1 Koʼág̃a che raʼy, péina ápe peteĩ mbaʼe haʼesevéva ndéve; ahechágui ne apytuʼũ ojepyʼapyha umi omanovaʼekue jeikovejey rehe.

2 Péina ápe, che haʼe ndéve, ndaiporiha jeikovejey—térã, ambue ñeʼẽme, haʼese, ko omanokuaáva noñemoĩmoʼãi ñemanoveʼỹramo, ko ñembyai noñemoĩmoʼãi ñembyaiʼỹramo—ndahaʼéiramo Cristo jeju rire peve.

3 Péina ápe, haʼe ojapo omanovaʼekue jeikovejey. Ha katu péina ápe, che raʼy, pe jeikovejey neʼĩra gueteri og̃uahẽ. Koʼág̃a, aikuaaukáta ndéve peteĩ mbaʼeñemimby; upevére, oĩ heta mbaʼeñemimby oñeñomíva, avave ndoikuaáiva ndahaʼéirõ Tupã añónte. Ha katu ahechauka ndéve peteĩ mbaʼe aporanduvaʼekue jesarekópe Tupãme aikuaa hag̃ua—pe jeikovejey rehegua.

4 Péina ápe, oñemoĩvaʼekue peteĩ ára opavave opuʼãvaʼerãhápe omanovaʼekue apytégui. Koʼág̃a, arakaʼépa oúta ko ára avave ndoikuaái; ha katu Tupã oikuaa upe ára oñemoĩvaʼekue.

5 Koʼág̃a, oĩtapa peteĩha, térã mokõiha, térã mbohapyha ára yvyporakuéra opuʼãtaha omanovaʼekue apytégui, ndahaʼéi mbaʼeve; Tupã oikuaapágui opa mbaʼe; ha iporãntema chéve aikuaa upeichataha—oĩha peteĩ ára oñemoĩvaʼekue opavave opuʼãtaha omanovaʼekue apytégui.

6 Koʼág̃a, oĩmantevaʼerã peteĩ paʼũ pe ára oñemanoha ha pe ára ojeikovejeyha mbytépe.

7 Ha koʼág̃a che aporanduse mbaʼépa oiko yvyporakuéra ángagui ko ára ñemanoha guive pe ára oñemoĩvaʼekue ojeikovejey hag̃ua peve?

8 Koʼág̃a, ndahaʼéi mbaʼeve oĩvéramo peteĩ áragui oñemoĩvaʼekue yvyporakuéra oikovejey hag̃ua; ndaʼopavavéi omanógui peteĩ ára jave, ha péva ndahaʼéi mbaʼeve; opa mbaʼe haʼe peteĩ árante Tupãme g̃uarã, ha yvypórape g̃uarãnte ojeipapa ára.

9 Upévare, oñemoĩvaʼekue yvyporakuérape peteĩ ára oikovejey hag̃ua omanovaʼekue apytégui; ha oĩ peteĩ paʼũ pe ára ñemanoha ha pe jeikovejeyha mbytépe. Ha koʼág̃a, ko ára paʼũ rehe, mbaʼépa oiko yvyporakuéra ángagui, haʼe pe mbaʼe aporanduvaʼekue jesarekópe Ñandejárape aikuaa hag̃ua, ha péva haʼe pe mbaʼe che aikuaáva.

10 Ha og̃uahẽ vove ára opavave opuʼãjeyha, upéramo oikuaáta hikuái Tupã oikuaaha opa ára oñemoĩvaʼekue yvypórape.

11 Koʼág̃a, pe ánga ñeime rehegua pe ñemano ha jeikovejey paʼũme—péina ápe, ojeikuaauka chéve peteĩ ángel rupive, opa yvyporakuéra espíritu, ojeívo ko tete omanokuaávagui, heẽ, opa yvypóra espíritu, tahaʼe hekoporã térã hekoñañáva, ojeguerahajey upe Tupãme omeʼẽvaʼekue chupekuéra tekove.

12 Ha upérõ ojehúta, umi hekojojavaʼekue espíritu oñemog̃uahẽta peteĩ vyʼa ñeimépe, hérava paraíso, peteĩ pytuʼu ñeimépe, peteĩ ñeime pyʼaguapýpe, opytuʼutahápe hikuái opa ijehasaʼasy ha jepyʼapy, ha vyʼaʼỹgui.

