Omni Kuatiañeʼẽ

1 Péina ápe, ojehu che, Omni, ojerurévo chéve che ru, Jarom, ahai hag̃ua koʼã pláncha ári, añongatu hag̃ua ore genealogía—

2 Upévare, che ára pukukue aja, che aipota peikuaa heta añorairõhague che kysepukúpe amoʼã hag̃ua che tavayguakuéra, Nefita-kuérape, ani hag̃ua hoʼa hikuái ihayhuʼỹhakuéra pópe, lamanita-kuérava. Ha katu, péina ápe, che chejehegui haʼe peteĩ yvypóra iñañáva, ha nacheñeʼẽrendúivaʼekue umi Ñandejára rembipota ha rembiapoukapykuérare ajapovaʼerãháichakuri.

3 Ha ojehu ohasáma doscientos setenta y seis ary, ha roguerekókuri pyʼaguapy heta ára; ha roguereko heta ára ñorairõguasuvai ha tuguy ñeñohẽ. Heẽ, ha ipahápe, ohasáma doscientos ochenta y dos ary, ha che añongatúkuri koʼã pláncha che rukuéra rembiapoukapýicha; ha ameʼẽ che raʼy Amarón-pe. Ha péicha ambopaha.

4 Ha koʼág̃a che Amarón, ahai umi mbaʼe ahaíva, ha mbovy, che ru kuatiañeʼẽme.

5 Péina ápe, ojehu ohasáma trescientos veinte ary, ha umi nefita-kuéra apytépe heko ñañavéva oñehundipa.

6 Ñandejára ndohejamoʼãigui, haʼe oguenohẽ rire chupekuéra Jerusalén retãgui ha oñongatu ha oñangareko rire hesekuéra ani hag̃ua hoʼa hikuái ihayhuʼỹhakuéra pópe; heẽ, ndohejasemoʼãikuri ojejapoʼỹ umi ñeʼẽ heʼivaʼekue ore rukuérape, heʼívo: Napeneñeʼẽrendúiramo che rembiapoukapykuérare napeñakãrapuʼãmoʼãi pe yvýpe.

7 Upévare, Ñandejára ou chupekuéra tuicha huísio reheve; upevére, haʼe oñongatu umi hekojojávape ani hag̃ua omano, ha katu oipeʼa chupekuéra ihayhuʼỹhakuéra pógui.

8 Ha ojehu ameʼẽ umi pláncha che joykeʼy Quemis-pe.

9 Koʼág̃a che, Quemis, umi ahai mbovymíva, ahai che joykeʼy kuatiañeʼẽme; ha katu péina ápe, che ahecha pe haʼe ohaivaʼekue ipahápe, ohaihague ipo rupiete; ha ohaíkuri pe ára haʼe omeʼẽhaguépe chéve umíva. Ha kóicha roñongatu umi kuatiajehaipyre, ore rukuéra rembiapoukapýicha. Ha péicha ambopaha.

10 Péina ápe, che, Abinadom, haʼe Quemis raʼy. Péina ápe, ojehu ahecha heta ñorairõguasu ha joavy che tavayguakuéra apytépe, Nefita-kuéra, ha lamanita-kuéra; ha che kysepukúpe, aipeʼa heta lamanita-kuéra rekove amoʼã hag̃ua che joykeʼykuérape.

11 Ha péina ápe kóva ko tavayguakuéra kuatiajehaipyre ojehai umi pláncha rreikuéra oguerekóva ári, ñemoñareʼaty ohasaháicha; ha che ndaikuaái mbaʼeve rrevelasiõgui, ndahaʼéiramo umi ojehaivaʼekue, ni profesíagui; upévare, iporãma pe ojehaíva. Ha upéicha ambopaha.

12 Péina ápe, che haʼe Amalekí, Abinadom raʼy. Péina ápe, añeʼẽta peẽme peteĩ mbaʼe Mosíah rehegua, oñemoĩvaʼekue rréiramo Zarahemla retãme; ha katu péina ápe, omomarandu chupe Ñandejára osẽ hag̃ua Nefi retãgui, ha opavave ohenduséva Ñandejára ñeʼẽ osẽvaʼerãha avei hendive pe tetãgui taveʼỹ gotyo—

13 Ha ojehu haʼe ojapo Ñandejára heʼi haguéicha chupe. Ha opavave ohenduséva Ñandejára ñeʼẽ osẽ taveʼỹme pe tetãgui; ha ojegueraha chupekuéra heta mboʼepy ha profesía rupi. Ha oñemoñeʼẽ meme chupekuéra pe Tupã ñeʼẽme; ha ojegueraha chupekuéra ijyva puʼaka rupive, pe taveʼỹ rehe, og̃uahẽ meve hikuái pe yvy hérava Zarahemla retãme.

14 Ha ojuhu hikuái peteĩ tavayguakuéra, hérava Zarahemla tavayguakuéra. Koʼág̃a, oĩkuri heta vyʼa Zarahemla tavayguakuéra apytépe, ha avei Zarahemla ovyʼaiterei Ñandejára omboúgui Mosíah tavayguakuérape umi pláncha bronce-guigua reheve oguerekóva judio-kuéra kuatiajehaipyre.

15 Ha péina ápe, ojehu Mosíah ojuhu umi Zarahemla tavayguakuéra osẽhague Jerusalén-gui Sedequías, judá-pegua rréi, ojegueraharamoguare ñeñapytĩme Babilonia-pe.

