1 Koʼág̃a Alma, ohechávo Amulek ñeʼẽ omokirirĩ Zeezrom-pe, haʼe ohechágui Amulek ojagarraha chupe ijapu ha iñeʼẽreípe ohundi hag̃ua chupe, ha ohechávo haʼe oñepyrũha oryrýi oikuaágui hembiapovaiha, Alma oipeʼa ijuru ha oñepyrũ oñeʼẽ chupe, ha heʼi oĩporãha Amulek ñeʼẽ, ha omyesakãve umi mbaʼe, térã ohesaʼỹijove umi escritura Amulek ojapo haguégui.

2 Koʼág̃a umi ñeʼẽ Alma heʼivaʼekue Zeezrom-pe ohendu tavayguakuéra oĩva upe jerére; tuichaitereígui pe atyguasu, ha péicha haʼe oñeʼẽ:

3 Koʼág̃a Zeezrom, rehecha rejejagarraha ne ñeʼẽrei ha nde japúpe, nandejapúigui yvyporakuérape añónte ha katu ndejapúgui Tupãme; ha péina ápe, haʼe oikuaa opa nde jepyʼamongeta, ha rehecháma umi nde jepyʼamongeta ojeikuaaukaha oréve Ijespíritu rupive;

4 Ha rehecha roikuaaha ne plan haʼehague peteĩ plan katupyry, pe aña katupyrýicha, pembotavy ha peñeʼẽrei hag̃ua ko tavayguakuérape ikatu hag̃ua pemopuʼã chupekuéra ore rehe, oñemoĩ hag̃ua orerehe ha oremosẽ hag̃ua okápe—

5 Koʼág̃a kóva haʼékuri peteĩ nderayhuʼỹha plan, ha haʼe omombaʼapo ipuʼaka nde rehe. Koʼág̃a aipota nemanduʼa upe ndéve haʼéva haʼeha opavavépe.

6 Ha péina ápe haʼe opavavépe kóva haʼehague peteĩ penderayhuʼỹva ñuhã, haʼe omoĩva omoñuhã hag̃ua ko tavayguakuérape, penemoĩ hag̃ua ipoguýpe, penemosã hag̃ua isãme, ikatu hag̃ua penemosã ñehundi opaveʼỹvape, iñeñapytĩmby puʼakaháicha.

7 Koʼág̃a Alma oñeʼẽmba rire koʼã ñeʼẽ, Zeezrom oñepyrũ tuichave oryrýi, oñekonvensevégui Tupã puʼakágui; ha haʼe oñekonvense avei Alma ha Amulek oikuaaha chugui, oñekonvenségui haʼekuéra oikuaaha ikorasõ oñandu ha oipotáva; oñemeʼẽ haguére chupekuéra puʼaka oikuaa hag̃ua koʼã mbaʼégui pe profesía espíritu rupive.

8 Ha Zeezrom oñepyrũ oporandu chupekuéra jesarekópe, haʼe oikuaave hag̃ua pe Tupã rréinogui. Ha haʼe heʼi Alma-pe: Mbaʼe piko heʼise koʼã mbaʼe heʼivaʼekue Amulek umi omanomavaʼekue jeikovejey rehe, opavave opuʼãtaha omanomavaʼekue apytégui, hekojoja ha hekojojaʼỹva, ha ojeguerahataha chupekuéra oñemboʼy hag̃ua Tupã renondépe ojehusga hag̃ua hembiapokuérare?

9 Ha koʼág̃a Alma oñepyrũ omyesakã chupe koʼã mbaʼe, heʼívo: Hetápe ojeikuaauka Tupã mbaʼeñemimbykuéra; upevére, oñemeʼẽ chupekuéra peteĩ tembiapoukapy mbarete ndoikuaaukaivaʼerãha hikuái umíva ndahaʼéiramo umi iñeʼẽ pehẽngue añónte haʼe omeʼẽva yvypóra raʼykuérape, pe ñangareko ha jesareko haʼekuéra omeʼẽháicha chupe.

