1 Ha koʼág̃a ojehu oñepyrũvo ary veinticinco huekuéra ñeisãmbyhy Nefi tavayguakuéra ári, omoĩvo haʼekuéra pyʼaguapy Lehi tavayguakuéra ha Moriantón tavayguakuéra apytépe umi hetãnguéra reheguápe, ha oñepyrũvo ary veinticinco pyʼaguapýpe;

2 Upevére, noñongatúikuri hikuái peteĩ pyʼaguapypa heta ára pukukue upe tetãme, oñepyrũgui oĩ peteĩ joavy tavayguakuéra apytépe pe hue guasu Pahorán rupi; ha katu péina ápe, oĩ tavayguakuéra apytépe oipotáva pe léi oñemoambue heta hendápe.

3 Ha katu péina ápe, Pahorán nomoambueséi ni ndoipotái oñemoambue pe léi; upévare, haʼe nohendúi umi omondovaʼekue iñeʼẽ ojerurévo pe léi oñemoambue hag̃ua.

4 Upévare, umi oipotavaʼekue oñemoambue upe léi ipochy hendive, ha ndoipotavéima hikuái haʼe hue guasu upe tetã ári; upévare oiko peteĩ ñeʼẽʼapi upe mbaʼére, ha katu nog̃uahẽi tuguy ñeñohẽme.

5 Ha ojehu umi oipotávape Pahorán ojeipeʼa pe huekuéra apykágui oñehenói rréi potaha, oipotágui hikuái oñemoambue upe léi ojeity hag̃ua pe ñemosãso ñeisãmbyhy ha oñemoĩ hag̃ua peteĩ rréi upe tetã ári.

6 Ha umi oipotáva gueteri Pahorán tahaʼe hue guasu tavayguakuéra ári omoĩ ijehe herarã yvypóra isãsoséva; ha péicha oĩkuri ko ñembojaʼo ijapytepekuéra, umi yvypóra isãsoséva oñeʼẽmeʼẽgui térã ojapóguikuri konvénio oñongatúvo iderécho ha irreligión mbaʼeporã, peteĩ ñeisãmbyhy isãsóva rupi.

7 Ha ojehu ko mbaʼe ijoavykuéra rehegua oñembopaha tavayguakuéra ñeʼẽ rupive. Ha ojehu tavayguakuéra ñeʼẽ osẽ umi yvypóra isãsoséva ndive, ha Pahorán ojoko pe huekuéra apyka, ha péva ogueru heta vyʼa Pahorán joykeʼykuéra apytépe ha avei heta tavayguakuéra hekosãsóvape, omokirirĩva avei umi rréi potahápe, upévare noñehaʼãi hikuái oñemoĩ umívare ha katu ojokómante umi mbaʼe sãsorã.

8 Koʼág̃a umi oipotáva ojehupi rreikuéra haʼe umi hogaguakuéra herakuã porãva, ha haʼekuéra oikose rréiramo; ha oipytyvõ chupekuéra umi ohupytyséva puʼaka ha autorida tavayguakuéra ári.

9 Ha katu péina ápe, kóva haʼékuri peteĩ ára ivaíva oĩ hag̃ua péichagua joavy Nefi tavayguakuéra apytépe; péina ápe, Amalickíah omokyreʼỹ jeýmaguikuri lamanita tavayguakuéra korasõ nefita tavayguakuéra rehe, ha ombyaty hínakuri soldadokuéra opa hetã rendágui, ha oarma, ha ombosakoʼíkuri hína chupekuéra ñorairõguasurã opa jesarekópe; oñeʼẽmeʼẽguikuri hoyʼutaha Moroni ruguy.

10 Ha katu péina ápe, jahecháta upe ñeʼẽmeʼẽ haʼe ojapovaʼekue reihague; upevére, oñembosakoʼi ijupe ha ijehersitokuérape ou hag̃ua ñorairõme nefita-kuéra rehe.

11 Koʼág̃a ijehersitokuéra ndahetái yma guaréicha, umi heta miles ojejukavaʼekuégui nefita-kuéra po rupi; ha katu upevére heta iñehundikuéra, Amalickíah ombyatýkuri peteĩ ehérsito guasu hechapyrãva, upévare ndokyhyjéikuri oho hag̃ua Zarahemla retãme.

