1 Ha ojehu nefita-kuéra nomanoivaʼekue árma ñorairõguasugua rupi, oñotỹ rire umi omanovaʼekue—koʼág̃a umi omanovaʼekue ndojeipapái, hetaitereígui hikuái—ha oñotỹmba rire hikuái heʼõnguekuéra, opavave ohojey hetãme, ha hógape, ha hembireko, ha itaʼyrakuérape.

2 Koʼág̃a heta kuña ha mitã omanókuri kysepukúpe, ha avei heta ivaka ha ijovechaʼatykuéra; ha avei heta hiʼyva raʼỹikuéra ñu oñehundi, opyrũgui hesekuéra kuimbaʼe atykuéra.

3 Ha koʼág̃a opa lamanita ha amlicita-kuéra omanovaʼekue ysyry Sidón rembeʼýpe oñemombo Sidón ykuérape; ha péina ápe ikanguekuéra oĩ pe yguasu ruguápe, ha hetaiterei hikuái.

4 Ha amlicita-kuéra ojoavy nefita-kuéragui ombopara pytãgui hikuái isyvakuéra, lamanita-kuéraicha; upevére nomoperõi hikuái iñakã lamanita-kuéraicha.

5 Koʼág̃a lamanita-kuéra oñemoakãperõ; ha oiko hikuái opívo, ndahaʼéiramo peteĩ ao mymba pirégui ojejapóva omoĩva hikuái ilómore, ha avei iñarmadúra, omoĩva hikuái ijerére, ha iguyrapã, ha ihuʼykuéra, ha ijita, ha hiʼónda, ha opa mbaʼe.

6 Ha lamanita-kuéra ipire hũ, pe para oñemoĩvaʼekue ituvakuéra áricha, haʼevaʼekue peteĩ ñeʼẽngái hiʼarikuéra hembiapovaikuérare ha opuʼã haguére ijoykeʼykuérare, haʼéva Nefi, Jacob, José, ha Sam, haʼevaʼekue yvypóra hekojoja ha imarangatúva.

7 Ha ijoykeʼykuéra ohundise chupekuéra, upévare haʼekuéra oñemoñeʼẽngái; ha Tupã Ñandejára omoĩ peteĩ para hiʼarikuéra, heẽ, Lamán ha Lemuel ári, ha avei Ismael raʼykuéra, ha kuña ismaelita-kuéra ári.

8 Ha ojejapo kóva iñemoñare oñembojoavy hag̃ua ijoykeʼykuéra ñemoñarégui, péicha Tupã Ñandejára oñongatu hag̃ua itavayguakuérape, ani hag̃ua ojeheʼa ni oguerovia jepokuaa añeteguaʼỹva oguerútava iñehundikuéra.

9 Ha ojehu ombojeheʼáva iñemoñare lamanita-kuéra ñemoñare ndive ogueru avei upe ñeʼẽngái iñemoñare ári.

10 Upévare, opavave ojehejáva oñemovã lamanita-kuérare oñehenói upéva upe térã rupi, ha oñemoĩ hiʼári peteĩ para.

11 Ha ojehu umi ndogueroviáiva lamanita-kuéra jepokuaa, ha katu oguerovia umi kuatiajehaipyrekuéra ojegueruvaʼekue Jerusalén retãgui, ha avei ituvakuéra jepokuaa rehe, ha umíva ijoja, ogueroviáva Tupã rembiapoukapykuéra ha iñeʼẽrendu hese, oñehenói nefita-kuéra, térã Nefi tavayguakuéra, upe guive tenonde peve—

12 Ha haʼekuéra haʼe umi oguerahavaʼekue kuatiajehaipyre añeteguáva itavayguakuéra rehegua, ha avei lamanita-kuéra tavayguakuéra rehegua.

13 Koʼág̃a jahajeýta amlicita-kuérape, hiʼarikuéra oñemoĩgui avei peteĩ para; heẽ, haʼekueraite oñemoĩ ijehe pe para, heẽ, jepe peteĩ para pytãva isyvakuéra rehe.

