1 Ha koʼág̃a oñemog̃uahẽvo Moroni-pe ko kuatiañeʼẽ ikorasõ ojagarra pyʼaguasu, ha henyhẽ tuichaiterei vyʼapavẽgui Pahorán hekojoja haguére, haʼe ndahaʼéi haguére avei peteĩ oñemoĩva ñemosãso ni hetãre.

2 Ha katu ojepyʼapyeterei avei umi omosẽvaʼekue Pahorán-pe huekuéra apykágui rembiapovaíre, heẽ, peteĩ ñeʼẽme umi opuʼãvaʼekuére oñemoĩ hag̃ua hetã ha avei Itupã rehe.

3 Ha ojehu Moroni ogueraha hendive kuimbaʼe atyʼimi, Pahorán oipota haguéicha, ha omeʼẽ Lehi ha Teáncum-pe ijehérsito rembyre ñeisãmbyhy, ha oguata Gedeón retã gotyo.

4 Ha omboveve upe sãso poyvi opa tenda oikehápe, ha ombyaty opa soldádo ikatúva, oguata aja Gedeón retã gotyo.

5 Ha ojehu miles oñembyaty ipoyvi rehe, ha ojagarra ikysepuku omoʼã hag̃ua isãso, ani hag̃ua hoʼa ñeñapytĩmbýpe.

6 Ha péicha, Moroni ombyaty rire kuimbaʼe ikatúva opa iguata pukukue aja, haʼe ou Gedeón retãme; ha ombojoajúvo isoldadokuéra Pahorán mbaʼéva ndive imbareteterei hikuái, jepe imbareteve hikuái Pacus kuimbaʼekuéragui, haʼéva umi osẽvaʼekue rréi, umi omosẽvaʼekue yvyporakuéra isãsosévape Zarahemla retãgui ha ojagarravaʼekue upe tetã.

7 Ha ojehu Moroni ha Pahorán oguejy ijehérsito reheve Zarahemla retã meve, ha oho hikuái pe tavaguasu rehe, ha oñorairõ hikuái Pacus kuimbaʼekuéra ndive, upéicha osẽ hikuái ñorairõme.

8 Ha péina ápe, Pacus ojejuka ha ikuimbaʼekuéra ojejagarra prisionéroramo, ha Pahorán oñemoĩjey huekuéra apykápe.

9 Ha Pacus kuimbaʼekuérape ojejapo huísio, léipe heʼiháicha, ha avei umi rreipotahápe ojejagarravaʼekue ha oñemoĩ kaʼirãime; ha ojejuka chupekuéra léipe heʼiháicha; heẽ, opavave umi Pacus kuimbaʼe ha umi rreipotaha, opavavépe umi ojagarrarangue hiʼárma omoʼã hag̃ua hetãme, oñemoĩsevaʼekue hese, ojejukákuri.

10 Ha péicha oñeikotevẽkuri oñembojesarekoporã ko léi rehe oñeñangareko hag̃ua upe tetãre; heẽ, ha oimeraẽva ojejuhúva onegaha hína isãso pyaʼe ojejuka upe léipe heʼiháicha.

11 Ha péicha opákuri ary treinta huekuéra ñeisãmbyhy Nefi tavayguakuéra ári; Moroni ha Pahorán omoĩjeýkuri pyʼaguapy Zarahemla retãme, itavayguakuéra apytépe, ojukávo opa ndaijeroviarekóiva ñemosãsorãre.

12 Ha ojehu oñepyrũvo ary treinta y uno huekuéra ñeisãmbyhy Nefi tavayguakuéra ári, Moroni pyaʼe oguerahauka Helamán-pe hiʼupykuéra, ha avei peteĩ ehérsito oĩháme seis mil kuimbaʼe, oipytyvõ hag̃ua chupe omoʼã hag̃ua upe tetã renda.

13 Ha omondouka avei peteĩ ehérsito oguerekóva seis mil kuimbaʼe, tembiʼu oñeikotevẽva reheve, Lehi ha Teáncum ehérsitope. Ha ojehu ojejapo upéva oñemombarete hag̃ua lamanita-kuéragui upe tetã.

