1 Manje inkhosi Mosiya yenta kutsi bonkhe bantfu babutsane ndzawonye.

2 Manje bebangabanyenti kakhulu labebabantfwana baNefi, noma bebangabanyenti kakhulu labo labebabesitukulwane saNefi, njengobe bekunjalo ngebantfu baZarahemla, labekawesitukulwane saMuleki, kanye nalabo labeta naye ehlane.

3 Futsi bebangabanyenti kakhulu labebabantfu baNefi kanye nalabebabantfu baZarahemla njengobe bekunjalo kulabebangemaLamani; yebo, bebangasiyo ngisho incenye lenkhulu kakhulu.

4 Manje bonkhe bantfu baNefi bebabutsene ndzawonye, futsi ngalokunjalo nabo bonkhe bantfu baZarahemla, futsi bebabutsene ndzawonye bangemacembu lamabili.

5 Futsi kwenteka kutsi Mosiya wayifundza, futsi wenta kutsi ifundvwe, imibhalo yaZenifi ifundzelwe bantfu bakhe; yebo, wayifundza imibhalo yebantfu baZenifi, kusukela ngesikhatsi bashiya eveni laseZarahemla bate babuya futsi.

6 Futsi ngetulu kwaloko wafundza indzaba ya-Alma kanye nabomnakabo, kanye nato tonkhe tinhlupheko tabo, kusukela ngesikhatsi bashiya eveni laseZarahemla kute kube ngesikhatsi babuya futsi.

7 Manje, ngesikhatsi Mosiya sekente siphetfo sekufundza imibhalo, bantfu bakhe labebahlala eveni baba nekumangala kanye nekushaceka.

8 Ngoba bebangati kutsi bacabange ini; ngoba ngesikhatsi babona labo labebakhululiwe baphuma ebugcilini bagcwala kujabula lokukhulu kakhulu.

9 Ngetulu kwaloko, ngesikhatsi bacabanga ngabomnakabo labebabulewe ngemaLamani bagcwala lusizi, bakhala tinyembeti letinyenti telusizi.

10 Ngetulu kwaloko, ngesikhatsi bacabanga ngebuhle baNkulunkulu lobucondzile kubantfu, kanye nemandla akhe ekukhululeni Alma kanye nabomnakabo baphuma etandleni temaLamani kanye nasebugcilini, baphakamisa emavi abo bambonga Nkulunkulu.

11 Futsi, ngesikhatsi bacabanga ngemaLamani, labekabomnakabo, ngekona kwawo kanye nangesimo sawo lesingcolile, bagcwala buhlungu nekudzabuka ngalokuphatselene nenhlalakahle yemiphefumulo yawo.

12 Futsi kwenteka kutsi labo labebabantfwana ba-Amuloni kanye nabomnakabo, labebatsetse emadvodzakati emaLamani kuwashada, abaphatsekanga kahle ngendlela bokhokho babo labebatiphetse ngayo, futsi bona abatange basabitwa ngemabito abokhokho babo, ngako-ke batitsatsela libito laNefi, kute babitwe ngebantfwana baNefi futsi babalwe kanye nalabo labebabitwa ngekutsi bangemaNefi.

13 Manje bonkhe bantfu baZarahemla babalwa nemaNefi, futsi loku kungenca yekutsi umbuso wawunganiketwanga muntfu kodvwa kulabo labebabesitukulwane saNefi.

14 Manje kwenteka kutsi ngesikhatsi Mosiya sekente siphetfo senkhulumo kanye nekufundzela bantfu bakhe, waba nesifiso sekutsi Alma naye ngalokunjalo akhulume kubantfu.

15 Futsi Alma wakhuluma kubo, ngesikhatsi bonkhe sebabutsene ndzawonye ngemacembu lamakhulu, wahamba wesuka kulinye licembu waya kulelinye, ashumayela kubantfu kuphendvuka nekukholwa eNkhosini.

16 Futsi wabakhutsata bantfu baLimhi kanye nabomnakabo, bonkhe labo labebakhululiwe baphuma ebugcilini, kutsi bakhumbule kutsi bekuyiNkhosi leyabakhulula.

17 Futsi kwenteka kutsi emvakwekutsi Alma sekabafundzisile bantfu tintfo letinyenti, sekente siphetfo sekukhuluma nabo, inkhosi Limhi yaba nesifiso sekutsi ibhajatiswe; kanjalo nabo bonkhe bantfu bayo babanesifiso sekutsi nabo babhajatiswe.

18 Ngako-ke, Alma wahamba waya emantini futsi wababhabhatisa; yebo, wababhabhatisa ngendlela leyo lekenta ngayo kubomnakabo emantini aMormon; yebo, futsi bonkhe labo lababhabhatisa bangena ebandleni laNkulunkulu; loku bekungenca yenkholelo yabo emavini a-Alma.

19 Futsi kwenteka kutsi inkhosi Mosiya yaniketa Alma kutsi asungule emabandla kulo lonkhe live laseZarahemla; futsi yamnika emandla ekutsi abeke baphristi kanye nebafundzisi ngetulu kwawo onkhe emabandla.

20 Manje loku kwentiwa ngenca yekutsi bebabanyenti kakhulu bantfu kangangekutsi bebangenakuphatfwa ngumfundzisi munye; noma bonkhe bakwati kuliva livi laNkulunkulu embutsanweni munye;

21 Ngako-ke babutsana ndzawonye emacembu lehlukene, babitwa ngekutsi bangemabandla; libandla ngelibandla linebaphristi balo kanye nebafundzisi balo, futsi wonkhe umphristi ashumayela livi njengobe beliniketwe kuye ngemlomo wa-Alma.

22 Ngaleso sizatfu, nanoma bekungemabandla lamanyenti bonkhe bebalibandla linye, yebo, libandla laNkulunkulu; ngoba bekute lutfo lolwalushunyayelwa kuwo onkhe emabandla ngaphandle kwekuphendvuka kanye nelukholo kuNkulunkulu.

23 Manje besekukhona emabandla lasikhombisa eveni laseZarahemla. Futsi kwenteka kutsi labo labebanesifiso sekubitwa ngelibito laKhristu, noma laNkulunkulu, batihlanganisa nemabandla aNkulunkulu;

24 Babitwa ngekutsi bantfu baNkulunkulu. Futsi iNkhosi yatfululela Moya wayo etikwabo, babusiseka, baphumelela eveni.