1 Futsi kwenteka kutsi libutfo lenkhosi labuya, lingakabatfoli bantfu beNkhosi.

2 Manje bukani, emabutfo enkhosi besekamancane, ngoba besekancishisiwe, futsi kwacala kwaba nekuhlukana emkhatsini webantfu labesebasele.

3 Lidlanzana lelincane lacala lafutselana kakhulu lisongela inkhosi, futsi kwacala kwaba khona incabano lenkhulu emkhatsini wabo.

4 Manje bekukhona indvodza emkhatsini wabo libito layo bekunguGideyoni, ayindvodza lenemandla futsi leyisitsa senkhosi, ngako-ke wahoshula inkemba yakhe, wafunga ekutfukutseleni kwakhe kutsi utawuyibulala inkhosi.

5 Futsi kwenteka kutsi walwa nenkhosi; ngesikhatsi inkhosi ibona kutsi beseyitawehlulwa, yabaleka yagijima yayongena embhoshongweni lowawusedvute nelithempeli.

6 Gideyoni wayicosha futsi besekatawungena embhoshongweni kute ayibulale inkhosi, inkhosi yaphonsa emehlo ayo icalata ngaseveni laseShemloni, buka, libutfo lemaLamani laselisekhatsi eminceleni yelive.

7 Manje inkhosi yamemeta isebuhlungwini bemphefumulo wayo, itsi: Gideyoni, ngisindzise, ngoba emaLamani sekasetikwetfu, futsi atawusibhubhisa; yebo, atawubhubhisa bantfu bami.

8 Manje inkhosi bekungasiko kutsi beyinendzaba kakhulu nebantfu bayo kangangoba beyinendzaba nemphilo yayo; noko, Gideyoni wayisindzisa imphilo yayo.

9 Futsi inkhosi yayaleta bantfu kutsi babalekele emaLamani, nayo lucobo lwayo yahamba phambi kwabo, babalekela ehlane, nebesifazane kanye nebantfwana babo.

10 Futsi kwenteka kutsi emaLamani abacosha, abakhandza, acala kubabulala.

11 Manje kwenteka kutsi inkhosi yayaleta kutsi onkhe emadvodza ashiye bafati bawo kanye nebantfwana babo, abalekele emaLamani.

12 Manje bekamanyenti langavumanga kubashiya, kodvwa akhetsa kutsi ahlale abhubhe kanye nabo. Lamanye ashiya bafati kanye nebantfwana babo abaleka.

13 Futsi kwenteka kutsi lawo lasala kanye nebafati nebantfwana bawo enta kutsi emadvodzakati abo lamahle eme phambili ancenge emaLamani kutsi angababulali.

14 Futsi kwenteka kutsi emaLamani aba nebubele kubo, ngoba akhangwa buhle bebesifazane babo.

15 Ngako-ke emaLamani atisindzisa timphilo tabo, abatsatsa abatfumba abatfwala ababuyisela emuva eveni laNefi, abavumela kutsi balitsatse live, ngaphansi kwembandzela wekutsi bebatoletsa inkhosi Nowa etandleni temaLamani, futsi baletse imphahla yabo, incenye yinye yako konkhe labebanako, incenye yinye yeligolide labo, nesiliva labo, kanye nato tonkhe tintfo letiligugu kubo, futsi ngaleyo ndlela bebatokhokha umtselo enkhosini yemaLamani umnyaka ngemnyaka.

16 Manje bekukhona munye wemadvodzana enkhosi emkhatsini walaba labebatfunjiwe, libito lakhe bekunguLimhi.

17 Manje Limhi bekanesifiso sekutsi uyise angabhujiswa; noko, Limhi bekungasiko kutsi bekangati ngebubi beyise, yena ngekwakhe bekayindvodza lelungile.

18 Futsi kwenteka kutsi Gideyoni watfumela emadvodza ehlane ngasense, kutsi ayofuna inkhosi kanye nalabo labebanayo. Futsi kwenteka kutsi bahlangana nebantfu ehlane, bonkhe ngaphandle kwenkhosi nebaphristi bayo.

19 Manje bebafungile etinhlitiyweni tabo kutsi bebayawubuyela eveni laNefi, futsi uma bafati kanye nebantfwana babo babulewe, kanye nalabo labebasele nabo, kutsi bayawufuna kutiphindzisela, ngetulu kwaloko babhubhe kanye nabo.

20 Futsi inkhosi yabayaleta kutsi bangabuyeli; bayitfukutselela inkhosi, benta kutsi ive buhlungu, ngekufa ngemlilo.

21 Futsi besebatobamba nebaphristi bababulale kodvwa bababalekela.

22 Futsi kwenteka kutsi besebatobuyela eveni laNefi, kodvwa bahlangana nemadvodza aGideyoni. Futsi emadvodza aGideyoni abatjela ngako konkhe lokwakwentekile kubafati kanye nakubantfwana babo; nekutsi emaLamani abavumele kutsi bangalitsatsa live ngekutsi bakhokhe umtselo kumaLamani wencenye yinye yako konkhe labebanako.

23 Futsi bantfu batjela emadvodza aGideyoni kutsi bayibulele inkhosi, futsi baphristi bayo babalekele khashane baya ehlane.

24 Futsi kwenteka kutsi emvakwekutsi sebawucedzile umcimbi, babuyela eveni laNefi, batfokotile, ngoba bafati kanye nebantfwana babo bebangakabulawa; futsi bamtjela Gideyoni ngaloko labebakwentile enkhosini.

25 Futsi kwenteka kutsi inkhosi yemaLamani yenta sifungo kubo, sekutsi bantfu bayo bangababulali.

26 NaLimhi ngalokunjalo, ayindvodzana yenkhosi, umbuso sewunikwetwe yena bantfu, wenta sifungo enkhosini yemaLamani sekutsi bantfu bakhe bakhokhe umtselo kuyo, incenye yinye yako konkhe labebanako.

27 Futsi kwenteka kutsi Limhi wacala kusungula umbuso kanye nekucinisekisa kuthula emkhatsini webantfu bakhe.

28 Inkhosi yemaLamani yabeka bogadzi batungeleta live, kute ibagcine bantfu baLimhi baseveni, kute bangesuki baye ehlane; futsi yabondla bogadzi bayo ngemtselo leyayiwutfola kumaNefi.

29 Manje inkhosi Limhi yaba nekuthula njalo embusweni wayo sikhatsi lesiyiminyaka lemibili, kangangekutsi emaLamani akabahluphanga noma afune kubabhubhisa.