bacala kumbeka licala. Batsi: Uyitfukile inkhosi. Ngako-ke inkhosi bayiphehla kute imtfukutselele, yase iyamnikela kutsi abulawe.

13 Futsi kwenteka kutsi bamtsatsa bambopha, basishaya sikhumba sakhe ngenyandza yetinkhuni, yebo, washa wate wafa.

14 Manje ngesikhatsi emalangabi acala kumhashula, wamemeta kubo, watsi:

15 Bukani, njengobe nentile kimi, kanjalo kuyawukwenteka kutsi intalelwane yenu iyawukwenta kutsi labanyenti beve letinhlungu lengitivako, ngisho netinhlungu tekufa ngemlilo; futsi loku ngenca yekutsi ikholelwa ensindzisweni yeNkhosi Nkulunkulu wabo.

16 Futsi kutawukwenteka kutsi niyawuhlushwa ngato tonkhe tinhlobo tetifo ngenca yebubi benu.

17 Yebo, niyawushaywa kuto tonkhe tindzawo, futsi niyawucoshwa niphindze nihlakatwe niye emuva naphambili, njengemhlambi wesiganga ucoshwa tilwane tesiganga letesabekako.

18 Ngalelo langa niyawutingelwa, futsi niyawutsatfwa ngesandla setitsa tenu, emvakwaloko niyawukuva buhlungu, njengobe nami ngiva, tinhlungu tekufa ngemlilo.

19 Ngaleyo ndlela Nkulunkulu wenta imphindziselo etikwalabo lababulala bantfu bakhe. O Nkulunkulu, yemukela umphefumulo wami.

20 Manje, ngesikhatsi Abinadi sekawashito lamavi, wawa, eve buhlungu bekufa ngemlilo; yebo, abulewe ngenca yekutsi angeke ayiphike imiyaleto yaNkulunkulu, alicinisekisile liciniso lemavi akhe ngekufa kwakhe.