1 Che raʼy, ehendu che ñeʼẽ; che añeʼẽmeʼẽgui ndéve, neñeʼẽrenduháicha Tupã rembiapoukapykuérare reñakãrapuʼãtaha upe tetãme.

2 Che aipota rejapo pe che ajapo haguéicha, nemanduʼávo ñande rukuéra rekoapytĩre; oĩgui hikuái ñeñapytĩmbýpe, ha avave ndaikatúi oguenohẽ chupekuéra ndahaʼéirõ pe Abraham Tupã añónte, ha Isaac Tupã, ha Jacob Tupã; ha haʼe añetehápe omosãso chupekuéra ijeikoʼasykuérape.

3 Ha koʼág̃a, O che raʼy Helamán, péina ápe, nemitã niko nde, ha upévare, ajerureʼasy ndéve ehendu hag̃ua che ñeʼẽ ha eñehekomboʼe chehegui; che aikuaágui umi omoĩva ijerovia Tupã rehe ojejokotaha ijepyʼapýpe, ha ijejopy, ha ijehasaʼasýpe, ha oñemopuʼãta ára pahápe.

4 Ha che ndaipotái reimoʼã che aikuaaha chejehegui—ndahaʼéi upe yvyʼariguávagui ha katu pe espíritu reheguávagui, ndahaʼéi pe apytuʼũ toʼóvagui ha katu Tupãgui.

5 Koʼág̃a, péina ápe, che haʼe ndéve, nachereñóirire Tupãgui ndaikuaaivaʼerãmoʼã koʼã mbaʼe; ha katu Tupã, hiʼángel juru rupi, oikuaauka chéve koʼã mbaʼe, ndahaʼéi che cherekomarangatúgui;

6 Che aikógui Mosíah raʼykuéra ndive, añehaʼãvo ahundi Tupã tupao; ha katu péina ápe, Tupã ombou hiʼángel marangatu orejoko hag̃ua tapépe.

7 Ha péina ápe, haʼe oñeʼẽ oréve, haʼeramoguáicha arasunu ñeʼẽ, ha opa yvy oryrýi ore py guýpe; ha ore opavave roʼa yvýpe, Ñandejára kyhyje oúgui ore ári.

8 Ha katu péina ápe, pe ñeʼẽ heʼi chéve: Epuʼã. Ha che apuʼã ha añemboʼy, ha ahecha pe ángel.

9 Ha haʼe heʼi chéve: Nde ndejehegui reñehundiséramo, anive reñehaʼã rehundi Tupã tupao.

10 Ha ojehu haʼa pe yvýpe; ha mbohapy ára aja ha mbohapy pyharekue ndaikatúi aipeʼa che juru, ni ndaikatúi amonguʼe che rete.

11 Ha pe ángel heʼive chéve heta mbaʼe, che joykeʼykuéra ohendúva, ha katu che nahendúi umíva; che ahendúvogui umi ñeʼẽ—Nde ndejehegui reñehundiséramo, anive reñehaʼã rehundi Tupã tupao—ajejopy tuichaiterei kyhyje ha ñemondýi reheve peichahágui añehundíramo g̃uarã, ha haʼa yvýpe ha nahenduvéima.

12 Ha katu chejopy peteĩ jehasaʼasy opaveʼỹva, che ánga oĩʼasyetereígui ha ojejopy opa che angaipakuéra rupi.

13 Heẽ, chemanduʼa opa che angaipa ha che rembiapovaikuérare, ha umívare che ajejopy añaretã jehasaʼasy reheve; heẽ, ahecha añemoĩhague che Tupãre, ha nacheñeʼẽrenduihague hembiapoukapykuéra marangatúre.

14 Heẽ, ha che ajukákuri heta itaʼýrape, jaʼeporãsérõ aguerahavaʼekue chupekuéra ñehundípe; heẽ, ha ipahaitépe tuichaiterei che rembiapovaikuéra, ha ajepyʼamongetávo ahajeytaha che Tupã renondépe che ánga ojejopy jaʼekuaaʼỹva kyhyje reheve.

15 O, ajepyʼamongeta, añemosẽ ha añehundírire ánga ha tetépe, ani hag̃ua ajegueraha añemboʼy hag̃ua che Tupã renondépe, ajehusga hag̃ua che rembiapokuére.

16 Ha koʼág̃a, mbohapy ára ha mbohapy pyharekue ajejopy, jepe peteĩ ánga oñekondenáva jehasaʼasy reheve.

17 Ha ojehu péicha ajejopy jave ko jehasaʼasy reheve, chejopývo opa che angaipakuéra ñemomanduʼa, péina ápe, chemanduʼa avei ahenduhague che ru oprofetisáramo tavayguakuérape upe Jesucristo jeju rehe, pe Tupã Raʼy, oexpia hag̃ua yvóra angaipakuérare.

