1 Che raʼy, ehendu che ñeʼẽ, che haʼégui ndéve, jepe haʼe haguéicha Helamán-pe, neñeʼẽrenduháicha Tupã rembiapoukapykuérare reñakãrapuʼãta upe tetãme; ha naneñeʼẽrendúiramo Tupã rembiapoukapykuérare reñemosẽta henondégui.

2 Ha koʼág̃a, che raʼy, ajerovia aguerekotaha tuicha vyʼa nde rupive, neñemovãʼỹ ha ndejeroviarekóre Tupã ndive; ha reñepyrũ haguéicha rejerovia Ñandejára nde Tupã rehe ndepyahu aja, jepe upéicha aipota neñeʼẽrendu rehóvo hembiapoukapykuérare; ojehovasapyrégui upe oñehaʼãmbaitéva ipahaite peve.

3 Che haʼe ndéve, che raʼy, aguerekomahákuri tuicha vyʼa nderehe, nde jeroviareko ha nde jesareko, ha ne ñehaʼarõkuaa ha nde pyʼaporã rupi zoramita-kuéra apytépe.

4 Aikuaágui reimehague jejokuapýpe; heẽ, ha avei aikuaa rejeʼitaʼapihague ñeʼẽ rupi; ha nde regueropuʼakákuri ñehaʼarõkuaa reheve opa koʼã mbaʼe Ñandejára oĩgui nendive; ha koʼág̃a reikuaa Ñandejára nemosãsohague.

5 Ha koʼág̃a che raʼy, Shiblón, aipota nemanduʼa, rejeroviaháicha Tupãre reñemosãsóta ndejepyʼapy, ha jejopy, ha ndejeikoʼasykuéragui, ha reñemopuʼãta ára pahápe.

6 Koʼág̃a, che raʼy, che ndaipotái reimoʼã aikuaaha koʼã mbaʼe chejehegui, ha katu Tupã Espíritu oĩva chepype oikuaauka chéve koʼã mbaʼe; ha nachereñóirire Tupãgui ndaikuaaivaʼerãmoʼã koʼã mbaʼe.

7 Ha katu péina ápe, Ñandejára iporiahuvereko tuichápe ombou hiʼángelpe omombeʼu hag̃ua chéve ambopahavaʼerãha ñehundi rembiapo itavayguakuéra apytépe; heẽ, ha ahechákuri peteĩ ángel che rova renondépe, ha oñeʼẽ chéve, ha iñeʼẽ haʼe arasunúicha, ha omboryrýi opa pe yvy.

8 Ha ojehu mbohapy arakue ha mbohapy pyharekue aimékuri tuichaitereivéva ánga vyʼaʼỹ ha jepyʼapýpe; ha ndahaʼéi, ajerureʼasy peve poriahuverekóre Ñandejára Jesucristo-pe, ahupytýkuri che angaipa jora. Ha katu péina ápe, ajerureʼasy chupe ha ajuhu pyʼaguapy che ángape g̃uarã.

9 Ha koʼág̃a, che raʼy, haʼékuri ndéve kóva reñemoarandu hag̃ua, reikuaa hag̃ua chehegui ndaiporiha ambue mbaʼéichapa ni mbaʼerupive yvypóra ikatuha ojesalva, ndahaʼéiramo Cristo-pe ha hese rupive. Péina ápe, haʼe niko pe yvóra rekove ha resape. Péina ápe, haʼe niko pe ñeʼẽ añetegua ha tekojoja rehegua.

10 Ha koʼág̃a, reñepyrũ haguéicha remboʼe pe ñeʼẽ, péicha aipota remboʼeve rehóvo; ha aipota rejesareko ha neakãguapy opa mbaʼépe.

11 Eñehaʼãke ani eñembotuicha pe orgúllope; heẽ, eñehaʼã ani ejerovia ne arandúre, ni nembareteitereígui.

12 Eiporu pyʼaguasu, ha katu ani ñembotuicha; ha eñehaʼã avei ejejoko opa ne rembipotápe, nerenyhẽ hag̃ua mborayhúgui; eñehaʼã emombia ateʼỹ.

13 Ani reñemboʼe zoramita-kuéraicha, ehechágui haʼekuéra oñemboʼeha oñehenduka hag̃ua yvyporakuérare, ha oñemomorã hag̃ua iñarandu haguére hikuái.

14 Ani ere: O Tupã, che ameʼẽ ndéve aguyje oreporãvégui ore joykeʼykuéragui; ha katu ere: O Ñandejára, eperdona che rembiapovai, ha nemanduʼa che joykeʼykuérare poriahuverekópe—heẽ, ehechakuaa nderekojojaʼỹ Tupã renondépe opa ára.

15 Ha Ñandejára tohovasa ne ánga, ha tanemog̃uahẽ ára pahápe irréinope, eguapy hag̃ua pyʼaguapýpe. Koʼág̃a tereho, che raʼy, ha emboʼe upe ñeʼẽ ko tavayguakuérape. Neakãguapýke. Che raʼy, jajoecha peve.