1 Péina ápe, koʼág̃a ojehu Ammón tavayguakuéra oñemoĩ rire Jersón retãme, heẽ, ha avei lamanita-kuéra oñemosẽ rire upe tetãgui, ha heʼõnguekuéra oñeñotỹ upe tetãmegua tavayguakuéra rehe—

2 Koʼág̃a ndojeipapái heʼõnguekuéra hetaitereígui; ni umi nefita-kuéra teʼõnguekuéra ndojeipapái—ha katu ojehu oñotỹmba rire hikuái heʼõnguekuéra, ha avei ajúno ára rire, ha tasẽ, ha ñemboʼe, (ha haʼékuri désimo sexto ary huekuéra ñeisambyhýpe Nefi tavayguakuéra ári), oñepyrũ oĩ pyʼaguapy meme opa tetã tuichakue javeve.

3 Heẽ, ha pe tavayguakuéra oñehaʼã iñeʼẽrendu Ñandejára rembiapoukapykuérare; ha ojapo porãmbaite hikuái umi Tupã ordenansakuéra, pe Moisés léipe heʼiháicha; oñemboʼégui chupekuéra iñeʼẽrendu hag̃ua Moisés léire oñekumplipa peve.

4 Ha péicha ndaipórikuri joavy tavayguakuéra apytépe opa désimo sexto ary huekuéra ñeisambyhýpe Nefi tavayguakuéra ári.

5 Ha ojehu oñepyrũvo désimo sétimo ary huekuéra ñeisambyhýpe, oĩkuri pyʼaguapy meme.

6 Ha katu ojehu opávo pe désimo sétimo ary, og̃uahẽ peteĩ kuimbaʼe Zarahemla retãme, ha haʼe peteĩ Anti-Cristo, oñepyrũ haguére omboʼe tavayguakuérape oñemoĩvo umi profesía ojeʼevaʼekue rehe profetakuéra rupi, upe Cristo jeju rehe.

7 Koʼág̃a ndaipórikuri mbaʼevéichagua léi oñemoĩva kuimbaʼe ogueroviávare; oñemoĩhaguére Tupã rembiapoukapýre toĩ peteĩ léi ombojuavýva yvyporakuérape ojuehegui.

8 Péicha heʼígui umi escritura: Eiporavo koʼág̃a mávapepa eipytyvõta.

9 Koʼág̃a peteĩ kuimbaʼe oipytyvõramo Tupãme, ojeheja chupe; térã, ogueroviáramo Tupãme ojeheja chupe oipytyvõ chupe; ha katu ndogueroviáiramo chupe ndaipóri léi ohaviráva upévape.

10 Ha katu haʼe oporojukáramo ojehavira ñemanóme; ha omondáramo ojehavira avei, ha ipokarẽramo ojehavira avei; ha ojapóramo ñemyakãratĩ ojehavira avei; heẽ, opa koʼã tembiapovaíre ojehavira.

11 Oĩgui peteĩ léi opavave yvypóra ojehusgavaʼerãha hembiapovaikuére. Upevére ndaipóri léi yvypóra ogueroviáva rehe g̃uarã; upévare, ojehavira chupe umi tembiapovai ojapovaʼekuérente; upévare, opavave yvypóra oĩ peteĩchaite.

12 Ha ko Anti-Cristo, hérava Korihor (ha pe léi ndaikatúi ojoko chupe), oñepyrũ omboʼe tavayguakuérape ndaiporiha mbaʼevéichagua Cristo. Ha kóicha omboʼevaʼekue heʼívo:

13 O peẽ peiméva peteĩ ñehaʼarõ tavy ha vyrorei poguýpe. Mbaʼére piko pejejoko péichagua mbaʼe tavýpe? Mbaʼére piko pehaʼarõ peteĩ Cristo-pe? Avave yvypóra ikatu oikuaa mbaʼeve pe oútavagui.

14 Péina ápe, koʼã mbaʼe pehenóiva profesía, pejéva omombeʼuha umi proféta marangatu, péina ápe, koʼãva niko haʼe pende rukuéra jepokuaa vyrorei.

