1 Ha koʼág̃a ojehu oñepyrũvo ary veintinueve huekuéra ñeisãmbyhy rehegua, Ammorón heʼika Moroni-pe ojaposeha peteĩ prisionerokuéra ñemyengovia.

2 Ha ojehu Moroni-pe ogueru tuicha vyʼa pe ojejeruréva, oipotágui umi tembiʼu oñemeʼẽva lamanita-kuéra prisionérope opyta oñemongaru hag̃ua itavayguakuérape; ha avei haʼe oipota itavayguakuérape omombarete hag̃ua ijehérsito.

3 Koʼág̃a, lamanita-kuéra ojagarrákuri heta kuña ha mitã, ha ndaipórikuri ni peteĩ kuña ni mitã opa Moroni prisionerokuéra apytépe, térã prisionéro Moroni ojagarravaʼekue apytépe; upévare Moroni oiporu peteĩ mbotavy ohupyty hag̃ua heta prisionéro nefítava ikatúva umi lamanita-kuéragui.

4 Upévare ohai peteĩ kuatiañeʼẽ, ha omondo Ammorón rembiguái rupive, pe ogueruvaʼekuevoi peteĩ kuatiañeʼẽ Moroni-pe. Koʼág̃a koʼãva haʼe ñeʼẽ ohaivaʼekue Ammorón-pe, heʼívo:

5 Péina ápe, Ammorón, che ahaíkuri ndéve ñeʼẽ ko ñorairõguasu rehegua regueruvaʼekue che tavayguakuéra rehe, térã jaʼeporãséramo nde joykeʼy ogueruvaʼekue orerehe, ha reguerahasevénteva hína jepe haʼe omano riréma.

6 Péina ápe, che haʼese ndéve peteĩ mbaʼe upe Tupã hustísia rehe, ha iñekoʼõi ipuʼakapáva kysepuku, ojeiporútava penderehe peñearrepentiʼỹramo ha pembojevyʼỹrõ pende ehérsito pene retã meve, térã tetã pene mbaʼévape, haʼéva Nefi retã.

7 Heẽ, che haʼese ndéve koʼã mbaʼe ikatútarire rehendu umíva; heẽ, haʼevaʼerãmoʼã ndéve pe añaretã vaiete oĩmava omog̃uahẽ hag̃ua péicha oporojukávape nde ha nde joykeʼy haʼeháicha, napeñearrepentíriramo ha peheja pende jejukase, ha pehojey pende ehersitokuéra reheve pene retãme.

8 Ha katu upe mboyve perrechasa haguéicha koʼã mbaʼe, ha peñemoĩkuri Ñandejára tavayguakuéra rehe, upéicha che ahaʼarõjey pejapo.

9 Ha koʼág̃a péina ápe, roiméma ñembosakoʼípe pomog̃uahẽ hag̃ua; heẽ, ha pehejaʼỹramo umi mbaʼe pejaposéva, péina ápe, pejapóta upe Tupã perrechasavaʼekue ñekoʼõi hoʼa pende ári, jepe peñehundipaite peve.

10 Ha katu, Ñandejára oikoveháicha, ore ehersitokuéra oúta pende ári napeñembyasýiramo, ha koʼágui pyaʼe oúta peẽme ñemano, rojokótagui ore tavaguasu ha ore retã; heẽ, ha romoʼãta ore religión ha ore Tupã mbaʼéva.

11 Ha katu péina ápe, haʼetévaicha chéve añeʼẽreiha ndéve koʼã mbaʼére; térã haʼetévaicha chéve nde haʼeha peteĩ añaretã raʼy; upévare che ambopaháta che kuatiañeʼẽ haʼévo ndéve namyengoviamoʼãiha prisionerokuéra, nderemeʼẽiramo peteĩ kuimbaʼe ha hembireko ha itaʼyrakuéra peteĩ prisionéro rangue; péicha jajapótaramo, che ajapóta ñemyengovia.

