1 Manje kwenteka kutsi bebabanyenti besitukulwane lesikhulako labebangakwati kuwacondza emavi enkhosi Bhenjamini, basebantfwana labancane ngaleso sikhatsi akhuluma kubantfu bakhe; futsi bebangakholelwa kuwo emasiko abokhokho.

2 Bebangakholwa nguloko bekushiwo mayelana nekuvuswa kwalabafile, noma bakholwe mayelana nekuta kwaKhristu.

3 Manje ngenca yekungakholwa kwabo abakwatanga kulicondza livi laNkulunkulu; futsi tinhlitiyo tabo tatilukhuni.

4 Futsi abatange babhajatiswe; noma batihlanganise nelibandla. Bebabantfu labehlukile ngekwelukholo lwabo, bahlala banjalo nangemvakwaloko, nasesimeni sabo sekunaka kwenyama kanye nalesigcwele kona; ngoba abatange bayibite iNkhosi Nkulunkulu wabo.

5 Manje ekubuseni kwaMosiya bebangasiyo ngisho nencenye lenkhulu njengebantfu baNkulunkulu; kodvwa ngenca yekuphikisana emkhatsini webazalwane bona bandza kakhulu.

6 Ngoba kwenteka kutsi babakhohlisa labanyenti ngemavi abo lalutsako, labo labebasebandleni, babenta kutsi bente tono letinyenti; ngako-ke kwenteka kutsi kwadzingeka kutsi labo labente sono, labebasebandleni, becwayiswe libandla.

7 Futsi kwenteka kutsi baletfwa phambi kwebaphristi, betfulwa kubaphristi bafundzisi; futsi baphristi babaletsa phambi kwa-Alma, lobekangumphristi lomkhulu.

8 Manje inkhosi Mosiya beyinikete Alma ligunya ngetulu kwelibandla.

9 Futsi kwenteka kutsi Alma bekangati lebekumele akwente mayelana nabo; kodvwa bekukhona bofakazi labanyenti ngekumelana nabo; yebo, bantfu bema bafakaza ngebubi babo lobunyenti.

10 Manje bekungakate kube khona intfo lenje leyake yenteka ebandleni ngaphambilini; ngako-ke Alma wakhatsateka emoyeni wakhe, wenta kutsi baletfwe phambi kwenkhosi.

11 Watsi enkhosini: Buka, naba labanyenti lesibaletse phambi kwakho, lababekwe licala bazalwane babo; yebo, futsi batfolwe benta bubi lobuyinhlobonhlobo. Abaphendvuki ebubini babo; ngako-ke sibaletse phambi kwakho, kute ubehlulele ngekwemacala abo.

12 Kodvwa inkhosi Mosiya yatsi ku-Alma: Buka, angeke ngibehlulele; ngako-ke ngibanikela etandleni takho kute behlulelwe.

13 Manje umoya wa-Alma waphindze wakhatsateka; wahamba wayobuta eNkhosini kutsi kufanele enteni mayelana naloludzaba, ngoba bekesaba kutsi angahle ente lokungakalungi emehlweni aNkulunkulu.

14 Futsi kwenteka kutsi emvakwekutsi sekathandaze ngenshisekelo lenkhulu kuNkulunkulu, livi leNkhosi lefika kuye, litsi:

15 Ubusisiwe, Alma, futsi babusisiwe labo lababhajatiswa emantini aMormon. Ubusisiwe ngenca yelukholo lwakho lolukhulu emavini odvwa nje enceku yami Abinadi.

16 Futsi babusisiwe labo ngenca yelukholo lwabo lolukhulu emavini odvwa nje lowuwakhulume kubo.

17 Futsi ubusisiwe ngoba usungule libandla emkhatsini walaba bantfu; bayawumiswa, futsi bayawuba bantfu bami.

18 Yebo, babusisiwe laba bantfu labanesifiso sekutsi babitwe ngelibito lami; ngoba bayawubitwa ngelibito lami; futsi bangebami.

19 Futsi ngenca yekutsi ubute kimi mayelana nesoni, ubusisiwe.

20 Uyinceku yami; ngenta sivumelwano nawe sekutsi uyawuba nekuphila lokuphakadze; futsi uyawungisebentela uphindze uhambe egameni lami, ugcogcela dzawonye timvu tami.

