1 Ha koʼág̃a, koʼãva haʼe Ammón ñeʼẽ ijoykeʼykuérape, péicha heʼíva: Che joykeʼykuéra ha che joykeʼýva, péina ápe che haʼe peẽme, jaguerekoha tuicha mbaʼérepa javyʼa hag̃ua; ikatúgui piko ñaimoʼãraʼe ñasẽramoguare Zarahemla retãgui Tupã omeʼẽtahague ñandéve tuichaite jehovasa?

2 Ha koʼág̃a, che aporandu peẽme, mbaʼe jehovasa guasu piko haʼe omeʼẽvaʼekue ñandéve? Ikatu piko peje?

3 Péina ápe, che ambohovái penderehe; ñande joykeʼykuéra, lamanita-kuéra, oĩguikuri pytũmbýpe, heẽ, jepe ypytũ pypukúpe, ha katu péina ápe, mboy ijapytepekuérape piko ojehechaukákuri Tupã resape hechapyrãva! Ha kóva haʼe pe jehovasa oñemoĩvaʼekue ñande ári, haʼehague tembiporu Ñandejára pópe jajapo hag̃ua ko tembiapo guasu.

4 Péina ápe, miles ijapytepekuéra ovyʼa, ha ojeguerúkuri hikuái Tupã rredílpe.

5 Péina ápe, pe ñu hiʼajúmakuri, ha pejehovasapýva peẽ, pemoinge haguére pende kysekarapã, ha pemonoʼõkuri pene mbaretépe; heẽ, pembaʼapókuri opa ára pukukue; ha péina ápe tuicha pene ñemonoʼõ! Ha oñembyatýta hikuái umi yvaraʼỹi rendápe, ani hag̃ua oñehundi.

6 Heẽ, arapochy ndoitymoʼãi chupekuéra ára pahápe; heẽ, ni yvytujere ndojopymoʼãi chupekuéra; ha katu ou vove arapochy haʼekuéra oñembyatýta hendag̃uáme, ani hag̃ua arapochy oike oĩháme hikuái; heẽ, ni ndojeguerahamoʼãi yvytu atã rupi ihayhuʼỹhakuéra oguerahasehápe chupekuéra.

7 Ha katu péina ápe, oĩ hikuái Ñandejára omonoʼõva pópe, ha haʼekuéra imbaʼe; ha haʼe omopuʼãta chupekuéra ára pahápe.

8 Ojehovasapýva ñande Tupã réra; japurahéi chupe ñemomorã, heẽ, ñameʼẽ aguyje héra marangatúpe, haʼe ojapógui tapiaite tekojoja.

9 Ha ndajajupíririre Zarahemla retãgui, koʼãva ñande joykeʼykuéra hepyete ha jahayhuetéva, ñande rayhuetevaʼekue, ojejopyvaʼerãmoʼã gueteri ijehayhuʼỹ ñande rehe rupi, heẽ, ha avei haʼevaʼerãmoʼã hikuái pytagua Tupã ndive g̃uarã.

10 Ha ojehu Ammón heʼipávo koʼã ñeʼẽ, ojaʼo chupe ijoykeʼy Aarón, heʼívo: Ammón, akyhyje nde vyʼa ndegueraháramo g̃uarã jeroviapópe.

11 Ha katu Ammón heʼi chupe: Ndajeroviái che mbaretégui, ni che arandúgui; ha katu péina ápe, che vyʼa henyhẽ, heẽ, che korasõ henyhẽ vyʼágui, ha avyʼáta che Tupãme.

12 Heẽ, che aikuaa ndahaʼeiha mbaʼeve; che mbaretépe chekangy; upévare che ndajeroviamoʼãi chejehe, ha katu ajeroviáta che Tupãme, ipuʼaka reheve ikatúgui ajapo opa mbaʼe; heẽ, péina ápe, heta milágro jajapókuri ko tetãme, umívare ñamomorãta héra tapiaite peve.

13 Péina ápe, mboy mil ñande joykeʼykuérape piko haʼe omosãsovaʼekue pe añaretã ñeimeʼasýgui; ha opuraheise hikuái pe purahéi opororredimíva, ha kóva pe iñeʼẽ puʼaka oĩva ñande pype rupi, upévare ndajaguerekói piko heta mbaʼérepa javyʼa hag̃ua.

14 Heẽ, jaguereko mbaʼérepa ñamomorãvo chupe tapiaite, haʼégui haʼe Tupã Ijyvatevéva, ha omosãsókuri ñande joykeʼykuérape añaretã sãgui.

15 Heẽ, ojerékuri hesekuéra ypytũ opaveʼỹva ha ñehundi; ha katu péina ápe, haʼe oguerúkuri chupekuéra hesape opaveʼỹvape, heẽ, salvasiõ opaveʼỹvape; ha ojere hesekuéra ijojaʼỹva pyʼaporã imborayhu rehegua; heẽ, ha ñande haʼékuri tembiporu ipópe jajapo hag̃ua ko tembiapo tuicha ha hechapyrãva.

