1 Ha koʼág̃a ojehu oñepyrũvo ary treinta huekuéra ñeisãmbyhy aja, mokõiha ára peteĩha jasýpe, oñemog̃uahẽ Moroni-pe peteĩ kuatiañeʼẽ Helamán-gui, omombeʼuhápe chupe tavayguakuéra rehegua upe tetã pehẽnguépe.

2 Ha koʼãva haʼe ñeʼẽ haʼe ohaivaʼekue, heʼívo: Che joykeʼy ahayhuetéva, Moroni, jepe Ñandejárape térã ñande ñorairõguasu jehasaʼasýpe; péina ápe, che joykeʼy ahayhuetéva, che aguereko peteĩ mbaʼe haʼevaʼerã ndéve ñande ñorairõguasúre kóva ko tetã pehẽnguépe.

3 Péina ápe, dos mil umi kuimbaʼe raʼykuéra Ammón ogueruvaʼekue Nefi retãgui—koʼág̃a reikuaáma koʼãva haʼeha Lamán ñemoñare, ñande ru Lehi raʼy ypykue;

4 Koʼág̃a che natekotevẽi haʼejey ndéve ijepokuaakuéra ha ijegueroviaʼỹkuéra rehegua, nde reikuaágui opa koʼã mbaʼégui—

5 Upévare iporãntema che haʼe ndéve dos mil koʼã mitãrusu ojagarrahague hiʼárma ñorairõguasurã, ha oipota hikuái che haʼe imburuvichakuéra; ha rosẽkuri romoʼã hag̃ua ore retã.

6 Ha koʼág̃a reikuaa avei pe konvénio ojapovaʼekue ituvakuéra, nomopuʼãmoʼãiha hikuái árma ñorairõguasurã ijoykeʼykuéra rehe oñohẽ hag̃ua tuguy.

7 Ha katu ary veintiseis-pe, ohechávo hikuái ore jeikoʼasy ha jehasaʼasy rohasáva hesekuéra, haimete ojapyhara hikuái pe konvénio ojapovaʼekue ha omopuʼã hiʼárma ñorairõguasurã oremoʼã hag̃ua.

8 Ha katu che ndahejaséi chupekuéra ojapyhara hikuái upe konvénio ojapovaʼekue, aimoʼãgui Tupã oremombaretetaha, upéicha ndorohasaʼasymoʼãvéima, oñekumpli haguére pe ñeʼẽmeʼẽ haʼekuéra ojapovaʼekue.

9 Ha katu péina ápe, oĩ peteĩ mbaʼe ikatúvape jaguereko tuicha vyʼapavẽ. Ha péina ápe, ary veintiseis-pe, che, Helamán, aguata koʼã dos mil mitãrusu renonderã tavaguasu Judea peve, aipytyvõ hag̃ua Antipus-pe, rehenoivaʼekue mburuvicháramo tavayguakuéra ári upe tetã pehẽnguépe.

10 Ha amoinge dos mil che raʼykuérape, (hekomarangatúgui hikuái oñehenói hag̃ua che raʼy) Antipus ehérsitope, ha koʼã soldádo reheve haʼe ovyʼaiterei; péina ápe, ijehérsito oñemomichĩvékuri lamanita-kuérare ijehersitokuéra ojukáguikuri heta ore kuimbaʼekuérape, upévare roguereko mbaʼérepa orerasẽvo.

11 Upevére, ikatu oreangapyhy koʼãvape, omanohague hikuái hetãre ha Itupãre, heẽ, ha ovyʼa hikuái.

12 Ha lamanita-kuéra ojokókuri avei heta prisionerokuérape, haʼéva opavave mburuvicha guasu, avave ambuépe ndohejáigui hikuái oikove. Ha roimoʼã oimeha hikuái koʼág̃a Nefi retãme; noiméiramo ojuka hikuái chupekuéra.

13 Ha koʼág̃a koʼãva haʼe tavaguasu lamanita-kuéra ojagarravaʼekue oñohẽvo hetaite ore joykeʼykuéra ipyʼaguasúva ruguy.

14 Manti retã, térã Manti tavaguasu, ha tavaguasu Zeezrom, ha tavaguasu Cumeni, ha tavaguasu Antipara.

15 Ha koʼãva haʼe tavaguasu oguerekovaʼekue hikuái che ag̃uahẽramoguare tavaguasu Judea-pe; ha ajuhu Antipus ha kuimbaʼekuérape ombaʼapo hína opa ipuʼaka reheve omombarete hag̃ua upe tavaguasu.

