1 Koʼág̃a ojehu og̃uahẽvo pe kuatiañeʼẽ Moroni-pe haʼe ipochyve, oikuaágui Ammorón oikuaa porãitereiha pe japu heʼíva; heẽ, haʼe oikuaáguikuri Ammorón oikuaahague ndahaʼeiha mbaʼe joja oguerahavaʼekue chupe ojapo hag̃ua ñorairõguasu Nefi tavayguakuéra rehe.

2 Ha haʼe heʼi: Péina ápe, namyengoviamoʼãi prisionerokuéra Ammorón ndive ohejaʼỹramo pe ojaposéva, che haʼe haguéicha chupe che kuatiañeʼẽme; ndahejamoʼãigui chupe oguerekove puʼaka pe oguerekómavagui.

3 Péina ápe, che aikuaa tenda lamanita-kuéra oñongatuhápe che tavayguakuéra ojagarravaʼekue prisionéroramo; ha Ammorón nomoneímaramo pe che kuatiañeʼẽmegua, péina ápe, che ajapóta hendive añeʼẽ haguéicha; heẽ, añehaʼãta agueru ñemano ijapytepekuéra ojerure peve hikuái pyʼaguapy.

4 Ha koʼág̃a ojehu Moroni heʼívo koʼã ñeʼẽ; ohekauka isoldadokuéra apytépe, peichahágui ojuhúramo g̃uarã ijapytepekuéra peteĩ haʼéva Lamán ñemoñare.

5 Ha ojehu ojuhu hikuái peteĩme, hérava Lamán; ha haʼe peteĩ upe rréi Amalickíah ojukavaʼekue rembiguái.

6 Koʼág̃a Moroni ojapouka Lamán ha peteĩ ijehérsito atyʼimi oho oĩháme umi ñangarekohára omaʼẽva hína nefita-kuérare.

7 Koʼág̃a nefita-kuéra oĩkuri ñeñangarekoharakuéra poguýpe tavaguasu Gid-pe; upévare Moroni ohenói Lamán-pe, ha omondouka hendive peteĩ kuimbaʼe atyʼimi.

8 Ha pyharévo Lamán oho oĩháme umi ñangarekohára omaʼẽva hína nefita-kuérare, ha péina ápe, ohecha chupe hikuái ouha hína ha osapukái chupe; ha katu haʼe heʼi chupekuéra: Ani pekyhyje; péina ápe, che haʼe lamanita. Péina ápe, ore rokañýkuri nefita-kuéragui, ha haʼekuéra oke hína; ha péina ápe rogueru orendive ivinokuéra.

9 Koʼág̃a lamanita-kuéra ohendúvo koʼã ñeʼẽ omog̃uahẽ chupe vyʼápe; ha heʼi chupe hikuái: Emeʼẽ oréve ne vínogui, romboyʼu hag̃ua; rovyʼa regueru haguére nendive víno ore kaneʼõitereígui.

10 Ha katu Lamán heʼi chupekuéra: Ñañongatu ñane víno ñasẽ meve ñorairõme nefita-kuéra rehe. Ha katu koʼã ñeʼẽ omokyreʼỹvéntema chupekuéra omboyʼu hag̃ua upe víno;

11 Haʼekuéra, heʼígui: Orekaneʼõ, upévare ñamboyʼu upe vínogui, ha pyaʼe ojeguerútama ñandéve víno ñane mbaʼéva, ñanemombaretétava ñasẽ hag̃ua nefita-kuéra rehe.

12 Ha Lamán heʼi chupekuéra: Ikatu pejapo peẽ pejaposeháicha.

13 Ha ojehu omboyʼu kyreʼỹ hikuái upe vínogui; ha heterei chupekuéra, upévare omboyʼu kyreʼỹve hikuái; ha imbarete, ojejapóguikuri imbarete hag̃uáicha.

14 Ha ojehu hoyʼu ha ovyʼa hikuái, ha upe riremi okaʼupáma hikuái.

15 Ha koʼág̃a Lamán ha kuimbaʼekuéra ohechávo okaʼupa ha oke atãmbaha hína, ohojey hikuái Moroni rendápe ha omombeʼu chupe opa mbaʼe ojehuvaʼekue.

16 Ha koʼág̃a, péva oiko Moroni oipota haguéicha. Ha Moroni ombosakoʼímakuri kuimbaʼekuérape árma ñorairõguasurã reheve; ha ohókuri Gid tavaguasúpe, lamanita-kuéra oke atã ha okaʼu aja, ha oity hikuái árma ñorairõguasurã umi prisionérope, upéicha maymáva opyta árma reheve.

17 Heẽ, ikuñanguéra jepe, ha opa imitãnguéra, ikatúva oiporu árma ñorairõguasurã, Moroni oarma rire opa umi prisionerokuérape; ha ojejapókuri opa koʼã mbaʼe kirirĩ guasúpe.