16 Upévare, ñanderory, heẽ, ñanderorýta Ñandejárape; heẽ, javyʼáta, henyhẽgui ñande vyʼa; heẽ, ñamomorãta ñande Tupãme tapiaite. Péina ápe, máva piko ikatu horyeterei Ñandejárape? Heẽ, ha máva piko ikatúta heʼieterei ipuʼaka guasu, ha iporiahuvereko, ha ipyʼaporã rehe yvypóra raʼykuéra ndive g̃uarã? Péina ápe, che haʼe peẽme, ndaikatúi haʼe ni michĩmi pe añandúva.

17 Máva piko oimoʼãta ñane Tupã iporiahuverekoitetaha ñaneguenohẽ hag̃ua ñane ñeime vaiete, angaipápe, ha ñembyaipávagui?

18 Péina ápe, ñasẽ jepeve ñekoʼõime, ñeʼẽpohýi mbarete reheve ñahundi hag̃ua itupao.

19 O upéicharamo, mbaʼére piko haʼe nañanemoĩri peteĩ ñehundivaípe, heẽ, mbaʼére piko ndohejái ihustísia kysepuku hoʼa ñande ári, ha ñanekondena pe pyʼaropu opaveʼỹvape?

20 O, che ánga, haimete osẽ chehegui, ikatu jaʼe, ajepyʼamongetáramo umívare. Péina ápe, haʼe nomombaʼapói ihustísia ñande ári, ha katu poriahuvereko tuichápe ñaneguenohẽkuri ko yvykua pypuku opaveʼỹva ha hekoʼasývagui, jepe ñande angakuéra salvasiõ peve.

21 Ha koʼág̃a péina ápe, che joykeʼykuéra, mbaʼe yvypóra natural piko oĩ oikuaáva koʼã mbaʼe? Che haʼe peẽ, ndaipóri oikuaáva koʼã mbaʼe, ndahaʼéiramo pe oñembyasýva.

22 Heẽ, pe oñearrepentíva ha omombaʼapóva jerovia, ha ojapóva tembiapo porã, ha oñemboʼe meméva opa ára—pévape ojeheja oikuaa Tupã mbaʼeñemimbykuéra; heẽ, pévape ojehejáta ohechauka umi mbaʼe arakaʼeve ndojehechaukaivaʼekue; heẽ, ha pévape ojehejáta ogueru hetaiterei ángape arrepentimiéntope, ñandéve ojeheja haguéicha jagueru koʼã ñande joykeʼykuérape arrepentimiéntope.

23 Koʼág̃a penemanduʼa piko, che joykeʼykuéra, jaʼehague ñande joykeʼykuérape Zarahemla retãme, jajupitaha Nefi retãme, ñamboʼe hag̃ua ñande joykeʼykuéra, lamanita-kuérape, ha haʼekuéra oñembohoryhague ñande rehe?

24 Heʼígui hikuái ñandéve: Peimoʼã piko peẽ ikatuha pegueru lamanita-kuérape añetegua jeikuaápe? Peimoʼã piko ikatuha pekonvense lamanita-kuérape ituvakuéra jepokuaa oĩvaiha, haʼévo hikuái peteĩ tavayguakuéra ipyʼahatãva; ikorasõkuéra ovyʼáva tuguy ñeñohẽme; ohasáva hiʼarakuéra tembiapovai ivaivévape; hape haʼevaʼekue hembiapovaíva rape iñepyrũmby guive? Koʼág̃a che joykeʼykuéra, penemanduʼa péicha oñeʼẽhague hikuái.

25 Ha avei heʼi hikuái: Jajagarrána umi árma hesekuéra, ñahundi hag̃ua chupekuéra ha hembiapovai yvy árigui, ani hag̃ua ou hikuái ñande ári ha ñanerundi.

26 Ha katu péina ápe, che joykeʼykuéra ahayhuetéva, jajúkuri ko taveʼỹme ndahaʼéi ñahundi hag̃ua ñande joykeʼykuérape, ha katu ikatu mbaʼe hag̃ua jasalva jepe mbovymi hiʼangakuéra.

27 Koʼág̃a ñane korasõkuéra oĩramoguare vyʼaʼỹme, ha haimete jave jahajey, péina ápe, Ñandejára ñanemoangapyhýkuri, ha heʼi: Peho pende joykeʼykuéra apytépe, lamanita-kuéra, ha pehasa ñehaʼarõme pende jehasaʼasykuéra, ha che ameʼẽta peẽme poʼa.

