1 Manje, kwenteka kutsi emvakwekutsi inkhosi Mosiya seyibe nekuthula njalonjalo sikhatsi lesingangeminyaka lemitsatfu, yaba nesifiso sekwati mayelana nebantfu labahamba bayohlala eveni lemaLehi-Nefi, noma edolobheni lemaLehi-Nefi; ngoba bantfu bakhe bebangakeva lutfo ngabo kusukela ngesikhatsi bahamba eveni laseZarahemla; ngako-ke bamhlupha bambelesela ngabo.

2 Futsi kwenteka kutsi inkhosi Mosiya yavuma kutsi emadvodza lacinile lalishumi nesitfupha akhuphukele eveni lemaLehi-Nefi, kuyawubuta mayelana nabomnakabo.

3 Futsi kwenteka kutsi ngakusasa acala kukhuphuka, kuwo kwakhukhona lomunye longu-Amoni, lobekayindvodza lecinile lenemandla, bekawesitukulwane saZarahemla, ngetulu kwaloko bekangumholi wabo.

4 Manje, bebangayati indlela lebekumele bahambe ngayo ehlane kukhuphukela eveni lemaLehi-Nefi; ngako-ke bazulazula emalanga lamanyenti ehlane, emalanga langemashumi lamane bazulazula.

5 Ngesikhatsi sebazulazule emalanga langemashumi lamane befika egcumeni, lelisenyakatfo yelive laseShilomu, lapho bemisa emathende abo khona.

6 Amoni watsatsa bomnakabo labatsatfu, emabito abo bekubo-Amaleki, Helemi kanye naHemi, behlela entansi eveni laNefi.

7 Buka, bahlangana nenkhosi yebantfu labebaseveni laNefi, kanye naseveni laseShilomu, bebatungeletwe bogadzi benkhosi, batsatfwa, baboshwa, baphindze bafakwa ejele

8 Futsi kwenteka emvakwekutsi sebasejele emalanga lamabili baphindze baletfwa phambi kwenkhosi, tibopho tabo tacekiswa, bamiswa phambi kwenkhosi, bavunyelwa, noma bayaletwa, kutsi baphendvule imibuto lebeyitoyibuta kubo.

9 Yatsi kubo: Bukani, mine nginguLimhi, indvodzana yaNowa, lobekayindvodzana yaZenifi lowakhuphuka waphuma eveni laseZarahemla kute atfole lelive njengelifa, lokwakulive labokhokho babo, lowentiwa inkhosi ngelivi lebantfu.

10 Manje, ngifisa kwati sizatfu sekutsi nibe nesibindzi lesingaka sekusondzela edvute netindvonga talelidolobha, ngesikhatsi mine, lucobo lwami, benginabogadzi bami ngephandle kwelisango.

11 Manje, ngalesi sizatfu nginivumele kutsi nisindziswe, kute ngibute ngani, kungenjalo ngabe ngente kutsi bogadzi bami banibulale. Nivumelekile kutsi nikhulume.

12 Manje, ngesikhatsi Amoni abona kutsi bekavumelekile kukhuluma, waya ngaphambili wakhotsama phambi kwenkhosi; waphindze waphakama watsi: O nkhosi, ngiyabonga kakhulu phambi kwaNkulunkulu ngalelilanga kutsi ngisaphila, futsi ngisavunyelwe kutsi ngikhulume; ngitawutama kukhuluma ngesibindzi;

13 Ngoba ngicinisekile kutsi kube bewungati bewungeke uvume kutsi ngifakwe leti tibopho. Ngoba mine ngingu-Amoni, nginguwesitukulwane saZarahemla, futsi ngikhuphukile ngaphuma eveni laseZarahemla kutsi ngitobuta mayelana nabomnaketfu, Zenifi lakhuphuka nabo baphuma kulelo live.

14 Manje, kwenteka kutsi emvakwekutsi Limhi sekawavile lamavi ku-Amoni, wajabula kakhulu, watsi: Manje, sengiyati ngekweliciniso kutsi bomnaketfu labebaseveni laseZarahemla basaphila. Futsi manje, ngitawutfokota; kusasa ngitawukwenta kutsi bantfu bami batfokote nabo.

15 Ngoba buka, sisebugcilini kumaLamani, sitseliswe ngemtselo lokumatima kuwutfwala. Manje, buka, bomnaketfu batawusikhulula ebugcilini betfu, noma basikhiphe etandleni temaLamani, sitawuba tigcili tabo; ngoba kuncono kutsi sibe tigcili kumaNefi kunekutsi sikhokhe umtselo enkhosini yemaLamani.

16 Manje, inkhosi Limhi yayaleta bogadzi bayo kutsi bangabe basambopha Amoni noma bomnakabo, kodvwa yenta kutsi bahambe baye egcumeni lelalisenyakatfo yaseShilomu, baletse bomnakabo edolobheni, kute ngaloko badle, banatse, batiphumute emisebentini yeluhambo lwabo; ngoba bebahlushwe tintfo letinyenti; bebahlushwe yindlala, koma, kanye nekukhatsala.

17 Manje, kwenteka ngakusasa kutsi inkhosi Limhi yatfumela simemetelo emkhatsini wabo bonkhe bantfu bayo, kutsi babutsane ndzawonye ethempelini, kutova emavi labekatowakhuluma.

18 Futsi kwenteka kutsi emvakwekutsi sebabutsene ndzawonye yakhuluma kubo ngalendlela, yatsi: O nine, bantfu bami, phakamisani tinhloko tenu nidvudvuteke; ngoba bukani, sikhatsi sesifikile, noma asisekho khashane kakhulu, lapho singeke sibe ngaphansi kwetitsa tetfu, nanoma bumatima betfu bubunyenti, bube lite; noko ngiyetsemba buyachubeka bumatima lobunemphumela losatawukwentiwa.

