1 Futsi kwenteka kutsi emvakwesikhatsi lesiyiminyaka lemibili Abinadi wefika emkhatsini wabo atifihlile, kangangoba abatange bamati, wacala kuphrofetha emkhatsini wabo, watsi: Naku iNkhosi lengiyalete ngako, yatsi—Abinadi, hamba uphrofethe kulaba bantfu bami, ngoba batente lukhuni tinhlitiyo tabo ngekumelana nemavi ami; abaphendvukanga etentweni tabo letimbi; ngako-ke, ngitawubajezisa ngentfukutselo yami, yebo, ngentfukutselo yami leyesabekako ngitawubajezisa ebubini kanye nasetinengisweni tabo.

2 Yebo, maye kulesi situkulwane! Futsi iNkhosi yatsi kimi: Yelula sandla sakho uphrofethe, utsi: Naku lokushiwo yiNkhosi, kuyawukwenteka kutsi lesi situkulwane, ngenca yebubi baso lobukhulu, siyawuletfwa ebugcilini, futsi siyawushaywa esihlatsini; yebo, siyawucoshwa bantfu, siphindze sibulawe; futsi emangce asemoyeni, netinja, yebo, kanye netilwane tesiganga, tiyawuyishwabudzela inyama yaso.

3 Futsi kuyawukwenteka kutsi imphilo yenkhosi Nowa iyawuba lite njengengubo esitsandvweni lesishisako; ngoba uyawukwati kutsi mine ngiyiNkhosi.

4 Futsi kuyawukwenteka kutsi ngitawubashaya laba bantfu bami ngetinhlupheko letibuhlungu, yebo, ngendlala kanye nangamashayabhuce wesifo; ngitawukwenta kutsi bahhewule lilanga lonkhe.

5 Yebo, ngitawukwenta kutsi babe nemitfwalo leboshelwe emihlane yabo; futsi bayawuchutjelwa phambili njengembongolo lesimungulu.

6 Futsi kuyawukwenteka kutsi ngitawutfumela sangcotfo emkhatsini wabo, siyawubashaya; ngetulu kwaloko bayawushaywa ngumoya wasemphumalanga; tilokatane tiyawukhatsata live labo futsi, tishwabudzele lokuyinhlavu kwabo.

7 Bayawushaywa ngamashayabhuce wesifo lesikhulu—futsi konkhe loku ngitawukwenta ngenca yebubi kanye netinengiso tabo.

8 Futsi kuyawukwenteka kutsi ngaphandle kwekutsi baphendvuke ngitawubabhubhisa nya emhlabeni; noko bayawushiya umbhalo emvakwabo, ngitawugcinela letinye tive letiyawutfola lelive; yebo, naloku ngitawukwenta kute ngivete tinengiso talaba bantfu kuletinye tive. Tinyenti tintfo Abinadi latiphrofetha ngekumelana nalabantfu.

9 Futsi kwenteka kutsi bamtfukutselela; bamtsatsa bamtfwala bambophile bamyisa phambi kwenkhosi, batsi enkhosini: Buka, siletse indvodza phambi kwakho lephrofethe bubi mayelana nebantfu bakho, itsi Nkulunkulu utawubabhubhisa.

10 Ngetulu kwaloko iphrofethe bubi mayelana nemphilo yakho, itsi imphilo yakho iyawuba njengengubo esitsandvweni semlilo.

11 Ngetulu kwaloko, itsite wena uyawuba njengeluhlanga, ngisho njengeluhlanga lolomile lwensimi, lapho kugijima khona tilwane ngetulu kwalo futsi lugcotjwagcotjwe phansi kwetinyawo.

12 Ngetulu kwaloko, itsi wena uyawuba njengembali yelugagane, lokutsi, uma seyivutsiwe ngalokuphelele, uma umoya uvunguta, ipheshulelwe etikwelive lonkhe. Futsi yenta shangatsi yiNkhosi lekukhulumile loko. Itsi konkhe loku kuyawuta kuwe ngaphandle kwekutsi uphendvuke, futsi loku kungenca yebubi bakho.

13 Manje, O nkhosi, bubi buni lobukhulu lobentile, noma tono tini letinkhulu letentiwe bantfu bakho, kutsi tsine sijeziswe nguNkulunkulu noma sehlulelwe ngulendvodza na?

14 Manje, O nkhosi, buka, tsine asinacala, nawe kanjalo, O nkhosi, awutange wone; ngako-ke, lendvodza icale emanga mayelana nawe, futsi iphrofethe ngelite.

15 Buka, tsine sinemandla, angeke siye ebugcilini, noma sitsatfwe sitfunjwe titsa tetfu; yebo, futsi wena uphumelele kulelive, ngetulu kwaloko usatawuphumelela.

