1 Ha ojehu Alma oujey Gedeón retãgui, ohekomboʼe rire Gedeón tavayguakuérape heta mbaʼe ndaikatúiva ojehai, omoĩvo upépe upe tupao ñemohendaporã, ojapo haguéicha upe mboyve Zarahemla retãme, heẽ, haʼe ohojey hógape Zarahemla-pe, opytuʼu hag̃ua tembiapokuéra ojapovaʼekuégui.

2 Ha péicha opa pe novéno ary huekuéra ñeisãmbyhy Nefi tavayguakuéra ári.

3 Ha ojehu oñepyrũvo décimo ary huekuéra ñeisãmbyhy Nefi tavayguakuéra ári, Alma osẽ upégui ha oguata ohóvo Melek retã gotyo, ysyry Sidón kuarahyreike gotyo, pe taveʼỹ rembeʼýre kuarahyreiképe.

4 Ha oñepyrũ omboʼe tavayguakuérape Melek retãme pe Tupã orden marangatu rupive, haʼe oñehenoihague rupi; ha haʼe oñepyrũ ohekomboʼe tavayguakuérape opa pe Melek retã tuichakue javére.

5 Ha ojehu tavayguakuéra ou hendápe opa tetã rembeʼýgui oĩva pe taveʼỹ gotyo. Ha oñemongarai chupekuéra opa pe tetã tuichakue javére.

6 Upéicha ombopahávo hembiapo Melek-pe osẽ upégui, ha oguata mbohapy ára aja Melek retã nórte gotyo; ha og̃uahẽ peteĩ tavaguasu hérava Ammoníah-pe.

7 Koʼág̃a Nefi tavayguakuéra ojepokuaa ombohéra hikuái hetã ha itavaguasukuéra, ha itapỹikuéra, heẽ jepe opa itapỹiʼikuérape, pe ohupytyraẽvaʼekue réra rupi; ha péicha oikókuri Ammoníah retãre.

8 Ha ojehu Alma og̃uahẽ vove tavaguasu Ammoníah-pe oñepyrũ omboʼe Tupã ñeʼẽ chupekuéra.

9 Koʼág̃a Satana ohupytýkuri tuicha puʼaka tavaguasu Ammoníah tavayguakuéra korasõ ári; upévare haʼekuéra nohenduséikuri Alma ñeʼẽ.

10 Upevére Alma heta ombaʼapo upe espíritu-pe, ojerurévo Tupãme ñemboʼe mbaretépe haʼe oñohẽ hag̃ua ijespíritu tavayguakuéra ári oĩva upe tavaguasúpe, ikatu hag̃ua avei haʼe oheja omongarai chupekuéra arrepentimientorã.

11 Upevére, omohatã hikuái ikorasõ, ha heʼi chupe: Péina ápe, ore roikuaa nde haʼeha Alma; ha roikuaa nde haʼeha sumo sacerdote pe tupao ári nde remoĩvaʼekue heta hendápe upe tetãme, pende jepokuaaháicha; ha ore ndahaʼéi nde tupaogua, ha ndorogueroviái umi jepokuaa vyrorei.

12 Ha koʼág̃a roikuaa ore ndahaʼéi haguére nde tupaogua roikuaa nde ndereguerekoiha puʼaka ore ári; ha nde remeʼẽkuri pe huekuéra apyka Nefíah-pe; upévare nde ndahaʼéi pe hue guasu ore ári.

13 Koʼág̃a tavayguakuéra heʼi rire koʼãva, ha ombohovái rire opa iñeʼẽ, ha ojahéi hese, ha ondyvu hese, ha omosẽ rire chupe hikuái itavaguasukuéragui, haʼe oho upégui ha oguata ohóvo tavaguasu hérava Aarón-pe.

14 Ha ojehu oho jave pe tenda gotyo, ojopývo chupe vyʼaʼỹ, ohasávo heta jeikoʼasy ha pyʼapy hiʼángape, umi tavaygua Ammoníah-pegua tekoñaña rehe, ojehu Alma upéicha ojejopývo vyʼaʼỹme, péina ápe peteĩ Ñandejára ángel ojehechauka chupe, heʼívo:

15 Ejehovasapyre nde, Alma; upévare, emopuʼã ne akã ha evyʼa, eguerekógui tuicha mbaʼérepa revyʼa hag̃ua; ndejeroviarekógui neñeʼẽrendúvo Tupã rembiapoukapykuérare ára oñemeʼẽ guive ndéve pe marandu peteĩha chugui. Péina ápe, che haʼe pe ameʼẽvaʼekue ndéve.

