1 Péina ápe che joykeʼykuéra ahayhuetéva, ahechávo ojehejaha chéve aju penerendápe, añehaʼãta upévare añeʼẽ peẽme che ñeʼẽme, heẽ, che juru rupi, kóva haʼégui peteĩha ára añeʼẽha peẽme che juru ñeʼẽme, añembotýgui pe huekuéra apykápe, aguerekóvo heta mbaʼe ajapovaʼerã ha ndaikatúikuri aju penerendápe.

2 Ha jepe koʼág̃a ndaikatumoʼãikuri aju, noñemeʼẽi rire ambuépe huekuéra apyka, orreina hag̃ua cherendaguépe. Ha Ñandejára tuicha poriahuvereko reheve oheja aju penerendápe.

3 Ha péina ápe, che aju aguerekóvo tuicha ñehaʼarõ ha ajuhuse peñearrepentihague Tupã renondépe, ha pejerureʼasy memehague igrásiare, ha pojuhuse peimeha kulpaʼỹre henondépe, ha pojuhuse napeimeiha ñeimevaiete oĩ haguéicha ñande joykeʼykuéra oĩva Zarahemla-pe.

4 Ha katu tojehovasa Tupã réra, haʼe oikuaaukágui chéve, heẽ, omeʼẽvaʼekue chéve vyʼa tuichaiterei aikuaávo oĩ jeyha hikuái hekojoja rapépe.

5 Ha che ajerovia, pe Tupã Espíritu oĩva chepype rupi, aguerekotaha avei vyʼa pende rehe; upevére ndaipotái che vyʼa pende rehe ou hetaite jehasaʼasy ha vyʼaʼỹ añanduvaʼekue joykeʼykuéra Zarahemla-pegua rehe, ha péina ápe, che vyʼa hesekuéra ou ahasa rire heta jehasaʼasy ha vyʼaʼỹ.

6 Ha katu péina ápe, che ajerovia peẽ napeimeiha peteĩ tuicha jegueroviaʼỹme oĩhaguéicha pende joykeʼykuéra; che ajerovia napeñembotuichaiha pene korasõ orgúllope; heẽ, ajerovia napemoĩrihague pene korasõ pirapirekuéra ha mbaʼerei yvorapegua rehe; heẽ, ajerovia napetupaitũiha taʼangakuérape, ha katu petupaitũha pe Tupã añetegua ha oikovévape, ha pehaʼarõ kyreʼỹ pene angaipa jora, peteĩ jerovia opaveʼỹva reheve, outaha.

7 Ha katu péina ápe, che haʼe peẽme oĩ heta mbaʼe ouvaʼerã; ha péina ápe, oĩ peteĩ mbaʼe tuichavéva opaitévagui—ha péina ápe, namombyrýi ára pe Rredentor oikovéta ha outaha itavayguakuéra apytépe.

8 Péina ápe, ndaʼéi outaha ñande apytépe oikove aja hete omanótavape; ha péina ápe, pe Espíritu ndeʼírigui chéve peichataha. Koʼág̃a kóva ko mbaʼégui ndaikuaái; ha katu kóva aikuaa; Tupã Ñandejára oguerekoha puʼaka ojapo hag̃ua opa mbaʼe haʼéva umi ñeʼẽ haʼe heʼiháicha.

9 Ha péina ápe, pe Espíritu heʼíkuri chéve kóva, heʼívo: Esapukái ko tavayguakuérape, erévo—Peñearrepentíke, ha pembosakoʼi Ñandejára rape, ha peguata hapekuérare, ikareʼỹva; péina ápe, yvága rréino hiʼag̃uímagui, ha Tupã Raʼy ou yvy ape ári.

10 Ha péina ápe, haʼe heñóita María-gui, Jerusalén-pe, haʼéva ñande rukuéra retã, haʼévo haʼe peteĩ vírgen, peteĩ mbaʼyru iporãitereíva ha ojeiporavopyréva, oñemoʼãtava ha hyeguasúta pe Espíritu Santo puʼaka rupive, ha imembýta peteĩ mitãkuimbaʼe, heẽ, jepe Tupã Raʼy.

11 Ha haʼe osẽta, ohasávo mbaʼeʼasy ha jeikoʼasy ha jeipyʼaraʼã opaichaguáva; ha kóva oñekumpli hag̃ua pe ñeʼẽ heʼíva ojagarrataha hiʼári itavayguakuéra mbaʼeʼasy ha imbaʼasykuéra.

12 Ha haʼe ojagarráta hiʼári ñemano, ojora hag̃ua umi ñemano jokuaha ojopýva itavayguakuérape; ha haʼe ojagarráta hiʼári imbaʼasykuéra, ipyʼa henyhẽ hag̃ua poriahuverekógui, pe tete rupive, oikuaa hag̃ua pe tete rupive mbaʼéichapa oipytyvõvaʼerã itavayguakuérape, mbaʼasy oguerekoháicha hikuái.

13 Koʼág̃a pe Espíritu oikuaa opa mbaʼe; upevére Tupã Raʼy ohasaʼasy tete rupive ojagarra hag̃ua hiʼári itavayguakuéra angaipa, oipeʼa hag̃ua chupekuéra hembiapovaikuéragui pe iñemosãso puʼaka rupive; ha koʼág̃a péina ápe, kóva haʼe pe testimónio oĩva che pype.

