1 Manje Abinadi watsi kubo: Ngifuna kutsi nicondze kutsi Nkulunkulu lucobo lwakhe uyawukwehlela phansi emkhatsini webantfwana bebantfu, futsi uyawubahlenga bantfwana bakhe.

2 Ngenca yekutsi usenyameni uyawubitwa ngekutsi uyiNdvodzana yaNkulunkulu, futsi asente inyama yaba ngaphansi kwentsandvo yaBabe, unguBabe aphindze abe yiNdvodzana—

3 UnguYise, ngenca yekutsi watalwa ngemandla aNkulunkulu; futsi uyiNdvodzana ngenca yenyama; ngaleyo ndlela uba nguBabe kanye neNdvodzana—

4 Futsi banguNkulunkulu munye, yebo, yena kanye Babe waPhakadze wasezulwini kanye nasemhlabeni.

5 Ngako-ke inyama iba ngaphansi kwaMoya, noma iNdvodzana iba ngaphansi kwaBabe, banguNkulunkulu munye, lowahlushwa ngekulingwa, futsi akakuvumelanga kulingwa, kodvwa wavumela kutsi aphukutwe, abhacabulwe, acoshwe, futsi aphikwe bantfu bakhe.

6 Futsi emvakwako konkhe loku, emvakwekwenta timangaliso letinyenti letinkhulu emkhatsini webantfwana bebantfu, uyawuholwa, yebo, njengobe Isaya watsi, njengemvu phambi kwemhhuli isimungulu, njengobe kushiwo akawuvulanga umlomo wakhe.

7 Yebo, njengobe kushiwo naye uyawuholwa, abetselwe, abulawe, inyama ibe ngaphansi kwekufa, intsandvo yeNdvodzana igwinywe yintsandvo yaBabe.

8 Futsi ngaleyo ndlela Nkulunkulu uyawutidzabula tibopho tekufa, asatfole kuncoba ngetulu kwekufa; anike iNdvodzana emandla kutsi incusele bantfwana bebantfu—

9 Asanyukele ezulwini, anebubele benhlitiyo, agcwele sihawu kubantfwana bebantfu; eme emkhatsini wabo kanye nekulunga; atidzabulile tibopho tekufa, atfwale bubi babo kanye netiphambeko tabo, abahlengile, futsi wanelisa tidzingo tekulunga.

10 Manje ngitsi kini, ngubani loyawumemetela situkulwane sakhe na? Buka, ngitsi kini, uma umphefumulo wakhe sewentiwe umnikelo wesono uyawuyibona intalelwane yakhe. Manje nitsini na? Futsi ngubani loyawuba yintalelwane yakhe na?

11 Bukani ngitsi kini, loyo lowavile emavi ebaphrofethi, yebo, bonkhe baphrofethi labangcwele labaphrofetha mayelana nekuta kweNkhosi—Ngitsi kini, bonkhe labo labawalalela emavi abo, bakholwa kutsi iNkhosi iyawubahlenga bantfu bayo, futsi balindzela lelo langa lekutsetselelwa kwetono tabo, ngitsi kini, ngulaba labayintalelwane yakhe, noma labatindlalifa tembuso waNkulunkulu.

12 Ngoba ngibo laba tono tabo latitfwala; ngibo laba labafela, kubahlenga etiphambekweni tabo. Manje, ngabe abasiyo yini intalelwane yakhe na?

13 Yebo, futsi ngabe akusibo yini baphrofethi, wonkhe umphrofethi lovule umlomo wakhe waphrofetha, longawelanga esiphambekweni, ngisho bonkhe baphrofethi labangcwele kusukela ekucaleni kwemhlaba na? Ngitsi kini bayintalelwane yakhe.

14 Futsi laba ngibo labamemetele kuthula, labaletse tindzaba letimnandzi, labamemetele insindziso; batsi kuyo iSiyoni: Nkulunkulu wakho uyabusa!

15 O tatitinhle kanganani etikwetintsaba tinyawo tabo!

16 Ngetulu kwaloko, tinhle kanganani etikwetintsaba tinyawo talabo namanje labamemetela kuthula!

17 Ngetulu kwaloko, tinhle kanganani etikwetintsaba tinyawo talabo lokuyawutsi emvakwaloku bamemetele kuthula, yebo, kusukela ngalesi sikhatsi kuchubeka futsi ingunaphakadze.