13 Ha upéramo ojehúta, umi iñañáva espíritu, heẽ, umi hiʼañáva—péina ápe, ndoguerekói hikuái pe Ñandejára Espíritugui tenda ni pehẽngue; péina ápe, oiporavo haguére hikuái tembiapo ñaña iporãvarangue; upévare pe aña espíritu oike ipypekuéra, ha oñemombaʼe hogakuérare—ha koʼãva oñemosẽta ypytũ okapeguápe; oĩta tasẽ, ha pyahẽvai, ha tãi ñembopu, ha kóva hembiapovaikuéra rupi, ojeguerahágui chupekuéra ñeñapytĩmbýpe aña oipotaháicha.

14 Koʼág̃a péva haʼe umi iñañáva angakuéra ñeime, heẽ, pytũmbýpe, ha peteĩ ñeimevai, ha ñanemongyhyjéva ñehaʼaharõme pe Tupã pochy hendypáva ou hiʼarikuéra; ha péicha opyta hikuái ko ñeimépe, umi hekojojáva oĩháicha upe paraísope, ára oikovejey peve hikuái.

15 Koʼág̃a, oĩ oimoʼãva ko vyʼápe ñeime ha pe ánga tekoʼasýpe ñeime, jeikovejey mboyve, haʼeha upe peteĩha jeikovejey. Heẽ, che haʼe ikatuha oñehenói upévape peteĩ jeikovejey, ko espíritu térã ánga ñemopuʼã, ha iñemoĩ vyʼa térã tekoʼasýpe, umi ñeʼẽ ojeʼevaʼekuépe heʼiháicha.

16 Ha péina ápe, ojeʼevaʼekue avei, oĩha jeikovejey peteĩha, peteĩ jeikovejey opa umi oĩvaʼekue, oĩva, térã oĩtavagui, Cristo oikovejey peve omanovaʼekue apytégui.

17 Koʼág̃a, nañaimoʼãi ñande ko jeikovejey peteĩha, oñeñeʼẽ haguégui péicha, haʼeha pe angakuéra jeikovejey ha iñemohenda vyʼa térã tekoʼasýpe. Ndaikatúi reimoʼã kóva heʼiseha.

18 Péina ápe, che haʼe ndéve, Nahániri; ha katu heʼise ánga ha rete ñembojoaju, umi oikovevaʼekue Adán ára guive Cristo jeikovejey peve.

19 Ha katu umi ánga ha retekuéra oñeñeʼẽhague hína oñembojoajupataha peteĩ jave, iñaña térã hekojojáva, che ndaʼéi; iporãntema chéve haʼe opavave opuʼãtaha; térã ambue ñeʼẽme, ijeikovejeykuéra oikotaha umi omanótava Cristo jeikovejey rire mboyve.

20 Koʼág̃a, che raʼy, ndaʼéi ijeikovejeykuéra ouha Cristo jeikovejeýpe; ha katu, haʼe chejehegui, umi hekojojáva ánga ha rete oñembojoajutaha, ára Cristo oikovejey vove, ha ojupi vove yvágape.

21 Ha katu upévapa oikóta ára haʼe oikovejey vove térã upe rire, upéva che ndaʼéi, ha katu che haʼe, oĩha peteĩ paʼũ pe tete ñemano ha jeikovejey mbytépe, ha peteĩ ánga ñeime vyʼa térã tekoʼasýpe upe ára peve Tupã omoĩvaʼekue opuʼã hag̃ua hikuái omanovaʼekue apytégui, ha ojoaju hag̃ua, pe ánga ha tete, ha ojegueraha oñemboʼy hag̃ua Tupã renondépe, ha ojehusga hag̃ua hembiapokuérare.

22 Heẽ, kóva rupi ojejapo umi mbaʼe ñemoĩjey ojeʼevaʼekue profetakuéra juru rupive.

23 Pe ánga oñemoĩjeýta tetépe, ha pe tete ángape; heẽ, ha opa tete pehẽngue ha kangue ojoajuha oñemoĩjeýta hetépe; heẽ, ni peteĩ akãrague nokañymoʼãi akãgui; ha katu opa mbaʼe oñemoĩporãmbajeýta koʼág̃a oĩháicha.

24 Ha koʼág̃a, che raʼy, kóva haʼe pe ñemoĩjey oñemombeʼuvaʼekue profetakuéra juru rupive—

25 Ha upéramo umi hekojojáva omimbíta Tupã rréinope.

26 Ha katu péina ápe, peteĩ ñemanovaite ou umi iñañávape; omanógui hikuái umi mbaʼe haʼéva tekojoja reheguápe; ikyʼágui hikuái, ha mbaʼeve ikyʼáva ndaikatúi ohupyty pe Tupã rréino; ha katu oñemosẽ hikuái okápe, ha oñemoĩ ohupyty hag̃ua ojapovaʼekue térã hembiapokuéra yva, ivaivaʼekue; ha hoyʼu hikuái peteĩ káli iróva ratykue.