14 Kóicha oñekumpli Tupã ñeʼẽ, koʼãva haʼégui ñeʼẽ haʼe heʼivaʼekue Nefi-pe: Péina ápe, che amoñeʼẽngái lamanita-kuérape, ha amoĩta hiʼarikuéra peteĩ para haʼekuéra ha iñemoñarekuéra ojeipeʼa hag̃ua ndehegui ha ne ñemoñarégui, koʼág̃a guive tenondeve ha tapiaite peve, noñearrepentíriramo hikuái hembiapoñañakuéragui ha oujey chéve che aiporiahuvereko hag̃ua chupekuéra.

15 Ha avei: Che amoĩta peteĩ para pe ombojeheʼáva iñemoñare nde joykeʼykuéra ñemoñare ndive, oñemoñeʼẽngái hag̃ua avei hikuái.

16 Ha avei: Che amoĩta peteĩ para umi oñorairõva nendive ha ne ñemoñare ndive ári.

17 Ha avei, che haʼe umi ndehegui ojeíva noñehenoimoʼãveimaha ne ñemoñare; ha che rohovasáta, ha umi oñehenóivape ne ñemoñare, koʼág̃a guive tenondeve ha tapiaite peve; ha kóva haʼékuri Ñandejára ñeʼẽmeʼẽ Nefi ha iñemoñarépe.

18 Koʼág̃a amlicita-kuéra ndoikuaái okumpliha hína Tupã ñeʼẽ oñepyrũramoguare ombopara hikuái isyva; upevére opuʼã hikuái añetehápe Tupãre; upévare tekotevẽ hoʼa hiʼarikuéra upe ñeʼẽngái.

19 Koʼág̃a che aipota peẽ pehecha haʼekuéra ogueruhague hiʼarikuéra pe ñeʼẽngái; ha upeichaite avei mayma yvypóra oñemoñeʼẽngáiva ogueru hiʼári ikondenasiõ.

20 Koʼág̃a ojehu ndahetái ára oñorairõ rire lamanita ha amlicita-kuéra Zarahemla retãme, ou ambue lamanita-kuéra ehérsito Nefi tavayguakuéra ári, upe tenda oñorairõ haguépe amlicita-kuéra ndive pe ehérsito peteĩha.

21 Ha ojehu oñemondo peteĩ ehérsito omosẽ hag̃ua chupekuéra hetãgui.

22 Ha Alma voi, ohasaʼasýgui peteĩ jeikutukuére, ndohói upe jave oñorairõ lamanita-kuéra ndive.

23 Ha katu omondo peteĩ ehérsito tuichaitereíva hesekuéra, ha haʼekuéra ojupi ha ojuka heta lamanita-kuérape, ha ombojevy hembyrekuéra upe tetã rembeʼýgui okápe.

24 Ha upéicha ou jey hikuái ha oñepyrũ omoĩjey pyʼaguapy upe tetãme, oñemyangekoiʼỹre hikuái ihayhuʼỹhakuérare sapyʼami.

25 Koʼág̃a opa koʼã mbaʼe ojejapo, heẽ, opa koʼã ñorairõguasu ha joavykuéra oñepyrũ ha opa kínto ary huekuéra orreina aja.

26 Ha peteĩ arýpe milláres ha decenas de milláres angakuéra oñemondo pe yvóra opaveʼỹvape, omonoʼõ hag̃ua hepymeʼẽ tembiapo ojapo haguéicha, tahaʼe iporã, térã ivaíva, omonoʼõ hag̃ua vyʼa opaveʼỹva, térã tekoʼasy opaveʼỹva, pe espíritu haʼekuéra iñeʼẽrendu haguéicha, tahaʼe peteĩ espíritu imarangatúva térã iñañáva.

27 Opavave yvypóra ohupytýgui hepymeʼẽ pe iñeʼẽrendu haguégui, ha kóva pe espíritu de profesía ñeʼẽme heʼiháicha; upévare tojejapo pe añeteguápe oĩháicha. Ha péicha opa pe kínto ary huekuéra rreinádo.