21 Loyo lotawukuva livi lami uyawuba yimvu yami; futsi uyawumemukela ebandleni, nami ngalokunjalo ngitawumemukela.

22 Ngoba buka, leli libandla lami; noma ngubani lobhajatiswako uyawubhajatiselwa ekuphendvukeni. Futsi nanoma ngubani lowemukelako uyawukholwa egameni lami; futsi ngitawumtsetselela ngekukhululeka.

23 Ngoba ngimi lotfwala tono temhlaba; ngoba ngimi lobadalile; futsi ngimi lomniketako loyo lokholwako kute kube sekugcineni indzawo esandleni sami sangesekudla.

24 Ngoba buka, babitwa ngelibito lami; futsi uma bangati bayawuta ngaphambili, babe nendzawo yaphakadze esandleni sami sangesekudla.

25 Futsi kuyawukwenteka kutsi ngesikhatsi licilongo lesibili likhala ngaleso sikhatsi labo labangazange bangati bayawuta ngaphambili beme phambi kwami.

26 Ngaleso sikhatsi bayawukwati kutsi ngiyiNkhosi Nkulunkulu wabo, nginguMhlengi wabo; kodvwa bona bakhetsa kungahlengwa.

27 Ngaleso sikhatsi ngitawuvuma kubo kutsi angibati; futsi bayawuhamba baye emlilweni longapheli lolungiswe ngudeveli kanye netingilosi takhe.

28 Ngako-ke ngitsi kuwe, loyo longeke alive livi lami, nguye kanye loyo longayumemukela ebandleni lami, ngoba loyo angeke ngimemukele ngelilanga lekugcina.

29 Ngako-ke ngitsi kuwe, Hamba; futsi noma ngubani lowonako ngekumelana nami, loyo uyawumehlulela njengekwetono takhe latentile; futsi uma ativuma tono takhe phambi kwakho nami, aphendvuke ngekweliciniso enhlitiyweni yakhe, uyawumtsetselela, nami ngalokunjalo ngitawumtsetselela.

30 Yebo, futsi njalo nje uma bantfu bami baphendvuka ngitawubatsetselela etiphambekweni tabo ngekumelana nami.

31 Ngetulu kwaloko niyawutsetselelana tiphambeko tenu; ngoba ngicinisile ngitsi kuwe, loyo longamtsetseleli makhelwane wakhe tiphambeko takhe ngesikhatsi atsi uyaphendvuka, loyo utiletsela kulahlwa ngelicala.

32 Manje ngitsi kuwe, Hamba; futsi nanoma ngubani longeke aphendvuke etonweni takhe loyo akayukubalwa nebantfu bami; futsi loku kuyawugcinwa kusukela ngalesi sikhatsi kuya phambili.

33 Futsi kwenteka ngesikhatsi Alma sekawevile lamavi wawabhala phansi kute abe nawo, kute ehlulele bantfu belibandla njengekwemiyaleto yaNkulunkulu.

34 Futsi kwenteka kutsi Alma wahamba wabehlulela labo labebabanjwe benta bubi, njengekwelivi leNkhosi.

35 Futsi wonkhe muntfu lobekaphendvuka etonweni takhe futsi ativume, bekababala nebantfu belibandla;

36 Futsi labo labangativumanga tono tabo futsi bangaphendvuki ebubini babo, ababalwanga kanye nebantfu belibandla, futsi emabito abo esulwa.

37 Futsi kwenteka kutsi Alma watilawula tonkhe tindzaba telibandla; bacala kutsi babe nekuthula futsi baphumelela kakhulu etindzabeni telibandla, bahamba ngekucaphela phambi kwaNkulunkulu, bemukela labanyenti, futsi babhabhatisa labanyenti.

38 Manje tonkhe leti tintfo Alma kanye nalabo labekasebenta nabo labebangamele libandla batenta, bahamba ngako kukhutsala, bafundzisa livi laNkulunkulu kuto tonkhe tintfo, bahlupheka ngalo lonkhe luhlobo lwetinhlupheko, bahlushwa ngibo bonkhe labo labebangesibo belibandla laNkulunkulu.

39 Futsi babecwayisa bomnakabo; nabo ngalokunjalo becwayiswa, wonkhe umuntfu ngelivi laNkulunkulu, ngekwetono takhe, noma kuleto tono labekatentile, bayaletwe nguNkulunkulu kutsi bathandaze bangayekeli, futsi babonge kuto tonkhe tintfo.