14 Ha ojehu Moroni ha Pahorán, ohejávo tuicha kuimbaʼe aty Zarahemla retãme, ojagarra iguata heta kuimbaʼe reheve Nefíah retã gotyo, heʼímavo hikuái ipuʼakataha lamanita-kuérare upe tavaguasúpe.

15 Ha ojehu oguata aja hikuái upe tetã gotyo, ojagarra hikuái peteĩ lamanita-kuéra atyetápe, ha heta ojuka hikuái chupekuéra, ha ojagarra hikuái hiʼupykuéra ha hiʼarmakuéra ñorairõguasurã.

16 Ha ojehu ojagarra rire chupekuéra, ojapouka hikuái chupekuéra peteĩ konvénio ndojagarramoʼãveimaha hikuái hiʼárma ñorairõguasurã nefita-kuéra rehe.

17 Ha ojapo rire hikuái upéva upe konvénio omondo chupekuéra oiko hag̃ua hikuái Ammón tavayguakuéra ndive, ha haʼékuri cuatro mil rupi umi nomanoivaʼekue.

18 Ha ojehu omondo rire chupekuéra oguatajey hikuái Nefíah retã gotyo. Ha ojehu og̃uahẽvo hikuái Nefíah tavaguasúpe, omoĩ hogaaokuéra Nefíah ñúme, oĩva Nefíah tavaguasu ypýpe.

19 Koʼág̃a, Moroni oipotákuri lamanita-kuéra osẽ ñorairõme hesekuéra, pe ñu ári; ha katu lamanita-kuéra, oikuaávo ipyʼaguasuetereiha hikuái, ha ohechávo ijaty guasu, upévare noñanimái hikuái osẽvo hesekuéra; upévare nosẽi hikuái ñorairõme upe árape.

20 Ha og̃uahẽvo pyhare, Moroni osẽ upe pyhare pytũ, ha ojupi pe tápia ijyvateveha ári omaʼẽñemi hag̃ua moõpa oñemoĩ lamanita-kuéra ijehérsito ndive upe tavaguasúpe.

21 Ha ojehu oĩ hikuái pe kuarahyresẽ gotyo, pe okẽme; ha okejoa hína hikuái. Ha koʼág̃a Moroni ohojey ijehérsito rendápe, ha ojapouka ñembosakoʼi pyaʼe ñemosã atã ha ñemosã ojejupi hag̃ua reheve, oguejy hag̃ua hikuái pe tápia ijyvatevehárupi pe hyepýpe.

22 Ha ojehu Moroni ojapouka ikuimbaʼekuéra oguata ha ojupi pe tápia ijyvatevehápe, ha oguejy hikuái upéva upe tavaguasu pehẽnguépe, heẽ, jepe pe kuarahyreike gotyo, lamanita-kuéra noĩriháme ijehersitokuéra ndive.

23 Ha ojehu opavave haʼekuéra oguejy upe tavaguasu ryepýpe pyharekue, isã atãnguéra ha isã ñemosãingo rupi oguejy hag̃ua; upéicha koʼẽ rire opavave oĩma pe tavaguasu tápia ryepýpe.

24 Ha koʼág̃a, lamanita-kuéra opáyvo ha ohecha Moroni ehersitokuéra oĩmaha pe tápia ryepy gotyo, okyhyjeterei hikuái, jepe okañy meve hikuái pe tape paʼũ rupi.

25 Ha Moroni ohechávo oñaniha hikuái henonderã, haʼe ojapouka ikuimbaʼekuéra toho hesekuéra, ha hetápe ojuka, ha heta ambuépe omongora hikuái, ha ojagarra chupekuéra prisionéroramo; ha hembyrekuéra okañy Moroni retãme, opytáva pe yguasu rembeʼy ypýpe.

26 Ha upéicha Moroni ha Pahorán ohupytyvaʼekue Nefíah tavaguasu oñehundiʼỹre ni peteĩ ánga; ha oĩkuri heta lamanita-kuéra omanovaʼekue.

27 Koʼág̃a ojehu heta lamanita-kuéra prisionérova ojoajuse Ammón tavayguakuéra ndive oiko hag̃ua chuguikuéra tavayguakuéra isãsóva.

