1 Koʼág̃a ojehu ary treinta huekuéra ñeisambyhýpe Nefi tavayguakuéra ári, Moroni-pe oñemog̃uahẽ rire ha omoñeʼẽ rire pe Helamán kuatiañeʼẽ, haʼe ovyʼaiterei iñeimeporãre, heẽ, pe tuicha puʼaka Helamán ohupytyvaʼekuére, ojagarrávo umi tetã ojepeʼavaʼekue chuguikuéra.

2 Heẽ, ha haʼe oikuaauka opa itavayguakuérape, opa tetã ojeréva upe tendáre haʼe oĩháme, ovyʼa hag̃ua avei hikuái.

3 Ha ojehu pyaʼe omondouka peteĩ kuatiañeʼẽ Pahorán-pe, ojerurévo chupe tombyatyka kuimbaʼe omombarete hag̃ua Helamán-pe, térã Helamán ehérsitope, ikatu hag̃uáicha upéicha hasyʼỹme ojoko upéva upe tetã renda milágro rupive ojehupytyjeyvaʼekue.

4 Ha ojehu Moroni omondoukávo ko kuatiañeʼẽ Zarahemla retãme, haʼe oñepyrũjey omoheñói iñapytuʼũme peteĩ plan ojagarra hag̃ua umi yvy ha tavaguasu rembyre lamanita-kuéra oipeʼavaʼekue chuguikuéra.

5 Ha ojehu Moroni péicha oñembosakoʼi jave oho hag̃ua ñorairõme lamanita-kuéra rehe, péina ápe, Nefíah tavayguakuéra, oñembyatyvaʼekue tavaguasu Moroni-gui, tavaguasu Lehi ha tavaguasu Moriantón-gui, lamanita-kuéra oñemoĩ hesekuéra.

6 Heẽ, jepe umi oñemyañavaʼekue osẽ hag̃ua Manti retãgui, ha umi tetã jeréregui, og̃uahẽkuri ha ojoaju lamanita-kuéra ndive ko tetã pehẽnguépe.

7 Ha péicha hetaitereívo hikuái, heẽ, ha oñemog̃uahẽvo chupekuéra mbarete ára ha ára, Ammorón rembiapoukapýre ou hikuái Nefíah tavayguakuéra rehe, ha oñepyrũ ojuka chupekuéra tuicha jejukavaípe.

8 Ha hetaitereíkuri ijehersitokuéra upéicha rupi Nefíah tavayguakuéra rembyre oñemyaña okañy hag̃ua henonderãkuéra; ha og̃uahẽ ha ojoaju hikuái Moroni ehérsito ndive.

9 Ha koʼág̃a, Moroni oimoʼãgui omondotaha hikuái kuimbaʼekuéra tavaguasu Nefíah-pe, oipytyvõ hag̃ua tavayguakuérape oñongatu hag̃ua upe tavaguasu, ha oikuaápype ndahasyveiha ojejoko upe tavaguasu ani hoʼa lamanita-kuéra pópe ojeipeʼajeyrangue chuguikuéra, haʼe oimoʼãkuri ndahasymoʼãiha ojoko hikuái upe tavaguasu.

10 Upévare ojoko opavave isoldádo oñongatu hag̃ua umi tenda ojagarrajeyvaʼekue hikuái.

11 Ha koʼág̃a, Moroni ohechávo oñehundihague Nefíah tavaguasu ombyasyeterei, ha oñepyrũ oduda, tavayguakuéra tekoñaña rupi, hoʼáramo g̃uarã hikuái ijoykeʼykuéra pópe.

12 Koʼág̃a péicha ojehúkuri opa imburuvichakuéra ndive. Haʼekuéra oduda avei ha omombaʼeguasu tavayguakuéra tekoñaña, ha péva lamanita-kuéra ipuʼaka rupi hesekuéra.

13 Ha ojehu Moroni ipochy upe tetã ñeisãmbyhyha ndive, nomombaʼéi haguére hetã ñemosãsorã.