1 Péina ápe, koʼág̃a ojehu Moroni omondo riremi ikuatiañeʼẽ upe tetã oisãmbyhývape, oñemog̃uahẽ chupe peteĩ kuatiañeʼẽ Pahorán-gui, haʼéva upe sãmbyhyhára. Ha koʼãva haʼe ñeʼẽ oñemog̃uahẽvaʼekue chupe:

2 Che, Pahorán, ko tetã sãmbyhyhára, amondo koʼã ñeʼẽ Moroni-pe, mburuvicha guasu pe ehérsito ári. Péina ápe, che haʼe ndéve, Moroni, ndavyʼaiha pende jehasaʼasy tuicha rehe, heẽ, koʼãva ojopy che ánga.

3 Ha katu péina ápe, oĩ ovyʼáva pende jehasaʼasýre, heẽ, opuʼã jepe hikuái cherehe, ha avei che tavayguakuéra isãsoséva rehe, heẽ, ha umi opuʼãvaʼekue hetaiterei hikuái.

4 Ha haʼe umi oipeʼasevaʼekue chehegui pe huekuéra apyka oguerúva ko tembiapovai tuichaite; oiporúgui hikuái heta ñembojuruheʼẽ, ha ombojere heta tavayguakuéra korasõ, oguerútava tuicha jeikoʼasy ñande apytépe; haʼekuéra ojokókuri ñande hiʼupy, ha ojokókuri umi isãsosévape ani hag̃ua oho pene rendápe.

5 Ha péina ápe, chembojevy hikuái henonderãkuéra, ha akañýkuri Gedeón retãme, opa kuimbaʼe reheve ikatúva ambyaty chendive.

6 Ha péina ápe, che amondókuri peteĩ momarandu opa tendápe ko tetãme; ha péina ápe, ojoaju hína hikuái orendive opa ára, ojagarrávo umi árma, omoʼã hag̃ua hetã ha isãso, ha ovenga hag̃ua jejahéi ojejapovaʼekue orerehe.

7 Ha oúkuri hikuái oréve, upéicha rupi umi opuʼãvaʼekue orerehe ñemoĩme ojehechavai, heẽ, okyhyje peve hikuái orehegui, ha noñanimái hikuái ou ñorairõme orerehe.

8 Ojagarrákuri hikuái upe tetã, térã Zarahemla tavaguasu; ohenói hikuái irreirã, ha upéva ohaíkuri lamanita-kuéra rréipe, ha ojapókuri hendive peteĩ ñembojoaju; ha ko ñembojoajúpe heʼíkuri oñongatutaha Zarahemla tavaguasu, ñongatu haʼe oimoʼãva lamanita-kuérape ohupytyukataha umi tetã rembyre, ha haʼe oñehenoitaha rréi ko tavayguakuéra ári lamanita-kuéra ipuʼaka vove hesekuéra.

9 Ha koʼág̃a, reñeʼẽvaíkuri cherehe nde kuatiañeʼẽme, ha katu péva ndahaʼéi mbaʼeve; che ndachepochýi, ha katu avyʼa ne korasõ tuicha haguére. Che, Pahorán, ndaipotái puʼaka, ndahaʼéiramo ajoko hag̃ua huekuéra apyka chembaʼéva añongatu hag̃ua che tavayguakuéra derécho ha hekosãso. Che ánga opyta ñemovãʼỹme upe tekosãso Tupã ñanemosãsovaʼekuépe.

10 Ha koʼág̃a, péina ápe, rogueropuʼakáta pe tekoñaña jepeve tuguy ñeñohẽ meve. Ore noroñohẽivaʼerãmoʼã lamanita-kuéra ruguy opytárire hikuái hetãme.

11 Ore noroñohẽivaʼerãmoʼã ore joykeʼykuéra ruguy nopuʼãirire hikuái ñemoĩme ha ndojagarráirire kysepuku orerehe.

12 Ore roñemoĩvaʼerãmoʼã ñeñapytĩmby júgope Tupã hustísia péicha ojeruréramo, térã haʼe heʼíramo oréve rojapo hag̃ua.

13 Ha katu péina ápe haʼe ndeʼíri oréve roñemoĩ hag̃ua ore rayhuʼỹhakuéra poguýpe, ha katu romoĩ hag̃ua hese ore jerovia, ha haʼe oremosãsotaha.

14 Upévare, che joykeʼy ahayhuetéva, Moroni, jagueropuʼakána pe ñaña, ha ñaña ndaikatúiva jagueropuʼaka ñane ñeʼẽme, heẽ, umi ñepuʼã ha ñesẽicha, jagueropuʼaka ñande kysepukúpe, jajoko hag̃ua ñande rekosãso, javyʼa hag̃ua upe ñande tupao ñeimeporã tuichávape, ha ñande Rredentor ha ñane Tupã mbaʼévape.

15 Upévare, eju pyaʼe cherendápe mbovymi kuimbaʼekuéra ndive, ha eheja hembyre Lehi ha Teáncum poguýpe; emeʼẽ chupekuéra puʼaka oisãmbyhy hag̃ua pe ñorairõguasu upéva upe tetã rendápe, Tupã Espíritu heʼiháicha, haʼéva avei pe sãso Espíritu oĩva ipypekuéra.

16 Péina ápe che amondókuri chupekuéra michĩmi hiʼupy, ani omano hikuái ikatu peve eju cherendápe.

17 Embyaty opa soldádo ikatúva reguata aja koʼã gotyo, ha jaha pyaʼéta umi osẽvaʼekue rehe, ñane Tupã mbarete reheve jerovia oĩháicha ñande pype.

18 Ha jajagarráta Zarahemla tavaguasu, jahupytyve hag̃ua tembiʼu ñamondo hag̃ua Lehi ha Teáncum-pe; heẽ, jaháta hesekuéra Ñandejára mbarete reheve, ha ñambopaháta ko tuichaite tembiapovai.

19 Ha koʼág̃a, Moroni, avyʼa oñemog̃uahẽ haguére chéve nde kuatiañeʼẽ, ajepyʼapyʼimíguikuri mbaʼe rojapovaʼerãre, ijojápa rohórõ ore joykeʼykuéra rehe.

20 Ha katu erékuri, noñearrepentíriramo hikuái Ñandejára heʼiha ndéve reho hag̃ua hesekuéra.

21 Eñehaʼã emombarete Lehi ha Teáncum-pe Ñandejárape; ere chupekuéra ani hag̃ua okyhyje, Tupã omosãsótagui chupekuéra, heẽ, ha avei opavave umi opytávape ñemovãʼỹme upe tekosãso Tupã omosãso haguépe chupekuéra. Ha koʼág̃a ambopaha che kuatiañeʼẽ che joykeʼy ahayhuetéva, Moroni-pe.