1 Koʼág̃a Korihor omano rire, Alma oikuaávo zoramita-kuéra ombyaiha hína Ñandejára rape, ha Zoram, haʼéva huvichakuéra, oguerahaha hína tavayguakuéra korasõ oñesũ hag̃ua taʼanga oñeʼẽʼỹva renondépe, ikorasõ oñepyrũjey ojejopy pe tavayguakuéra rembiapovaíre.

2 Ojopýgui Alma-pe oikuaávo tembiapovai oĩva itavayguakuéra apytépe; upévare ikorasõ ojejopyeterei zoramita-kuéra ojei haguére nefita-kuéragui.

3 Koʼág̃a zoramita-kuéra oñembyaty peteĩ tetãme ohenóiva hikuái Antiónum, opytáva Zarahemla retã kuarahyresẽ gotyo, oĩva pe yguasu rembeʼy ypýpe, Jersón retã sur gotyo, omohembeʼýva avei pe taveʼỹ oĩva súrpe, henyhẽva lamanita-kuéragui.

4 Koʼág̃a nefita-kuéra okyhyjeterei zoramita-kuéra oñemongetáramo g̃uarã lamanita-kuéra ndive, ha tahaʼe upéva tuicha ñehundirã nefita-kuérape g̃uarã.

5 Ha koʼág̃a, pe ñeʼẽ jehekomboʼe oguereko haguére tuicha puʼaka ogueraha hag̃ua tavayguakuérape ojapo hag̃ua pe ijojáva—heẽ, oikeve kysepukúgui iñapytuʼũnguérape, térã oimeraẽ mbaʼe ojehuvaʼekue chupekuéragui—upévare Alma ohechaporã omoĩ hikuái pyʼaraʼãme pe Tupã ñeʼẽ puʼaka.

6 Upévare ojagarra Ammón, ha Aarón, ha Omner-pe; ha oheja Himni-pe Zarahemla-pegua tupaópe; ha katu ogueraha hendive umi mbohapy, ha avei Amulek ha Zeezrom-pe, oĩva Melek-pe; ha ogueraha avei mokõi itaʼýra.

7 Koʼág̃a ndoguerahái hendive itaʼýra ypykuépe, hérava Helamán; ha katu umi ogueraháva hendive rerakuéra haʼe Shiblón ha Coriantón; ha koʼãva haʼe umi ohovaʼekue hendive zoramita-kuéra apytépe réra, omboʼe hag̃ua chupekuéra pe ñeʼẽ.

8 Koʼág̃a zoramita-kuéra haʼe ojeivaʼekue nefita-kuéragui; upévare oñemboʼevaʼekue chupekuéra Tupã ñeʼẽ.

9 Ha katu hoʼavaʼekue hikuái tuicha jejavýpe, noñehaʼãigui hikuái iñeʼẽrendu Tupã rembiapoukapykuérare, ni hembipotakuérare, Moisés léipe heʼiháicha.

10 Ni ndojapói hikuái tupaopegua ojapóva, ojesarekóvo ñemboʼe ha jerurépe Tupãme opa ára, ani hag̃ua oike hikuái pyʼaraʼãme.

11 Heẽ, ipahaitépe, ombyai hikuái Ñandejára rape heta mbaʼépe; upévare, ko mbaʼére, Alma ha ijoykeʼykuéra oho upe tetãme omboʼe hag̃ua chupekuéra pe ñeʼẽ.