12 Heẽ, Amalickíah jepe voi ou, lamanita-kuéra renonderã. Ha haʼékuri ary veinticinco huekuéra ñeisãmbyhy aja; ha péva haʼékuri ára oñepyrũ jave omoĩ porã hikuái ijoavy hue guasu, Pahorán rehegua.

13 Ha ojehu yvyporakuéra oñehenóiva rreipotaha ohendúvo lamanita-kuéra ouha ñorairõme hesekuéra, ovyʼa hikuái ikorasõme; ha ombotove hikuái ojagarra hag̃ua umi árma, oñekoʼõietereígui hikuái pe hue guasu ndive, ha avei umi tavayguakuéra hekosãsóva ndive, upévare ndojagarraséi hikuái árma omoʼã hag̃ua hetã.

14 Ha ojehu Moroni ohechávo péva, ha ohecha avei lamanita-kuéra og̃uahẽmaha hína tetã rembeʼýpe, oñekoʼõieterei ipyʼahatã haguére umi tavayguakuéra haʼe oñangarekovaʼekue jesarekópe; heẽ, oñekoʼõieterei; hiʼánga henyhẽ pochýgui hesekuéra.

15 Ha ojehu omondo peteĩ momarandu, tavayguakuéra ñeʼẽ reheve, pe tetãgua sãmbyhyhárape, ojerurévo chupe omoñeʼẽ hag̃ua, ha omeʼẽ hag̃ua chupe (Moroni) puʼaka omyaña hag̃ua umi osẽvaʼekuépe omoʼã hag̃ua hetã térã oipeʼa hag̃ua chuguikuéra hekove.

16 Peteĩ mbaʼe haʼe ojapose raẽvévakuri haʼe ombopaha tavayguakuéra apytépe upe joavy ha ñesẽ; ha katu péina ápe, kóva haʼégui upe mboyve peteĩ mbaʼe oñehundipahaguére chupekuéra. Ha ojehu oiko tavayguakuéra ñeʼẽme heʼiháicha.

17 Ha ojehu Moroni heʼi ijehersitokuérape oho hag̃ua umi rreipotaha rehe, oity hag̃ua ijorgullokuéra ha iñembotuicha ha omotĩndy hag̃ua chupekuéra yvytimbo peve, térã ojagarrauka chupekuéra umi árma ha omombarete pe tekosãsorã.

18 Ha ojehu umi ehérsito oho hesekuéra; ha oity ijorgullokuéra ha iñembotuicha, upéicharupi omopuʼãvo hikuái hiʼárma ñorairõguasurã oñemoĩ hag̃ua Moroni kuimbaʼekuérare, oñeikytĩ ha ojeity chupekuéra yvýpe.

19 Ha ojehu oĩkuri cuatro mil umi osẽvaʼekue oñeikytĩva kysepukúpe; ha imburuvichakuéra ndojejukaivaʼekue ñorairõme ojejagarra ha ojeity kaʼirãime, ndaipórigui ára ojehusga hag̃ua chupekuéra upe jave.

20 Ha umi osẽvaʼekue rembyre, ojeityrangue yvýpe kysepuku rupi, oñemoĩ pe ñemosãso poyvi poguýpe, ha oñemyaña chupekuéra ohupi hag̃ua pe ñemosãso poyvi itorrekuéra ári, ha itavaguasukuérape, ha ojagarra hag̃ua hikuái umi árma omoʼã hag̃ua hetã.

21 Ha péicha Moroni ombopaha umi rréi potahápe, upéicha ndaipóri avave oñembohérava rréi potaha; ha péicha haʼe ombopaha umi heʼíva oguerekoha tuguy iporãvéva pyʼahatã ha orgúllo; ha katu oñemyaña chupekuéra oñemomirĩ hag̃ua ijoykeʼykuéraicha, ha oñorairõ hag̃ua pyʼaguasúpe oñemosãso hag̃ua ñeñapytĩmbýgui.

22 Ha katu péina ápe, ojehu Moroni omoĩporã jave hína ñorairõguasu ha joavy oĩva itavayguakuéra apytépe, ha omoĩvo chupekuéra pyʼaguapy ha tekoarandúpe, ha omboguatávo ñembosakoʼi ñorairõguasurã lamanita-kuéra ndive, péina ápe, lamanita-kuéra oikémakuri Moroni retãme, oĩva pe yguasu rembeʼy ypýpe.

