Enós Kuatiañeʼẽ

1 Péina ápe, ojehu che, Enós, aikuaa che ru haʼeha peteĩ kuimbaʼe hekojojáva—haʼe chemboʼégui iñeʼẽme, ha avei chemongakuaa Ñandejára rekomboʼe ha ñemoñeʼẽme—ha tojehovasa che Tupã réra upévare—

2 Ha amombeʼúta peẽme pe ñorairõ aguerekovaʼekue Tupã renondépe, ahupyty mboyve che angaipa jora.

3 Ha péina ápe, asẽ ajuka hag̃ua mymba kaʼaguýpe; ha umi ñeʼẽ ahendúmiva che ru oñeʼẽ pe tekove opaveʼỹva ha umi imarangatuvakuéra vyʼa rehe, oike pypuku che korasõme.

4 Ha che ánga iñembyahýi; ha añesũ che Apohare renondépe, ha ajerure chupe ñemboʼe mbarete ha jerureʼasýpe che ánga rehe; ha ajerureʼasy chupe ára pukukue aja, heẽ, ha pytũ rire, amopuʼã gueteri che ñeʼẽ yvate og̃uahẽ meve yvágape.

5 Ha ou chéve peteĩ ñeʼẽ heʼívo: Enós, oñeperdona ndéve ne angaipakuéra, ha rejehovasáta.

6 Ha che, Enós, aikuaa Tupã ndaikatuiha ijapu; upévare, che rembiapovaikuéra oñemopotĩ.

7 Ha che haʼe: Ñandejára, mbaʼéicha piko ojejapo upéva?

8 Ha haʼe heʼi chéve: Nde jerovia rupi Cristo-re, arakaʼeve nderehechái ni rehenduivaʼekuépe. Ha ohasáta heta ary haʼe ojehechauka mboyve hetépe; upévare, tereho, nde jerovia nemopotĩ.

9 Ha koʼág̃a, ojehu ahendu rire koʼã ñeʼẽ, añepyrũ aipota che joykeʼy nefita-kuéra ñeimeporã; upévare, añohẽ Tupãme opa che ánga hesekuéra.

10 Ha ajejuhu jave péicha añorairõvo pe espíritu-pe, péina ápe, Ñandejára ñeʼẽ oujey che apytuʼũme, heʼívo: Che ajúta nde joykeʼykuérape ojesarekoháicha hikuái iñeʼẽrendúvo che rembiapoukapykuérare. Che ameʼẽvaʼekue chupekuéra ko yvy, ha haʼe peteĩ yvy marangatu; ha namoñeʼẽngái ndahaʼéirõ tembiapovaíre; upévare, ajúta nde joykeʼykuérape haʼe haguéicha; ha hembiapovaikuéra amboguejýta vyʼaʼỹme iñakã ári.

11 Ha che, Enós, ahendu rire koʼã ñeʼẽ, che jerovia Ñandejárare oñepyrũ imbareteterei; ha añemboʼe chupe heta ha are che joykeʼykuéra, lamanita-kuérare.

12 Ha ojehu añemboʼe ha ambaʼapo rire opa jesarekópe, heʼi chéve Ñandejára: Ameʼẽta ndéve reipotaháicha, nde jerovia rupi.

13 Ha koʼág̃a péina ápe, kóva haʼe potapy che aipotáva chugui—Peichahágui che tavayguakuéra, Nefita-kuéra, hoʼáramo tembiapovaípe, ha oñehundíramo hikuái, ha katu lamanita-kuéra noñehundíriramo, Tupã Ñandejára toñongatu peteĩ ñemombeʼu che tavaygua nefita-kuéra rehegua, jepe ijyva marangatu puʼaka rupive, peteĩ ára uperireguápe ojegueraha hag̃ua umi lamanita-pe, ikatu mbaʼe hag̃ua ojegueraha chupekuéra salvasiõme.

14 Ha katu koʼág̃a peve ore ñehaʼã romoĩjey hag̃ua chupekuéra jerovia añetépe mbaʼeverei. Ha oñeʼẽmeʼẽ hikuái iñekoʼõime, ikatúramo, ohundivaʼerãha hikuái ore kuatiajehaipyrekuéra ha oréve, ha avei opa ore rukuéra jepokuaa.

15 Upévare, che aikuaávo che Tupã Ñandejára ikatuha oñongatu ore kuatiajehaipyrekuéra, ajerureʼasy meme chupe, haʼe heʼígui chéve: Oimeraẽ mbaʼe rejeruréva jeroviápe, regueroviáramo oñemeʼẽtaha ndéve Cristo rérape, rehupytýta.

