1 Ha koʼág̃a ojehu pe undésimo jasy desimonovéno arýpe, ára diez jasy jave, ojehecha lamanita-kuéra ehérsito oñemoag̃uiha hína Ammoníah retã gotyo.

2 Ha péina ápe, pe tavaguasu oñemopuʼãjeykuri, ha Moroni omoĩkuri peteĩ ehérsito pe tavaguasu rembeʼy ypýpe, ha omopuʼãkuri hikuái peteĩ moʼãha yvyguigua oñemoʼã hag̃ua hikuái lamanita-kuéra huʼy ha itágui; péina ápe, oñorairõgui hikuái ita ha huʼy reheve.

3 Péina ápe, che haʼékuri Ammoníah tavaguasu oñemopuʼãjey hague. Che haʼe peẽme, heẽ, oñemopuʼãjeyhague peteĩ pehẽngue, ha lamanita-kuéra ohundíguikuri peteĩ árape tavayguakuéra hembiapovai rupi, oimoʼã hikuái haʼejeýta hiʼupy hasyʼỹva chupekuéra g̃uarã.

4 Ha katu péina ápe, tuichaite niko ipoʼaʼỹ; péina ápe, nefita-kuéra omopuʼãguikuri peteĩ moʼãha yvyguigua ijererekuéra, ijyvatetereígui lamanita-kuéra ndaikatúi ojapi porã chupekuéra ijita ha ihuʼykuéra reheve, ni ndaikatúi hoʼa hikuái hiʼarikuéra ndahaʼéirõ pe okẽ rupive.

5 Koʼág̃a ko árape umi lamanita-kuéra mburuvicha guasu omombaʼeguasueterei, nefita-kuéra arandu ombosakoʼi haguére umi henda ñemoʼãha.

6 Koʼág̃a lamanita-kuéra mburuvicha oimoʼãkuri, hetaiterei haguére hikuái, heẽ, oimoʼãkuri horytaha hikuái hoʼávo hiʼarikuéra ojapóma haguéicha; heẽ, ha oñembosakoʼíkuri avei hikuái tetemoʼãha, ha pytiʼamoʼãha reheve; ha oñembosakoʼíkuri avei hikuái ao mymba pirégui reheve; heẽ, ao iñanambusuetereíva omoʼã hag̃ua hete opívo.

7 Ha oñembosakoʼívo hikuái upéicha oimoʼã ndahasymoʼãi chupekuéra ipuʼaka hesekuéra ha ojopytaha ijoykeʼykuérape pe ñeñapytĩmby júgo poguýpe, térã ojukáta ha ojukavaitaha chupekuéra haʼekuéra oipotaháicha.

8 Ha katu péina ápe, omombaʼeguasuve hag̃ua hikuái, haʼekuéra oñembosakoʼíkuri ojotopa hag̃ua hendivekuéra, arakaʼeve ndojeikuaái haguéicha Nefi raʼykuéra apytépe. Koʼág̃a oñembosakoʼíkuri hikuái oñorairõ hag̃ua lamanita-kuéra ndive, Moroni heʼihaguéicha chupekuéra.

9 Ha ojehu lamanita-kuéra, térã amalickiahita-kuéra, omombaʼeguasueterei ohechávo mbaʼéichapa oñembosakoʼi hikuái ñorairõguasurã.

10 Koʼág̃a, pe rréi Amalickíah oguejýrire Nefi retãgui, ijehérsito renonderã, ikatumbaʼékuri ojapo lamanita-kuéra oñemoĩ nefita-kuéra rehe pe Ammoníah retãme; péina ápe, ndahaʼéigui chupe mbaʼeve itavayguakuéra ruguy.

11 Ha katu péina ápe, Amalickíah haʼete ndoʼúi ñorairõme. Ha péina ápe, imburuvicha guasukuéra noñanimái oñemoĩvo nefita-kuérare Ammoníah tavaguasúpe, Moroni omoambuégui umi mbaʼe nefita-kuéra apytépe, upéicha lamanita-kuéra ojecha poʼaʼỹme umi henda ñemoʼãha rupi ha ndaikatúi oñemoĩ hikuái hesekuéra.

12 Upévare oho hikuái pe taveʼỹme, ha omopuʼã hikuái hendag̃ua ha oguata Noé retã gotyo, oimoʼãgui péva haʼeha tenda mokõiha iporãvéva ou hag̃ua hikuái nefita-kuérare.

13 Ndoikuaáigui hikuái Moroni omombaretehague, térã omopuʼãhague tenda ñemoʼãha, opa tavaguasúpe opa tetã jerépe; upévare, oguata hikuái tenonde gotyo Noé retã gotyo peteĩ ñeʼẽme; heẽ, imburuvicha guasukuéra oñemotenonde ha oñeʼẽmeʼẽ ohunditaha tavayguakuéra upe tavaguasuguápe.

14 Ha katu péina ápe, iñemondyirã, pe Noé tavaguasu, haʼevaʼekue peteĩ tenda naimbaretéiva, koʼág̃a, Moroni rupive, oñemombaretékuri, heẽ, jepe imbareteve Ammoníah tavaguasúgui.

15 Ha koʼág̃a, péina ápe, koʼãvape Moroni iñarandúkuri; oimoʼãguikuri oñemondyitaha hikuái Ammoníah tavaguasúpe; ha Noé tavaguasu haʼéguikuri upe mboyve tenda ikangyvéva upe tetãme, upévare oguatákuri hikuái upépe oñorairõ hag̃ua; ha péicha oikókuri haʼe oipota haguéicha.