16 Buka, nayi lendvodza, siyiletsa kutakho tandla; ungenta noma yini kuyo loko lokubonakala kukuhle kuwe.

17 Futsi kwenteka kutsi inkhosi Nowa yenta kutsi Abinadi aphonswe ejele; waphindze wayaleta kutsi baphristi babutsane ndzawonye kute ibambe umhlangano nabo kutsi yenteni ngaye.

18 Futsi kwenteka kutsi batsi enkhosini: Mletse lapha kute simbute; inkhosi yayaleta kutsi akaletfwe phambi kwabo.

19 Bacala kumbuta, kute bamphice, kute ngaloko babe naloko labangambeka licala ngako; kodvwa wabaphendvula ngesibindzi, wayimela yonkhe imibuto yabo, yebo, bate bamangala nabo; ngoba wamelana nabo kuyo yonkhe imibuto yabo, wabancoba ngenkhulumo kuwo onkhe emavi abo.

20 Futsi kwenteka kutsi lomunye wabo watsi kuye: Asho kutsini lamavi labhaliwe, lafundziswe bokhokho betfu, batsi:

21 Tinhle kangakanani etikwetintsaba tinyawo taloyo loletsa tindzaba letimnandzi; lomemetela kuthula; loletsa tindzaba letimnandzi tebuhle; lomemetela insindziso; lotsi kuSiyoni, Nkulunkulu wakho uyabusa;

22 Balindzi bakho bayawuphakamisa livi; ngelivi linye bayawuhlabela; ngoba bayawutibonela ngewabo emehlo lapho iNkhosi iphindze iletsa iSiyoni;

23 Hlokomani ngekujabula; hlabelelani kanyekanye nine tindzawo letitindzala taseJerusalema; ngoba iNkhosi ibadvudvutile bantfu bayo, iyihlengile iJerusalema;

24 INkhosi yembule umkhonono wayo longcwele emehlweni ato tonkhe tive, futsi yonkhe imikhawulo yemhlaba iyawuyibona insidziso yaNkulunkulu wetfu na?

25 Manje Abinadi watsi kubo: Ngabe nibaphristi na, futsi nenta shangatsi nifundzisa laba bantfu, nekutsi niyacondza ngamoya wekuphrofetha, kodvwa nifisa kwati kimi kutsi leti tintfo tisho kutsini?

26 Ngitsi kini, maye kini ngoba niguculele tindlela teNkhosi! Ngoba uma niticondza leti tintfo anikate nitifundzise; ngako-ke, niguculele tindlela teNkhosi.

27 Anikate nifise etinhlitiyweni tenu kucondza; ngako-ke, anikabi nako kuhlakanipha. Ngako-ke, nibafundzisani laba bantfu na?

28 Batsi: Sifundzisa umtsetfo waMosi.

29 Watsi kubo: Uma nifundzisa umtsetfo waMosi pho kuya ngani ningawugcini na? Kuya ngani nibeke tinhlitiyo tenu etikwemcebo na? Kuya ngani nente bugwadla futsi nicitse emandla enu netingwadla, yebo, nenta labantfu kutsi bente sono, kangangekutsi iNkhosi ibe nesizatfu sekungitfumela kutsi ngiphrofethe ngekumelana nalaba bantfu, yebo, nangebubi lobukhulu ngekumelana nalaba bantfu na?

30 Anati yini kutsi ngikhuluma liciniso na? Yebo, niyati kutsi ngikhuluma liciniso; futsi nifanele kutfutfumela phambi kwaNkulunkulu.

31 Futsi kuyawukwenteka kutsi niyawushaywa ngenca yebubi benu, ngoba nitsite nifundzisa umtsetfo waMosi. Natini mayelana nemtsetfo waMosi na? Ngabe insindziso ita ngemtsetfo waMosi? Nitsini?

32 Baphendvula batsi insindziso yeta ngemtsetfo waMosi.

33 Kodvwa manje Abinadi watsi kubo: Ngiyati kutsi uma nigcina imiyaleto yaNkulunkulu nitawusindziswa; yebo, uma nigcina imiyaleto iNkhosi leyayiletsa kuMosi entsabeni yaseSinayi, letsi:

34 NgiyiNkhosi Nkulunkulu wakho, lokukhiphe eveni laseGibhithe, wakukhipha emtini webugcili.

35 Angeke ube nalomunye Nkulunkulu ngaphandle kwami.

36 Ungatenteli sitfombe lesibatiwe, noma umfanekiso wanoma yini lesezulwini ngetulu, noma tintfo letisemhlabeni ngaphansi.

37 Manje Abinadi watsi kubo, Ngabe nikwentile konkhe loku na? Ngitsi kini, Cha, anikakwenti. Futsi ngabe nibafundzisile yini laba bantfu kutsi kumele bente tonkhe leti tintfo na? Ngitsi kini, Cha, anikate.