12 Koʼág̃a, og̃uahẽvo hikuái upe tetãme, péina ápe, iñemondyirã ojuhu umi zoramita-kuéra omopuʼãhague sinagogakuéra, ha oñembyatyha hikuái peteĩ ára jave, ohenóiva hikuái Ñandejára ára; ha otupaitũ hikuái Alma ha ijoykeʼykuéra ndohechái haguéicha arakaʼeve;

13 Omopuʼãgui hikuái isinagóga mbytépe, peteĩ tenda akãgui ijyvatevéva; ha pe ijyvatevehápe ija peteĩ tekovénte.

14 Upévare, opavave otupaitũséva ohovaʼerã ha oñemboʼy upe tenda yvatépe, ha ohupi ipo yvága gotyo, ha ojerureʼasy sapukáipe heʼívo:

15 Marangatu, Tupã Marangatu; roguerovia nde haʼeha Tupã, ha roguerovia nemarangatuha, ha nde haʼehague peteĩ espíritu, ha haʼeha peteĩ espíritu, ha haʼetaha peteĩ espíritu tapiaite.

16 Tupã marangatu, ore roguerovia nde oreipeʼahague ore joykeʼykuéra apytégui; ha ndorogueroviái ore joykeʼykuéra jepokuaa, oñembohasavaʼekue chupekuéra ituvakuéra imitãreko rupi; ha katu roguerovia oreiporavohague haʼe hag̃ua nde raʼykuéra marangatu; ha avei reikuaauka oréve ndaiporimoʼãiha Cristo.

17 Ha katu nde peteĩnte kuehe, koʼág̃a, ha tapiaite; ha oreiporavo rojesalva hag̃ua, ha katu opa umi ojeréva ore rehe ojeiporavo oñemombo hag̃ua ne ñekoʼõi rupi añaretãme; ha kóva ko marangatu rehe, O Tupã, romeʼẽ ndéve aguyje; ha avei romeʼẽ ndéve aguyje oreiporavo haguére, ani hag̃ua rojegueraha umi ore joykeʼykuéra jepokuaa vyroreíre, omoĩva chupekuéra peteĩ Cristo jegueroviápe, ogueraháva ikorasõkuéra mombyry ndehegui, ore Tupã.

18 Ha romeʼẽ jey ndéve aguyje, O Tupã, ore haʼégui peteĩ tavayguakuéra ojeiporavopyréva ha imarangatúva. Amén.

19 Ha ojehu Alma ha ijoykeʼykuéra ha itaʼyrakuéra ohendu rire koʼã ñemboʼe, tuichaiterei oñemondýi.

20 Péina ápe, opavave kuimbaʼe ohógui ha omeʼẽ kóva ko ñemboʼe.

21 Koʼág̃a ombohéra hikuái pe tenda Rameumptom, oñehesaʼỹijóramo, heʼiséva, tenda marangatu.

22 Koʼág̃a, kóva ko tenda guive omeʼẽ, opavave kuimbaʼe, peteĩchagua ñemboʼe Tupãme, omeʼẽvo aguyje Tupãme oiporavo haguére chupekuéra, ha ndoguerahái haguére chupekuéra ijoykeʼykuéra jepokuaa rapykuéri, ha ikorasõkuéra noñeñapytĩrigui oguerovia hag̃ua mbaʼe oútava, ndoikuaáivagui hikuái mbaʼeve.

23 Koʼág̃a, opa tavayguakuéra omeʼẽ rire aguyje péicha, ohojey hikuái hógape, oñeʼẽveʼỹre Itupãre oñembyaty jey peve upe tenda marangatúpe, omeʼẽ hag̃ua hikuái aguyje ojepokuaaháicha.

24 Koʼág̃a Alma ohechávo kóva ojejopy ikorasõ; ohechágui haʼeha hikuái peteĩ tavayguakuéra hekoñaña ha hembiapovaíva; heẽ, ohecha ikorasõkuéra oĩha óro, ha pláta, ha opáichagua mbaʼe hechapyrãvape.

25 Heẽ, ha ohechágui avei ikorasõkuéra opuʼãha tuicha ñembotuicha reheve, ijorgúllo rupi.

26 Ha haʼe omopuʼã iñeʼẽ yvágape, ha ojerureʼasy, heʼívo: O, arakaʼe peve piko, O Ñandejára, ehejáta ne rembiguaikuéra oikove koʼápe hoʼópe, ohecha hag̃ua tuichaite tembiapoñaña yvypóra raʼykuéra apytépe?