18 Koʼág̃a, amoĩvo che apytuʼũ ko temiandúpe, ajerureʼasy che korasõme: O Jesús, Tupã Raʼy, cheporiahuverekóna, aimégui pe vyʼaʼỹ pahápe, ha ajejokua ñemano sã opaveʼỹvape.

19 Ha koʼág̃a, péina ápe, ajepyʼamongetávo pévare, nachemanduʼavéima che jehasaʼasýre; heẽ, ndachejopyvéima che angaipakuéra ñemomanduʼa.

20 Ha O, mbaʼe vyʼa tuichaite, ha tesape hechapyrãva piko haʼe pe ahecháva; heẽ, che ánga henyhẽ peteĩ vyʼa pahágui haʼe haguéicha che vyʼaʼỹ!

21 Heẽ, che haʼe ndéve, che raʼy, ndaiporihague mbaʼeve imbaretevéva ni irovéva che mbaʼembyasykuéragui. Heẽ, ha avei che haʼe ndéve, che raʼy, ambue hendápe, ndaiporihague mbaʼeve imbaretevéva ha heʼẽvéva haʼe haguéicha che vyʼa.

22 Heẽ, haʼetévaicha chéve ahecha, jepe ñande ru Lehi ohecha haguéicha, Tupã oguapývo ijapykajeguápe, ojerévo hese angelkuéra aty heta, opurahéi ha omomorãva Itupãme; heẽ, ha che ánga oĩseʼasy upépe.

23 Ha katu péina ápe, che rete ohupytyjey imbarete, ha añemboʼy, ha haʼe tavayguakuérape chereñoihague Tupãgui.

24 Heẽ, ha upe ára guive jepeve koʼág̃a peve, ambaʼapo meménte, agueru hag̃ua angakuéra oñearrepenti hag̃ua; agueru hag̃ua chupekuéra oñandu hag̃ua pe vyʼa tuichaite che añanduvaʼekue; heñói hag̃ua avei hikuái Tupãgui, ha henyhẽ hag̃ua pe Espíritu Santo-gui.

25 Heẽ, ha koʼág̃a péina ápe, O che raʼy, Ñandejára omeʼẽ chéve tuichaiterei vyʼa che rembiapokuéra yvágui;

26 Pe ñeʼẽ haʼe oikuaaukavaʼekue chéve rupi, péina ápe, heta heñói Tupãgui, ha oñandu che añandu haguéicha, ha ohechákuri hesa hesaitépe che ahecha haguéicha; upévare haʼekuéra oikuaa koʼã mbaʼe che añeʼẽvaʼekuégui, che aikuaaháicha; ha upe kuaapy aguerekóva ou Tupãgui.

27 Ha ajejokovaʼekue opáichagua jepyʼapy ha jejopýpe, heẽ, ha opáichagua jehasaʼasýpe; heẽ, Tupã chemosãsovaʼekue kaʼirãigui, ha jejokua, ha ñemanógui; heẽ, ha amoĩ che jerovia hese, ha haʼe chemosãsóta gueteri.

28 Ha che aikuaa haʼe chemopuʼãtaha ára pahápe, aiko hag̃ua hendive verapýpe; heẽ, ha che amomorãta chupe tapiaite, oguenohẽgui ñande rukuérape Egipto-gui, ha omoñapymi egipcio-kuérape Mar Rojo-pe; ha ipuʼaka rupi oguerahavaʼekue ñande rukuérape yvy ñeʼẽmeʼẽnguéme; heẽ, ha omosãsovaʼekue chupekuéra ñeñapytĩmby ha tekoʼapytĩgui heta ára.

29 Heẽ, ha oguenohẽvaʼekue avei ñande rukuérape Jerusalén retãgui; ha haʼe avei, ipuʼaka opaveʼỹva rupi, omosãso chupekuéra ñeñapytĩmby ha tekoʼapytĩgui, heta ára, jepe ko ára peve; ha che añongatu meme hekoʼapytĩnguérare momanduʼa; heẽ, ha nde avei nemanduʼavaʼerã hekoʼapytĩ rehe, che ajapo haguéicha.

30 Ha katu péina ápe, che raʼy, ndahaʼéi kóva añónte; nde reikuaavaʼerãgui, che aikuaaháicha, neñeʼẽrenduháicha Tupã rembiapoukapykuérare reñakãrapuʼãta upe tetãme; ha reikuaavaʼerã avei, naneñeʼẽrendúiramo Tupã rembiapoukapykuérare, reñemosẽtaha henondégui. Koʼág̃a kóva haʼe iñeʼẽme heʼiháicha.