16 Heẽ, ha ikaneʼõkuri hikuái hetépe ha ijespíritupe, oñorairõguikuri hikuái pyʼaguasúpe arakue ha ombaʼapóguikuri hikuái pyharekue oñongatu hag̃ua itavaguasukuéra; ha upéicha ohasákuri hikuái tuicha jeikoʼasy opaichaguáva.

17 Ha koʼág̃a heʼíma hikuái ipuʼakataha hesekuéra upe tendápe térã omanóta; upévare ikatu reimoʼã porã ko mbareteʼimi agueruvaʼekue chendive, heẽ, umi che raʼykuéra, omeʼẽkuri chupekuéra tuicha ñehaʼarõ ha heta vyʼapavẽ.

18 Ha koʼág̃a ojehu lamanita-kuéra ohechávo oñemog̃uahẽveha Antipus-pe heta soldádo ijehérsitope g̃uarã, oñemyaña chupekuéra Ammorón heʼígui, ani hag̃ua ou hikuái oñemoĩ Judea tavaguasu rehe, térã orerehe, ñorairõme.

19 Ha péicha Ñandejára oremoĩporãkuri; ha oúrire hikuái ore ári orekangy aja ikatuvaʼerãmoʼãkuri ohundi hikuái ore ehersitoʼimi; ha katu péicha roñeñongatúkuri.

20 Ammorón heʼíkuri chupekuéra ojoko hag̃ua hikuái umi tavaguasu ojagarravaʼekue. Ha péicha opákuri ary veintiseis. Ha oñepyrũvo ary veintisiete rombosakoʼíkuri ore tavaguasu ha orejupe roñemoʼã hag̃ua.

21 Koʼág̃a, ore roipotákuri lamanita-kuéra ou ore ári; noroñemoĩséigui hesekuéra hendambaretekuérape.

22 Ha ojehu romoĩ maʼẽñemiharakuéra umi jerére, rohecha hag̃ua lamanita-kuéra ojapóva, ani hag̃ua oike hikuái oréve pyharekue ni arakue oñemoĩvo ambue ore tavaguasukuéra ári opytáva nórte gotyo.

23 Roikuaágui umíva umi tavaguasúpe naimbaretetereiriha hikuái roñemoĩ hag̃ua hesekuéra; upévare ore roʼasékuri hiʼarikuéra hapykuéguio, ohasáramo hikuái ore roimehápe, ha péicha roñemoĩ hag̃ua hesekuéra hapykuéguio ojejopy jave avei hikuái tenondéguio. Roimoʼãkuri orepuʼakataha hesekuéra; ha katu péina ápe, rohecha ndoikoiha koʼã mbaʼe roipotáva.

24 Noñanimái hikuái ohasávo ijehersitokuéra reheve ore roimeha rupi, ni noñanimái hikuái ohasávo ipehẽngue reheve, ani mbaʼe ndoguerekói hikuái mbarete oikotevẽva ha hoʼa.

25 Ni noñanimái hikuái oguatávo oñemoĩ hag̃ua Zarahemla retã rehe; ni noñanimái hikuái ojapyharávo ysyry Sidón ykua yvu, Nefíah retã gotyo.

26 Ha péicha, imbaretekuéra reheve, heʼíma hikuái ojokotaha umi tavaguasu ojagarravaʼekue.

27 Ha koʼág̃a ojehu kóva ko arýpe mokõiha jasy jave, oñemog̃uahẽ oréve heta tembiʼu umi dos mil che raʼykuéra tuvakuéragui.

28 Ha ojegueruka avei oréve dos mil kuimbaʼe Zarahemla retãgui. Ha péicha roñembosakoʼíkuri diez mil kuimbaʼe reheve, ha hiʼupy chupekuéra g̃uarã reheve, ha avei ikuña ha itaʼyrakuérape g̃uarã.

29 Ha lamanita-kuéra, ohechávo, péicha ore mbaretekuéra oñembotuichaveha ára ha ára, ha og̃uahẽha hiʼupy ore karurã, oñepyrũ okyhyje hikuái, ha oñepyrũ osẽ, ohecha hag̃ua ikatúpa ombopaha hikuái umi hiʼupy ha soldádo jegueru.