16 Ha oho hikuái pe taveʼỹre, ha Ñandejára po ogueraha chupekuéra umi yguasu rupive, pe yvy Mosíah ojuhu haguépe chupekuéra; ha haʼekuéra oikovaʼekue upépe upe ára guive.

17 Ha upe ára Mosíah ojuhuramoguare chupekuéra, hetaitereímakuri hikuái. Upevére, oguerekóma hikuái heta ñorairõguasu ha joavy ivaíva, ha sapyʼa sapyʼa hoʼákuri hikuái kysepukúre; ha iñeʼẽnguéra oñembyai; ha ndoguerahái hikuái kuatiajehaipyre hendivekuéra; ha onega hikuái Ijapoharépe, ha ni Mosíah, ni itavayguakuéra, ndaikatúi oikũmby chupekuéra.

18 Ha katu Mosíah omboʼeuka chupekuéra iñeʼẽ. Ha ojehu oñemboʼe rire chupekuéra Mosíah ñeʼẽ, Zarahemla omeʼẽ peteĩ ituvakuéra genealogía, imanduʼaháicha; ha umíva ojehai, ha katu ndahaʼéi koʼã plánchape.

19 Ha ojehu Zarahemla ha Mosíah tavayguakuéra ojoaju oñondive, ha Mosíah oñehenói haʼe hag̃ua irréi.

20 Ha ojehu Mosíah árape, ojegueru chupe peteĩ ita tuicháva ojehaipyréva, ha haʼe ohesaʼỹijo umi jehaipyre pe Tupã don ha puʼaka rupive.

21 Ha omombeʼu hikuái peteĩ Coriamtumr, ha itavayguakuéra jejuka rehegua. Ha Zarahemla tavayguakuéra ojuhu Coriantumr-pe; ha oiko hendivekuéra nueve jasy aja.

22 Ha avei omombeʼu ñeʼẽ mbovymi ituvakuéra rehegua. Ha ituvakuéra ypykue ouvaʼekue pe tórregui, Ñandejára omoapañuãiramoguare tavayguakuéra ñeʼẽ; ha Ñandejára jehavira hoʼa hiʼarikuéra ihuisiokuéraicha, ijojáva; ha ikanguekuéra isarambi yvy nortepeguápe.

23 Péina ápe, che Amalekí, che reñoivaʼekue Mosíah árape; ha aikovaʼekue ahecha peve iñemano; ha itaʼýra, Benjamín orreina hendaguépe.

24 Ha péina ápe, ahecha peteĩ ñorairõvai rréi Benjamín árape, ha heta tuguy ñeñohẽ nefita-kuéra ha lamanita-kuéra apytépe. Ha katu, péina ápe, nefita-kuéra tuicha ipuʼakave hesekuéra; heẽ, pe rréi Benjamín omosẽ peve chupekuéra Zarahemla retãgui.

25 Ha ojehu añepyrũ chetuja; ha, ndaguerokóigui ñemoñare, ha aikuaávo pe rréi Benjamín haʼeha peteĩ yvypóra hekojojáva Ñandejára renondépe, upévare, ameʼẽta chupe koʼã pláncha, haʼévo opa yvypórape ou hag̃ua Tupãme, Israel-pegua Imarangatúvape, ha oguerovia hag̃ua umi profesía, ha rrevelasiõ, ha angelkuéra ministrasiõ, ha pe ñeʼẽ rehegua don, ha pe ñeʼẽ ñemyesakã don, ha opa mbaʼe iporãva; ha katu ndaipóri mbaʼe iporãva ndoúiva Ñandejáragui: ha pe ivaíva ou añágui.

26 Ha koʼág̃a, che joykeʼykuéra ahayhuetéva, aipota peju Cristo-pe, haʼéva Israel-pegua Imarangatúva, ha peike isalvasiõme ha pe irredensiõ puʼakápe. Heẽ, peju hendápe, ha peikuaveʼẽmbaite chupe pene ánga temikuaveʼẽramo, ha peajuna ha peñemboʼe meme, ha peñehaʼãmbaite ipahaite peve, ha oikoveháicha Ñandejára pejesalváta.

27 Ha koʼág̃a haʼese peẽme peteĩ mbaʼe umi ohovaʼekue taveʼỹme rehe oujey hag̃ua Nefi retãme; ha katu oĩ heta oipotáva ijyvy jehejapyre.

28 Upévare, osẽ hikuái taveʼỹme. Ha imburuvicha haʼévo peteĩ yvypóra imbarete ha ipuʼakapáva, ha yvypóra ipyʼahatãva, upévare haʼe ojapo peteĩ joavy ijapytepekuéra; ha opavave, cincuenta añónte katu nahániri, omano upe taveʼỹme, ha koʼãva ohojey Zarahemla retãme.

29 Ha ojehu ogueraha avei hendivekuéra heta ambuévape, ha oñepyrũ jey oho hikuái pe taveʼỹre.

30 Ha che Amalekí, aguereko peteĩ joykeʼy, ohovaʼekue avei hendivekuéra; ha upe guive ndaikuaavéi mbaʼeve chuguikuéra. Ha che ahátama che ñeñotỹháme; ha koʼã pláncha henyhẽma. Ha ambopaha che ñemombeʼu.