15 Mbaʼéicha piko peikuaa añeteguaha? Péina ápe, ndaikatúi peikuaa umi mbaʼe ndapehecháivagui; upévare ndaikatúi peikuaa oĩtaha peteĩ Cristo.

16 Pemaʼẽ umi ouvaʼerã rehe ha peje pehechaha pene angaipa jora. Ha katu péina ápe, péva haʼe peteĩ apytuʼũ oĩvaíva rembiapokue, ha ko apytuʼũ ñeimevai ou pende rukuéra jepokuaa rupi, pendegueraháva peguerovia hag̃ua umi mbaʼe ndaipóriva.

17 Ha hetave péichagua mbaʼe oñeʼẽ chupekuéra, heʼívo chupekuéra ndaikatuiha ojejapo mbaʼevéichagua expiasiõ yvyporakuéra angaipáre, ha katu kóva ko tekovépe oñemeʼẽ opavavépe ikatupyry rupi; upévare opa yvypóra oñakãrapuʼã ikatupyry rupi, ha opa yvypóra ohupyty imbarete rupi; ha ndahaʼeiha mbaʼeve ivaíva peteĩ yvypóra ojapóramo ojaposéva.

18 Ha péicha haʼe omboʼe chupekuéra, ombojerévo heta korasõ, omokyreʼỹvo oñakãrapuʼã hag̃ua hembiapoñañáme; heẽ, omokyreʼỹvo heta kuña, ha avei kuimbaʼépe, ojapo hag̃ua tembiapokyʼa—heʼívo chupekuéra yvypóra omano vove, upépe opaha upéva.

19 Koʼág̃a ko kuimbaʼe oho avei Jersón retãme, omboʼe hag̃ua koʼã mbaʼe Ammón tavayguakuéra apytépe, peteĩ ára haʼevaʼekue lamanita-kuéra tavayguakuéra.

20 Ha katu péina ápe koʼãva iñaranduve heta nefita-kuéragui; ojagarra, ha ojokua, ha oguerahágui hikuái chupe Ammón renondépe, haʼéva peteĩ sumo sacerdote upe tavayguakuéra ári.

21 Ha ojehu omosẽuka chupe upe tetãgui. Ha og̃uahẽ Gedeón retãme, ha oñepyrũ omboʼe avei chupekuéra; ha péina ápe haʼe ndaipoʼái upépe, ojagarrágui ha ojokua chupe hikuái ha ogueraha pe sumo sacerdote renondépe, ha avei pe hue guasu upe tetãme ári renondépe.

22 Ha ojehu pe sumo sacerdote heʼi chupe: Mbaʼére piko reiko rembyai hína Ñandejára rape? Mbaʼére piko remboʼe ko tavayguakuérape ndaiporimoʼãiha Cristo, rembyai hag̃ua ivyʼakuéra? Mbaʼére piko reñeʼẽvai opa proféta marangatu profesiakuéra rehe?

23 Koʼág̃a pe sumo sacerdote réra haʼe Giddona. Ha Korihor heʼi chupe: Namboʼéi haguére pende rukuéra jepokuaa vyrorei, ha che namboʼéi haguére ko tavayguakuérape oñemoĩ hag̃ua umi ordenánsa vyrorei poguýpe, ha jepokuaa omoĩvaʼekue sacerdote-kuéra ymaguare, ohupyty hag̃ua puʼaka ha autorida hiʼarikuéra, oguereko hag̃ua chupekuéra jeikuaaʼỹme, ani hag̃ua omopuʼã hikuái iñakã, ha katu oñemotindy hag̃ua hikuái ne ñeʼẽ heʼiháicha.

24 Peje kóva haʼeha peteĩ tavayguakuéra isãsóva. Péina ápe, che haʼe peẽme oĩha hikuái ñeñapytĩmbýpe. Peje umi profesía ymaguare añeteguaha. Péina ápe, che haʼe peẽme ndapeikuaaiha añeteguápa.

25 Peje kóva haʼeha peteĩ tavayguakuéra hembiapovaíva ha hoʼáva, peteĩ túva rembiapovai rupi. Péina ápe, che haʼe peẽme peteĩ mitã ndahaʼéi hembiapovaíva ituvakuéra rupi.

