1 Péina ápe, koʼág̃a Nefi tavayguakuéra ovyʼaiterei, Ñandejára omosãso jey haguére chupekuéra ihayhuʼỹhakuéra pógui; upévare omeʼẽ hikuái aguyje Ñandejára Itupãme; heẽ, ha oajuna ha oñemboʼe heta hikuái, ha otupaitũ hikuái Tupãme peteĩ vyʼa tuichaitereíva reheve.

2 Ha ojehu pe désimo novéno ary huekuéra ñeisambyhýpe Nefi tavayguakuéra ári, Alma ou itaʼýra Helamán rendápe ha heʼi chupe: Regueroviápa umi ñeʼẽ haʼevaʼekue ndéve koʼã kuatiajehaipyre ojehaivaʼekuére?

3 Ha Helamán heʼi chupe: Heẽ, che aguerovia.

4 Ha Alma heʼi jey chupe: Regueroviápa Jesucristo, pe ouvaʼerãme?

5 Ha haʼe heʼi: Heẽ, che aguerovia opa ñeʼẽ nde erevaʼekue.

6 Ha Alma heʼi jey chupe: Neñeʼẽrendútapa che rembiapoukapykuérare?

7 Ha haʼe heʼi: Heẽ, cheñeʼẽrendúta ne rembiapoukapykuérare opa che korasõ reheve.

8 Ha upémarõ heʼi chupe Alma: Ejehovasapyréva nde; ha Ñandejára nemoakãrapuʼãta ko tetãme.

9 Ha katu péina ápe, che aguereko peteĩ mbaʼe aprofetisa hag̃ua ndéve; ha katu che aprofetisátava ndéve neremombeʼumoʼãi; heẽ, pe che aprofetisátava ndéve ndojeikuaaukamoʼãi, jepe oñekumpli peve upe profesía; upévare ehai umi ñeʼẽ haʼétava.

10 Ha koʼãva haʼe umi ñeʼẽ: Péina ápe, che ahecha kóva ko tavayguakuéra, nefita-kuéra, pe espíritu rrevelasiõ rehegua oĩva chepype rupi, cuatrocientos arýpe ára Jesucristo ojehechauka rire chupekuéra, hoʼáta jeroviaʼỹme.

11 Heẽ, ha upéramo ohecháta hikuái ñorairõguasu ha mbaʼasyvai, heẽ, ñembyahýi ha tuguy ñeñohẽ, jepe Nefi tavayguakuéra ojejukapa peve—

12 Heẽ, ha kóva hoʼátagui hikuái jegueroviaʼỹme ha hoʼáta hikuái tembiapo ypytũme, ha tekotieʼỹ, ha opáichagua tembiapovaípe; heẽ, che haʼe ndéve, iñangaipátagui hikuái tuichaite tesape ha jeikuaa rehe, heẽ, che haʼe ndéve, upe ára guive, nomanombajepemoʼãi pe irundy ñemoñare ou mboyve ko tuichaite tembiapovai.

13 Ha og̃uahẽ vove upe ára guasu, péina ápe, pyaʼe og̃uahẽ ára umi koʼág̃a haʼéva, térã, umi koʼág̃a ojeipapáva Nefi tavayguakuéra apytépe ñemoñare, ndojeipapamoʼãveimaha Nefi tavayguakuéra apytépe.

14 Ha katu umi opytáva, ha noñehundíriva upe ára tuicha ha oporomondyietévape, ojeipapáta lamanita-kuéra apytépe, ha haʼéta haʼekuéraicha, maymáva, ndahaʼéiramo mbovymi oñehenóitava Ñandejára remimboʼe; ha koʼãvape lamanita-kuéra omuñáta jepe ojejukapa peve. Ha koʼág̃a, pe tembiapovai rupi, kóva ko profesía oñekumplíta.

15 Ha Koʼág̃a, ojehu Alma heʼi rire koʼã mbaʼe Helamán-pe, haʼe ohovasa chupe, ha avei ambue itaʼyrakuérape; ha haʼe avei ohovasa pe yvy hekojojavakuéra ñeimeporãrã.

16 Ha haʼe heʼi: Péicha heʼi Tupã Ñandejára—Oñemoñeʼẽngáita pe yvy, heẽ, kóva ko yvy, oñehundi hag̃ua opa tetã, avaretã, ñeʼẽ, ha tavaygua, hembiapo ñañáva, hiʼajupa vove hikuái; ha che haʼe haguéicha ojehúta; kóva haʼégui Tupã ñeʼẽngái ha jehovasa upe tetã ári, Ñandejára ndaikatúigui ohechaporã ni michĩmi pe angaipa.

17 Ha koʼág̃a, Alma heʼipávo koʼã ñeʼẽ ohovasa tupaópe, heẽ, opa opytávape jerovia ñemovãʼỹme upe ára guive tenondeve peve.

18 Ha Alma ojapo rire upéva osẽ Zarahemla retãgui, ohoramoguáicha Melek retãme. Ha ojehu ndojeikuaavéiva mbaʼeve chugui arakaʼeve; ha iñemano térã iñeñotỹgui mbaʼeve ndoroikuaái.

19 Péina ápe, kóva katu roikuaa, haʼékuri peteĩ yvypóra hekojojáva; ha ojeʼe pe tupaópe haʼe ojeguerahahague pe Espíriture, térã oñeñotỹhague Ñandejára póre, jepe Moiséicha. Ha katu péina ápe, umi escritura heʼi Ñandejára ojagarrahague Moisés-pe imbaʼerã; ha roʼe avei ore oiménehague omog̃uahẽ Alma-pe avei pe espíritu-pe, imbaʼerã; upévare, upe mbaʼére mbaʼeve ndoroikuaái iñemano ha iñeñotỹgui.

20 Ha koʼág̃a ojehu oñepyrũvo désimo novéno ary huekuéra ñeisãmbyhy Nefi tavayguakuéra ári, Helamán osẽkuri tavayguakuéra apytépe omboʼe hag̃ua chupekuéra upe ñeʼẽ.

21 Ha katu péina ápe, iñorairõkuéra rupi lamanita-kuéra ndive ha umi heta osẽvaʼekue ha pe joavy oĩvaʼekue tavayguakuéra apytépe rupive, oñeikotevẽkuri oñemboʼe ijapytepekuéra pe Tupã ñeʼẽ, heẽ, ha oñemoĩ peteĩ mbaʼe ojejapovaʼerã opa upe tupaópe.

22 Upévare, Helamán ha ijoykeʼykuéra osẽ omopuʼã jey hag̃ua pe tupao opa upe tetãme, heẽ, ha opa tavaguasu oĩva opavave tetã haʼévape Nefi tavayguakuéra mbaʼe. Ha ojehu ohenói hikuái sacerdote ha mboʼeharakuéra opavave tetã javeve, opa tupao ári.

23 Ha koʼág̃a ojehu Helamán ha ijoykeʼykuéra ohenói rire sacerdote ha mboʼeharakuéra umi tupao ári oñepyrũ peteĩ joavy ijapytepekuéra, ha nohenduséi hikuái Helamán ha ijoykeʼykuéra ñeʼẽ;

24 Ha katu ijorgullóso hikuái, oñembotuichávo ikorasõme, imbaʼerepy heta haguére hikuái; upévare oñembopirapire heta hikuái hesa renondépe, ha nohenduséi umi ñeʼẽ, oguata kareʼỹ hag̃ua hikuái Tupã renondépe.