16 Ha péina ápe, Moroni ohenóikuri Lehi-pe haʼe hag̃ua mburuvicha guasu upe tavaguasupegua kuimbaʼekuéra ári; ha haʼe pe Lehi oñorairõvaʼekue lamanita-kuéra ndive pe yvytypaʼũme ysyry Sidón kuarahyresẽ gotyo.

17 Ha koʼág̃a péina ápe ojehu, lamanita-kuéra ohechávo Lehi oisãmbyhyha pe tavaguasu ojehechajey hikuái poʼaʼỹme, okyhyjetereígui hikuái Lehi-gui; upevére imburuvicha guasukuéra oñeʼẽmeʼẽkuri oñemoĩtaha pe tavaguasu rehe; upévare, ogueru hikuái ijehérsito.

18 Koʼág̃a péina ápe, lamanita-kuéra ndaikatúikuri oike henda moʼãhakuérape ndahaʼéiramo pe okẽ rupi, ijyvatetereígui pe tápia oñemopuʼãvaʼekue, ha pe yvykua pypuku ojejoʼovaʼekue ijerére, pe okẽme añónte nahániri.

19 Ha péicha nefita-kuéra oñembosakoʼíkuri ohundi hag̃ua oimeraẽva oñehaʼãva ojupi oike hag̃ua oimeha rupirei upe tenda moʼãháme, ojapívo chupekuéra ita ha ihuʼýpe.

20 Ha péicha oĩkuri hikuái ñembosakoʼípe, heẽ, peteĩ ikuimbaʼekuéra imbaretevéva aty, ikysepuku ha hiʼondakuéra reheve, oipyʼajopy hag̃ua opavave oñehaʼãvape oike hag̃ua henda moʼãhakuérape upe okẽ rupi; ha péicha oĩkuri hikuái ñembosakoʼípe oñemoʼã hag̃ua lamanita-kuéragui.

21 Ha ojehu umi lamanita-kuéra mburuvicha ogueraha ijehersitokuéra upe tenda okẽ renondépe, ha oñepyrũ oñorairõ hikuái nefita-kuéra ndive, oike hag̃ua henda moʼãhakuérape; ha katu péina ápe, ojerrechasa chupekuéra heta ára aja, upéicha rupi ojejuka hikuái tuicha jejukavaípe.

22 Koʼág̃a ohechávo hikuái ndaikatuiha ipuʼaka nefita-kuérare pe okẽ rupive, oñepyrũ ojoʼo hikuái itapiakuéra yvyguigua ojapo hag̃ua peteĩ tape ohasa hag̃ua ijehersitokuéra, oñorairõ hag̃ua hendivekuéra peteĩcha; ha katu péina ápe, koʼã mbaʼe ojaposévape oñehundi chupekuéra umi ita ha huʼykuéra ojapíva hikuái hesekuéra rupi; ha omyenyhẽrangue ijyvykuakuéra oitývo umi tápia yvyguigua, haʼekuéra omyenyhẽ heʼõnguekuéra ha hete jekutupyrévape.

23 Ha péicha nefita-kuéra ipuʼaka opa mbaʼépe ihayhuʼỹhakuérare; ha péicha lamanita-kuéra oñehaʼãkuri ohundi nefita-kuérape omanomba peve opa imburuvicha guasukuéra; heẽ, ha oĩvékuri mil-gui omanovaʼekue lamanita-kuéra apytépe; ha, ambue hendápe katu, nomanóikuri ni peteĩ ánga nefita-kuérava.

24 Oĩkuri cincuenta rupi ojekutuvaʼekue, oĩvaʼekue upe okẽme lamanita-kuéra huʼy jehupytýpe, ha katu omoʼã chupekuéra hetemoʼãhakuéra, ha ipytiʼamoʼãhakuéra, ha iñakãmoʼãhakuéra, upéicha rupi ojekutu chupekuéra hetymámente, heta oĩ oĩvaietereíva.

25 Ha ojehu, lamanita-kuéra ohechávo mayma huvicha guasukuéra ojejukahague oñani hikuái pe taveʼỹme. Ha ojehu ohojey hikuái Nefi retãme, omombeʼu hag̃ua irréi, Amalickíah-pe, nefitava, heñóigui chuguikuéra, tuicha iñehundikuéragui.

26 Ha ojehu haʼe ipochyetereíkuri itavayguakuéra ndive, ndohupytýigui hembipota nefita-kuéra ári; ha ndojopýiguikuri chupekuéra pe ñeñapytĩmby júgope.

27 Heẽ, haʼe oñekoʼõietereíkuri, ha omoñeʼẽngái Tupãme, ha avei Moroni-pe, oñeʼẽmeʼẽvo hoyʼutaha huguy; ha péva Moroni iñeʼẽrendu haguére Tupã rembiapoukapykuérare oñembosakoʼívo omoʼã hag̃ua itavayguakuérape.

28 Ha ojehu, ambue hendápe, Nefi tavayguakuéra omeʼẽkuri aguyje Ñandejára Itupãme, ipuʼaka ijojaʼỹva rehe omosãso hag̃ua chupekuéra ihayhuʼỹhakuéra pógui.

29 Ha péicha opákuri pe désimo novéno ary huekuéra ñeisãmbyhy Nefi tavayguakuéra ári.

30 Heẽ, oĩkuri pyʼaguapy meme ijapytepekuéra, ha tuichaiterei akãrapuʼã pe tupaópe pe ñangareko ha jesareko omeʼẽva rupi hikuái Tupã ñeʼẽ rehe, ojeʼéva chupekuéra Helamán, ha Shiblón, Coriantón, ha Ammón ha ijoykeʼykuéra rupi, heẽ, ha opavave umi oñeordenavaʼekue pe Tupã órden marangatu rupive, oñemongaraívo arrepentimientorã, ha oñemondóvo omboʼe hag̃ua tavayguakuéra apytépe.