Escritura-kuéra
Alma 35


Ñembyaty 35

Pe ñeʼẽ ñehekomboʼe ohundi zoramita-kuéra ñuhã—Omosẽ hikuái umi oñekonvertivaʼekuépe, ha umíva ojoaju Jersón-pe Ammón tavayguakuéra ndive—Alma ojepyʼapy itavayguakuéra rekoñañáre. 74 ary rupi Cristo mboyve.

1 Koʼág̃a ojehu Amulek heʼipávo koʼã ñeʼẽ, ojei hikuái pe atyguasúgui ha oho Jersón retãme.

2 Heẽ, ha umi ambue joykeʼykuéra, omboʼe rire pe ñeʼẽ zoramita-kuérape, oho avei Jersón retãme.

3 Ha ojehu umi herakuãporãvéva zoramita-kuéra apytépe oporandu rire ojupe umi ñeʼẽ oñemboʼevaʼekue chupekuéra rehe, ipochy hikuái umi ñeʼẽ rehe, ohundígui iñuhãnguéra; upévare nohenduséi hikuái umi ñeʼẽ.

4 Ha omondo ha ombyatyka hikuái opa upe tetã tuichakue jave opa tavayguakuérape, ha oporandu chupekuéra umi ñeʼẽ ojeʼevaʼekue rehe.

5 Koʼág̃a itendota ha isacerdotekuéra ha imboʼeharakuéra ndohejái tavayguakuéra oikuaa pe haʼekuéra oipotáva; upévare oporandu hikuái kirirĩháme mbaʼépa heʼi opa tavayguakuéra.

6 Ha ojehu oikuaa rire hikuái mbaʼépa heʼi opa tavayguakuéra, umi ohecha porãva umi ñeʼẽ heʼivaʼekue Alma ha ijoykeʼykuéra oñemosẽ hetãgui; ha heta hikuái; ha oho avei hikuái Jersón retãme.

7 Ha ojehu Alma ha ijoykeʼykuéra oministra chupekuéra.

8 Koʼág̃a zoramita tavayguakuéra ipochy Ammón tavayguakuéra ndive oĩva Jersón-pe, ha zoramitakuéra tendota guasu, haʼégui peteĩ kuimbaʼe iñañaitereíva, oñeʼẽ Ammón tavayguakuéra ndive omokyreʼỹvo chupekuéra omosẽ hag̃ua hikuái opa umi ijapytepekuéragui og̃uahẽva hetãme.

9 Ha ojapo heta ñeʼẽpohýi hesekuéra. Ha koʼág̃a Ammón tavayguakuéra ndokyhyjéi iñeʼẽnguéragui; upévare nomosẽi chupekuéra okápe, ha katu omog̃uahẽ hikuái mayma zoramita imboriahúva oúvape hendapekuéra; ha omongaru chupekuéra, ha omonde, ha omeʼẽ chupekuéra yvy jehejapyre; ha oñangareko hesekuéra oipotaháicha hikuái.

10 Koʼág̃a kóva omopuʼã zoramita-kuérape pochýpe Ammón tavayguakuéra rehe, ha oñepyrũ ojeheʼa hikuái lamanita-kuéra ndive ha omokyreʼỹ avei chupekuéra pochyrã hesekuéra.

11 Ha péicha zoramita-kuéra ha lamanita-kuéra oñepyrũ oñembosakoʼi ñorairõguasurã Ammón tavayguakuéra ndive, ha avei nefita-kuéra ndive.

12 Ha péicha opa pe désimo sétimo ary huekuéra ñeisãmbyhy Nefi tavayguakuéra ári.

13 Ha Ammón tavayguakuéra osẽ Jersón retãgui, ha oho Melek retãme, ha omeʼẽ Jersón retãme nefita-kuéra ehérsito rendarã, oñorairõ hag̃ua lamanita-kuéra ha zoramita-kuéra ehérsito ndive; ha péicha oñepyrũ peteĩ ñorairõguasu lamanita-kuéra ha nefita-kuéra apytépe, pe désimo octávo ary huekuéra ñeisambyhýpe; ha tenondeve oñemeʼẽta peteĩ iñorairõguasukuéra ñemombeʼu.

14 Ha Alma, ha Ammón, ha ijoykeʼykuéra, ha avei mokõive Alma raʼy ohojey Zarahemla retãme, haʼe rire hikuái tembiporu Tupã pópe ogueru hag̃ua heta zoramita arrepentimiéntope; ha opa ojeguerúva arrepentimiéntope oñemosẽkuri hetãgui; ha katu oguereko hikuái ijyvy jehejapyrerã Jersón retãme, ha ojagarra hikuái umi árma oñemoʼã hag̃ua ijupe, hembirekokuéra, itaʼyrakuéra, ha hetãnguéra.

15 Koʼág̃a Alma, ojepyʼapy itavayguakuéra rembiapovaíre, heẽ umi ñorairõguasu rehe, ha pe tuguy ñeñohẽre, ha joavy oĩva ijapytepekuéra rehe; ha osẽvo omboʼe hag̃ua pe ñeʼẽ, térã omondóvo oñemboʼe hag̃ua pe ñeʼẽ, opa tavayguakuéra apytépe oikóva opa tavaguasúpe; ha ohechávo tavayguakuéra korasõ oñepyrũha oñemohatã, ha ipochyha pe ñeʼẽ oñemovãʼỹva rupi, ikorasõ ojepyʼapyeterei.

16 Upévare, ombyatyuka itaʼyrakuéra, omeʼẽ hag̃ua opavavépe chupekuéra hembiaporã, peteĩ teĩme, umi mbaʼe haʼéva tekojoja rehegua rehe. Ha roguereko peteĩ ñemombeʼu hembiapoukapykuéragui, omeʼẽvaʼekue chupekuéra, ikuatiajehaipyrépe oĩháicha.