18 Ha katu omombáyrire hikuái lamanita-kuérape, péina ápe okaʼúkuri hikuái ha nefita-kuéra ikatútakuri ojuka chupekuéra.

19 Ha katu péina ápe, ndahaʼéi upéva Moroni oipotavaʼekue; haʼe ndaipyʼarorýi jejuka ni tuguy ñeñohẽme, ha katu haʼe hory osalvávo itavayguakuérape ñehundígui; ha upéva rupi, ani hag̃ua ojapo ijojaʼỹva, haʼe ndoʼaséi lamanita-kuéra ári okaʼu aja hikuái ha ohundi chupekuéra.

20 Ha katu ohupytýkuri oipotáva; omoʼármagui umi prisionéro nefita oĩva tavaguasu tápia ryepýpe, ha omeʼẽkuri chupekuéra puʼaka ojagarra hag̃ua hikuái umi tenda oĩva upe tápia ryepýpe.

21 Ha upémarõ ojapouka umi kuimbaʼe oĩva hendive tojei chuguikuéra peteĩ jeguata rupi, ha tomongora lamanita-kuéra ehérsito.

22 Koʼág̃a, péina ápe upéva ojejapókuri pyharekue, upéicha opáyvo lamanita-kuéra upe koʼẽme ohecha hikuái omongoraha chupekuéra nefita-kuéra okáguio, ha hyepýpe prisionerokuéra oĩha árma reheve.

23 Ha péicha ohecha hikuái nefita-kuéra oguerekoha puʼaka hiʼarikuéra; ha peichagua ñeimépe oikuaa hikuái naiporãiha oñorairõ nefita-kuéra ndive; upévare imburuvicha guasukuéra ojerure chupekuéra hiʼárma ñorairõguasurã, ha ogueraha hikuái ha oity nefita-kuéra py gotyo, ojerurévo poriahuvereko.

24 Koʼág̃a péina ápe, upéva haʼe Moroni oipotavaʼekue. Ojapo chuguikuéra ñorairõguasu prisionéro, ha ojagarra pe tavaguasu, ha omosãsouka opa prisionéro, nefita-kuérava; ha ojoaju hikuái Moroni ehérsito ndive, ha tuicha omombarete hikuái ijehérsito.

25 Ha ojehu ojapouka lamanita-kuéra, ojagarravaʼekue prisionéroramo, omoñepyrũ tembiapo omombarete hag̃ua umi tendamoʼãha oĩva tavaguasu Gid jerére.

26 Ha ojehu omoʼã rire tavaguasu Gid, haʼe oipota haguéicha, haʼe oguerahauka iprisionerokuéra tavaguasu Abundancia-pe; ha omoʼã avei upe tavaguasu peteĩ puʼaka imbaretetereíva reheve.

27 Ha ojehu haʼekuéra, jepeve opa mbotavy lamanita-kuéra ohaʼãvaʼekue, oñongatu ha omoʼãkuri opa prisionéro ojagarravaʼekuépe, ha avei oñongatúkuri opa tenda ha poʼa ohupytyjeyvaʼekue hikuái.

28 Ha ojehu péicha nefita-kuéra oñepyrũ jey ipoʼa, ha oguerekojey iderécho ha imbaʼeporãkuéra.

29 Heta ára lamanita-kuéra oñehaʼã omongora chupekuéra pyharekue, ha katu upéva ojapokuévo ohundi hikuái heta prisionéro.

30 Ha heta ára oñehaʼã hikuái omboyʼu nefita-kuérape ivínogui, ojuka hag̃ua chupekuéra venénope térã kaʼúgui.

31 Ha katu péina ápe, nefita-kuéra naimbeguéikuri imanduʼa hag̃ua Ñandejára Itupã rehe ára ohasaʼasy jave. Ndaikatúikuri oity hikuái chupekuéra iñuhãme; heẽ, ndoyʼúi hikuái ivinokuéragui, omboyʼuka mboyve iprisionerokuéra lamanita-vape.

32 Ha péicha ojesareko hikuái ani hag̃ua oñemeʼẽ chupekuéra venéno; pe víno oenvenenáramo peteĩ lamanita-pe avei oenvenenáta peteĩ nefita-pe; ha péicha ojapókuri hikuái opa ilikor reheve.

33 Ha koʼág̃a ojehu oñeikotevẽkuri Moroni ojapo ñembosakoʼi oñemoĩ hag̃ua Moriantón tavaguasu rehe; ha katu péina ápe, lamanita-kuéra, hembiapo rupi, omombaretékuri Moriantón tavaguasu oiko peve chugui peteĩ tenda imbaretetereíva.

34 Ha ogueru memékuri hikuái mbarete pyahu upe tavaguasúpe, ha avei hiʼupy ipyahúva.

35 Ha péicha opákuri ary veintinueve huekuéra ñeisãmbyhy aja Nefi tavayguakuéra ári.