30 Koʼág̃a, rohechávo lamanita-kuéra oñepyrũha ojepyʼapy péicha, roiporuse hesekuéra peteĩ mbotavy; upévare Antipus heʼi chéve asẽ hag̃ua kuimbaʼe atyʼimi reheve peteĩ tavaguasúpe namombyrýiva upégui, rogueraharamoguáicha hína hiʼupy upe tavaguasúpe.

31 Ha rohasavaʼerãkuri tavaguasu Antipara rupi, rohoramoguáicha tavaguasu mombyryvévape, pe yguasu rembeʼy ypýpe.

32 Ha ojehu rosẽ roguata, rogueraharamoguáicha ore hiʼupykuéra, roho hag̃ua upéva upe tavaguasúpe.

33 Ha ojehu Antipus osẽ ijehérsito pehẽngue reheve, ohejávo hembyre omoʼã hag̃ua pe tavaguasu. Ha katu nosẽi che aha mboyve che ehersitoʼimi ndive, ha añemoag̃ui rire tavaguasu Antipara rehe.

34 Ha koʼág̃a, tavaguasu Antipara-pe oĩ lamanita-kuéra ehérsito imbaretevéva: heẽ, pe hetavéva.

35 Ha ojehu umi imaʼẽñemihára omombeʼúvo chupekuéra, ou hikuái ijehérsito reheve ha oñemoĩ orerehe.

36 Ha ojehu roñani henonderãkuéra, nórte gotyo. Ha péicha rogueraha ore rapykuéri lamanita-kuéra ehérsito tuichavéva;

37 Heẽ, jepe peteĩ tuicha pukukue jave, upéicha ohechávo hikuái Antipus ehérsito, omuña mbaretéva hína chupekuéra, ndojeréi hikuái akatúa ni asu gotyo, ha katu oguata kareʼỹnte ohóvo hikuái ore rapykuéri; ha, ore roimoʼãkuri, haʼekuéra orejukaseha Antipus ohupyty mboyve chupekuéra, ha péva ani hag̃ua oñemongora hikuái ore tavayguakuérare.

38 Ha koʼág̃a Antipus, ohechávo roimevaiha, ombopyaʼeve ijehérsito jeguata. Ha katu péina ápe, og̃uahẽ pytũ; upévare haʼekuéra ndaʼorerupytýi, ni Antipus ndaikatúikuri ohupyty chupekuéra; upévare ropytuʼu pyharekue.

39 Ha ojehu koʼẽ mboyve, péina ápe, lamanita-kuéra oúma hína ore rapykuéri. Koʼág̃a ndoroguerekóikuri mbarete oñeikotevẽva roñorairõ hag̃ua hendivekuéra; heẽ, che ndahejaséi che raʼymikuéra hoʼa ipopekuéra; upévare roguatave rohóvo, ha roho taveʼỹ gotyo.

40 Koʼág̃a, haʼekuéra noñanimái ohóvo akatúa ni asu gotyo okyhyjégui opytáramo g̃uarã hikuái ñemongorápe; ni che ndajereséi akatúa ni asu gotyo akyhyjégui cherupytýramo g̃uarã hikuái, ha ndaikatuiramo g̃uarã roñemoʼã chuguikuéra, ha orejuka, ha okañýramo g̃uarã hikuái; upéicha roñani pe taveʼỹme upe ára pukukue, jepe pytũ meve.

41 Ha ojehu upéicha jey, koʼẽvo, rohecha lamanita-kuérape ou ore ári, ha roñani henonderãkuéra.

42 Ha katu ojehu naoremuña pukúi ha opyta hikuái; ha haʼékuri mbohapyha ára koʼẽme pe sétimo jasy jave.

43 Ha koʼág̃a, ndoroikuaáikuri ohupytýparaʼe chupekuéra Antipus, ha katu che haʼe kuimbaʼekuérape: Péina ápe, ñande ndajaikuaái opytáparaʼe hikuái jaju hag̃ua hesekuéra, péicha haʼekuéra ñandereity hag̃ua iñuhãme;

44 Upévare mbaʼépa peje, che raʼykuéra, pehosépa peñorairõ hendivekuéra?

45 Ha koʼág̃a che haʼe ndéve, Moroni che joykeʼy ahayhuetéva, arakaʼeve che ndahechaivaʼekue tuichaite pyʼaguasu, nahániri, ni opavave nefita-kuéra apytépe.