18 Futsi bukani, ngitsi kini, akusiko loku kuphela. Ngoba O tinhle kanganani etikwetintsaba tinyawo taloyo loletsa tindzaba letimnandzi, loyo longumsunguli wekuthula, yebo, ngisho neNkhosi, lehlenge bantfu bayo; yebo, leletse insindziso kubantfu bayo;

19 Ngoba kube bekungasiko ngenca yekuhlengwa leyakwentela bantfu bayo, lokwalungiswa kusukela ekusekelweni kwemhlaba, ngitsi kini, uma bekungasiko ngenca yaloku, bonkhe bantfu bekufanele babhubhe.

20 Kodvwa bukani, tibopho tekufa tiyawudzatjulwa, iNdvodzana iyabusa, futsi inemandla ngetulu kwalabafile; ngako-ke, ifeza kuvuswa kwalabafile.

21 Futsi kuta kuvuka, kuvuka kwekucala; yebo, kuvuka kwalabo labebakhona, kanye nalabo labakhona, kanye nalabo labayawuba khona, kute kube kuvuka kwaKhristu—ngoba uyawubitwa kanjalo.

22 Manje, kuvuka kwabo bonkhe baphrofethi, kanye nabo bonkhe labo labakholelwa emavini abo, noma bonkhe labo labagcine imiyaleto yaNkulunkulu, bayawuphuma ngekuvuka kwekucala; ngako-ke bakuvuka kwekucala.

23 Bavuselwa kutsi bahlale naNkulunkulu lobahlengile; ngaleyo ndlela banekuphila lokuphakadze kuKhristu, lodzabule tibopho tekufa.

24 Futsi laba ngibo labanesabelo ekuvukeni kwekucala; futsi ngibo laba labafe ngaphambi kwekubuya kwaKhristu, basekungatini, bangatfolanga kutsi insindziso imenyetelwe kubo. Futsi ngaleyo ndlela iNkhosi ifeza kubuyiselwa kwalaba; futsi banesabelo ekuvukeni kwekucala, noma banekuphila lokuphakadze, bahlengwe yiNkhosi.

25 Futsi bantfwana labancane nabo banekuphila lokuphakadze.

26 Kodvwa bukani, nesabe, nitfutfumele phambi kwaNkulunkulu, ngoba kumele nitfutfumale; ngoba iNkhosi ayihlengi namunye lonjengalabo labamhlubukako futsi nalabafa basetonweni tabo; yebo, bonkhe labo lababhubha basetonweni tabo kusukela ekucaleni kwemhlaba, labahlubuka ngemabomu kuNkulunkulu, labebayati imiyaleto yaNkulunkulu, kodvwa bangayigcini; ngibo laba labangenasabelo ekuvukeni kwekucala.

27 Ngako-ke akukameli yini nitfutfumale na? Ngoba insindziso ayiti nakumunye lonjalo; ngoba iNkhosi ayihlenganga namunye lonjalo; yebo, futsi angeke iNkhosi imhlenge lonjalo; ngoba ayinakutiphikisa; ngoba ayitukwalela kulunga uma sekutsatsa indzawo yako.

28 Manje ngitsi kini sikhatsi siyawufika lapho insindziso yeNkhosi iyawumenyetelwa kuto tonkhe tive, tihlobo, tilimi kanye nakubantfu.

29 Yebo, Nkhosi, balindzi bakho bayawuphakamisa emavi abo; ngelivi kanyekanye bayawuhlabelela; ngoba bayawubona ngewabo emehlo, ngesikhatsi iNkhosi seyibuyisa iSiyoni futsi.

30 Hlokomani ngenjabulo, hlabelelani kanyekanye, nine mave latindzala aseJerusalema; ngoba iNkhosi ibadvudvutile bantfu bayo, iyihlengile iJerusalema.

31 INkhosi iwembulile umkhono wayo longcwele emehlweni ato tonkhe tive; futsi yonkhe imikhawulo yemhlaba iyawuyibona insindziso yaNkulunkulu wetfu.