Jarom Kuatiañeʼẽ

1 Koʼág̃a péina ápe, che, Jarom, ahai ñeʼẽ mbovymi che ru, Enós, rembiapoukapýpeicha, oñeñongatu hag̃ua ore genealogía.

2 Ha koʼã pláncha michĩgui, ha koʼã mbaʼe ojehaígui ore joykeʼy lamanita-kuéra ñeime porãrã, upévare, oñeikotevẽ ahai mbovymi; ha katu che ndahaimoʼãi che profesiakuéragui, ni che rrevelasiõnguéragui. Ha mbaʼe piko ikatuve che ahai umi che rukuéra ohaimavaʼekuégui? Haʼekuéra piko ndohechaukaivaʼekue pe plan salvasiõ rehegua? Che haʼe peẽme, Heẽ; ha péva iporãma chéve g̃uarã.

3 Péina ápe, tekotevẽ ojejapo heta mbaʼe ko tavayguakuéra apytépe, ikorasõ atãgui hikuái, ha nohenduséigui, ha iñapytuʼũnguéra ndohecháigui, ha ijajúra hatãgui hikuái; upevére, Tupã iporiahuverekoiterei hendivekuéra, ha koʼág̃a peve neʼĩra gueteri oitypei chupekuéra yvy apéregui.

4 Ha oĩ heta ore apytépe oñemeʼẽva chupe heta rrevelasiõ, ndahaʼéigui opavave ipyʼahatãva. Ha heta naipyʼahatãiva ha oguerekóva jerovia, ojoaju pe Espíritu Santo rehe, ojehechaukáva yvypóra raʼykuérape, ojeroviaháicha hikuái.

5 Ha koʼág̃a, péina ápe, ohasáma doscientos ary, ha Nefi tavayguakuéra oñemombarete pe tetãme. Oñehaʼã hikuái iñeʼẽrendu Moisés léire ha omomarangatu Ñandejárape pe ára japytuʼuvaʼerãháme. Ha noñembohorýi, ni noñemotieʼỹi hikuái Tupãre. Ha pe tetãmegua leikuéra imbareteterei.

6 Ha isarambi hikuái heta tenda yvy ape ári, ha lamanita-kuéra avei. Ha koʼãva hetaitereive Nefita-kuéragui; ha ohayhu hikuái jejuka ha hoyʼu hikuái mymba ruguy.

7 Ha ojehu heta ára aja ou hikuái orerehe, Nefita-kuérare, ñorairõme. Ha katu ore rreikuéra ha ore sãmbyhyharakuéra haʼe yvypóra imbaretéva Ñandejára jegueroviápe; ha omboʼe hikuái tavayguakuérape umi Ñandejára rape; upévare, orepuʼaka umi lamanita-kuérare ha romosẽ chupekuéra ore retãgui, ha roñepyrũ romombarete ore tavaguasu, ha opa umi ore yvy jehejapyre.

8 Ha heta roñemoña, ha oresarambi yvy ape ári, ha heta ore mbaʼehepy, óro, ha pláta ha mbaʼe iporãvape, ha tembiapo porã yvyrágui ojejapóvape, óga guasúpe, ha tembiporúpe, ha avei iérro ha cobre-pe, ha bronce ha asérope, rojapóvo opáichagua tembiporu roñemitỹ hag̃ua, ha árma ñorairõguasurã—heẽ, pe huʼy hakuáva, ha pe huʼy ryru, ha pe mbaʼe hakuáva, ha pe kysepuku, ha opa mbaʼe ojeporúva ñorairõguasúpe.

9 Ha roimévo péicha ñembosakoʼípe rombohovake hag̃ua lamanita-kuérape, haʼekuéra ndaipuʼakái orerehe. Ha katu oiko umi Ñandejára ñeʼẽ heʼivaʼekue ore rukuérape, heʼívo péicha: Peneñeʼẽrenduháicha che rembiapoukapykuérare peñakãrapuʼãta pe tetãme.

10 Ha ojehu Ñandejára profetakuéra oñeʼẽpohýi Nefi tavayguakuérape, Tupã ñeʼẽme heʼiháicha, haʼekuéra naiñeʼẽrendúiramo umi tembiapoukapýre, ha katu hoʼáramo hikuái tembiapovaípe, haʼekuéra oñehunditaha yvy ape árigui.

11 Upévare, umi proféta, ha sacerdote-kuéra, ha mboʼeharakuéra ombaʼapo jesarekópe, oñemoñeʼẽvo opa mborayhúpe tavayguakuérape ojesareko hag̃ua hikuái; omboʼévo chupekuéra Moisés léi, ha mbaʼérepa péva oñemeʼẽvaʼekue, oñeipyʼamovãvo chupekuéra omaʼẽ hag̃ua tenonde gotyo pe Mesías rehe ha oguerovia hag̃ua haʼe outaha oikomarõguáicha. Ha péicha omboʼe hikuái chupekuéra.

12 Ha ojehu ojapo haguére hikuái péicha ndohejái chupekuéra oñehundi pe yvy ape árigui; omokyreʼỹ memégui ikorasõkuéra pe ñeʼẽme, omokyreʼỹvo chupekuéra oñearrepenti hag̃ua.

13 Ha ojehu ohasa doscientos treinta y ocho ary—opáichagua ñorairõguasúpe, ha joavy, ha ñeʼẽʼapi, heta ára pukukue aja.

14 Ha che Jarom, ndahaivéima, umi pláncha michĩgui. Ha katu péina ápe, che joykeʼykuéra, peẽ ikatu peheka ambue Nefi planchakuérape; ha péina ápe, hiʼarikuéra ojehaígui ore ñorairõguasukuéra rembiasakue, umi rreikuéra ohai haguéicha, térã umi haʼekuéra ohaiukavaʼekue.

15 Ha amoĩ koʼã pláncha che raʼy Omni pópe, ojegueraha hag̃ua che rukuéra rembipotáicha.