1 Koʼág̃a umi lamanita-kuéra ohovaʼekue ñorairõguasúpe nefita-kuéra rehe ohechávo, heta oñehaʼã rire ohundi hag̃ua chupekuéra, oñehaʼãreiha hikuái, ohojey hikuái Nefi retãme.

2 Ha ojehu amalekita-kuéra, umi oñehundivaʼekue ijapytepekuéra rupi, henyhẽ pochýgui. Ha ohechávo hikuái ndaikatuiha oñevenga nefita-kuérare, oñepyrũ omokyreʼỹ tavayguakuérape pochýpe ijoykeʼykuéra, Anti-nefi-lehi tavayguakuéra rehe; upévare haʼekuéra oñepyrũ ohundijey chupekuéra.

3 Koʼág̃a ko tavayguakuéra ndojagarraséi jey umi árma, ha ojejukauka hikuái ihayhuʼỹhakuéra oipotaháicha.

4 Koʼág̃a Ammón ha ijoykeʼykuéra ohechávo ko ñehundi rembiapo umi ohayhuetéva apytépe, ha umi ohayhuetevaʼekue chupekuéra apytépe—ojapógui hendivekuéra haʼeramoguáicha hikuái ángel Tupã ombouvaʼekue oipeʼa hag̃ua chupekuéra peteĩ ñehundi opaveʼỹvagui—upévare, Ammón ha ijoykeʼykuéra ohechávo ko ñehundi guasu rembiapo, oñemovã hikuái poriahuverekópe, ha heʼi hikuái upe rréipe:

5 Ñambyaty ko Ñandejára tavayguakuérape, ha jaguejy Zarahemla retãme ñande joykeʼykuéra nefita-kuérape, ha ñañani ñande rayhuʼỹhakuéra pógui, ani hag̃ua ñañehundi.

6 Ha katu upe rréi heʼi chupekuéra: Péina ápe, nefita-kuéra ñanerundíta, heta jejuka ha angaipakuéra jajapovaʼekuére hesekuéra.

7 Ha Ammón heʼi: Che aháta ha aporandúta Ñandejárape, ha haʼe heʼíramo ñandéve jaha hag̃ua ñande joykeʼykuérape, pehótapa peẽ?

8 Ha pe rréi heʼi chupe: Heẽ, Ñandejára heʼíramo oréve roho hag̃ua, ore rohóta ore joykeʼykuéra oĩháme, ha haʼéta hembiguaikuéra roñemoĩporã meve hendivekuéra umi heta jejuka ha angaipa rojapovaʼekuére hesekuéra.

9 Ha katu Ammón heʼi chupe: Oñemoĩ niko ñande joykeʼykuéra léi rehe, oñemoĩvaʼekue che ru rehe, toĩ oimeháichagua tembiguái ijapytepekuéra; upévare jaguejy ha jajerovia ñande joykeʼykuéra poriahuvereko rehe.

10 Ha katu pe rréi heʼi chupe: Eporandu Ñandejárape, ha haʼe heʼíramo oréve roho hag̃ua, rohóta; ndaupéichairamo romanóta upe tetãme.

11 Ha ojehu Ammón oho ha oporandu Ñandejárape, ha Ñandejára heʼi chupe:

12 Eguenohẽ ko tavayguakuérape ko tetãgui, ani hag̃ua omano; Satana oguerekógui tuicha puʼaka amalekita-kuéra korasõ ári, omokyreʼỹva lamanita-kuérape pochýpe ijoykeʼykuéra rehe ojuka hag̃ua chupekuéra; upévare esẽ ko tetãgui; ha ojehovasapýva ko tavayguakuéra ko ñemoñaremegua, che añongatútagui chupekuéra.

13 Ha koʼág̃a ojehu Ammón oho ha heʼi upe rréipe opa ñeʼẽ Ñandejára heʼivaʼekue chupe.

14 Ha ombyaty hikuái opa itavayguakuérape, heẽ, opa Ñandejára tavayguakuérape, ha ombyaty hikuái opa ivaka ha ovechaʼatykuéra, ha osẽ hikuái upe tetãgui, ha og̃uahẽ hikuái taveʼỹme ombojaʼóva Nefi retã Zarahemla retãgui, ha og̃uahẽ hikuái pe tetã rembeʼýpe.

15 Ha ojehu Ammón heʼi chupekuéra: Péina ápe, che ha che joykeʼykuéra rohóta Zarahemla retãme, ha peẽ pepytáta koʼápe ore rojujey peve; ha roipyʼaraʼãta ore joykeʼykuéra korasõ, rohecha hag̃ua ohejátapa hikuái peike hetãmekuéra.

16 Ha ojehu Ammón oguata jave pe tetãre, haʼe ha ijoykeʼykuéra ojuhu Alma-pe, upe tendápe oñeñeʼẽvaʼekuére; ha péina ápe, haʼe peteĩ jejuhu vyʼapavẽme.

17 Koʼág̃a Ammón vyʼa tuichaiterei jepe omyenyhẽ peve chupe; heẽ, henyhẽ Itupã vyʼágui, jepe ikangypa peve chugui imbarete; ha hoʼa jey yvýpe.