10 Ha upévare, pe omohatãva ikorasõ, pévape oñemeʼẽʼive iñeʼẽ; ha pe nomohatãiva ikorasõ, pévape oñemeʼẽ hetave iñeʼẽgui, ojeheja peve chupe oikuaa Tupã mbaʼeñemimbykuéra oikuaapaite peve.

11 Ha umi omohatãva ikorasõ, umívape oñemeʼẽʼive iñeʼẽgui, ndoikuaái peve mbaʼevete imbaʼeñemimbykuéragui; ha upéramo aña ogueraha chupekuéra ñeñapytĩmbýpe, ha oisãmbyhy chupekuéra oipotaháicha ñehundípe. Koʼág̃a kóva haʼe upe heʼiséva umi añaretã sã.

12 Ha Amulek oñeʼẽ porã pe ñemano rehe, ha ñañemopuʼã kóva ko jeikove ñemanokuaágui peteĩ ñemanoveʼỹ ñeimépe, ha jajegueraha Tupã trivunal renondépe jajehusga hag̃ua ñane rembiapokuérare.

13 Upéicha ñane korasõ oñemohatãramo, heẽ, ñamohatãramo ñane korasõ pe ñeʼẽ rehe, ndaipóri peve ñande pype; upéicharamo ñaimevaietereíta, ñañekondenátagui.

14 Ñane ñeʼẽ ñanekondenátagui, heẽ, opa ñane rembiapokuéra ñanekondenáta; ndajajejuhumoʼãi kyʼaʼỹre; ha ñande jepyʼamongetakuéra ñanekondenáta avei; ha ko ñane ñeimevaietépe nañañanimamoʼãi ñamaña ñande Tupã rehe; ha katu javyʼáta ikatúramo jaʼe itakuéra yvytypeguápe toʼa ñande ári ñaneñomi hag̃ua henondégui.

15 Ha katu péva ndaikatumoʼãi; jahamantevaʼerã ha ñañemboʼy henondépe iverapýpe, ha ipuʼaka, ha imbarete, ha imbaʼeguasu, ha ipuʼakapápe, ha jahechakuaa ñane ñemotĩ opaveʼỹ g̃uarã opa ihuisiokuéra ijojaha; haʼe ijojaha opa hembiapópe, ha oiporiahuverekoha opa yvypóra raʼykuérape, ha oguerekoha opa puʼaka osalva hag̃ua mayma yvypóra ojeroviávape hérare ha omeʼẽva yva joja arrepentimientorã.

16 Ha koʼág̃a péina ápe, che haʼe peẽme upéramo ou peteĩ ñemano, jepe pe ñemano mokõiha, haʼéva peteĩ ñemano espíritu rehegua; upéramo haʼe peteĩ ára mayma omanóva iñangaipápe, pe yvyʼarigua ñemanóme, omanotaha avei pe ñemano espíritu reheguápe opa mbaʼe haʼéva tekojoja rehegua.

17 Upéramo ijehasaʼasykuéra haʼéta peteĩ lágo tata ha asufreguiguáicha, hata ojupíva tapiaite g̃uarã; ha upéramo haʼe ára oñemosãtaha chupekuéra peteĩ ñehundi opaveʼỹvape, pe Satana puʼaka ha ñeñapytĩmbýicha, ojopýtagui chupekuéra haʼe oipotaháicha.

18 Upéramo, che haʼe peẽme, oĩtaha hikuái ndojejapoiramoguáicha mbaʼevéichagua rredensiõ; ndaikatúigui oñerredimi chupekuéra Tupã hustísia rupive; ha ndaikatúi omano hikuái, ndaiporivéimagui ñembyai.