26 Ha avei peje Cristo outaha. Ha katu péina ápe, che haʼe peẽme ndapeikuaaiha oĩtapa peteĩ Cristo. Ha avei peje haʼe ojejukataha yvóra angaipa rehe—

27 Ha péicha pegueraha ko tavayguakuérape pende rukuéra jepokuaa vyrorei rapykuéri, ha peẽ peipotaháicha; ha pejopy chupekuéra, jepe ñeñapytĩmeguáicha, peñemyenyhẽ hag̃ua ipokuéra rembiapógui, upévare noñanimái omopuʼã hikuái hesa kyhyjeʼỹme, ha noñanimái ovyʼa hikuái iderécho ha imbaʼéva reheve.

28 Heẽ, noñanimái hikuái oiporu pe imbaʼéva ani ombopochy hikuái isacerdotekuérape, ojopýva chupekuéra jejokuápe oipotaháicha, ha ogueroviakavaʼekue chupekuéra, ijepokuaa ha ikerarecha rupi, ha ipotapy ha techauka ha mbaʼeñemimby añeteʼỹva rupi, ndojapóiramo hikuái iñeʼẽme heʼiháicha, ombopochytaha peteĩ tekove ojeikuaaʼỹvape, heʼíva hikuái haʼeha Tupã—peteĩ tekove arakaʼeve ndojehechái ni ndojeikuaáiva, arakaʼeve ndaipóriva ni ndaiporimoʼãiva.

29 Koʼág̃a pe sumo sacerdote ha hue guasu ohechávo ikorasõ atãha, heẽ, ohechávo oñeʼẽvaiha Tupã rehe jepeve, nombohovaiséi iñeʼẽ; ha katu ojokuauka hikuái chupe; ha omeʼẽ hikuái chupe tendotakuéra pópe, ha omondo hikuái chupe Zarahemla retãme, upépe oñemoĩ hag̃ua Alma renondépe, ha umi hue guasu renondépe oisãmbyhýva opa upe tetã ári.

30 Ha ojehu ojeguerahávo chupe Alma ha pe hue guasu renondépe, oñeʼẽ haʼe oñeʼẽ haguéicha Gedeón retãme; heẽ, ohovénte oñemotieʼỹ meve.

31 Ha oñepyrũ oñeʼẽ hatã Alma redondépe, ha oñeʼẽvai sacerdote ha mboʼeharakuérare, heʼívo hesekuéra omovãha tavayguakuérape ituvakuéra jepokuaa vyrorei rapykuéri, oñemyenyhẽ hag̃ua hikuái tavayguakuéra rembiapo reheve.

32 Koʼág̃a, Alma heʼi chupe: Nde reikuaa ore noroñemyenyhẽiha ko tavayguakuéra rembiapo reheve; ha péina ápe, che ambaʼapókuri huekuéra ñeisãmbyhy ñepyrũmby guive koʼág̃a peve, che po rupiete akaru hag̃ua, jepe heta che jeʼói upe tetã tuichakue jave amboʼe hag̃ua Tupã ñeʼẽ ko tavayguakuérape.

33 Ha jepe umi heta tembiapo ajapovaʼekue pe tupaópe, che arakaʼeve ndahupytýiva ni peteĩ seníne che rembiapokuére; ni avave che joykeʼykuéra, ndahaʼéiramo aguapy jave pe huekuéra apykápe; ha upéicharõ ojehepymeʼẽkuri oréve ára rombaʼapo haguérente léipe heʼiháicha.

34 Ha koʼág̃a, ndorohupytýirõ mbaʼeve ore rembiapo tupaopegua rehe, mbaʼe porã piko oréve g̃uarã rombaʼapo pe tupaópe ndahaʼéiramo romboʼe hag̃ua pe añetegua, rovyʼa hag̃ua ore joykeʼykuéra vyʼápe?

35 Mbaʼére piko ere romboʼeha ko tavayguakuérape rohupyty hag̃ua jehepymeʼẽ, nde ndejehegui, reikuaávo noñemeʼẽiha oréve mbaʼeve? Ha koʼág̃a, reguerovia piko nde rombotavyha ko tavayguakuérape, ha péva ogueruha tuichaite vyʼa ikorasõkuérape?