18 Koʼág̃a ndahaʼéi piko kóva peteĩ vyʼaguasuete? Péina ápe, kóva haʼe peteĩ vyʼa avave ndohupytýiva ndahaʼéiramo pe oñembyasy añetéva ha ñemomirĩme ohekáva vyʼapavẽ.

19 Koʼág̃a Alma vyʼa ojuhúvo ijoykeʼykuérape añetehápe tuichákuri, ha avei Aarón vyʼa, ha Omner, ha Himni; ha katu péina ápe ivyʼa ndoguerohasái imbarete.

20 Ha koʼág̃a ojehu Alma ogueraha jey ijoykeʼykuérape Zarahemla retãme; jepe hogaite peve. Ha oho hikuái ha omombeʼu pe hue guasúpe opa mbaʼe ojehuvaʼekue chupekuéra Nefi retãme, ijoykeʼykuéra, lamanita-kuéra apytépe.

21 Ha ojehu pe hue guasu omondo peteĩ momarandu opa upe tetã jerére, oikuaaségui mbaʼépa haʼe tavayguakuéra ñeʼẽ pe ijoykeʼykuéra, haʼéva Anti-nefi-lehi tavayguakuéra, ñemoinge rehe.

22 Ha ojehu tavayguakuéra ñeʼẽ ou, heʼívo: Péina ápe, ñameʼẽta Jersón retã, oĩva kuarahyresẽme pe yguasu ypýpe, ha oñembojáva pe Abundancia retãre, ha oĩva Abundancia súrpe, ha ko Jersón retã haʼe ñameʼẽtava ñande joykeʼykuérape ijyvy jehejapyrerã.

23 Ha péina ápe, ñamoĩta ñande ehersitokuéra Jersón retã ha Nefi retã mbytépe, ñamoʼã hag̃ua ñande joykeʼykuérape Jersón retãme; ha jajapo koʼãva ñande joykeʼykuéra rehe, okyhyjégui hikuái oiporu hag̃ua árma ijoykeʼykuéra rehe ani ojapo hikuái angaipa; ha ko tuicha ikyhyjekuéra oúkuri pe arrepentimiénto pypuku oguerekovaʼekue hikuái rupi, umi heta ijejuka ha tekoñaña vaietégui.

24 Ha koʼág̃a péina ápe, jajapóta koʼãva ñande joykeʼykuérare, ohupyty hag̃ua hikuái Jersón retã; ha ñamoʼãta chupekuéra ihayhuʼỹhakuéragui ñande ehérsito reheve, haʼekuéra omeʼẽtaramo ñandéve peteĩ imbaʼehepykuéra pehẽngue ñanepytyvõ hag̃ua ñande ehersitokuéra ndive.

25 Koʼág̃a, Ammón ohendúvo koʼãva, ohojey Anti-nefi-lehi tavayguakuérape, ha avei Alma oho hendive, pe taveʼỹme, omoĩ haguépe hikuái hogaaokuéra, ha oikuaauka chupekuéra opa koʼã mbaʼe. Ha Alma omombeʼupa avei chupekuéra ikonversiõ, Ammón ha Aarón, ha ijoykeʼykuéra ndive.

26 Ha ojehu upéva ogueru peteĩ vyʼa guasu ijapytepekuéra. Ha oguejy hikuái Jersón retãme, ha ojagarra hikuái upe tetã; ha nefita-kuéra ohenói chupekuéra Ammón tavayguakuéra; upévare ojeikuaa hikuái upéva upe térare upe guive tenonde peve.

27 Ha oĩ hikuái Nefi tavayguakuéra apytépe, ha avei ojeipapa chupekuéra tavayguakuéra haʼéva Tupã tupaopegua apytépe. Ha avei ojeikuaa chupekuéra ipyʼaporãgui Tupã ndive g̃uarã, ha avei yvyporakuéra ndive g̃uarã; haʼégui hikuái heko japuʼỹva ha oĩporãmbáva opa mbaʼépe; ha noñemovãi hikuái ijeroviágui Cristo-re, jepe ipahaite peve.

28 Ha ohecha hikuái tuicha mbaʼevaíramo oñohẽ ijoykeʼykuéra ruguy; ha arakaʼeve ndaikatúi ojegueraha chupekuéra ojarra hag̃ua armakuéra ijoykeʼykuéra rehe, ha ndohechái hikuái ñemano mbaʼevéichagua kyhyje reheve, iñehaʼarõ ha jerovia oguerekóva rupive Cristo ha jeikovejey rehe; upévare, chupekuéra g̃uarã pe ñemano oñembogue pe puʼaka Cristo oguerekóva rupive hiʼári.

29 Upévare, ohasa hikuái ñemano ivaivéva ikatúva ijoykeʼykuéra ojapo hesekuéra, ojagarrarangue kysepuku térã simitárra oikutu hag̃ua chupekuéra.

30 Ha péicha haʼe hikuái peteĩ tavayguakuéra ipyʼaporãva ha ojehayhúva, peteĩ tavayguakuéra ojehechaporãitereíva Ñandejárare.