19 Koʼág̃a ojehu Alma oñeʼẽmba rire koʼã ñeʼẽ, tavayguakuéra oñepyrũ oñemondyive;

20 Ha katu oĩ peteĩ Antiona, haʼéva peteĩ sãmbyhyhára guasu ijapytepekuéra, osẽva ha heʼi chupe: Mbaʼe piko pe eréva, yvypóra oikovejeytaha umi omanomavaʼekue apytégui ha oñemoambuetaha ko ñeime ñemanokuaágui ñemanoveʼỹme, ha pe ánga ndaikatuiha omano arakaʼeve?

21 Mbaʼépa heʼise pe escritura heʼíva, Tupã omoĩhague keruvinkuéra ha peteĩ kysepuku hendýva pe jardín edén-pegua kuarahyresẽ gotyo, ani hag̃ua ñande rukuéra peteĩha oike ha hoʼu pe yvyramáta tekove rehegua yvágui, ha oikove tapiaite peve? Ha péicha jahecha ndaiporiha mbaʼéichapa ikatu oikove hikuái tapiaite.

22 Koʼág̃a heʼi chupe Alma: Péva haʼe amyesakãtavakuri. Koʼág̃a jahecha Adán hoʼahague hoʼu haguére pe yva jaʼuʼỹvaʼerãgui, Tupã ñeʼẽme heʼiháicha; ha upéicha jahecha, ijeʼa rupi, opa yvyporakuéragui oiko tavayguakuéra okañy ha hoʼáva.

23 Ha koʼág̃a péina ápe, che haʼe ndéve ikatúrire Adán hoʼu upéramo pe yva yvyramáta tekove reheguágui, ndaiporivaʼerãmoʼã ñemano, ha pe ñeʼẽ ndahaʼeivaʼerãmoʼã mbaʼeve, ha ombojapuvaʼeramoʼã Tupãme, haʼe heʼíguikuri: Reʼúramo, añetehápe remanóta.

24 Ha jahecha pe ñemano ouha yvyporakuéra ári, heẽ, pe ñemano oñeʼẽhague Amulek, haʼéva pe yvyʼarigua ñemano; upevére, oñemeʼẽ yvypórape peteĩ ára oñearrepenti hag̃ua; upévare ko tekovégui oiko peteĩ jeipyʼaraʼãme ñeime; peteĩ ára ñañembosakoʼi hag̃ua ñañemoĩ hag̃ua Tupã renondépe; peteĩ ára ñañembosakoʼi hag̃ua pe ñeime opaveʼỹvape g̃uarã roñeʼẽhaguére, oúva omanovaʼekue jeikovejey rire.

25 Koʼág̃a, ndahaʼéirire pe plan rredensiõ rehegua rupive, oñemoĩvaʼekue yvóra ñepyrũmby guive, ndaiporivaʼerãmoʼã ñemanógui jeikovejey; ha katu oñemoĩkuri peteĩ plan rredensiõ rehegua, ojapótava umi omanomavaʼekue jeikovejey, oñeñeʼẽma haguére.

26 Ha koʼág̃a péina ápe, ñande rukuéra peteĩha ikatúrire ohupyty ha hoʼu pe yvyramáta tekove reheguágui, hekoʼasyvaʼerãmoʼã tapiaite g̃uarã, ndoguerekóivo peteĩ ñembosakoʼípe ñeime; ha upéicha plan rredensiõ rehegua oñehundivaʼerãmoʼã, ha Tupã ñeʼẽ opytareivaʼerãmoʼã, mbaʼeverõguáicha.

27 Ha katu péina ápe, ndahaʼéi upéicha; ha katu ojeʼemavaʼekue yvyporakuérape omanovaʼerãha, ha pe ñemano rire, ouvaʼerã hikuái huísiope, jepe pe huísio roñeʼẽ haguégui, haʼéva pe ipaha.

28 Ha Tupã heʼi rire koʼã mbaʼe ouvaʼerãha yvyporakuérape, péina ápe, upéramo haʼe ohecha oñeikotevẽha koʼãva oikuaa umi mbaʼégui haʼe omoĩvaʼekue chupekuéra g̃uarã.