16 Ha péina ápe, che añemondo haʼe hag̃ua ndéve rehojey hag̃ua Ammoníah tavaguasúpe, ha ehekomboʼejey upe tavaguasugua tavayguakuérape; heẽ, ehekomboʼe chupekuéra. Heẽ, ere chupekuéra, noñearrepentíriramo, Tupã Ñandejára ohunditaha chupekuéra.

17 Ha péina ápe, koʼág̃a ohecha hína hikuái mbaʼéichapa ikatu ohundi nde tavayguakuéra sãso, (péicha heʼígui Ñandejára) mbaʼe ojoavýva Tupã rembipota ha huísio ha tembiapoukapy ndive haʼe omeʼẽvaʼekue itavayguakuérape.

18 Koʼág̃a ojehu oñemeʼẽ rire Alma-pe imarandu pe Ñandejára ángel rupi ohojey pyaʼe Ammoníah retãme. Ha haʼe oike pe tavaguasúpe ambue tape rupi, heẽ, tape opytáva tavaguasu Ammoníah rupi sur gotyo.

19 Ha oikévo upe tavaguasúpe iñembyahýi, ha heʼi peteĩ kuimbaʼépe: Emeʼẽne piko mbaʼe hoʼu hag̃ua peteĩ Ñandejára rembiguái imirĩvape?

20 Ha pe kuimbaʼe heʼi chupe: che haʼe peteĩ nefita, ha che aikuaa nde haʼeha peteĩ Tupã proféta marangatu, nde haʼégui pe kuimbaʼe pe ángel heʼi haguére chéve peteĩ techaukápe: Nde remog̃uahẽta chupe. Upévare eju chendive che rógape ha ameʼẽta ndéve che rembiʼúgui; ha aikuaa nde haʼetaha peteĩ jehovasa chéve ha che rógape g̃uarã.

21 Ha ojehu pe kuimbaʼe omog̃uahẽ chupe hógape; ha pe kuimbaʼe héra Amulek; ha ogueru mbujape ha soʼo ha omoĩ Alma renondépe.

22 Ha ojehu Alma hoʼu pe mbujape ha hyg̃uatã; ha haʼe ohovasa Amulek ha hógape, ha omeʼẽ aguyje Tupãme.

23 Ha okaru ha hyvatã rire heʼi Amulek-pe: Che haʼe Alma, ha haʼe sumo sacerdote Tupã tupao ári ko tetã tuichakue javére.

24 Ha péina ápe, che añehenói amboʼe hag̃ua Tupã ñeʼẽ opa ko tavayguakuéra apytépe, rrevelasiõ espíritu ha profesía heʼiháicha; ha aimékuri ko tetãme ha nachemog̃uahẽséi hikuái, ha katu chemosẽ okápe ha haimete ajere ko tetãgui tapiaite g̃uarã.

25 Ha katu péina ápe, ojeʼe chéve ajujey hag̃ua ha aprofetisa ko tavayguakuérape, heẽ, ha atestifika hag̃ua hesekuéra hembiapovaikuérare.

26 Ha koʼág̃a, Amulek, ejehovasáva nde chemongaru, ha chemog̃uahẽ haguére, cheñembyahýigui, aʼajuna haguérekuri heta ára aja.

27 Ha Alma opyta Amulek ndive heta ára oñepyrũ mboyve ohekomboʼe tavayguakuérape.

28 Ha ojehu tavayguakuéra oñemohatãve hembiapovaikuérape.

29 Ha pe ñeʼẽ ou Alma-pe, heʼívo: Tereho ha ere avei che rembiguái Amulek-pe, pesẽ ha peprofetisa hag̃ua ko tavayguakuérape, pejévo: Peñearrepentíke, péicha heʼígui Ñandejára, napeñearrepentíriramo che ajúta ko tavayguakuérape che pochy reheve; heẽ, ha namboykemoʼãi che pochyvaiete.

30 Ha Alma osẽ, ha avei Amulek, tavayguakuéra apytépe, omeʼẽ hag̃ua chupekuéra Tupã ñeʼẽ; ha henyhẽ hikuái pe Espíritu Santo-gui.

31 Ha oñemeʼẽ chupekuéra puʼaka, tuichaitereígui ndaikatúi oñemoinge chupekuéra kaʼirãime; ni ndaikatúi avave yvypóra ojuka chupekuéra; upevére, ndoiporúi hikuái ipuʼaka ojejokua peve chupekuéra jokuahápe ha ojeity kaʼirãime. Koʼág̃a, koʼãva ojejapo Ñandejára ohechauka hag̃ua ipuʼaka hesekuéra.

32 Ha ojehu osẽ hikuái ha oñepyrũ ohekomboʼe ha oprofetisa tavayguakuérape, pe espíritu ha puʼaka Ñandejára omeʼẽvaʼekue chupekuéra rupive.