28 Ha ojehu opavave oipotávape, oñemeʼẽ oipotaháicha.

29 Upévare, opa prisionéro lamanítava ojoaju Ammón tavayguakuéra ndive, ha oñepyrũ ombaʼapoiterei hikuái, oñemitỹvo, oñotỹvo opaichagua yva raʼỹi, ha opaichagua mymbaʼaty; ha péicha nefita-kuéra opytuʼuve peteĩ mbaʼe pohýigui; heẽ, upéicha opytuʼu hikuái opa prisionéro lamanítavagui.

30 Koʼág̃a ojehu Moroni, ohupyty rire Nefíah tavaguasu, ojagarra rire heta prisionéro, omopokãitereíva lamanita-kuéra ehérsito, ha omosãso rire hikuái heta nefita ojejagarravaʼekue prisionéroramo, mbaʼe omombaretetereíva Moroni ehersitokuéra; upévare Moroni oho Nefíah retãgui Lehi retã gotyo.

31 Ha ojehu ohechávo lamanita-kuéra Moroni ouha hesekuéra, okyhyjetereijey hikuái, ha oñani Moroni ehérsito renonderã.

32 Ha ojehu Moroni ha ijehérsito oho hapykuerikuéra tavaguasúgui tavaguasúpe, ojojuhu peve hikuái Lehi ha Teáncum ndive; ha lamanita-kuéra oñani Moroni ha Teáncum-gui, jepe oguejy peve hikuái yguasu rembeʼy ypýpe, og̃uahẽ meve Moroni retãme.

33 Ha lamanita-kuéra ehérsito oñembyatypa, upéicha oĩ hikuái peteĩ atýpente Moroni retãme. Koʼág̃a Ammorón, lamanita-kuéra rréi, oĩ avei hendivekuéra.

34 Ha ojehu Moroni ha Lehi ha Teáncum omoĩ hendag̃uakuéra ijehérsito ndive Moroni retã rembeʼy jerére, upéicha lamanita-kuéra oñemongora upe hembeʼýpe taveʼỹ sur gotyo, ha pe hembeʼýpe taveʼỹre kuarahyresẽ gotyo.

35 Ha péicha omoĩ hikuái hendag̃ua pyharekue. Ha péina ápe, nefita-kuéra ha lamanita-kuéra avei ikaneʼõiterei oguata heta rupi; upévare nohaʼãi hikuái mbaʼeveichagua mbotavy pyharekue, ndahaʼéiramo Teáncum; ipochyetereígui Ammorón ndive, jepe haʼe oimoʼã Ammorón, ha ijoykeʼy Ammalickíah, haʼehague ogueruvaʼekue upe tuicha ha ipukúva ñorairõguasu ijapytepekuéra ha lamanita-kuéra apytépe, ogueruvaʼekue hetaite ñorairõ ha tuguy ñeñohẽ, heẽ, ha hetaite ñembyahýi.

36 Ha ojehu Teáncum ipochýpe oike lamanita-kuéra oĩháme, ha oguejy pe tavaguasu tápia rehe. Ha haʼe oho peteĩ sã reheve, peteĩ tendágui ambue tendápe ojuhu peve rréipe; ha ojapi chupe peteĩ havalínape, oikutúva chupe ikorasõme. Ha katu péina ápe, upe rréi omombáy iñangarekoharakuérape omano mboyve, upéicha omuña hikuái Teáncum-pe, ha ojuka chupe.

37 Koʼág̃a Moroni ha Lehi oikuaávo Teáncum omanohague ombyasyeterei hikuái; péina ápe, haʼéguikuri haʼe peteĩ kuimbaʼe oñorairõ mbaretéva hetãre, heẽ, peteĩ tekosãso angirũ añete; ha ohasákuri heta jeikoʼasy guasu. Ha katu péina ápe, haʼe omanókuri, ha oho opa yvy rapére.

38 Koʼág̃a ojehu koʼẽ rire Moroni oguata, ha hoʼa lamanita-kuéra ári, upéicha ojuka chupekuéra tuichaiterei jejuka reheve; ha omosẽ hikuái chupekuéra upe tetãgui; ha oñani hikuái, jepe ndouvéi peve hikuái nefita-kuéra rehe upe árape.