36 Ha Korihor ombohovái chupe, Heẽ.

37 Ha upéramo Alma heʼi chupe: Eguerovia piko nde oĩha peteĩ Tupã?

38 Ha haʼe ombohovái, Nahániri.

39 Koʼág̃a Alma heʼi chupe: Renega jeýta piko oĩha peteĩ Tupã, ha avei renegáta piko pe Cristo-pe? Péina ápe, che haʼégui ndéve, che aikuaa oĩha peteĩ Tupã, ha avei Cristo outaha.

40 Ha koʼág̃a eguerekópa mbaʼérepa ere hag̃ua ndaiporiha Tupã, térã Cristo ndoumoʼãiha? Che haʼe ndéve ndereguerekoiha mbaʼeve, ndahaʼéiramo ne ñeʼẽ añónte.

41 Ha katu, péina ápe, che aguereko opa mbaʼe testimónioramo koʼã mbaʼe añeteguaha; ha avei nde reguereko opa mbaʼe testimónioramo ndéve g̃uarã koʼãva haʼeha añetegua; ha renegáta piko umíva? Eguerovia piko koʼã mbaʼe añeteguaha?

42 Péina ápe, che aikuaa regueroviaha, ha katu ndejagarra peteĩ espíritu japu rehegua, ha remombo Tupã Espíritu ndaikatuvéi peve oike ndepype; ha katu aña ipuʼaka nderehe, ha ndegueraha peteĩ ha ambue hendápe, rejapóvo ñuhã haʼe ohundi hag̃ua Tupã raʼykuérape.

43 Ha koʼág̃a Korihor heʼi Alma-pe: Rehechaukáramo chéve peteĩ techauka, añekonvense hag̃ua oĩha peteĩ Tupã, heẽ, ehechauka chéve haʼe oguerekoha puʼaka, ha upéramo añekonvenséta ne ñeʼẽ añeteguaha.

44 Ha katu Alma heʼi chupe: Eguerekómakuri heta techauka; eipyʼaraʼãse piko nde Tupãme? Eréta, piko ehechauka chéve peteĩ techauka, reguerekómarõ opa nde joykeʼykuéra testimónio, ha avei opa proféta marangatukuéra testimónio? Escritura-kuéra oĩ nerenondépe, heẽ, ha opa mbaʼe ohechauka oĩha peteĩ Tupã; heẽ, jepe upe yvy ha opa mbaʼe oĩva hiʼári, heẽ, ha iñemonguʼe, heẽ, ha avei opa planéta oñemonguʼéva oñemoĩ haguéicha otestifika oĩha peteĩ Apohare Ipuʼakapáva.

45 Ha jepe koʼãva reiko upérupi, removãvo ko tavayguakuéra korasõ, etestifikávo ndaiporiha peteĩ Tupã? Ha renegáta gueteri piko opa koʼã testimónio jepe? Ha haʼe heʼi: Heẽ, che anegáta, nderehechaukáiramo chéve peteĩ techauka.

46 Ha koʼág̃a ojehu Alma heʼi chupe: Péina ápe, che ajejopy ne korasõ atãre, heẽ, reñemoĩségui gueteri pe espíritu añeteguáva rehe, oñehundi hag̃ua ne ánga.

47 Ha katu péina ápe, iporãve ne ánga oñehundi haʼerangue tembiporu egueraha hag̃ua heta ángape ñehundípe, ndejapu ha neñeʼẽrei rupi; upévare renega jeýramo, péina ápe Tupã ndeipyʼajopýta repyta hag̃ua ñeʼẽngu, anive hag̃ua arakaʼeve reipeʼa nde juru, rembotavy hag̃ua ko tavayguakuérape.

48 Koʼág̃a Korihor heʼi chupe: Che nanegái Tupã oikoveha, ha katu ndagueroviái oĩha peteĩ Tupã; ha che haʼe avei, nde ndereikuaaiha oĩha peteĩ Tupã; ha nderehechaukáiramo chéve peteĩ techaukaha che ndagueroviamoʼãi.

49 Koʼág̃a Alma heʼi chupe: Kóva ameʼẽta ndéve techaukaháramo, epytáta reñeʼẽʼỹre, che añeʼẽ haguéicha; ha che haʼe, Tupã rérape repytataha ñeʼẽngu, upéicha ndaikatumoʼãvéima reñeʼẽ.