14 Koʼág̃a che haʼe peẽme peñearrepentivaʼerãha ha penereñoijey; pe Espíritu heʼígui napenereñoijeýramo ndaikatumoʼãiha pehupyty yvága rréino. Upévare peju ha peñemongarai arrepentimientorã, peñemopotĩ hag̃ua pene angaipágui, peguereko hag̃ua jerovia pe Tupã Cordero rehe, oipeʼáva yvóra angaipakuéra, ipuʼakapáva oporosalva hag̃ua ha oporomopotĩ hag̃ua opa jojaʼỹgui.

15 Heẽ, che haʼe peẽme peju ha ani pekyhyje, ha peheja opa angaipa, ndahasyietéva pendeahoʼi hag̃ua, pendejokuáva ñehundi peve; heẽ, peju ha pesẽ ha pehechauka pene Tupãme peimeporãha peñearrepenti hag̃ua pene angaipakuéragui ha pejapo hag̃ua hendive peteĩ konvénio peneñeʼẽrendutaha hembiapoukapykuérare, ha pe testifika chupe ko árape, pehóvo y ñemongaraípe.

16 Ha umi ojapóva kóva, ha iñeʼẽrendúva Tupã rembiapoukapykuérare upe guive tenonde peve, péva imanduʼáta haʼeha chupe, heẽ, imanduʼáta haʼehague chupe, haʼe ohupytytaha tekove opaveʼỹva, pe Espíritu Santo testimónio heʼiháicha, otestifikáva chepype.

17 Ha koʼág̃a che joykeʼykuéra ahayhuetéva, peguerovia piko koʼã mbaʼe? Péina ápe che haʼe peẽme, heẽ, che aikuaa pegueroviaha koʼã mbaʼe, ha che aikuaa peẽ pegueroviaha koʼãva pe Espíritu oĩva chepype ohechauka haguére chéve. Ha koʼág̃a pende jerovia tuicha haguére koʼãvare, heẽ, umi mbaʼe añeʼẽ haguére, tuichaiterei avyʼa.

18 Ha haʼe haguéicha peẽme iñepyrũmby guive, aipotaitereihague napeiméi ñeimevaietépe pende joykeʼykuéraicha, ha ajuhu oikohague umi che aipotáva.

19 Che añandúgui peimeha tekojoja rapére; añandu peimeha pe tape oporogueraháva Tupã rréinope; heẽ, añandu pembojojaha hína hapekuéra.

20 Che añandu ojeikuaaukaha peẽme, iñeʼẽ testimónio rupive, haʼe ndaikatuiha oguata tape karẽre; ni ndojeréi pe heʼivaʼekuégui; ni nomohaʼangái oñemovãtaha akatúagui asúpe, térã pe oĩporãvagui oĩvaívape; upévare hape haʼe peteĩ jere opaveʼỹva.

21 Ha haʼe ndoikói témplo kyʼápe; ni ndaikatúi mbaʼekyʼakuéra térã mbaʼevéichagua mbaʼe ipotĩʼỹva oñemoinge Tupã rréinope; upévare haʼe peẽme outaha ára, heẽ, ha haʼéta ára pahápe, pe ikyʼáva opytáta imbaʼekyʼápe.

22 Ha koʼág̃a che joykeʼykuéra ahayhuetéva, haʼékuri peẽme koʼã mbaʼe pomombáy hag̃ua pene rembiaporãme Tupã ndive g̃uarã, peguata hag̃ua henondépe kulpaʼỹre, peguata hag̃ua Tupã marangatu órdenpe, peñemog̃uahẽhague rupi.

23 Ha koʼág̃a che aipota peñemomirĩ, ha peneñeʼẽrendu, ha penemarangatu; ndahasýivo pejehekomboʼe hag̃ua; penerenyhẽvo ñehaʼarõkuaa ha pyʼaporãgui; peneakãguapývo opa mbaʼépe; pejesarekóvo peneñeʼẽrendu hag̃ua Tupã rembiapoukapykuérare opa ára; pejerurévo opa mbaʼe peikotevẽvare, espíritu ha yvyʼári reheguávape; pemeʼẽvo aguyje tapiaite Tupãme opa mbaʼe oñemeʼẽvare peẽme.

24 Ha pehecha tapeguereko hag̃ua jerovia, ñehaʼarõ, ha karida, ha upéicha tapiaite penerenyhẽta tembiapo porãgui.

25 Ha Ñandejára tapenderovasa, ha peñongatu potĩ pende aokuéra, pejegueraha hag̃ua ipahápe peguapy hag̃ua yvága rréinope, Abraham, Isaac, ha Jacob ndive, ha umi proféta marangatu oĩvaʼekue yvóra ñepyrũmby guive ndive, peguereko potĩvo pende aokuéra napesẽvéima hag̃ua, jepe ijaokuéra ipotĩháicha.

26 Ha koʼág̃a che joykeʼykuéra ahayhuetéva, añeʼẽkuri peẽme koʼã mbaʼe pe Espíritu otestifikáva chepype rupi; ha che ánga ovyʼaiterei, pe tuicha jesareko ha ñangareko pemeʼẽvaʼekue rupi che ñeʼẽ rehe.

27 Ha koʼág̃a Tupã pyʼaguapy topytuʼu pende ári, ha pende rogakuéra ha pende yvykuéra ári, ha pende vaka ha ovechaʼatykuéra ári, ha opa mbaʼe peguerekóva ári, pene rembireko ha pene mitãnguéra, pende jerovia ha tembiapo porãháicha, koʼág̃a guive tenondépe ha tapiaite peve. Ha upéicha añeʼẽkuri. Amén.