39 Ha péicha opákuri ary treinta y uno huekuéra ñeisãmbyhy Nefi tavayguakuéra ári; ha péicha oguerekókuri hikuái ñorairõguasu, ha tuguy ñeñohẽ, ha ñembyahýi, ha jeikoʼasy, heta ary aja.

40 Ha oĩkuri jejuka, ha ñorairõ, ha ñesẽ, ha opáichagua tembiapovai Nefi tavayguakuéra apytépe; upevére hekojojavakuéra ñeimeporãrã, heẽ, umi hekojojáva ñemboʼe rupi, oñeñongatu chupekuéra.

41 Ha katu péina ápe, ipukuetereígui ñorairõguasu nefita-kuéra ha lamanita-kuéra apytépe, oĩkuri heta oñembopyʼahatãva, ipukuetereímagui pe ñorairõguasu; ha oĩkuri heta omohuʼũva ikorasõ ijeikoʼasykuéra rupi, oñemomirĩ meve hikuái Tupã renondépe, jepe ñemomirĩ pypuku reheve.

42 Ha ojehu Moroni omombarete rire umi yvy renda hiʼag̃uivéva lamanita-kuéragui, oñemombarete porã meve, haʼe ohojey Zarahemla tavaguasúpe; ha avei Helamán ohojey ijyvy jehejapyrépe; ha oñemoĩjey pyʼaguapy Nefi tavayguakuéra apytépe.

43 Ha Moroni omeʼẽ ijehérsito ñeisãmbyhy itaʼýrape, hérava Moroníah; ha oho hógape ohasa hag̃ua pyʼaguapýpe ára hembýva chupe.

44 Ha Pahorán ohojey huekuéra apykápe; ha Helamán oñepyrũ jey omboʼe Tupã ñeʼẽ tavayguakuérape; hetaite ñorairõguasu ha joavy rupi tekotevẽ oñemoĩjey tupaópe mbaʼe pyahu ojejapovaʼerã.

45 Upévare, Helamán ha ijoykeʼykuéra osẽ, ha omboʼe Tupã ñeʼẽ tuicha puʼakápe okonvensévo heta tavayguakuérape hekoñañágui, omoarrepentíva chupekuéra iñangaipakuéragui ha oñemongarai hikuái Ñandejára Itupãme g̃uarã.

46 Ha ojehu omoĩjey hikuái Tupã tupao, opa upe tetã rupi.

47 Heẽ, ha oñemoĩkuri apopyrã léi rehegua. Ha oñehenói ihuekuéra, ha ihue guasukuéra.

48 Ha Nefi tavayguakuéra oñakãrapuʼã jey upe tetãme, ha oñepyrũ jey oñemoña ha oñemombareteterei upe tetãme. Ha oñepyrũ ipirapire hetaiterei hikuái.

49 Ha ipirapire hetáramo jepe hikuái, térã imbarete, ha oñakãrapuʼã, nopuʼãi hikuái hesa orgúllope; ni naimbeguéi hikuái imanduʼa hag̃ua Ñandejára Itupãre; ha katu tuicha oñemomirĩ hikuái henondépe.

50 Heẽ, imanduʼa hikuái tuichaite mbaʼe Ñandejára ojapovaʼekuére hesekuéra, mbaʼéichapa omosãsovaʼekue chupekuéra ñemanógui, ha tekoapytĩgui, ha kaʼirãigui, ha opáichagua jeikoʼasýgui, ha oipeʼavaʼekue chupekuéra ihayhuʼỹhakuéra pógui.

51 Ha oñemboʼe meme hikuái Ñandejára Itupãme, jepe haʼe ohovasa peve chupekuéra, iñeʼẽme heʼiháicha, upéicha oñemombareteterei hikuái ha oñakãrapuʼã upe tetãme.

52 Ha ojehu ojejapopa koʼã mbaʼe. Ha omanókuri Helamán, ary treinta y cinco huekuéra ñeisãmbyhy jave Nefi tavayguakuéra ári.