16 Ha che aguereko jerovia, ha ajerureʼasy Tupãme oñongatu hag̃ua umi kuatiajehaipyre; ha haʼe ojapo chendive konvénio omog̃uahẽtaha lamanita-kuérape pe ára haʼe oipotahápe.

17 Ha che, Enós, aikuaa ojejapotaha upe konvénio haʼe heʼi haguéicha; upévare che ánga opytuʼu.

18 Ha heʼi chéve Ñandejára: Nde rukuéra ojerurevaʼekue avei chéve koʼã mbaʼe; ha oñemeʼẽta chupekuéra ojeroviaháicha; ijeroviakuéra haʼégui nde jeroviáicha.

19 Ha ojehu che, Enós, aha Nefi tavayguakuéra apytépe, aprofetisávo umi mbaʼe oútavagui, ha ameʼẽ testimónio umi mbaʼe ahendu ha ahechavaʼekuégui.

20 Ha che atestifika Nefi tavayguakuéra oñehaʼãhague jesarekópe omoĩjey hag̃ua lamanita-kuérape Tupã jerovia añetépe. Ha katu ore mbaʼapo mbaʼeverei, ijehayhuʼỹkuéra tuichaitereígui, ha ojegueraha hikuái heko ñañáre, ha upéicha oiko chuguikuéra tavayguakuéra saite, ñarõ, ha hoyʼuséva tuguy, henyhẽva taʼangarayhu ha mbaʼekyʼágui; ha hoʼu hikuái mymba saite; ha oiko hikuái ogaaópe ha oikorei hikuái taveʼỹre, peteĩ mymba pire mbyky ilómo jerére, ha iñakã perõ hikuái; ha ikatupyry huʼýpe, kysepuku karẽ ha háchape. Ha heta ijapytepekuéra ndoʼúi ndahaʼéirõ soʼo pýrante; ha oñehaʼã meme hikuái orerundi.

21 Ha ojehu Nefi tavayguakuéra oñemitỹ, ha oñotỹ opáichagua yva raʼỹi ha yva, ha omongakuaa vaka ha opáichagua mymba aty, ha kavara ha kavara kaʼaguy, ha avei heta kavaju.

22 Ha oĩ hetaiterei profetakuéra ore apytépe. Ha umi tavayguakuéra ipyʼahatã ha ndoikuaaséi.

23 Ha ndaipóri mbaʼeve ndahaʼéiramo tuicha tekomboʼe, oñemboʼévo ha ojeprofetisávo ñorairõguasu ha joavy ha ñehundi rehe, omomanduʼa memévo chupekuéra ñemanóre, ha pe ára apyraʼỹ pukukue, ha Tupã puʼaka ha huisiokuérare, ha opa koʼã mbaʼe—omokyreʼỹ memévo chupekuéra opyta hag̃ua hikuái Ñandejára kyhyjépe. Ha haʼe ndaiporiha mbaʼeve, ndahaʼéirõ koʼã mbaʼe, ha tuicha ñeʼẽ resakã, ndohejamoʼãiva hoʼa pyaʼe hikuái ñehundíme. Péicha ahai hesekuéra.

24 Ha ahecha ñorairõguasu Nefita ha Lamanita-kuéra apytépe aikove aja.

25 Ha ojehu añepyrũ chetuja, ha ohasáma ciento setenta y nueve ary ore ru Lehi osẽhague Jerusalén-gui.

26 Ha ahecha pyaʼe ahamavaʼerãha che ñeñotỹháme, ojeʼe rire chéve Tupã puʼaka rupive amboʼe ha aprofetisavaʼerãha ko tavayguakuérape, ha amboʼe pe ñeʼẽ añetegua oĩva Cristo-pe. Ha amboʼékuri péva opa che ára pukukue aja, ha avyʼaitereive umívape mbaʼe yvorapeguávagui.

27 Ha che pyaʼe aháma pe tenda apytuʼu hag̃uáme, haʼéva che Rredentor ndive; aikuaágui hendive apytuʼutaha. Ha cherory pe ára che rekove omanokuaáva oñemondetaha ñemanoʼỹme, ha añemboʼýta henondépe, upérõ che ahecháta torýpe hova, ha haʼe heʼíta chéve: Eju che rendápe, nde rejehovasáva, oĩ peteĩ tenda oñembosakoʼíva ndéve g̃uarã che Ru rógape. Amén.