29 Upévare ombou angelkuéra oñeʼẽ hag̃ua hendivekuéra, ha umíva ohechauka yvyporakuérape iverapy.

30 Ha upe guive tenonde gotyo haʼekuéra oñepyrũ ohenói héra; upévare Tupã oñeʼẽ yvyporakuéra ndive, ha oikuaauka chupekuéra upe plan rredensiõ rehegua, oñembosakoʼivaʼekue yvóra ñepyrũmby guive; ha upéva oikuaauka chupekuéra ojerovia ha oñearrepenti ha hembiapo marangatuháicha hikuái.

31 Upévare, omeʼẽ tembiapoukapy yvyporakuérape, ojapyhara raẽvo hikuái umi tembiapoukapy peteĩha haʼéva yvyʼarigua rehegua, oikóvo chuguikuéra tupãicha, ohechakuaávo iporãva ivaívagui, oñemoĩvo ijupe peteĩ ñeime ombaʼapo hag̃uáme, térã oñemoĩvo chupe ojapo hag̃ua hembipota ha oipotaháicha, tahaʼe ojapo hag̃ua ivaíva térã iporãva.

32 Upévare Tupã omeʼẽ chupekuéra tembiapoukapy, oikuaauka rire chupekuéra pe plan rredensiõ rehegua, ani hag̃ua ojapo hikuái mbaʼevai, oguerútava pe ñemano mokõiha, haʼéva peteĩ ñemano opaveʼỹva umi mbaʼe haʼéva tekojoja reheguápe; koʼãvare pe plan rredensiõ rehegua ndoguerekomoʼãigui puʼaka, umi hustísia rembiapokuéra ndaikatúigui oñehundi, pe tuichaite Tupã pyʼaporã rupi.

33 Ha katu Tupã ohenoivaʼekue yvyporakuérape, Itaʼýra rérape, (kóva haʼégui pe plan rredensiõ rehegua oñemeʼẽvaʼekue) heʼívo: Peñearrepentíramo ha napemohatãiramo pene korasõ, upéicharõ poiporiahuverekóta, che Raʼy Unihénito rupive;

34 Upévare, opavave oñearrepentíva, ha nomohatãiva ikorasõ, ikatúta ojerure poriahuvereko che Raʼy Unihénito rupive, iñangaipa jorarã; ha haʼekuéra oikéta che pytuʼúpe.

35 Ha opavave omohatãva ikorasõ ha ojapóva tembiapovai, péina ápe, che añeʼẽmeʼẽ che ñekoʼõime péva ndoikemoʼãiha che pytuʼúpe.

36 Ha koʼág̃a, che joykeʼykuéra, péina ápe che haʼe peẽme, pemohatãramo pene korasõ ndapeikemoʼãi Ñandejára pytuʼúpe; upévare pene rembiapovaikuéra ombopochy chupe ombou hag̃ua iñekoʼõi pende ári peteĩha ñembopochypeguáicha, heẽ, iñeʼẽme heʼiháicha pe ñembopochy paha ha peteĩhámeicha, pene angakuéra ñehundi opaveʼỹva g̃uarã; upévare, iñeʼẽme heʼiháicha, ñemano pahápe g̃uarã, ñemano peteĩháme g̃uarãicha.

37 Ha koʼág̃a, che joykeʼykuéra, jaikuaámarõ koʼã mbaʼe, ha umíva haʼe añetegua, ñañearrepenti ha ani ñamohatã ñane korasõkuéra, ani hag̃ua ñambopochy Ñandejára ñane Tupãme omboguejy hag̃ua iñekoʼõi ñande ári koʼã hembiapoukapy mokõiha omeʼẽvaʼekuépe ñandéve; ha jaike pe Tupã pytuʼúpe, oñembosakoʼivaʼekue iñeʼẽme heʼiháicha.