1 Ha koʼág̃a, che raʼy, aguereko peteĩ mbaʼe haʼe hag̃ua ndéve pe ñemoĩjey oñeñeʼẽvaʼekue rehe; péina ápe, oĩ tekove omokarẽva umi escritura, ha oñemovã mombyry koʼã mbaʼe rupi. Ha che ahecha ne apytuʼũ ojepyʼapyhague avei ko mbaʼe rehe. Ha katu péina ápe, amyesakãta ndéve upéva.

2 Che haʼe ndéve, che raʼy, pe plan ñemoĩjey rehegua oñeikotevẽha Tupã hustísiape; tekotevẽgui opa mbaʼe oñemoĩjey hendaitépe. Péina ápe, tekotevẽ ha ijoja, Cristo puʼaka ha jeikovejeypeguáicha, pe yvypóra ánga toñemoĩjey hetépe, ha hetépe toñemoĩjey ipehẽnguekuéra.

3 Ha tekotevẽ Tupã hustísiape yvyporakuéra ojehusga hembiapokuére; ha hembiapokue iporãramo ko tekovépe, ha iporãramo ikorasõ oipotáva, toñemoĩjey avei chupekuéra pe iporãvape ára pahápe.

4 Ha hembiapokuéra ivaíramo oñemoĩjeýta chupekuéra mbaʼevairã. Upévare, opa mbaʼe oñemoĩjeýta hendaitépe, opa mbaʼe oĩvaʼerãháicha—pe ñemanokuaa opuʼãta ñemanoʼỹme, ñembyai ñembyaiʼỹme—oñemopuʼã peteĩ vyʼa opaveʼỹvape ohupyty hag̃ua Tupã rréino, térã peteĩ tekoʼasy opaveʼỹvape ohupyty hag̃ua aña rréino, peteĩva peteĩ hendápe, ha ambuéva ambue hendápe—

5 Peteĩme oñemopuʼã vyʼápe oipota haguéicha vyʼa, térã pe iporãvape oipota haguéicha iporãva; ha ambuévape mbaʼevaípe oipota haguéicha ivaíva; ha ojapose haguéicha ivaíva opa ára péicha ohupytýta avei hepymeʼẽ ivaívagui og̃uahẽ vove pyhare.

6 Ha péicha oiko ambue hendápe. Oñearrepentíramo iñangaipágui, ha oipotáramo hekojojáva hiʼára paha peve, upéicha avei ojehepymeʼẽta chupe tekojojápe.

7 Koʼãva haʼe Ñandejára orredimíva; heẽ, koʼãva haʼe umi ojejoráva, umi oñemosãsóva pe pyhare ypytũ opaveʼỹvagui; ha péicha ojejoko térã hoʼa hikuái; ha katu péina ápe, haʼe hikuái hue ijupekuéra g̃uarã, tahaʼe ojapo hag̃ua iporãva térã ivaíva.

8 Koʼág̃a, Tupã rembipota ndaikatúi oñemovã; upévare, oñembosakoʼivaʼekue upe tape opavave oipotáva oiko hag̃ua ipype ha ojesalva hag̃ua.

9 Ha koʼág̃a péina ápe, che raʼy, anive reñehaʼã reñemoĩ Tupãre umíva umi doctrina-pe, koʼág̃a peve reñehaʼã haguéicha rejapóvo angaipa.

10 Ani reimoʼã, oñeñeʼẽ haguére pe ñemoĩjey rehe, reñemoĩjeytaha angaipágui vyʼápe. Péina ápe, che haʼe ndéve, pe tekoñaña ndahaʼeivaʼekue arakaʼeve vyʼapavẽ.

11 Ha koʼág̃a, che raʼy, opa yvypóra oĩva peteĩ ñeime natural-pe, térã haʼese, peteĩ toʼo ñeimépe, oĩ hikuái vyʼaʼỹ pahápe ha tembiapovai sãme; oĩ hikuái Tupãʼỹre yvórape, ha ojapo hikuái ndahaʼéiva Tupã reko; upévare, oĩ hikuái peteĩ ñeime oñemoĩvape upe vyʼa reko rehe.

12 Ha koʼág̃a péina ápe, heʼise piko pe ñemoĩjey, jajagarra peteĩ mbaʼe iñeime natural-gui ha ñamoĩ peteĩ ñeime ndahaʼéiva natural-pe, térã ñamoĩ peteĩ ñeime oñemoĩvape heko natural-re?

13 O, che raʼy, ndahaʼéi upéicha; ha katu pe ñeʼẽ ñemoĩjey heʼise oñemeʼẽjey ivaíva ivaíva rehe, térã hoʼóva toʼópe, térã aña reheguáva añáme; iporãva iporãvape, hekojojáva hekojojáva rehe, ijojáva ijojáva rehe, iporiahuverekóva iporiahuverekóva rehe.

14 Upévare, che raʼy, eñehaʼã ndeporiahuvereko nde joykeʼykuéra ndive; ejapo hustísia, ehusga hustísia reheve, ha ehusga tekojojápe, ha ejapo pe iporãva opa ára; ha rejapóramo opa koʼã mbaʼe, upéicharamo rehupytýta nde repymeʼẽ; heẽ, pe poriahuvereko oñemoĩjeýta ndéve g̃uarã; pe hustísia oñemoĩjeýta ndéve g̃uarã; oñemoĩjeýta ndéve peteĩ huísio ijojáva; ha ojehepymeʼẽjeýta ndéve iporãvape.

15 Ha ndehegui osẽva niko ou jeýta ndéve, ha oñemeʼẽ jeýta ndéve; upévare pe ñeʼẽ ñemoĩjey okondenave iñangaipávape, ha mbaʼevépe ndohustifikái chupe.