23 Ha ojehu nefita-kuéra naimbaretetereíri Moroni retãme; upévare Amalickíah omosẽ chupekuéra, ojukávo hetápe. Ha ojehu Amalickíah ojagarra pe tavaguasu, heẽ, oñemombaʼe opa henda moʼãhakuéra rehe.

24 Ha umi oñanivaʼekue Moroni tavaguasúgui ou Nefíah tavaguasúpe; ha avei tavaguasu Lehi-pegua tavayguakuéra oñembyaty oñondive, ha oñembosakoʼi ha oñemoĩporã hikuái ogueropuʼaka hag̃ua ñorairõme lamanita-kuérape.

25 Ha katu ojehu Amalickíah ndohejái lamanita-kuéra oho Nefíah tavaguasu rehe oñorairõ hag̃ua, ha katu ojoko chupekuéra pe yguasu ypýpe, ohejávo kuimbaʼekuéra peteĩteĩ tavaguasúpe oñongatu ha omoʼã hag̃ua umíva.

26 Ha upéicha haʼe oho tenondévo, ojagarrávo heta tavaguasu, Nefíah tavaguasu, ha Lehi tavaguasu, ha Moriantón tavaguasu, ha Omner tavaguasu, ha Gid tavaguasu, ha Mulek tavaguasu, opavave umíva opytáva kuarahyresẽ rembeʼýpe yguasu ypýpe.

27 Ha péicha lamanita-kuéra ohupytýkuri, Amalickíah katupyry rupi, heta tavaguasu, ijehérsito hetaite reheve, opavave oñemoʼã mbaretéva Moroni omoʼã haguéicha; ha opaite omeʼẽva tenda mbarete lamanita-kuérape.

28 Ha ojehu oguata hikuái tetã Abundancia rembeʼy peve, oitývo nefita-kuérape henonderãkuéra ha ojukávo hetápe.

29 Ha katu ojehu osẽ chupekuéra Teáncum, pe ojukavaʼekue Moriantón-pe ha ojokovaʼekue itavayguakuérape okañy vove.

30 Ha ojehu ojoko avei Amalickíah-pe, kóva oho jave ijehérsito hetaitéva ndive ojagarra hag̃ua Abundancia retã, ha avei yvy nortepegua.

31 Ha katu péina ápe ndaipoʼái oñembojevýgui Teáncum ha ijehérsitore, haʼégui hikuái soldádo mbarete; opavave Teáncum soldadokuéra ohaságui lamanita-kuérape imbarete ha ikatupyrýpe ñorairõguasurãme, upéicha rupi ipuʼaka hikuái lamanita-kuérare.

32 Ha ojehu ojopyvai chupekuéra, jepe ojuka peve chupekuéra pytũ meve. Ha ojehu Teáncum ha ijehérsito omoĩ hogaaokuéra Abundancia retã rembeʼýpe; ha Amalickíah omoĩ hogaaokuéra umi y rembeʼýpe pe yguasu ypýpe, ha péicha oñembojevy chupekuéra.

33 Ha ojehu oúvo pe pytũ, Teáncum ha hembiguái osẽ kañyhápe pyharekue, ha oike hikuái Amalickíah renda oĩháme; ha péina ápe, topehýi ipuʼakákuri lamanita-kuéra rehe ikaneʼõitereígui hikuái, umi tembiapo ha ára haku haguére.

34 Ha ojehu Teáncum oike kañyhápe pe rréi ogaaópe, ha oikutu chupe ikorasõme peteĩ havalínape; ha upepete ojuka rréipe ha upéicha rupi nomombáy hembiguaikuérape.

35 Ha ohojey kañyháme henda oĩháme, ha péina ápe, ijehersitokuéra oke hína, ha omombáy ha heʼi chupekuéra opa mbaʼe ojapovaʼekue.

36 Ha haʼe ombosakoʼiuka ijehersitokuéra, ani mbaʼe lamanita-kuéra opáy ha ou hesekuéra.

37 Ha péicha opa ary veinticinco huekuéra ñeisãmbyhy Nefi tavayguakuéra ári; ha péicha opa Amalickíah arakuéra.