12 Ha péina ápe, nderejapóiramo upéva, che aháta penderehe che ehérsito reheve; heẽ, jepe amoʼármata kuña ha mitãnguéra, ha che aháta pende rehe, ha aháta penderapykuéri pene retã meve, haʼéva tetã ñande jehejapyre peteĩha; heẽ, ha haʼéta tuguy tuguýre, heẽ, tekove tekovére; ha che añemoĩta penderehe jepe peñehundi peve yvy ape árigui.

13 Péina ápe, che chepochy, ha avei che tavayguakuéra; peẽ orejukasékuri, ha ore roñehaʼãnte roñemoʼã. Ha katu péina ápe, peñehaʼã jeýramo orerundi ore roñehaʼãta pohundi peẽme; heẽ, ha roñehaʼãta rohupyty hag̃ua ore retã, tetã ore jehejapyre peteĩha.

14 Koʼág̃a che ambopaha che kuatiañeʼẽ. Che haʼe Moroni; che haʼe peteĩ nefita tavayguakuéra mburuvicha.

15 Koʼág̃a ojehu Ammorón, og̃uahẽvo chupe ko kuatiañeʼẽ, ipochýkuri; ha ohai ambue kuatiañeʼẽ Moroni-pe, ha koʼãva haʼe ñeʼẽ ohaivaʼekue, heʼívo:

16 Che haʼe Ammorón, lamanita-kuéra rréi; che haʼe Amalickíah joykeʼy pejukavaʼekue. Péina ápe, che avengáta huguy pende ári, heẽ, ha che ajúta pende ári che ehersitokuéra reheve ndakyhyjéigui ñeʼẽpohýi pejévagui.

17 Ha katu péina ápe, pende rukuéra ndaijojaivaʼekue ijoykeʼykuéra ndive, omonda peve chuguikuéra iderécho oisãmbyhy hag̃ua haʼévakuri añetete imbaʼekuéra.

18 Ha koʼág̃a péina ápe, pemeʼẽramo pene árma, ha peñemoĩramo peneisãmbyhy hag̃ua umi ñeisãmbyhy imbaʼéva añetete, upéramo che ajapóta che tavayguakuéra oheja hiʼárma ha anivéma oĩ ñorairõguasúpe.

19 Péina ápe, heta ñeʼẽpohýi erékuri che rehe ha che tavayguakuéra rehe; ha katu péina ápe, naoremongyhyjéi ne ñeʼẽpohyikuéra eréva.

20 Upevére, che ahejáta prisionerokuéra oñemyengovia nde ejerure haguéicha, vyʼápe, añongatu hag̃ua che rembiʼukuéra che ehersitokuéra ñorairõguasurãme g̃uarã; ha rojapóta peteĩ ñorairõguasu opaveʼỹtava, tahaʼe romoĩ hag̃ua nefita-kuérape ore autorida guýpe térã rojukapa hag̃ua chupekuéra tapiaite peve g̃uarã.

21 Ha pe Tupã nde erehague ore rorrechasavaʼekue, péina ápe, ore ndoroikuaái upe tekovépe; ni peẽ avei; ha katu peichahágui oĩramo péichagua tekove, ikatúraʼe oime haʼe oreapo oréve pendeapo haguéicha peẽme.

22 Ha oĩramo peteĩ aña ha peteĩ añaretã, péina ápe napenemondomoʼãi piko haʼe upépe peiko hag̃ua che joykeʼy pejukavaʼekuépe ndive, pejéva ohohague upe tendápe? Ha katu péina ápe koʼã mbaʼe ndahaʼéi mbaʼeve.

23 Che haʼe Ammarón, ha haʼe Zoram ñemoñare, upe pende rukuéra omyañavaʼekue ha oguenohẽ Jerusalén-gui.

24 Ha péina ápe koʼág̃a, che haʼe peteĩ lamanita ipyʼaguasúva; péina ápe, ojejapovaʼekue ko ñorairõguasu oñevenga hag̃ua ijojaʼỹkuéra, ha oñeñongatu ha ojehupyty hag̃ua iderechokuéra oisãmbyhy hag̃ua; ha ambopaha che kuatiañeʼẽ Moroni-pe.