19 Ngako-ke, phakamisani tinhloko tenu, nitfokote, nibeke litsemba lenu kuNkulunkulu, kuloyo Nkulunkulu lobekanguNkulunkulu wa-Abrahama, na-Isaka, kanye naJakobe; loyo Nkulunkulu lowakhipha bantfwana baka-Israyeli eveni laseGibhithe, wenta kutsi bahambe badzabule Lwandle loluBovu emhlabatsini lowomile, wabondla ngemana kute bangabhubhi ehlane; futsi tinyenti letinye tintfo labentela tona.

20 Futsi ngetulu kwaloko, yena kanye loyo Nkulunkulu ukhiphe bokhokho betfu eveni laseJerusalema, wabagcina wabalondvolota bantfu bakhe kute kube manje; bukani, kungenca yebubi kanye netinengiso tetfu kutsi usiletse ebugcilini.

21 Nine nonkhe nibofakazi ngalelilanga, kutsi Zenifi, lowentiwa inkhosi ngetulu kwalaba bantfu, bekanenshisekelo lenkhulu kutsi atfole live labokhokho bakhe, ngako-ke wakhohliswa ngemacebo kanye nebucili enkhosi Lamani, lowatsi ekubeni angene esivumelwaneni nenkhosi Zenifi, ekubeni atinikele etandleni takhe kuphatfwa kwencenye yalelive, noma lidolobha lemaLehi-Nefi, nelidolobha laseShilomu kanye nelive lelitungeletiwe—

22 Konkhe loku yakwenta, ngenhloso yinye yekuletsa laba bantfu ebugcilini noma ngaphansi kwayo. Bukani, tsine ngalesi sikhatsi sikhokha umtselo enkhosini yemaLamani, lokulinani leliyincenye yinye yemmbila wetfu, kanye nebhali yetfu, nako konkhe kwetfu lokuyinhlavu kwalo lonkhe luhlobo, kanye nencenye yinye yekwentalo yemhlambi wetimvu kanye nemhlambi wetinkhomo tetfu; nencenye yinye yako konkhe lesinako noma lesikuphetse inkhosi yemaLamani iyakufuna kitsi, noma timphilo tetfu.

23 Manje, ngabe loku akusiko matima yini kukutfwala na? Ngabe loku, akusiyo yini, inhlupheko, lenkhulu kitsi na? Manje, bukani, ngabe sikhulu kanganani sizatfu sekutsi silile na?

24 Yebo, ngitsi kini, tinkhulu tizatfu letenta silile; ngoba bukani bangaki bomnaketfu lababulawa, ingati yabo yacitselwa lite, konkhe ngenca yebubi.

25 Ngoba kube laba bantfu bebangawelanga esiphambekweni iNkhosi beyingeke ivume kutsi lobu bubi lobukhulu kangaka behlele etikwabo. Kodvwa bukani, abawalalelanga emavi ayo; kodvwa kwavuka tincabano emkhatsini wabo, kangangekutsi bacitsa ingati emkhatsini wabo lucobo.

26 Umphrofethi weNkhosi bambulele; yebo, indvodza lekhetsiwe yaNkulunkulu, leyabatjela ngebubi babo kanye netinengiso, yaphrofetha ngetintfo letinyenti letitokwenteka, yebo, nangekuta kwaKhristu.

27 Ngenca yekutsi watsi kubo Khristu bekanguNkulunkulu, Babe wato tonkhe tintfo, nekutsi uyawutsatsa umfanekiso wemuntfu, futsi kuyawuba ngumfanekiso umuntfu ladalwe ngawo ekucaleni; noma ngalamanye emagama, watsi umuntfu bekadalwe ngemfanekiso waNkulunkulu, nekutsi Nkulunkulu uyokwehlela emkhatsini webantfwana bebantfu, atsatse umtimba wenyama nengati, futsi ahambe emhlabeni wonkhe.

28 Manje, ngenca yekutsi washo loku, bambulala; tinyenti kakhulu tintfo labatenta letehlisela lulaka lwaNkulunkulu etikwabo. Ngako-ke, ngubani lomangalako kutsi basebugcilini, kanye nekutsi bashaywa ngetinhlupheko letibuhlungu na?

29 Ngoba bukani, iNkhosi itsite: Angitubasita bantfu bami ngelilanga lesiphambeko sabo; kodvwa ngitawutibiyela tindlela tabo kute bangaphumeleli; tento tabo tiyawuba sikhubekiso phambi kwabo.

30 Ngetulu kwaloko, itsi: Uma bantfu bami bayawuhlanyela kungcola bayawuvuna emakhoba abo kuso sivunguvungu; futsi umphumela waloko ngushevu.

31 Ngetulu kwaloko itsi: Uma bantfu bami bayawuhlanyela kungcola bayawuvuna umoya wasemphumalanga, loletsa imbubhiso ngekushesha.

32 Manje, bukani, setsembiso seNkhosi sigcwalisekile, nishayiwe niphindze nisetinhluphekweni.

33 Kodvwa uma nitawuphendvukela eNkhosini ngenhloso legcwele yenhlitiyo, nibeke litsemba lenu kuyo, niyisebentele ngako konkhe kukhutsala kwengcondvo, uma nitawukwenta loku, ngekwentsandvo nangekwesifiso sayo, itawunikhipha ebugcilini.