1 Koʼág̃a Alma oñeʼẽ rire koʼã ñeʼẽ, oporanduka hikuái chupe oikuaaségui ogueroviavaʼerãpa hikuái peteĩ Tupãme, ohupyty hag̃ua hikuái pe yva haʼe oñeʼẽhague, térã mbaʼéichapa oñotỹvaʼerã hikuái pe yvaraʼỹi, térã pe ñeʼẽ oñeʼẽ haguégui, haʼe heʼivaʼekue oñeñotỹvaʼerãha ikorasõkuérape; térã mbaʼéichapa oñepyrũvaʼerã omombaʼapo hikuái ijerovia.

2 Ha Alma heʼi chupekuéra: Péina ápe, pejékuri ndaikatuiha petupaitũ pende Tupãme peñemosẽgui pene sinagogakuéragui. Ha katu péina ápe, che haʼe peẽme, peimoʼãramo ndaikatuiha petupaitũ pende Tupãme, tuicha pejavy, ha pehesaʼỹijovaʼerã umi escritura; peimoʼãramo kóva haʼe umi penemboʼevaʼekue, heʼise napeikũmbyiha.

3 Napenemanduʼái piko pemoñeʼẽvaʼekue Zenós, pe proféta ymaguare, heʼivaʼekue pe ñemboʼe térã ñetupaitũ rehe?

4 Haʼe heʼígui: Ndeporiahuvereko, O Tupã, rehendúgui che ñemboʼe, jepe aime jave pe taveʼỹme; heẽ, ndeporiahuverekókuri añemboʼe jave umi cherayhuʼỹvare, ha nde rembojerejey chupekuéra chéve.

5 Heẽ, O Tupã, ha ndeporiahuverekókuri chendive ajerureʼasy jave ndéve che kokuépe; ajerureʼasy jave ndéve che ñemboʼe rupi, ha nde cherendúkuri.

6 Ha avei, O Tupã, aha jave che rógape cherendúkuri che ñemboʼépe.

7 Ha aike jave che kotýpe, O Ñandejára, ha añemboʼe ndéve, nde cherendúkuri.

8 Heẽ, nde ndeporiahuvereko nde raʼykuéra ndive ojerureʼasývo ndéve hikuái, oñehenduka hag̃ua nderehe ha katu yvyporakuérare nahániri, ha nde rehendúta chupekuéra.

9 Heẽ, O Tupã, nde ndeporiahuverekókuri chendive, ha rehendúkuri che jerureʼasykuéra nde atyguasu mbytépe.

10 Heẽ, ha avei cherendúkuri che rayhuʼỹhakuéra chemosẽ ha ndacherayhuiramoguare; heẽ, rehendúkuri che jerureʼasykuéra, ha hendy nde pochy che rayhuʼỹhakuéra rehe, ha rejúkuri chupekuéra nde pochýpe ñehundi pyaʼe reheve.

11 Ha cherendúkuri che jehasaʼasy ha che rekoañete rupi; ha nde Raʼy rupi niko ndeporiahuverekókuri chendive, upévare ajerureʼasýta ndéve opa che jehasaʼasýpe, nendive oĩgui che vyʼa; reipeʼágui chehegui nde huisiokuéra nde Raʼy rupi.

12 Ha koʼág̃a Alma heʼi chupekuéra: Peguerovia piko koʼã escritura umi ymaguare ohaivaʼekue?

13 Péina ápe, pegueroviáramo, pegueroviavaʼerã Zenós heʼivaʼekue; ha, péina ápe haʼe heʼíkuri: Reipeʼákuri nde huisiokuéra nde Raʼy rupi.

14 Koʼág̃a péina ápe, che joykeʼykuéra, aporanduse peẽme pemoñeʼẽpa umi escritura? Ha pejapóramo upéva, mbaʼéicha piko ndapegueroviái pe Tupã Raʼýpe?

15 Ndojehaíri piko ndahaʼeiha Zenós añónte oñeʼẽvaʼekue koʼã mbaʼégui, ha katu avei Zenoc oñeʼẽkuri koʼã mbaʼégui.

16 Ha katu péina ápe, haʼe heʼivaʼekue: Ndepochy, O Ñandejára, ko tavayguakuéra ndive, noikũmbyséigui hikuái nde poriahuvereko remeʼẽvaʼekue chupekuéra nde Raʼy rupi.

17 Ha koʼág̃a, che joykeʼykuéra, pehecháma mokõiha proféta ymaguare otestifikákuri pe Tupã Raʼýgui, ha tavayguakuéra noikũmbyséigui iñeʼẽ oitaʼapi chupe hikuái omano meve.

18 Ha katu péina ápe, ndaʼupévainte; ndahaʼéi koʼãva añónte oñeʼẽvaʼekue pe Tupã Raʼy rehe.

19 Péina ápe, Moisés oñeʼẽvaʼekue hese; heẽ, ha péina ápe oñemopuʼãvaʼekue peteĩ ñemohaʼanga pe taveʼỹme, oimeraẽva omaʼẽva hese, oikove hag̃ua. Ha heta oĩ omaʼẽva ha oikovéva.

20 Ha katu saʼi oĩ oikũmbyvaʼekue mbaʼépa heʼise umi mbaʼe, ha kóva ikorasõ atã rupi hikuái. Ha katu oĩ heta ipyʼahatãitereíva ha nomañaséiva, upévare omano hikuái. Koʼág̃a nomañaséikuri hikuái ndogueroviáigui upéva omonguerataha chupekuéra.

21 O che joykeʼykuéra, peñemonguerárire pemaña haguérente peñemonguera hag̃ua, napemaña pyaʼemoʼãi piko, térã pemohatãsevéta pene korasõ jeroviaʼỹme, ha peñemoateʼỹ, ha napemañamoʼãi, péicha pemano hag̃ua?

22 Péicharamo, tekoʼasy oúta pende ári; ha katu ndaʼupéichairamo, pemaʼẽ ha peñepyrũ peguerovia Tupã Raʼýpe, oútava orredimi hag̃ua itavayguakuérape, ha ohasaʼasýtava ha omanótava oexpia hag̃ua iñangaipakuéra; ha opuʼãtava omanovaʼekue apytégui, oguerútava pe jeikovejey, opa yvypóra ou hag̃ua henondépe, ojehusga hag̃ua upe ára pahápe, hembiapo haguéicha.

23 Ha koʼág̃a, che joykeʼykuéra, che aipota peñotỹ koʼã ñeʼẽ pene korasõme; ha oñepyrũvo oñembotuicha, peñangareko hese pende jerovia reheve. Ha péina ápe, oikóta chugui peteĩ yvyramáta, okakuaátava pendepype tekove opaveʼỹvape g̃uarã. Ha upéramo Tupã toheja taivevýi pene mbaʼepohýi Itaʼýra vyʼapavẽ rupi. Ha añetehápe opa koʼã mbaʼe ikatu pejapo pejaposéramo. Amén.