27 Péina ápe, O Tupã, ojerureʼasy hikuái ndéve, ha ikorasõkuéra katu henyhẽ orgúllogui. Péina ápe, O Tupã, nerenói hikuái ijuru rupi, oñembotuichávo, jepe oñembovu hikuái, umi yvorapegua mbaʼerei reheve.

28 Péina ápe, O che Tupã, ijao hepykuéra, ha ikuãirũ, ha ijyvajeguaka, ha imbaʼejeguaka oroguigua, ha opa imbaʼe hepykuéra oñembojeguakaha reheve; ha péina ápe, ikorasõkuéra oĩ koʼã mbaʼépe, ha jepeve ojerureʼasy ndéve hikuái ha heʼi—Romeʼẽ ndéve aguyje, O Tupã, haʼégui ore ndéve g̃uarã peteĩ tavayguakuéra jeiporavopyre, ha umi ambuéva katu oñehundíta.

29 Heẽ, ha heʼi hikuái nde reikuaaukahague chupekuéra ndaiporimoʼãiha Cristo.

30 O Tupã Ñandejára, arakaʼe peve piko rehejáta oĩ peichagua tekoñaña ha tekojojaʼỹ ko tavayguakuéra apytépe? O Ñandejára, emeʼẽ chéve mbarete, agueropuʼaka hag̃ua che kangykue. Chekangýgui, ha kóʼãichagua tekoñaña ko tavayguakuéra apytépe ombohasaʼasy che ánga.

31 O Ñandejára, che korasõ ojejopyeterei; emoangapyhýna che ánga Cristo-pe. O Ñandejára, emeʼẽna chéve taguereko mbarete, ahasa hag̃ua ñehaʼarõkuaápe koʼã jehasaʼasy oútava che ári, ko tavayguakuéra rembiapovai rupi.

32 O Ñandejára, emoangapyhýna che ánga, ha emeʼẽ chéve poʼa, ha avei umi chendive ombaʼapóvape—heẽ, Ammón, ha Aarón, ha Omner, ha avei Amulek ha Zeezrom, ha avei mokõi che raʼy—heẽ, jepe emoangapyhýna opa koʼãvape, O Ñandejára. Heẽ, emoangapyhýna hiʼangakuéra Cristo-pe.

33 Emeʼẽna chupekuéra taʼimbarete hikuái, ogueropuʼaka hag̃ua ijehasaʼasy oútava hiʼarikuéra ko tavayguakuéra rembiapovai rupi.

34 O Ñandejára, emeʼẽ oréve toroguereko poʼa roguerujeývo chupekuéra ndéve, Cristo-pe.

35 Péina ápe, O Ñandejára, hiʼangakuéra iporãiterei, ha heta haʼekuéra haʼe ore joykeʼykuéra; upévare, emeʼẽ oréve, O Ñandejára, puʼaka ha arandu roguerujey hag̃ua ndéve koʼã, ore joykeʼykuérape.

36 Koʼág̃a ojehu Alma heʼi rire koʼã ñeʼẽ, omoĩ ipo opa umi hendive oĩva ári. Ha péina ápe, omoĩvo ipo hiʼarikuéra, henyhẽ hikuái Espíritu Santo-gui.

37 Ha upéva rire ojei hikuái ojuehegui, ojepyʼamongetaʼỹre hembiʼurãkuérare, ni pe hoyʼútavare, ni pe omondétavare.

38 Ha Ñandejára omeʼẽ chupekuéra ani hag̃ua ohasa ñembyahýi, ni yʼuhéi; heẽ, ha omeʼẽ avei chupekuéra mbarete, ani hag̃ua ohasa mbaʼevéichagua jehasaʼasy noñemboguéiva Cristo vyʼápe. Koʼág̃a péva oikókuri Alma oñemboʼe haguéicha; ha kóva oñemboʼe haguére jeroviápe.