1 Ha ojehu opyta hikuái ha ojei ag̃uimi chuguikuéra. Ha Moroni heʼi Zerahemna-pe: Péina ápe, Zerahemna, ore noroñohẽsevéima yvyporakuéra ruguy. Nde reikuaa peimeha ore pópe, upevére ndoporojukasevéima.

2 Péina ápe, ndorojúi roñorairõ hag̃ua penendive roñohẽ hag̃ua pende ruguy rohekávo puʼaka; ni noromoĩséi pe ñeñapytĩmby júgo avave ári. Ha katu upévare peẽ pejúkuri orerehe; heẽ, ha pendepochy orendive ore religión rupi.

3 Ha katu koʼág̃a, pehecha Ñandejára oĩha orendive; ha pehecha penemeʼẽha oréve ore pópe. Ha koʼág̃a aipota peikũmby koʼãva ojejapoha orendive ore religión ha ore jerovia Cristo rehe rupi. Ha koʼág̃a pehecháma ndaikatuiha pehundi ko ore jerovia.

4 Koʼág̃a, pehecha kóva haʼeha Tupã jerovia añetegua; heẽ, pehecha Tupã oremoʼãta, ha oñangarekotaha orerehe, ha oreñongatúta, orejeroviareko aja hese, ha ore jeroviáre, ha ore religión-re; ha arakaʼeve Ñandejára ndohejamoʼãi roñehundi ndahaʼéiramo roʼa haguére tembiapovaípe ha ronega ore jerovia.

5 Ha koʼág̃a, Zerahemna, che haʼe ndéve, pe Tupã ipuʼakapáva rérape, omombaretevaʼekue ore jyva rohupyty hag̃ua puʼaka pende ári, ore jerovia rupi, ha ore religión, ha ore ñemboʼe tupaitũrã, ha ore tupao rupi, ha pe ñangareko marangatu roguerekóva rupi ore rembirekokuéra ha ore raʼykuéra ndive, pe tekosãso orembojoajúva ore yvy ha ore retã rehe; heẽ, ha avei oreñeʼẽrendu haguére Tupã ñeʼẽ marangatúre, omeʼẽva oréve opa ore vyʼapavẽ; ha opa mbaʼe rohayhúvare—

6 Heẽ, ha ndahaʼéi pévante; che haʼe peẽme, peikoveseháicha, pemeʼẽ hag̃ua oréve pene árma ñorairõguasurã, ha noroñohẽmoʼãi pende ruguy, ha katu rohejáta peẽme peikove, pehóramo pende rape rupi ha anivéma peju ñorairõguasúpe orerehe.

7 Ha koʼág̃a, ndapejapóiramo kóva, péina ápe, peime ore pópe, ha haʼéta che ehersitokueraguápe hoʼa hag̃ua pende ári, ha omoĩ hag̃ua pende retére ñemano jekutu, péicha peñehundi hag̃ua; ha upéramo jahecháta mávapa oguereko puʼaka ko tavayguakuéra ári; heẽ, jahecháta mávapa ojegueraháta ñeñapytĩmbýpe.

8 Ha koʼág̃a Zerahemna ohendúvo koʼã ñeʼẽ oñemotenonde ha omeʼẽ ikysepuku ha isimitárra, ha ijyvyrapã Moroni pópe, ha heʼi chupe: Péina ápe, koʼápe oĩ ore árma ñorairõguasurã; romeʼẽta ndéve, ha katu ndorojapomoʼãi peteĩ ñeʼẽmeʼẽ nendive, roikuaáva ndorojapomoʼãiha, ha avei ore raʼykuéra; ha katu ejagarra ore árma ñorairõguasurã, ha eheja toroho pe taveʼỹme; ndaupéichairamo rojokóta ore kysepuku, ha ore puʼakáta penderehe, ỹramo romanóta.

9 Péina ápe, ore ndahaʼéi pende jerovia rehegua; ndorogueroviái haʼeha Tupã oremeʼẽvaʼekue pende pópe; ha katu roguerovia haʼeha pende katupyry peneñongatuvaʼekue ore kysepukúgui. Péina ápe, haʼe pende pytiʼamoʼãha ha pende retemoʼãhakuéra peneñongatuvaʼekue.

10 Ha koʼág̃a Zerahemna oñeʼẽmbávo koʼã ñeʼẽ, Moroni omeʼẽjey ikysepuku ha umi árma ñorairõguasurã, oñemeʼẽvaʼekue chupe, Zerahemna-pe, heʼívo: Péina ápe, ñamohuʼãta ko ñorairõ.