46 Ha che ahenóiguikuri chupekuéra tapiaite che raʼykuéra (opavave haʼekuéra imitãitereígui) jepe péicha heʼi chéve hikuái: Túva, péina ápe ñane Tupã oĩ ñanendive, ha haʼe ndohejamoʼãi jaʼa; upéicha jahákatu; ndajajukaivaʼerãmoʼã ñande joykeʼykuérape ñanderejárire hikuái pyʼaguapýpe; upévare jahákatu, ani ipuʼaka hikuái Antipus ehérsito rehe.

47 Koʼág̃a arakaʼeve noñorairõivaʼekue hikuái, upevére ndokyhyjéikuri ñemanógui; ha ohayhuve hikuái ituvakuéra rekosãso hekovégui; heẽ, isykuéra omboʼevaʼekue chupekuéra ndodudáiramo hikuái, Tupã omosãsotaha chupekuéra.

48 Ha heʼijey chéve hikuái isykuéra ñeʼẽ, heʼívo: Ndorodudái ore sykuéra oikuaahague koʼãva.

49 Ha ojehu ahajey dos mil che raʼykuéra reheve umi lamanita oremuñavaʼekue rehe. Ha koʼág̃a péina ápe, Antipus ehersitokuéra ohupytýkuri chupekuéra, ha omoñepyrũ peteĩ ñorairõ ivaietereíva.

50 Ha Antipus ehérsito ikaneʼõvo, oguata puku haguére mbovy árape, haimetékuri hoʼa lamanita-kuéra pópe; ha che ndajevýirire che dos mil reheve haʼekuéra ohupytyvaʼerãmoʼã pe oipotáva.

51 Antipus hoʼáguikuri kysepuku rupi, ha heta imburuvichakuéra avei, ikaneʼõ, oguata pyaʼe haguére—upévare Antipus ehersitokuéra, oñemoapañuãivo imburuvichakuéra omano haguére, oñepyrũ ojevy lamanita-kuéra renondépe.

52 Ha ojehu lamanita-kuéra oñembopyʼaguasu, ha oñepyrũ omuña chupekuéra; ha péicha lamanita-kuéra omuña mbarete javékuri chupekuéra, Helamán hoʼa hapykuéguio idos mil reheve, ha oñepyrũ ojuka hetaiterei chupekuéra, jepe opa lamanita-kuéra ehérsito opyta peve ha ojere Helamán ári.

53 Koʼág̃a Antipus tavayguakuéra ohechávo lamanita-kuéra ojerejeyha, ombyaty jey kuimbaʼekuérape ha ou jey hikuái lamanita-kuéra ári hapykue gotyo.

54 Ha koʼág̃a ojehu ore, Nefi tavayguakuéra, Antipus tavayguakuéra, ha che umi che dos mil ndive, romongora lamanita-kuérape, ha rojuka chupekuéra; heẽ, ohecha peve hikuái omeʼẽmantevaʼerãha hiʼárma ñorairõguasurã ha avei oñemoĩ hikuái ñorairõguasu prisionéroicha.

55 Ha koʼág̃a ojehu oñemoĩvo hikuái ore poguýpe, péina ápe, aipapa umi mitãrusu oñorairõvaʼekue chendive, akyhyjégui heta haʼekuéra oiméramo g̃uarã omanoraʼe.

56 Ha katu péina ápe, tuicha che vyʼapavẽrã, ajuhu ni peteĩ ánga ndoʼaihague yvýpe; heẽ, ha oñorairõkuri hikuái Tupã mbareteramoguáicha reheve; heẽ, arakaʼeve ndojeikuaáiva kuimbaʼe oñorairõha mbarete imilagrosoitéva reheve; ha puʼaka imbaretetéva reheve hoʼákuri hikuái lamanita-kuéra ári, omongyhyje peve chupekuéra; ha péva rupi lamanita-kuéra oñemoĩ ñorairõguasu prisionéroramo.

57 Ha ndoroguerekóigui tenda ore prisionerokuérape g̃uarã, romaʼẽ hag̃ua hesekuéra ani hag̃ua ogueraha chupekuéra lamanita-kuéra ehérsito, upévare romondo chupekuéra Zarahemla retãme, ha Antipus ehersitokuéra nomanoivaʼekue pehẽngue, oho hendivekuéra; ha ajagarra hembyre ha ambojoaju che mitãrusukuéra ammonita ndive, ha rohojey Judea tavaguasúpe.