50 Koʼág̃a Alma heʼi vove koʼã ñeʼẽ, Korihor opyta iñeʼẽngu, ha ndaikatuvéima oñeʼẽ, Alma heʼi haguéicha.

51 Ha koʼág̃a pe hue guasu ohechávo upéva, oipyso ipo ha ohai Korihor-pe, heʼívo: Reñekonvensémapa Tupã puʼakágui? Mávare piko reipota Alma ohechauka ndéve pe techauka? Reipota piko ombohasaʼasy ambuépe, ohechauka hag̃ua ndéve peteĩ techauka? Péina ápe, haʼe ohechaukáma ndéve peteĩ techauka; ha koʼág̃a reñorairõvéta gueteri piko?

52 Ha Korihor oipyso ipo ha ohai, heʼívo: Che aikuaa ndaikatuiha añeʼẽ ndaikatúigui haʼe mbaʼeve; ha aikuaa mbaʼeve ndahaʼéiramo Tupã puʼaka añónte ikatuha ogueru koʼãva che ári; heẽ, ha che tapiaite aikuaákuri oĩha peteĩ Tupã.

53 Ha katu péina ápe, chembotavy pe aña; ojehechaukágui chéve haʼeramoguáicha peteĩ ángel, ha heʼi chéve: Tereho ha egueru ko tavayguakuérape, haʼekuéra oñemovãgui peteĩ Tupã ojeikuaaʼỹva rapykuéri. Ha haʼe heʼi chéve: Ndaipóri peteĩ Tupã; heẽ, ha chemboʼe pe haʼevaʼerã. Ha amboʼékuri iñeʼẽ; ha amboʼékuri chupekuéra oguerohorýgui hikuái pe apytuʼũ toʼo reheguáva; ha amboʼékuri chupekuéra, jepe ahupyty peve heta poʼa, tuichaiterei, aguerovia peve umíva añeteguaha; ha pévare añemoĩ añetegua rehe; jepe agueru peve ko tuichaite ñeʼẽngái che ári.

54 Koʼág̃a heʼívo koʼãva, haʼe ojerureʼasy Alma oñemboʼe hag̃ua Tupãme, ojeipeʼa hag̃ua chugui pe ñeʼẽngái.

55 Ha katu Alma heʼi chupe: Ojepeʼáramo ndehegui ko ñeʼẽngái reñepyrũ jeýta removã ko tavayguakuéra korasõ; upévare, tojejapo nendive Ñandejára oipotaháicha.

56 Ha ojehu pe ñeʼẽngái ndojeipeʼái Korihor-gui, ha katu oñemosẽ okápe, ha oiko peteĩgui ambue ógape ojerurévo hembiʼurã.

57 Koʼág̃a ojeikuaauka opa tetãme pe mbaʼe ojehuvaʼekue Korihor-pe; heẽ, pe hue guasu omondo momarandu opa tavayguakuéra upe tetãguápe, omombeʼúvo umi ogueroviavaʼekue Korihor ñeʼẽme oñearrepentivaʼerãha pyaʼe, ani ou hiʼarikuéra upeichagua huísio.

58 Ha ojehu opavave oñekonvense Korihor rembiapoñañágui; upévare opavave oñekonverti jey Ñandejára-pe; ha kóva ombopaha tembiapovai Korihor omoĩvaʼekue. Ha Korihor oho peteĩgui ambue ógape, ojerurévo tembiʼu okaru hag̃ua.

59 Ha ojehu oho jave tavayguakuéra apytépe, heẽ, umi ojeivaʼekue nefita-kuéra apytégui ndive ha ojagarravaʼekue herarã zoramita, ojeguerahakágui peteĩ kuimbaʼe hérava Zoram-re—ha oho jave ijapytepekuéra, péina ápe, oity ha opyrũmba hese hikuái, jepe omano meve.

60 Ha péicha jahecha mbaʼéichapa opa pe ombyaíva Ñandejára rape; ha péicha jahecha aña nomoʼãmoʼãiha taʼyrakuérape ára pahápe, ha katu ombotyryry chupekuéra pyaʼe pe añaretãme.