28 Ha koʼág̃a, péina ápe, jaju ha ñaimékuri ijapytepekuéra; ha ñahaʼarõkuaákuri ñande jehasaʼasykuérape, ha jagueropuʼakákuri opáichagua jehasaʼasy; heẽ, jaguatákuri peteĩgui ambue ógape, jajeroviávo yvóra poriahuverekóre—ha ndahaʼéi yvóra poriahuverekórente ha katu Tupã poriahuverekóre.

29 Ha jaikékuri hogapekuéra ha ñamboʼe chupekuéra, ha ñamboʼékuri chupekuéra hapekuérape; heẽ, ñamboʼékuri chupekuéra ijyvyty yvate ári; ha avei jaikékuri itemplokuéra ha isinagogakuérape ha ñamboʼékuri chupekuéra; ha ñañemosẽkuri okápe, ha oñembohory ñanderehe, ha oñendyvu ñande ári, ha ñañenupã ñande rova rupi, ha jajeʼitaʼapíkuri, ha jajejagarra, ha jajejokua ñemosã atãme, ha ñañemoĩ kaʼirãime, ha Tupã puʼaka ha arandu rupive ñañemosãso jeýkuri.

30 Ha jahasákuri opáichagua jeikoʼasy, ha opa koʼã mbaʼe, ikatu mbaʼe hag̃ua ñande rupive ojesalva peteĩ ángante jepe; ha ñaimoʼãkuri ñande vyʼa henyhẽtaha ikatu mbaʼéramo ñande rupive oĩ ojesalváva.

31 Koʼág̃a péina ápe, ikatu jaipyso ñande resa ha jahecha ñande rembiapokue; ha mbovy piko hikuái? Che haʼe peẽme, Nahániri; heta hikuái; heẽ, ha ikatu jatestifika añeteguaha, mborayhu oguerekóva rupi ijoykeʼykuéra rehe ha ñande rehe avei.

32 Péina ápe, omeʼẽsevégui hikuái hekove oipeʼarangue hekove jepe ihayhuʼỹhakuérape; ha oñotỹkuri hikuái hiʼárma ñorairõrã yvyguy pypukúpe, pe mborayhu oguerekóva rupi hikuái ijoykeʼykuérare.

33 Ha koʼág̃a péina ápe che haʼe peẽme, oĩvaʼekuépa mborayhu tuichaitéva opa upe tetãme? Péina ápe, che haʼe peẽme, nahániri, ndaiporivaʼekue, nefita-kuéra apytépe jepeve.

34 Péina ápe, haʼekuéra ojagarránegui hiʼárma ijoykeʼykuéra rehe; ndohejamoʼãigui hikuái ojejuka chupekuéra. Ha katu péina ápe, mboy piko koʼãva apytégui omeʼẽkuri hekove; ha jaikuaa ohoha hikuái Itupãme, imborayhu rupive, ha ndohayhúigui hikuái angaipa.

35 Koʼág̃a ndajaguerekói piko ñande mbaʼérepa javyʼa hag̃ua? Heẽ, che haʼe peẽme, ndaiporivaʼekue yvypóra oguerekovaʼekue tuichaite mbaʼérepa ovyʼa hag̃ua ñande jaguerekoháicha, yvóra ñepyrũmby guive; heẽ, ha che vyʼa henyhẽ, jepe añemombaʼeguasu peve che Tupãme; haʼe oguerekógui opa puʼaka, opa arandu, ha opa ñeikũmby; haʼe oikuaapa opa mbaʼe, ha haʼe peteĩ tekove iporiahuverekóva, jepe osalva peve, umi oñearrepentiséva ha ogueroviáva hérape.

36 Koʼág̃a kóva haʼéramo ñembojerovia, jepe péicha añembojeroviáta, kóva haʼégui che rekove ha che resape, che vyʼa ha che salvasiõ, ha che rredensiõ vyʼaʼỹ opaveʼỹvagui. Heẽ, ojehovasapýva che Tupã réra, imanduʼáva ko tavayguakuérare, haʼéva Israel yvyramáta rakã, ha okañyvaʼekue hapógui peteĩ tetã ojeikuaaʼỹvape; heẽ, che haʼe, ojehovasapýva che Tupã réra, oñangarekovaʼekue ñande rehe, jaikoreíva peteĩ tetãme ndahaʼéiva ñane mbaʼe.

37 Koʼág̃a che joykeʼykuéra, jahecha Tupã imanduʼaha opa tavayguakuérare, tahaʼe haʼéva tetã oĩháme hikuái; heẽ, haʼe oipapa itavayguakuérape, ha ipyʼa poriahuvereko oĩ opa yvy ári. Koʼág̃a kóva haʼe che vyʼa ha che aguyje tuichaiterei; heẽ, ha che ameʼẽta aguyje che Tupãme tapiaite peve. Amén.