11 Koʼág̃a che ndaikatúi ajevy umi ñeʼẽ añeʼẽvaʼekuégui, upévare Ñandejára oikoveháicha, ndapehomoʼãi pejapoʼỹramo peteĩ ñeʼẽmeʼẽ ndapejumoʼãveimaha ñorairõme orerehe. Koʼág̃a peimémaramo ore pópe roñohẽta pende ruguy yvýpe, térã pejapóta pe haʼevaʼekue peẽme.

12 Ha koʼág̃a Moroni heʼívo koʼã ñeʼẽ, Zerahemna ojagarra ikysepuku, ha ipochy Moroni ndive, ha ojeity hiʼári ojuka hag̃uáicha Moroni-pe; ha katu omopuʼãvo ikysepuku, péina ápe, peteĩ Moroni soldádo oity hiʼári peteĩ ñenupã oitýva chugui yvýpe ikysepuku, ha omopẽ hiʼýva; ha avei oikutu Zerahemna-pe ha oikytĩ chugui iñakãpire ha upéva hoʼa yvýpe. Ha Zerahemna ojei chuguikuéra isoldadokuéra apytépe.

13 Ha ojehu pe soldádo oĩva upépe, pe oikytĩvaʼekue Zerahemna akãpire, omopuʼã yvýgui ipire iñakãraguégui, ha omoĩ ikysepuku apýrare, ha oipyso haʼekuéra gotyo, heʼívo chupekuéra ñeʼẽ sapukáipe:

14 Jepe hoʼa haguéicha yvýpe ko akãpire, haʼéva pende ruvicha mbaʼe, péicha peʼáta peẽ yvýpe pemeʼẽʼỹramo pene armakuéra ñorairõguasurã ha peho mboyve pejapo peteĩ konvénio pyʼaguapyrã.

15 Koʼág̃a oĩ heta, ohendúvo koʼã ñeʼẽ ha ohechávo pe akãpire kysepuku ári, ojejopýva kyhyje reheve; ha heta ohasa ha oity hiʼárma ñorairõguasurã Moroni py gotyo, ha ojapo peteĩ konvénio pyʼaguapyrã. Ha opavave ojapóvape konvénio ojeheja oho taveʼỹme.

16 Koʼág̃a ojehu Zerahemna oñekoʼõieterei, ha omokyreʼỹ pochyrã isoldádo rembyrépe, oñorairõ mbareteve hag̃ua hikuái nefita-kuéra ndive.

17 Ha koʼág̃a, Moroni ipochy, lamanita-kuéra ñemohatã rupi; upévare heʼi itavayguakuérape hoʼa hag̃ua hiʼarikuéra ha ojuka hag̃ua chupekuéra. Ha ojehu oñepyrũ hikuái ojuka chupekuéra; heẽ, ha lamanita-kuéra oñorairõ imbarete ha ikysepukukuéra reheve.

18 Ha katu péina ápe, ipire ijopívo ha iñakãnguéra oñemoʼãʼỹva opyta nefita-kuéra kysepuku rãimbe jehupytýpe. Heẽ, péina ápe ojekutuvaipa ha ojeipyʼajopy chupekuéra, heẽ, ha pyaʼeterei hoʼa hikuái nefita-kuéra kysepuku renondépe; ha oñepyrũ ojeity chupekuéra, jepe oprofetisa haguéicha pe Moroni soldádo.

19 Koʼág̃a Zerahemna, ohechávo opavave oñehundi potaiteha, ojerureʼasy Moroni-pe, oñeʼẽmeʼẽvo chupe haʼe ha itavayguakuéra ojapotaha konvénio hendivekuéra, ohejáramo hikuái hekove umi hembývape, arakaʼeve ndoumoʼãveimaha hikuái ñorairõguasu reheve hesekuéra.

20 Ha ojehu Moroni ombopaha jey pe jejuka tavayguakuéra apytépe. Ha ojagarra lamanita-kuéra árma ñorairõguasurã; ha ojapo rire hikuái peteĩ konvénio hendive pyʼaguapyrã, ojeheja chupekuéra osẽ taveʼỹme.

21 Koʼág̃a, ndojeipapái heʼõnguekuéra hetaitereígui; heẽ, heʼõnguekuéra hetaiterei, péicha nefita ha lamanita-kuéra apytépe.

22 Ha ojehu oity hikuái umi heʼõnguekuéra ysyry Sidón ykuérape, ha ojegueraha chupekuéra ha ojepoi yguasu ipypukuvehápe.

23 Ha nefita-kuéra ehérsito, térã Moroni mbaʼéva, ohojey ha og̃uahẽ hóga ha hetãmekuéra.

24 Ha péicha opa upe désimo octávo ary huekuéra ñeisãmbyhy Nefi tavayguakuéra ári. Ha péicha opa Alma kuatiajehaipyre, ojehaivaʼekue Nefi pláncha ári.